E Mata, E Fai Ne Koe Te Takitakiga I Te Āva Ki Ou Taina Tali‵tonu?

“Ke fakatau a‵lofa koutou i te alofa fakataina; kae ke fai ne koutou te takitakiga i te āva o te suā tino ki te suā tino.”​—LOMA 12:10, NW.

1, 2. (a) Se a te fakamalosiga ne fai atu ne Paulo i tena tusi ki te kau Loma? (e) Ne a fesili ka mafau‵fau tatou ki ei?

I TENA tusi ki te kau Loma, ne faka‵mafa atu i ei ne te apositolo ko Paulo a te tāua mō tatou Kelisiano ke fakaasi atu a te alofa i loto i te fakapotopotoga. E fakamasaua mai a ia ki a tatou ke fai “ke tonu te alofa.” Ne faipati mai foki a ia e uiga ki “te alofa fakataina” kae fai mai me e ‵tau o fakaasi atu a te alofa tenā mo te “fakatau a‵lofa.”​—Loma 12:9, 10a.

² E tonu, a te alofa fakataina e se ko te mauaga fua o lagonaga penā e uiga ki nisi tino. E ‵tau o fakaasi atu a lagonaga penā e auala i faiga. Me e seai se tino e mafai o iloa ne ia i a tatou e a‵lofa seiloga ke fakaasi atu ne tatou a te mea tenā i faiga matea. Tenā te pogai ne fakaopoopo mai ei a Paulo penei: “Ke fai ne koutou te takitakiga i te āva o te suā tino ki te suā tino.” (Loma 12:10e, NW) Ne a la mea e aofia i te fakaasiatuga o te āva? Kaia e tāua ei ke fai a te takitakiga i te fakaasiatuga o te āva ki ‵tou taina tali‵tonu? E mafai pefea ne tatou o fai a te mea tenā?

Te Fakaaloalo mo te Āva

3. Se a te uiga o te pati “āva” i ‵gana mua ne tusi i ei te Tusi Tapu?

³ A te pati Epelu tonu mō te “āva” e fakauiga ki te “‵mafa.” A te tino telā e āva ki ei a tino e fai pelā me e ‵mafa io me se tino tāua. Tenā foki te pati Epelu telā e ‵fuli sāle i te Tusi Tapu ki te “‵malu,” telā e toe fakaasi mai i ei a te lasi o te tāua o te tino telā e āva ki ei a tino. (Kenese 45:13) A te pati Eleni telā ne ‵fuli ki te “āva” i te Tusi Tapu e mafai o fakauiga ki te lasi o te fakaaloalo, te aoga, mo te lasi o te tāua. (Luka 14:10) E tonu, a tino kolā e āva tatou ki ei ne tino tāua ‵ki kae e aoga ki a tatou.

4, 5. E tai ‵pau pefea a te fakaasiatuga o te āva mo te mauaga o te fakaaloalo? Fakamatala mai.

⁴ Ne a mea e aofia i te fakaasiatuga o te āva ki nisi tino? Muamua la ko te fakaaloalo. Se mea tonu me e fakaaoga fakatasi sāle a pati konei ko te “āva” mo te “fakaaloalo” ona ko te mea e ‵tai ‵pau eiloa lā uiga. A te āva ko te fakaasimaiga, io me ko te fakaasiatuga ki tua o te fakaaloalo. I nisi tugapati, e fakasino muamua atu eiloa a te pati fakaaloalo ki ‵tou lagonaga e uiga ki ‵tou taina, kae fakasino atu a te pati āva ki ‵tou faifaiga ki ‵tou taina.

⁵ E mafai pefea o fakaasi atu ne se Kelisiano a te āva tonu ki ana taina tali‵tonu māfai e se fakaaloalo atu a ia ki a latou i tena loto? (3 Ioane 9, 10) E pelā eiloa mo se lakau telā e lauusiusi kae ola leva foki māfai e ‵toki i se laukele ola ‵lei, e mafai foki o tonu te āva kae tumau i se taimi leva māfai e ‵toki i se loto telā e ‵fonu i te fakaaloalo. Ona ko te mea e se mafai o māfua mai a te āva fakaloiloi mai i te fakaaloalo tonu, ka galo fakavave atu eiloa io me i se taimi fakamuli ifo. Tela la, e se tioa eiloa o fakatomua mai ne Paulo tena fakamalosiga ke fakaasi atu a te āva i te fakamatalaga manino tenei: “Ke tonu te alofa.”​—Loma 12:9; faitau te 1 Petelu 1:22.

Āva ki Tino Kolā ne Faite “ki te Fakatusa o te Atua”

6, 7. Kaia e manakogina ei ke fakaaloalo atu tatou ki nisi tino?

⁶ Ona ko te mauaga o te fakaaloalo mai te loto ko te kī ke fakaasi atu ei a te āva ki nisi tino, e se ‵tau lele eiloa o puli i a tatou a pogai faka-te-Tusi Tapu ko maua ne tatou ke fakaasi atu ei a te fakaaloalo ki ‵tou taina katoa. Ke na mafau‵fau aka tatou ki pogai e lua konā.

⁷ E se pelā mo nisi mea ola i luga i te lalolagi, ko tino fua “ne faite ki te fakatusa o te Atua.” (Iakopo 3:9) Tela la, ko tatou fua e maua ne tatou a uiga o te Atua e pelā mo te alofa, te poto, mo te faiga o fakamasinoga ‵tonu. Ke onoono ki te suā mea ne maua ne tatou mai te ‵tou Mafuaga. E fai mai a te faisalamo: “Ieova . . . , i o koe a te ‵malu telā e fakamatalagina i luga atu o te lagi! . . . Ne faite foki ne koe a te tagata ke tai malalo ifo i tino e pelā me ne atua, kae ne fakafou atu ei ne koe ki a ia te ‵malu mo te [“fakaaloalo,” King James Version].” (Salamo 8:1, 4, 5; 104:1, NW)a E fakafou, io me teu ne te Atua a tino kolā e ‵tau o fai penā ki se vaega o te ‵malu mo te fakaaloalo. Tela la, kafai e fakaaloalo atu tatou ki se isi tino, ko tena uiga ko fakaaloalo atu foki tatou ki te Pogai o te tulaga ‵malu o te tino, ko Ieova. Ko tena uiga, kafai e maua ne tatou a pogai ‵lei ke fakaasi atu a te fakaaloalo ki tino katoa, e ‵tau eiloa o sili fakafia atu a te fakaaloalo o tatou ki ‵tou taina tali‵tonu!​—Ioane 3:16; Kalatia 6:10.

A Tatou ne Tino Katoa i Loto i te Kāiga e Tasi

8, 9. Se a te pogai ne fai mai ne Paulo me e ‵tau eiloa o fakaasi atu te āva ki taina tali‵tonu?

⁸ Ne fai mai ne Paulo a te suā pogai e fakatau āva ei tatou te suā tino ki te suā tino. Mai mua malie faeloa o tena fakamalosiga ke fakaasi atu te āva, ana muna: “Ke fakatau a‵lofa koutou i te alofa fakataina.” A te tugapati Eleni telā e ‵fuli i konei ki te “fakatau a‵lofa” e fakasino atu eiloa ki te malosi o te fusi telā e ‵sai ne ia a te kāiga ke fealofani kae fakatau ‵lago atu te suā tino ki te suā tino. Tela la, mai te fakaaogaga o te tugapati tenei, ne faka‵mafa mai ei ne Paulo me e ‵tau o malosi kae fakamafanafana a te fesokotakiga i loto i te fakapotopotoga e pelā eiloa mo te fealofani i loto i te kāiga. (Loma 12:5) E se gata i ei, ke masaua foki me ne tusi atu ne Paulo a pati konā ki Kelisiano fakaekegina, ko latou katoa kolā ko oti ne puke mo fai a tama a te Tamana fua e tokotasi, ko Ieova. Tela la, ne fai latou mo fai se kāiga fealofani i se auala lasi ‵ki. Ne maua tonu ei ne Kelisiano fakaekegina i aso o Paulo se pogai ‵lei ke fakatau āva te suā tino ki te suā tino. E penā foki a tino fakaekegina i aso nei.

⁹ Kae e a tino kolā e aofia i ‘nisi mamoe’? (Ioane 10:16) E tiga eiloa e se fai latou mo fai ne tama puke a te Atua, e mafai eiloa o fakaigoa ne latou a latou ki taina mo tuagane me e aofia latou i te kau kāiga fealofani o Kelisiano i te lalolagi kātoa. (1 Petelu 2:17; 5:9) Tela la, kafai e malamalama ‵lei a nisi mamoe i te taimi e fakaaoga ei ne latou a pati ko te “taina” io me ko te “tuagane,” ko maua ei ne latou se pogai ‵lei ke āva latou ki olotou taina tali‵tonu i olotou loto.​—Faitau te 1 Petelu 3:8.

Kaia e Tāua ‵ki ei ke Fakaasi Atu a te Āva?

10, 11. Kaia e tāua ‵ki ei a te mauaga o te uiga ko te fakaaloalo mo te fakaasiatuga o te āva?

¹⁰ Kaia e tāua ‵ki ei ke maua te fakaaloalo kae fakaasi atu a te āva? Ona ko te pogai tenei: Mai te fakaasi atu o te āva ki ‵tou taina mo ‵tou tuagane, e lasi ‵ki te ‵tou tusaga e fai i te tausiga ke malosi kae fealofani foki a te fakapotopotoga kātoa.

¹¹ E tonu, e iloa ne tatou me i te mauaga o se fesokotakiga ‵pili mo Ieova mo te ‵lago mai o tena agaga ko toe pogai ‵lei eiloa konā e maua ei ne tatou a te malosi e pelā me ne Kelisiano ‵tonu. (Salamo 36:7; Ioane 14:26) Kae kafai e fakaasi mai ne ‵tou taina tali‵tonu me e fakatāua ne latou a tatou, e fakamalosi mai eiloa ki a tatou a te mea tenā. (Faataoto 25:11) E fakamalosi mai ki a tatou māfai e lagona atu ne tatou a pati kolā e fakaasi mai i ei a te āva. E tuku mai i ei ki a tatou a te malosi fakaopoopo ke tumau tatou i te sa‵sale mo te fia‵fia mo te loto finafinau i te auala telā e tau atu ki te ola. E seai se fakalotolotolua me ko oti eiloa ne lagona ne koe a te mea tenā.

12. E mafai pefea o fai ‵tou tusaga taki tokotasi ke maua ei te alofa tonu i loto i te fakapotopotoga?

¹² Ona ko te mea e iloa ne Ieova a te manakoga i loto i a tatou e uiga ki te fakaaloalo, e fakamalosi mai a ia ki a tatou e auala i tena Muna ke “fia‵fia malosi o fakaasi atu te āva o te suā tino ki te suā tino.” (Loma 12:10, Today’s English Version; faitau te Mataio 7:12.) A Kelisiano katoa kolā e fakatāua ne latou a te fakatakitakiga tenei i olotou loto e lasi atu te lotou tusaga e fai ke maua te alofa i loto i te kautaina Kelisiano. Tela la, se mea ‵lei ke fesili ifo a tatou ki a tatou eiloa penei, ‘Anafea ne fakaasi fakamuli atu ei toku fakaaloalo tonu ki se taina io me se tuagane i te fakapotopotoga?’​—Loma 13:8.

Se Galuega Fakapito mō Tatou Katoa

13. (a) Ko oi e ‵tau o fai ne latou a te takitakiga i te fakaasiatuga o te āva? (e) Se a te mea e fakasino atu ki ei a pati a Paulo i te Loma 1:7?

¹³ Ko oi e ‵tau o fai ne ia te takitakiga i te fakaasiatuga o te āva? I tena tusi ki te kau Epelu, ne fakamatala mai ne Paulo a toeaina Kelisiano e pelā me ko “otou takitaki.” (Epelu 13:17) E tonu, e fai ne toeaina a te takitakiga i galuega e uke. Kae e pelā me ne tausi mamoe o te lafu mamoe, e ‵tau eiloa o fai ne latou a te takitakiga i te fakaasiatuga o te āva ki taina tali‵tonu​—e aofia i ei a taina toeaina. E pelā mo te mea tenei, i te taimi e fono ei a toeaina ke mafau‵fau e uiga ki manakoga faka-te-agaga o te fakapotopotoga, e fakaasi atu ne latou a te āva o te suā tino ki te suā tino mai te fakalogo‵logo faka‵lei ki manatu kolā e fakaasi mai ne so se taina toeaina. E se gata i ei, e fakaasi atu ne latou a te āva mai te mafau‵fau ki manatu mo fakamatalaga a toeaina katoa māfai ko fai se fakaikuga. (Galuega 15:6-15) Kae e ‵tau foki o masaua ne tatou, me i te tusi a Paulo ki te kau Loma ne seki fakasino atu fua ki toeaina kae ki te fakapotopotoga kātoa. (Loma 1:7) Tela la, ne fakalauefa mai ki a tatou katoa i aso nei a te fakamalosiga ke fakaasi atu a te āva.

14. (a) Fakamatala mai a te ‵kese i te fakaasiatuga o te āva mo te faiga o te takitakiga i te fakaasiatuga o te āva. (e) Se a te fesili e mafai o ‵sili ifo ne tatou ki a tatou eiloa?

¹⁴ Ke onoono foki ki te vaega tenei o pati fakatonutonu a Paulo. Ne fakamalosi atu a ia ki ana taina tali‵tonu i Loma ke se fakaasi atu fua a te āva kae ke fai ne latou a te takitakiga i te fakaasiatuga o te āva. Kaia e ‵kese ei te avā mea konei? Mafaufau ki te mea tenei. E mata, ka fakamalosi atu se faiakoga ki se potukau o tama‵liki kolā e ‵poto i te fai‵tau ke taumafai ke iloa ne latou o fai‵tau? Ikai. Ko leva ne iloa ne latou o fai‵tau. I lō te fai penā, ka manako eiloa a te faiakoga o fesoasoani atu ke gasolo aka o ‵lei a te lotou fai‵tau. I se auala tai ‵pau, a te fakatau a‵lofa o tatou, telā e fakaosofia ne ia tatou ke fakaasi atu te āva, ko leva ne fai mo fai se fakailoga o Kelisiano ‵tonu. (Ioane 13:35) Kae e pelā eiloa mo tama‵liki ‵poto i te fai‵tau kolā e mafai o faka‵lei aka te lotou fai‵tau, e mafai foki o faka‵lei aka ne tatou a te fakaasiatuga o te āva mai te gasuesue muamua ke fakaasi atu te uiga tenā. (1 Tesalonia 4:9, 10) A te galuega fakapitoa tenā e tuku mai eiloa ki a tatou taki tokotasi. E mafai o fesili ifo tatou penei, ‘E a, e fai ne au a te mea tenā​—te fakaasiatuga muamua o te āva ki nisi tino i te fakapotopotoga?’

Āva “ki Tino Ma‵tiva”

15, 16. (a) Kafai e fakaasi atu ne tatou a te āva, ko oi e se ‵tau o puli i a tatou, kae kaia? (e) Se a te mea e fakaasi mai i ei me e maua ne tatou te āva tonu ki ‵tou taina mo tuagane?

¹⁵ Kafai e fakaasi atu ne tatou a te āva, ko oi a tino i te fakapotopotoga e se ‵tau o puli i a tatou? E fai mai te Muna a te Atua: “Kafai e avatu ne koe ne mea ki tino ma‵tiva, e pelā eiloa me se mea e tuku atu ne koe ki te Aliki, tela la, e toe taui mai ne te Aliki ki a koe e ‵tusa eiloa mo tou aga‵lei.” (Faataoto 19:17) E ‵tau o pokotia pefea tatou i pati fakavae konā i te ‵tou taumafai o fai a te takitakiga i te fakaasiatuga o te āva?

¹⁶ E iloa ‵lei ne koe me i te tokoukega o tino e fia‵fia o fakaasi atu a te āva ki olotou pule, kae ko tino foki eiloa konei e mafai o āva malie fua io me e se āva eiloa ki tino kolā e ma‵lalo ifo i a latou. Kae ko Ieova e se fai penā. E fai mai a ia: ‘Ka āva au ki tino kolā e āva mai ki a au.’ (1 Samuelu 2:30; Salamo 113:5-7) E fakaasi atu ne Ieova a te āva ki tino katoa kolā e tavini kae fakaaloalo atu ki a ia. E se puli i a ia a “tino loto malalo.” (Faitau te Isaia 57:15; 2 Nofoaiga Tupu 16:9) Se mea tonu me e ma‵nako eiloa tatou o fakaakoako atu ki a Ieova. Tela la, kafai e ma‵nako ke iloa ne tatou me e pefea te ‵lei o te auala e fakaasi atu ei ne tatou a te āva tonu ki nisi tino, se mea ‵lei ke fesili ifo tatou penei, ‘E pefea aku faiga ki a latou kolā e seai ne olotou tulaga tāua i te fakapotopotoga?’ (Ioane 13:14, 15) E fakaasi mai i te tali ki te fesili tenā a mea e uke e uiga ki te tulaga o te ‵tou āva tonu ki nisi tino.​—Faitau te Filipi 2:3, 4.

Fakaasi Atu te Āva Mai te Tukuatuga o ‵Tou Taimi

17. Se a te auala tāua e tasi e mafai ei o fai ne tatou a te takitakiga i te fakaasiatuga o te āva, kae kaia e tāua ei?

¹⁷ Se a te auala tāua e tasi telā e mafai ei o fai ne tatou a te takitakiga i te fakaasiatuga o te āva ki tino katoa i te fakapotopotoga? Mai te tukuatuga o ‵tou taimi ki nisi tino. Kaia e tāua ei a te mea tenā? E pelā me ne Kelisiano, e fakalave‵lave malosi tatou i te olaga, kae e uke a taimi e fakamāumāu ne tatou i te faiga o galuega e uke kae tāua i te fakapotopotoga. Tela la, e se ōfo tatou māfai e fakatāua malosi ne tatou a te taimi. E iloa foki ne tatou me e se ‵tau o ma‵nako tatou ke tō silia a te taimi e tuku mai ne ‵tou taina mo tuagane ki a tatou. E penā foki te ‵tou fia‵fia māfai e malamalama a nisi tino i te fakapotopotoga me e se ‵tau o kinau mai latou e uiga ki ‵tou taimi māfai ko fakamolemole mai ki ei.

18. E pelā mo te ata telā e fakaasi mai i te itulau e 25, e mafai pefea o fakaasi atu te ‵tou fia‵fia o fakaaoga a taimi mō ‵tou taina tali‵tonu?

¹⁸ E se gata i ei, e matea foki ne tatou (maise eiloa a tatou kolā e tavini atu e pelā me ne tausi mamoe i te fakapotopotoga) me i te ‵tou loto fia‵fia o taofi aka a nisi faifaiga masani a tatou ko te mea ke fakaaoga a nisi o ‵tou taimi mō ‵tou taina tali‵tonu, e fakaasi atu i ei me e amanaia tatou ki a latou. E pefea la? Kafai e taofi aka a ‵tou faifaiga masani ko te mea ke fakaaoga a nisi o ‵tou taimi mō ‵tou taina, e pelā eiloa me ko fai atu tatou ki a latou penei, ‘Ko oko eiloa i tou tāua ki a au; tenā te pogai e sili atu ei ki a au ke fakamāumāu oku taimi mō koe i lō te faiga o te mea tenei e fai ne au.’ (Maleko 6:30-34) E penā foki i te suā feitu. Kafai e se fia taofi ne tatou a ‵tou faifaiga masani ko te mea ke fakaaoga a ‵tou taimi mō ‵tou taina, e mafai o fai ne tatou a ia ke mafaufau me e se tāua malosi a ia ki a tatou. E tonu la, e maina tatou me e isi ne taimi e se ‵tau ei o taofi aka se mea telā e ‵tau o fai fakavave. E ui i ei, a te talia ne tatou​—io me ko te sē fia‵fia o tatou o fakaaoga a nisi taimi o tatou mō nisi tino e fakaasi mai i ei a te lasi io me ko te foliki o te āva i ‵tou loto ki ‵tou taina mo tuagane.​—1 Kolinito 10:24.

Ke Fai Eiloa a te Takitakiga

19. I tafa o te tukuatuga o ‵tou taimi, e fakaasi atu pefea ne tatou a te āva ki ‵tou taina tali‵tonu?

¹⁹ E isi aka foki ne auala tāua e fakaasi atu ei ne tatou a te āva ki ‵tou taina tali‵tonu. E pelā mo te mea tenei, kafai e fakaaoga ‵tou taimi mō latou, e ‵tau foki o ‵saga ‵tonu atu tatou ki a latou. E tuku mai foki ne Ieova se fakaakoakoga i te feitu tenei. E fai mai penei te faisalamo ko Tavita: “A te Aliki, e onoono faeloa ki tino amio‵tonu kae talia foki olotou fakatagi.” (Salamo 34:15) E taumafai malosi tatou o fakaakoako ki a Ieova mai te tuku atu o ‵tou mata mo ‵tou taliga​—ko te ‵tou ‵saga katoatoa atu—⁠ki ‵tou taina, maise eiloa a latou kolā e o‵mai ki a tatou mō se fesoasoani. Mai te fai penā, e fakaasi atu ei ne tatou a te āva ki a latou.

20. Ne a fakamasauaga e uiga ki te fakaasiatuga o te āva e ‵tau o tausi i ‵tou mafaufau?

²⁰ E pelā mo mea ko oti ne mafau‵fau tatou ki ei, e ma‵nako tatou ke maina ‵lei i ‵tou mafaufau a te pogai e ‵tau ei o āva tonu tatou i ‵tou loto ki ‵tou taina tali‵tonu. E se gata i ei, e onoono loa tatou ki avanoaga ke fakaasi muamua atu ei ne tatou a te āva ki tino katoa, e aofia i ei a tino fatauva. Mai te faiga o mea konei, ka fakamalosi aka ei ne tatou a te alofa fakataina mo te fealofani i loto i te fakapotopotoga. Tela la, ke na tumau tatou e se gata fua i te fakaasiatuga o te āva kae maise eiloa te faiga o te takitakiga i te fakaasiatuga o te āva o te suā tino ki te suā tino. E mata, ka fai eiloa ne koe a te mea tenā?

[Fakamatalaga fakaopoopo]

E Masaua ne Koe?

• E tai ‵pau pefea a te uiga o te āva mo te fakaaloalo?

• Ne a pogai e āva ei tatou ki ‵tou taina tali‵tonu?

• Kaia e tāua ei ke fakaasi atu a te āva o te suā tino ki te suā tino?

• I auala fea e fakaasi atu ei ne tatou a te āva ki ‵tou taina tali‵tonu?

[Ata i te itulau e 25]

E mafai pefea o fakaasi atu ne tatou a te āva ki ‵tou taina tali‵tonu?