E Mata, ne Iloa ne te Atua me ka Agasala a Atamu mo Eva?

E TOKOUKE a tino e fia iloa tonu ne latou a te tali ki te fesili tenei. I te taimi ne sae aka ei te kinauga tenei e uiga ki te pogai e talia ei ne te Atua a amioga ma‵sei, ne fai eiloa te agasala a te tauavaga muamua i te fatoaga o Etena e pelā me se mataupu ke sau‵tala ki ei. A te mafaufauga me ‘e iloa ne te Atua a mea katoa’ e faigofie ke takitaki atu ei a nisi tino ki te manatu me ne ‵tau eiloa o iloa atu mai mua ne te Atua me ka se faka‵logo a Atamu mo Eva ki a ia.

Moi ne iloa tonu ne te Atua me ka agasala a te tauavaga ‵lei katoatoa konei, se a te mea ko fakaasi mai i ei ne te mea tenei? Ko fakaasi mai i te vaegā kilokiloga tenā a faifaiga sē ‵lei e uiga ki te Atua. Ne fakafoliga mai i ei me i a ia e se alofa, sē fakamaoni, kae amio fakaloiloi. E ‵kilo atu a nisi tino ki ei e pelā me e masei ke fakaasi atu ki te tauavaga muamua se mea telā ne iloa ne Ia me ka iku atu ki te masei. E foliga mai me ne māfua mai i te Atua​—a amioga ma‵sei katoa mo logo‵maega i tala fakasolopito. E foliga atu te ‵tou Mafuaga ki nisi tino e pelā me e valea.

E mata, e fetaui tonu a Ieova te Atua, telā ne fakaasi mai i te Tusi Tapu mo se fakamatalaga sē ‵lei penā? Ke tali aka te fesili tenā, ke na suke‵suke nei tatou ki pati a te Tusi Tapu e uiga ki galuega fakaofoofogia mo uiga o Ieova.

“E Gali ‵ki Eiloa”

E uiga ki mea a te Atua ne faite, e aofia i ei te tauavaga muamua i te lalolagi, e fai mai te Kenese, penei: “Ne kilo atu te Atua ki ana mea katoa ne faite, [“ko oko eiloa i te ‵gali,” Tusi Paia, Samoa].” (Kenese 1:​31) Ne faite a Atamu mo Eva ke ‵lei katoatoa, telā ne fetaui ‵lei ki te enivalomene i te lalolagi. Ne ‵lei eiloa te auala ne faite ei lāua. Ne “gali ‵ki eiloa” te faitega o lāua, e mautinoa eiloa me ne maua ne lāua a uiga ‵gali kolā ne ‵tau o maua ne lāua. Ne faite lāua ki ‘foliga o te Atua.’ (Kenese 1:​27) Tela la ne maua ne lāua te atamai ke fakaasi atu i se auala tai lasi a uiga o te Atua ko te poto, te alofa fakamaoni, mo te aga‵lei. A te fakaasi atu o vaegā uiga penā ne mafai o fesoasoani atu ke fai ne lāua a fakaikuga kolā e aoga ki a lāua kae fakafiafia atu foki ki te la Tamana faka-te-lagi.

Ne tuku atu ne Ieova ki te tauavaga ‵lei katoatoa konei a te saolotoga. Tela la e se fakauiga i ei me ne fakapolokalame lāua ke fakafiafia atu ki te Atua​​—e pelā me se masini. Mafaufau la ki ei. Se a te mea e tāua malosi ki a koe​​—se meaalofa telā ne tuku atu kae ko oti ne fakapolokalame io me ko te meaalofa telā e vau mai te loto? E manino eiloa te tali ki ei. I se auala tai ‵pau, moi ne filifili ne Atamu mo Eva ke faka‵logo lāua ki te Atua, penei e tāua malosi ‵ki eiloa te la faka‵logo ki a ia. A te avanoaga ke fai la filifiliga ne mafai o fai ei ke faka‵logo a te tauavaga muamua ki a Ieova mo te a‵lofa.​​—Teutelonome 30:​19, 20.

E Amiotonu, e Fai Mea Tonu, Kae ‵Lei

E fakaasi mai i te Tusi Tapu a uiga o Ieova ki a tatou. A uiga konei e fakafaigofie ei ke se aofia a ia i se agasala. A Ieova “e fiafia .  . . ki te amiotonu mo te fai mea tonu,” ko pati a te Salamo 33:5. Kae e fai mai te Iakopo 1:​13, penei: “I te Atua e se mafai o fakaosoosogina ne te masei, kae se fakaosooso foki ne ia tino ki te masei.” Ona ko te fakamaoni o te Atua kae atafai atu ki a Atamu, ne fakailoa atu ne ia ki a Atamu: “E mafai ne koe o kai a fuaga o so se lakau i loto i te fatoaga, kae tapu koe e kai ki fuaga o te lakau telā e fai ne ia te tino ke iloa te ‵lei mo te masei. E se ‵tau eiloa mo koe o kai ki fuaga o te lakau tenā, me kafai e kai koe ki ei, a koe e mate eiloa i te taimi tenā.” (Kenese 2:​16, 17) Ne tuku atu ki se tauavaga muamua se filifiliga i te va o te ola se-gata-mai mo te mate. E mata, e se amiotonu a te Atua māfai e fakailoa atu ne ia ki a lāua e uiga ki se agasala kae ko oti ne iloa ne ia a te ikuga masei mai i ei? E pelā me se tino “amiotonu kae fai mea tonu,” ne seki ‵tau o tuku mai ne Ieova se filifiliga telā e se tonu.

A Ieova e ‵fonu foki i te aga‵lei. (Salamo 31:19) Ke fakamatala atu a te aga‵lei o te Atua, ne fai mai a Iesu: “Ko oi se tino i a koutou e mafai o tuku atu se fatu ki tena tama manafai e akai mai ki se falaoa? Io, me akai mai ki se ika, kae tuku atu ki a ia se gata? Tela la, kafai koutou e ma‵sei, kae e iloa ne koutou o tuku atu a mea ‵lei ki otou tama‵liki; e a, e se sili atu la te otou Tamana i te lagi, i te fia tuku atu o mea ‵lei ki tino kolā e akai atu ki a ia?” (Mataio 7:​9-11) E tuku mai ne te Atua a “mea ‵lei” ki ana tino ne faite. A te auala ne faite ei a tino mo te Palataiso telā ne fakatoka mō lāua se fakaasiga o te aga‵lei o te Atua. E mata, e mafai ne se vaegā Pule Sili ‵lei o fai se mea masei mai te faite ne ia o se koga gali penā telā ne iloa ne ia me ka ave keatea? Ikai. A te Tino telā ne faite ne ia tatou e amiotonu kae ‵lei kae e se ‵tau o ‵losi atu ne tatou ki a ia mō te ‵teke atu o tino.

“Te Atua Poto e Tokotasi”

E fakaasi mai foki i te Tusi Tapu me ko Ieova “te Atua poto e tokotasi.” (Loma 16:27) Ne molimau ne agelu a te Atua i te lagi a fakaasiga e uke o te poto sē fakanafagina tenei. Ne kamata latou o “ka‵laga mo te fiafia” i te taimi ne faite ei ne Ieova a mea i te lalolagi. (Iopu 38:​4-7) E seai eiloa se fakalotolotolua me ne tau‵tali atu a tino faka-te-agaga konei i mea ne ‵tupu i te fatoaga o Etena mo te loto finafinau. Mai tua ifo o te faitega ne ia o te iunivesi fakaofoofogia mo te fakagaligaliga o mea ne faite i te lalolagi, e mata, se mea ‵lei mō se Atua poto, ke faite ne ia i mua o agelu ne tino e tokolua kolā e iloa ne ia me ka se faka‵logo? E manino ‵lei me se mea valea ke aofaga se vaegā mea penei.

Kae e mafai eiloa o ‵teke mai se tino penei, ‘Kae kaia e se iloa ei ne te Atua poto a te mea tenei?’ A te tonuga loa, a te vaega o te poto sili o Ieova ko tena atamai ke iloa ne ia a “mea ka ‵tupu mai i te kamataga.” (Isaia 46:​9, 10) Kae e se ‵tau o fakaaoga ne ia te atamai tenei, e pelā mo te sē fakaaoga katoatoa ne ia tena ‵mana. E fakaaoga ne Ieova mo te poto a tena atamai e uiga ki mea kolā e iloa ne ia me ka ‵tupu. E fakaaoga ne ia māfai e ‵tau o fai penā kae fetaui ‵lei mo te fakanofonofoga.

A te atamai ke ‵kalo keatea mai te fakaaogaga o te iloa i mea ka ‵tupu e mafai o fakatusa ki se vaega o poto ‵fou. E mafai ne se tino telā e onoono atu i se ata ta‵fao telā ne ‵kopi o filifili ke onoono atu muamua i mu minute fakaoti ko te mea ke iloa ne ia te ikuga. Kae e se ‵tau o kamata a ia i te auala tenā. Ko oi la ka mafai o taku fakamasei ne latou a ia māfai ne filifili a ia ke onoono atu ki te ata kātoa mai te kamataga? E penā foki loa, ne filifili ne te ‵tou Mafuaga mo te mautinoa ke mo a ma iloa ne ia a te ikuga o mea. Kae ne filifili ne ia ke faka‵tali ke fakaasi malielie mai a mea ka ‵tupu, ko iloa ei ne ia a te auala ka fakaasi mai ei ne ana tama‵liki faka-te-lalolagi a mea e uiga ki a latou.

E pelā mo te mea ne fakaasi mai muamua, ne seki faite eiloa ne Ieova i tena poto a te tauavaga muamua e pelā me se masini ne fakapolokalame. Kae ne tuku atu ne ia mo te alofa ki a lāua a te saolotoga ke fai la filifiliga. Mai te filifili aka ki te auala tonu, ne mafai ei ne lāua o fakaasi atu a te alofa, loto fakafetai, mo te fakalogo, mai te fakaopoopo atu o te fiafia ki a latou eiloa mo Ieova e pelā me ko te lotou Tamana faka-te-lagi.​​—Faataoto 27:11; Isaia 48:18.

E fakaasi mai i te Tusi Tapu me i te ukega o taimi e se fakaaoga ne te Atua a tena atamai ke iloa a mea ka ‵tupu. E pelā me se fakaakoakoga, i te taimi ne tofotofo aka ei te tagata fakamaoni ko Apelaamo ke ofo atu tena tama e pelā me se taulaga, ne mafai o fai atu a Ieova, penei: “Ko iloa nei ne au i a koe e mataku ki te Atua, i a koe seki ita ke ofo atu a Isaako mo fai te taulaga ki a ia.” (Kenese 22:12) I te suā feitu, e isi ne taimi ne fai ei ne amioga ma‵sei a nisi tino ko te mea ke “faka‵mae” ne latou te loto o te Atua. E mata, ka lagona ne ia te logo‵mae moi ne fai ko leva ne iloa ne ia a mea ka fai ne latou?​​—Salamo 78:​40, 41; 1 Tupu 11:​9, 10.

Tela la, se mea poto ke fakaiku aka me ne seki fakaaoga ne te Atua poto a tena atamai ke iloa a mea ka ‵tupu ke mafai ei o iloa ne ia me ka agasala eiloa a ‵tou mātua muamua. E se fakavalevale a ia ke faite aka a tino ke fai ne latou a mea va‵lea kolā ko oti ne iloa ne ia me ka ‵tupu.

“Te Atua ko te Alofa”

Ne kamata ne te fili o te Atua, ko Satani, a te kinauga i Etena telā ne iku atu ki ikuga sē ‵lei, e aofia i ei te agasala mo te mate. Kae ne fai a Satani mo fai se “tino tatino.” Ne fakamaoni mai foki a ia e pelā me “se tino loi, ka ko te tamana foki eiloa o tino ‵loi.” (Ioane 8:44) Ona ko mafaufauga sē ‵lei, ne taumafai a ia ke fakaasi atu ne ia a mafaufauga sē ‵lei ki te ‵tou Mafuaga alofa. E manako eiloa a ia o ‵losi atu ki a Ieova ona ko te agasala a te tagata.

A te uiga ko te alofa ko te pogai tāua ne filifili ei ne Ieova ke se iloa muamua ne ia me ka agasala eiloa a Atamu mo Eva. A te alofa ko te uiga fakavae eiloa o te Atua. A te “Atua ko te alofa,” ko pati i te 1 Ioane 4:8. A te alofa se uiga ‵lei, kae e se masei. E kilokilo ki mea e ‵lei ei a nisi tino. Ao, ona ko te alofa, ne manako eiloa a Ieova te Atua ki te ‵toe mea ‵lei mō te tauavaga muamua.

E tiga eiloa ne mafai o fai ne tama‵liki a te Atua se fakaikuga valea, ne seki mafaufau te ‵tou Atua alofa ke fakalotolotolua io me ke fakafanoanoa ki ana tino ‵lei katoatoa kolā ne faite. Ne tuku atu katoa ne ia a mea e ma‵nako lāua ki ei i te olaga kae fakailoa atu ki ei a mea katoa kolā e ‵tau o iloa ne lāua. Se mea ‵lei me ne seki ‵tau o fakamoemoe te Atua ki se ‵tekeatuga, kae ki te fakalogo mo te alofa mai i a lāua. Ne iloa ne ia me ne mafai eiloa ne Atamu mo Eva o fakamaoni, me ne mafai foki o fakamaoni mai a te mea tenā ne tagata sē ‵lei katoatoa, e pelā mo Apelaamo, Iopu, Tanielu, mo nisi tino aka e tokouke.

“E mafai ne te Atua o fai a mea katoa,” ko muna a Iesu. (Mataio 19:26) E fakamafanafana mai eiloa a te mafaufauga tenā. E fakatalitonu mai ne te alofa o Ieova, fakatasi mo ana uiga fakavae ko te fai mea tonu, te poto, mo te ‵mana, me e mafai kae ka ave keatea ne ia i te taimi tonu a ikuga katoa o te agasala mo te mate.​​—Fakaasiga 21:​3-5.

E manino ‵lei, me ne seki iloa muamua ne Ieova me ka agasala a te tauavaga muamua. E tiga eiloa ne logo‵mae a ia ona ko te sē fakalogo o te tagata mo te logo‵mae telā ne iku mai i ei, ne iloa ne te Atua me ka se taofi aka ne te tulaga tenei a te fakataunuga o tena fuafuaga ke ‵nofo a tino i te lalolagi nei ki te se-gata-mai. Kaia e se ‵sala atu ei koe ki fakamatalaga e uke atu e uiga ki te fuafuaga tenā mo te auala e mafai ei o maua ne koe a mea aoga mai te fakataunuga gali tenei?a

[Fakamatalaga Fakaopoopo]

[Manatu Tāua i te itulau e 12]

Ne seki faite ne Ieova a te tauavaga muamua e pelā me se masini telā ne fakapolokalame

[Manatu Tāua i te itulau e 13]

Ne iloa ne te Atua me ne mafai eiloa ne Atamu mo Eva o fakamaoni