Ke Talia Te Pulega A Ieova

“Me e tenei te uiga o te alofa ki te Atua: ko te fakalogo ki ana fakatonuga. Ka ko ana fakatonuga e se na ‵mafa foki mō tatou.”​​—1 IOANE 5:3.

1, 2. (a) Kaia e takalia‵lia ei a tino e tokouke i aso nei ke faka‵logo latou ki pulega? (e) E mata, e ‵tu tokotasi eiloa a tino kolā e fai mai me e se talia ne latou a pulega a nisi tino? Fakamatala mai.

KO SE fia‵fia nei a te tokoukega o tino ki te pati “pulega.” E takalia‵lia a tino e tokouke ki te manatu ke faka‵logo ki se isi tino. A te tugāpati, “E seai se tino e ‵tau o fakatonu ne ia au” e fakaasi mai ei te uiga o tino kolā e se talia ne latou a pulega a nisi tino. Kae e mata, e ‵tu tokotasi eiloa a tino konei? Ikai! A te tokoukega o tino konei e tau‵tali atu eiloa i faifaiga a nisi tino e tokouke kolā e “amio fakatasi . . . mo te lalolagi nei.” (Loma 12:2) I lō te ‵tu tokotasi i a latou eiloa, e ‵tusa mo pati a te apositolo Kelisiano ko Petelu, e fai latou e pelā me ne “pologa . . . a te amio fakamasei mea.” (2 Petelu 2:​19) E tau‵tali eiloa latou i “auala ma‵sei o te lalolagi; ne faka‵logo [latou] ki te pule o te ‵mana fakatiapolo i te lagi,” ko Satani te Tiapolo.​​—Efeso 2:2.

² Ne fai mai se tino tusitala mo te fakamatamata, penei: “E se talia ne au oku mātua, se faifeau, se takitaki lotu, se faifeau i te lotu Hindu io me ko te Tusi Tapu ke fai ne latou a fakaikuga mō au.” E tonu, e fakaaogā ‵se ne nisi tino olotou tulaga pule kae e se manakogina ke faka‵logo tatou ki a latou. Kae e mata, a te ‵teke katoatoa atu ki so se fakatakitakiga ko te tali ki ei? A te onoono atu fua ki ulutala i te nusipepa e tuku mai loa i ei se tali fakafanoanoa. Se mea fakapoi me i te taimi eiloa telā ko ma‵nako malosi ei a tino ki fakatakitakiga, e se fia talia ei ne te tokoukega o tino.

Te ‵Tou Kilokiloga ki Pulega

3. Ne fakaasi atu pefea ne Kelisiano i te senitenali muamua me ne seki sōna faka‵logo fua latou ki pulega a tino?

³ E pelā me ne Kelisiano, e ‵kese eiloa ‵tou tulaga mo tino o te lalolagi. E se fakauiga i ei me e fai fua ne tatou so se mea telā e fakatonu mai ke fai ne tatou. E ‵kese mai i ei, e se ‵tau o talia ne tatou i nisi taimi ke faka‵logo tatou ki pulega a nisi tino faitalia olotou tulaga pule. Tenā foki eiloa te mea ne fai ne Kelisiano i te senitenali muamua. E pelā mo te taimi ne fakatonu atu ei ki te kau apositolo ke taofi aka te lotou galuega talai, ne seki talia ne latou a fakatonuga a te faitaulaga sili mo nisi tino pule kolā ne fai pelā me ne vaega o te Sanetulini. Ne seki fakasēaogā ne latou olotou amioga ‵lei ko te mea ke tau‵tali atu fua i takitaki pule.​​—Faitau te Galuega 5:​27-​29.

4. Ne a fakaakoakoga mai te Tusi Tapu i te ‵gana Epelu e fakaasi mai i ei me e tokouke a tino o te Atua ne fai ne latou a faifaiga kolā e se fia‵fia ki ei a tino e tokouke?

⁴ Ne fai foki eiloa penā a nisi tavini a te Atua i taimi mai mua o Iesu. E pelā mo Mose, ne “ita manafai e taku a ia ko te tama a te tama fafine a Falao i te taimi ne matua ei a ia. E fiafia atu manafai e puapuagatia fakatasi a ia mo tino o te Atua,” faitalia me ne fai i ei ke ‘sauā a te tupu.’ (Epelu 11:​24, 25, 27) Ne ‵teke ne Iosefa a taumafaiga a te avaga a Potifala, telā ne maua ne ia te malosi ke taui kae ke fakamasei ne ia a Iosefa. (Kenese 39:​7-9) Ne fakaiku aka ne Tanielu “ke se kai a ia i meakai mo uaina o te palesi,” faitalia me ne faigata ke talia ne te sotia tausi o Papelonia tena tulaga e uiga ki te mea tenā. (Tanielu 1:​8-​14) E fakaasi mai i vaegā fakaakoakoga penā, me ne puke ‵mau eiloa a tino o te Atua ki te faiga o te mea tonu, faitalia a ikuga e maua mai i ei. Ne seki faka‵logo fua latou ko te mea ke fia‵fia mai a tino ki a latou, kae e se ‵tau foki o fai tatou penā.

5. E ‵kese pefea a ‵tou kilokiloga ki pulega mo te kilokiloga a tino o te lalolagi?

⁵ E se ‵tau o fakauiga i ei me i ‵tou tu ‵mautakitaki e fakaasi atu i ei i a tatou e fai‵tonu; io me fai tatou e pelā mo nisi tino ‵teke kolā e se ‵lago atu ki se manatu fakapolitiki. I lō te fai penā, e talia eiloa ne tatou te pulega a Ieova i lō so se pulega a tino. Kafai ko fe‵paki a tulafono a tāgata mo tulafono a te Atua, e faigofie eiloa a fakaikuga ka fai ne tatou e uiga ki ‵tou mea e ‵tau o fai. E pelā mo apositolo i te senitenali muamua, e faka‵logo eiloa tatou ki te Atua e pelā me ko ‵tou takitaki i lō tāgata.

6. Kaia e fai faeloa ei a te fakalogo ki fakatonuga a Ieova e pelā me ko te ‵toe mea ‵lei?

⁶ Se a te mea ne fesoasoani mai ke talia ne tatou te pulega a te Atua? E lotoma‵lie tatou ki te mea telā e fakaasi mai i te Faataoto 3:​5, 6: “Talitonu ki te Aliki mo tou loto kātoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.” E tali‵tonu tatou me i so se mea e manako te Atua ki ei mai i a tatou ka aogā eiloa mō tatou. (Faitau te Teutelonome 10:​12, 13.) E tonu, ne fai atu a Ieova ki te kau Isalaelu me i a ia ko te tino telā e “manako o akoako koutou ke ‵lei koutou kae fakatonutonu foki koutou i te auala e ‵tau o olo koutou i ei.” Kae ne toe fakaopoopo mai foki: “Moi ne faka‵logo mai eiloa koutou ki aku fakatonuga, e penei a fakamanuiaga mō koutou e ‵tafe eiloa pelā me se vaitafe telā e se mafai o masa pakupaku! E penei e maua ne koutou te manumalo pelā mo galu kolā e ‵fati ki luga i te tafatai.” (Isaia 48:​17, 18) E tali‵tonu eiloa tatou ki pati konā. E tali‵tonu tatou me i te fakalogo ki fakatonuga a te Atua ko te ‵toe mea ‵lei mō tatou.

7. Ne a ‵tou mea e ‵tau o fai māfai e se malamalama faka‵lei tatou i se fakatonuga telā e fakaasi mai i te Muna a te Atua?

⁷ E talia ne tatou te pulega a Ieova kae faka‵logo ki a ia faitalia me e se malamalama faka‵lei tatou i te pogai o nisi fakatonuga e fai mai i loto i tena Muna. A te mea tenei e se ko te sōna talitonu fua ki ei, kae ko te talitonu katoatoa ki ei. E fakaata mai i ei a te loto talitonu katoatoa me e iloa ne Ieova a mea e ‵lei ei tatou. A te ‵tou faka‵logo se fakaasiga foki tenā o ‵tou a‵lofa, me ne tusi mai te apositolo ko Ioane, penei: “Me e tenei te uiga o te alofa ki te Atua: ko te faka‵logo ki ana fakatonuga.” (1 Ioane 5:3) Kae e isi foki se isi pogai tāua o ‵tou faka‵logo telā e se ‵tau o manatu mā‵mā tatou ki ei.

Te Akoakoga o te Malosi o ‵Tou Mafaufau

8. E fetaui pefea a te ‘akoakoga’ o te malosi o ‵tou mafaufau mo te taliaga o te pulega a Ieova?

⁸ E fai mai te Tusi Tapu me e ‵tau o “akoako” ‵tou mafaufau ke “iloa ne [tatou] o tami ki te kese‵kesega o te ‵lei mo te masei.” (Epelu 5:14) Tela la, e se fakamoe‵moe eiloa tatou ke faka‵logo fua ki tulafono a te Atua e aunoa mo te mafaufau faka‵lei ki ei. I lō te fai penā, e ma‵nako tatou ke “iloa ne [tatou] o tami ki te kese‵kesega o te ‵lei mo te masei” e ‵tusa mo tulaga o Ieova. E ma‵nako tatou ke lavea atu a te poto o auala o Ieova, ko te mea ke mafai o fai atu ne tatou a pati a te faisalamo: “E tausi ne au au akoakoga i toku loto.”​​—Salamo 40:8.

9. E mafai pefea o fakafetaui aka ne tatou ‵tou loto lagona mo tulaga o Ieova, kae kaia e tāua ei ke fai ne tatou te mea tenā?

⁹ Ko te mea ke iloa ne tatou te tāua o tulafono a te Atua e pelā mo te faisalamo, e ‵tau o mafaufau ‵loto tatou ki ‵tou mea e faitau i te Tusi Tapu. E pelā mo te taimi e tauloto ei tatou e uiga ki se tulafono a Ieova, e mafai o fesili ifo tatou: ‘Kaia e ‵lei ei te tulafono io me ko te fakatakitakiga tenei? Kaia e aogā ei ke fakalogo au ki ei? Ne a ikuga sē ‵lei ne oko atu ki tino kolā ne seki faka‵logo ki fakatakitakiga a te Atua e uiga ki te tulafono tenei?’ Kafai e fetaui ‵lei ‵tou loto lagona mo auala o Ieova, ka fai foki eiloa ne tatou a fakaikuga kolā e fetaui ‵lei mo tena loto. Ko mafai ei o iloa ne tatou “me se a te mea e loto ki ei te Aliki” ko tau‵tali atu ei tatou i ei mo te faka‵logo. (Efeso 5:​17) E se faigofie faeloa a te mea tenei.

Auala o Satani ke Fakasēaogā te Pulega a te Atua

10. Se a te auala e tasi e salasala ne Satani ke fakasēaogā ei te pulega a te Atua?

¹⁰ Ko leva eiloa ne salasala a Satani ki auala ke fakasēaogā ei a te pulega a te Atua. E lavea atu ne tatou tena uiga fia tu tokotasi i auala e uke. Ke mafaufau ki te sē amanaia o tino ki te fakatokaga a te Atua e uiga ki te fakaipoipoga. E fia ‵nofo fakatasi a nisi tino e aunoa mo te fakaipoipo faka‵lei, kae e ‵sala atu a nisi tino ki auala ke ‵tala ei olotou fakaipoipoga. Kāti e lotoma‵lie eiloa a vaegā tino penā ki pati a se fafine lauiloa i tamunei, telā ne fai mai penei: “E se mafai o tokotasi te avaga a se tino.” Ne toe fai mai a ia: “E seki iloa eiloa ne au se tino telā ne fakamaoni io me manako ke fakamaoni ki tena avaga.” Mai te mafaufau ifo ki ana fakaipoipoga kolā ne seki iku manuia, ne fai mai se tagata lauiloa i tamunei, penei: “E se mautinoa i a au me e isi eiloa se manakoga i a tatou ke ‵nofo mo se tino e tokotasi i ‵tou olaga kātoa.” E ‵tau o fesili ifo tatou penei, ‘E mata, e talia ne au te pulega a Ieova e uiga ki te fakaipoipoga, io me ko pokotia toku mafaufau ona ko te kilokiloga a te lalolagi?’

11, 12. (a) Kaia e faigata ei ki talavou ke talia te pulega a Ieova? (e) Fakamatala mai se tala ke fakaasi mai ei te masei o te sē fakalogo ki tulafono mo fakatakitakiga a Ieova.

¹¹ E mata, a koe se talavou i loto i te fakapotopotoga a Ieova? Kafai e penā loa, kāti ka taumafai malosi eiloa Satani o fai ne ia koe ke manatu māmā ki te pulega a Ieova. E mafai ne “manakoga fakatamatane” fakatasi mo fakamalosiga mai taugasoa o fai ne ia koe ke mafaufau me e faigata ‵ki a tulafono a te Atua. (2 Timoteo 2:​22) Ke se talia eiloa ne koe ke tupu te mea tenā. Taumafai ke iloa ne koe te aogā o tulaga o te Atua. E pelā me se fakaakoakoga, e fai mai te Tusi Tapu ke “fakagata [io me ‵kalo keatea mai] te fina lalolagi.” (1 Kolinito 6:18) Nei la, ke toe ‵sili ifo ne koe a fesili konei: ‘Kaia e ‵lei ei te fakatonuga tenā? Ka aogā pefea ki a au toku fakalogo ki ei?’ Kāti e iloa ne koe a nisi tino kolā ne seki fia ‵saga atu ki fakatakitakiga a te Atua kae ko oti ne logo‵mae latou i ikuga o te mea ‵se tenā. E mata, ko fia‵fia nei eiloa latou? E mata, ko sili atu nei te ‵lei o te lotou olaga i lō te olaga ne maua muamua ne latou a koi ‵nofo ei i loto i te fakapotopotoga a Ieova? E mata, ko oti eiloa ne maua ne latou te fiafia tonu telā e se maua ne tavini katoa a te Atua?​​—Faitau te Isaia 65:14.

¹² Ke mafaufau ki pati ne fai mai ne se Kelisiano ko Sharon i se taimi tai mata leva: “Ona ko te sē fakalogo ki tulafono a Ieova, ko maua nei au ne te masaki fakamataku ko te SELAMETE. E mafaufau faeloa au ki tausaga e uke kolā ne fiafia ei au i taku taviniga ki a Ieova.” Ne iloa aka ne ia me se mea valea ke ‵teke atu ki tulafono a Ieova kae ne ‵tau o āva malosi a ia ki ei. A tulafono a Ieova e fai pelā me se puipuiga mō tatou eiloa. Ne mate a Sharon i te fitu vaiaso fua mai tua ifo o te tusiga ne ia o pati mai luga nei. E pelā mo te mea e fakaasi mai i te tulaga fakamataku ne oko tou fafine ki ei, e seai se mea ‵lei e mafai o tuku mai ne Satani ki tino kolā e ola i te olaga masei tenei. E pelā me ko te ‘tamana o te loi,’ e fai mai ne ia a tautoga e uke, kae e se tausi ki ei, e pelā eiloa mo tena mea ne fai ki a Eva. (Ioane 8:44) E tonu, a te taliaga o te pulega a Ieova ko te ‵toe mea ‵lei eiloa.

‵Teke Atu ki te Uiga Fia Tu Tokotasi

13. Se a te feitu e tasi e ‵tau ei o ‵teke atu tatou ki te uiga fia tu tokotasi?

¹³ I te taliaga o te pulega a Ieova, e ‵tau o ‵teke atu tatou ki te uiga fia tu tokotasi. A te uiga fakamatamata e mafai o fai ei tatou ke mafau‵fau me e se ‵tau o maua ne tatou te takitakiga a se tino. E pelā me se fakaakoakoga, e mafai o ‵teke atu tatou ki pati polopoloki mai tino kolā e fai ne latou te takitakiga o tino o te Atua. Ko oti ne fai ne te Atua se fakatokaga ke tuku mai ne te tavini fakamaoni kae poto a mea‵kai faka-te-agaga i te taimi tonu. (Mataio 24:​45-​47) E ‵tau o talia ne tatou mo te loto maulalo me tenei eiloa te auala e tausi ei ne Ieova ana tino i aso nei. Ke fakaakoako tatou ki apositolo fakamaoni. I te taimi ne fuli tua atu ei a nisi soko, ne fesili atu Iesu ki te kau apositolo: “Kae pefea koutou, e fia olo foki koutou keatea?” Ne tali atu a Petelu: “Te Aliki, ko oi te tino ka olo matou ki ei? A muna o te ola se gata mai, e nofo mo koe.”​​—Ioane 6:​66-​68.

14, 15. Kaia e ‵tau ei o faka‵logo tatou mo te loto maulalo ki fakatakitakiga mai te Tusi Tapu?

¹⁴ A te taliaga o te pulega a Ieova e aofia i ei te saga atu ki fakatakitakiga kolā e fakavae ki tena Muna. E pelā me se fakaakoakoga, ko oti ne fakamalosi mai te tavini fakamaoni kae poto ki a tatou ke “mataala kae toka.” (1 Tesalonia 5:6) E fetaui ‵lei eiloa a fakatakitakiga konā mo aso fakaoti konei, kolā e “ma‵natu fakapito, kaima‵nako” a tino e tokouke i ei. (2 Timoteo 3:​1, 2) E mata, e mafai o pokotia tatou i vaegā kilokiloga lauiloa penā? Ao. A te kausaki atu ki fakamoemoega faka-te-lalolagi e mafai o fai ei ke ‵to ‵tou moe i te feitu faka-te-agaga, io me maua ne tatou te uiga fia maumea. (Luka 12:​16-​21) Tela la, ko tafaga la te ‵poto o tatou ke talia a fakatakitakiga faka-te-Tusi Tapu kae ‵kalo keatea mai te olaga kaimanako telā ko lauiloa valevale i te lalolagi a Satani!​​—1 Ioane 2:​16.

¹⁵ A meakai faka-te-agaga mai te tavini fakamaoni kae poto e tufa ne toeaina filifilia ki fakapotopotoga takitasi. E fakamalosi mai te Tusi Tapu ki a tatou: “Faka‵logo ki otou takitaki kae sa‵sale foki i olotou fakatonuga. E se mapu eiloa latou i te tausiga o otou agaga, me ‵tau mo latou o avatu se tala a olotou galuega ki te Atua. Kafai e faka‵logo koutou ki ei, e fai olotou galuega mo te fia‵fia, kae masei te sē faka‵logo ki ei, ko fai ei olotou galuega mo te sē fia‵fia, ko māumāu ei olotou galuega mō koutou.” (Epelu 13:17) E mata, e fakauiga i ei me e se mafai o fai ne toeaina a mea ‵se? Ikai! E lavea faka‵lei ne te Atua olotou vāivāiga i lō so se isi tino aka. Kae e manako eiloa a ia ke faka‵logo tatou ki a latou. A te ga‵lue fakatasi mo toeaina, faitalia me e se ‵lei katoatoa latou, e fakamaoni mai ei me e talia ne tatou te pulega a Ieova.

Te Tāua o te Loto Maulalo

16. E mafai pefea o fakaasi atu ne tatou te amanaia ki a Iesu e pelā me ko te Ulu o te fakapotopotoga Kelisiano?

¹⁶ E ‵tau o masaua faeloa ne tatou i a Iesu ko te Ulu o te fakapotopotoga. (Kolose 1:​18) A te mea tenā se pogai e tasi e ‵tau ei o faka‵logo tatou mo te loto maulalo ki fakatonuga a toeaina filifilia, kae tuku atu ki a latou te “āva lasi.” (1 Tesalonia 5:​12, 13) E tonu, e mafai o fakaasi atu ne toeaina i te fakapotopotoga me e faka‵logo latou mai te fakaoko atu mo te fakaeteete ki te fakapotopotoga a te fekau a te Atua, kae e se ko olotou manatu totino. E se “sili atu [olotou] manatu i mea ne tusi ki lalo” ko te mea ke fakamalosi aka ei olotou manatu totino.​​—1 Kolinito 4:​6, Tusi Paia, Samoa.

17. Kaia e fakamataku i ei te uiga fia takutakua?

¹⁷ E ‵tau o matapula‵pula a tino katoa i te fakapotopotoga ke mo a ma ‵sala atu ki olotou tavaega eiloa. (Faataoto 25:27) E mautinoa eiloa me ne fai te mea tenā e pelā me se malei ki se soko e tokotasi telā ne fetaui mo Ioane. Ne tusi mai a ia: “Ka ko Siofilisi, telā e manako ke fai mo olotou takitaki, e se fia fakalogo eiloa ki aku muna konei e fai atu. Tela la, kafai e oko atu au, e fakamasaua katoa ne au ana mea ne fai: ko mea ma‵sei katoa kolā ne faipati ne ia e uiga mō matou, e pelā foki mo ana tala ‵loi ne fai!” (3 Ioane 9, 10) E isi eiloa se akoakoga i te tala tenā mō tatou i aso nei. E isi eiloa ne pogai ‵lei ke fakasēaogā so se mafaufauga sē ‵lei i a tatou. E fai mai te Tusi Tapu: “A te fakamatamata e iku ki te malaia, a te fiasili e iku ki te sē aogā.” A tino kolā e talia ne latou te pulega a te Atua e ‵tau o ‵teke atu ki te malei ko te fakamatamata, me kafai e se fai penā ka iku atu fua i ei ki te masiasi.​​—Faataoto 11:2; 16:18.

18. Se a te mea ka fesoasoani mai ke talia ne tatou te pulega a Ieova?

¹⁸ E tonu, ke taumafai malosi o ‵teke atu te uiga fia tu tokotasi kae ke talia te pulega a Ieova. Ke mafaufau ‵loto mo te loto fakafetai i nisi taimi ki te tauliaga sili ke tavini atu koe ki a Ieova. A te aofia o koe i tino o te Atua se fakamaoniga me ko talia ne ia koe ke fakapilipili atu ki a ia e auala i tena agaga tapu. (Ioane 6:​44) Ke se manatu māmā eiloa koe ki tou fesokotakiga mo te Atua. Taumafai malosi o fakaasi atu i tulaga katoa o te olaga me e ‵teke ne koe te uiga fia tu tokotasi kae e talia ne koe te pulega a Ieova.

E Mata, e Masaua ne Koe?

• Ne a mea e aofia i te taliaga o te pulega a Ieova?

• E fetaui pefea a te akoakoga o ‵tou mafaufau mo te taliaga o te pulega a Ieova?

• I auala fea e taumafai ei Satani ke fakasēaogā ne ia te pulega a te Atua?

• Kaia e tāua ei te loto maulalo i te taliaga o te pulega a Ieova?

[Fakamatalaga o te Ata i te itulau e 20]

“E ‵tau mo matou o faka‵logo ki te Atua i lō te faka‵logo ki tino”

[Fakamatalaga o te Ata i te itulau e 22]

Se mea poto eiloa ke tau‵tali tatou i tulaga o te Atua