E Fesili Mai ‵Tou Kau Fai‵tau . . .

E mata, ne faite ne te Atua a te Tiapolo?

▪ E tiga eiloa e fai mai te Tusi Tapu me i te Atua “ne faite ne ia a mea katoa,” ko oti ne fakaiku aka ne nisi tino me ne ‵tau o faite ne te Atua a te Tiapolo. (Efeso 3:9; Fakaasiga 4:​11) E fakaasi manino mai eiloa i te Tusi Tapu me ne seki faite ne ia!

Ne faite ne Ieova a te tino telā ne fai mo fai te Tiapolo. Tela la, a te māfuaga o te tino tenei e pelā me ko te ‵toe tino ‵teke ki te Atua e ‵tau eiloa o fakafetaui aka mo pati e fakaasi mai i te Tusi Tapu e uiga ki a Ieova e pelā me ko te Mafuaga. Ne fai mai penei e uiga ki a ia: “E tonu kae amiotonu i ana auala katoa; a te otou Atua e fakamaoni kae amiotonu; e fai ne ia te mea tonu kae nofogamalie.” (Teutelonome 32:​3-5) Mai te fakamatalaga tenā, e mafai o fakaiku aka ne tatou me i a Satani ne taku i te kamataga me e ‵lei katoatoa kae amiotonu, se tama e tokotasi a te Atua telā se agelu. I te Ioane 8:​44, ne fai mai a Iesu me i te Tiapolo “ne seki tumau i te munatonu,” e fakaasi mai ei me ne fakamaoni kae ‵lei a Satani i se taimi e tasi.

Kae e pelā mo te ‵toega o tino atamai a Ieova ne faite, ne maua ne te agelu telā ne fai mo fai a Satani a te saolotoga ke filifili aka a te ‵kese o te mea tonu mo te mea ‵se. Mai te filifili aka ke ‵teke atu ki te Atua kae fakakolekole ne ia te tauavaga muamua ke ‵kau atu ki a ia, ne fai ei ne ia a ia eiloa e pelā me ko Satani, telā e fakauiga ki te “Tino ‵Teke.”​​—⁠Kenese 3:​1-5.

Ne fai foki ne te agaga masei tenā a ia eiloa ke fai mo fai te Tiapolo, telā e fakauiga ki te “Tino Fatufatu.” A Satani ko te tino sē matea telā ne nofo atu mai tua o te gata kae fakaloiloi ne ia a Eva ke se fakalogo ki te tulafono telā ne fai atu ne te Mafuaga. Tenā eiloa te pogai ne taku ei ne Iesu a Satani ko te “tamana foki eiloa o tino ‵loi.”​​—⁠Ioane 8:​44.

Kae e mafai pefea ne se agaga ‵lei katoatoa​​—⁠telā e seai ne ana vāivāiga io me ne fakamalosiga ma‵sei e maua ne ia i ana tafa​​—⁠o faka‵segina? E mautinoa eiloa me ne manako a ia ki te tapuakiga telā ne ‵tau fua o fai ki te Atua kae ne lavea ne ia te avanoaga ke ‵nofo a tino mai lalo i tena pulega i lo te pulega a Ieova. Mai te tumau i te mafaufau ke pule a ia kae seki ave keatea mai tena mafaufau ke oko loa ki te taimi ko fai ei ne ia. E fakamatala mai te auala ne fai ei ne ia penā i te tusi o Iakopo: “Ka ko te tino e fakaosoosogina manafai ko to keatea a ia, kae faka‵segina ne ona manakoga ma‵sei. Tela la, kafai ko faitama te manako masei, ko fanau mai ei te agasala.”​​—⁠Iakopo 1:​14, 15; 1 Timoteo 3:⁠6.

Ke fai se fakatusa: Mafaufau la ki se tino tausi tupe telā e lavea ne ia se avanoaga e fakagalue ne ia a lipoti i se auala telā e kaisoa ei a ia mai tena kamupane mō tena ‵lei. E mafai o fakagalo fakavave ne ia a te mafaufauga ‵se tenā. Kae i lo te fai penā, e saga atu a ia ki te manakoga tenei, ko kamata o ati aka ne ia te mafaufau tenā, kae fakamoemoe eiloa ke fai ne ia. Kafai e fai ne ia, ko fai eiloa ne ia a ia eiloa e pelā me se tino kaisoa. Kafai e loi a ia e uiga ki te mea masei ne fai ne ia, ka fai foki a ia e pelā me se tino loi. I se auala tai ‵pau, mai te atiakaga o se manakoga masei kae fai ne ia, ne fakaaoga eiloa ne te agelu telā ne faite ne te Atua a te saolotoga ke loto masei kae ‵teke atu a ia ki tena Tamana, kae fai ei a ia e pelā me ko Satani te Tiapolo.

Se mea fakafiafia, me ko fakaseai atu a Satani te Tiapolo i te taimi tonu o te Atua. (Loma 16:20) I te vaitaimi tenei, ko oti ne fakailoa atu ki tino tapuaki o Ieova te Atua e uiga ki auala o Satani kae tuku atu ki a latou se puipuiga mai ana auala ma‵sei. (2 Kolinito 2:​11; Efeso 6:​11) Tela la, ke na “‵teke atu te Tiapolo, ko sola ei a ia keatea mai i a koutou.”​​—⁠Iakopo 4:⁠7.

[Manatu tāua i te itulau e 32]

Mai te filifiliga o se auala ke ‵teke atu ei ki te Atua, ne fai eiloa ne se agelu ‵lei katoatoa ke fai a ia mo fai a Satani