‵Kalo Kea‵tea Mai Te “Vave O ‵Numi Otou Mafaufau”!

1, 2. Kaia ko lauiloa malosi ei a te fakaloiloi tino i aso nei, kae ne a auala e fakaaoga i ei?

A TE faitala loi, te faitogafiti, mo te fakaloiloi tino ko mea kolā ko masani ki ei a tino i te olaga tenei. E se ‵tau o ‵poi tatou i te mea tenei. E fakaasi faka‵lei mai i te Tusi Tapu i a Satani te Tiapolo se tino poto i te fakaloiloi tino, kae ko te pule o te olaga tenei. (1 Timo. 2:14; 1 Ioa. 5:19) I te pili atu o tatou ki te gataga o te olaga tenei, a te kaitaua o Satani e gasolo aka eiloa ki luga me e iloa ne ia i tena “taimi ko toetoe” fua. (Faka. 12:12) Tela la, e mafai o fakamoe‵moe tatou i amioga fakaloi‵loi a latou kolā e fakamalosi aka ne te Tiapolo e gasolo aka eiloa ki luga, maise ki a latou kolā e fakamaluga ne latou te tapuakiga tonu.

² I nisi taimi, e ave a tala sē ‵tonu mo loi e uke e uiga ki tavini a Ieova mo olotou talitonuga i mea fakasalalau tala. Ne fakaaoga foki a nusipepa, televise, mo te itaneti ke fakasalalau a tala sē ‵tonu. Kae ko te ikuga, ne ‵numi a nisi tino kae faigofie o tali‵tonu ki loi penā.

3. Se a te mea e mafai o fesoasoani mai ke taua atu tatou ki te fakaloiloi tino?

³ Ke taua atu ki te auala faka‵mae loto tenei o ‵tou fili, e fakafetai tatou me e maua ne tatou te Muna a te Atua, telā e “aoga . . . ki te fakatonutonuga o mea ‵se.” (2 Timo. 3:16) Se mea tāua ke tauloto tatou mai i tusitusiga a te apositolo ko Paulo me i nisi Kelisiano i Tesalonia i te senitenali muamua ne faka‵segina, mai te talia o mea sē ‵tonu. Ne fakamalosi atu a ia ki a latou “ke se vave o ‵numi [olotou] mafaufau.” (2 Tesa. 2:1, 2) Ne a akoakoga e mafai o tauloto ne tatou mai i polopolokiga a‵lofa a Paulo, kae e mafai pefea o fakagalue aka ne tatou a mea konei ki ‵tou fakanofonofoga?

FAKA‵PULAGA I TE TAIMI TONU

4. Ne fakailoa atu pefea ki Kelisiano i Tesalonia e uiga ki te oko mai o te “aso o Ieova,” kae ne fakailoa mai pefea ki a tatou?

⁴ I tena tusi muamua ki te fakapotopotoga i Tesalonia, ne faipati eiloa Paulo ki te oko mai o te “aso o Ieova.” Ne seki manako tou tagata ke ‵nofo atu ana taina i te pouliga kae sē toka. Ne fakamalosi atu a ia ki a latou e pelā me ne “fanau katoa o te mainaga” ke ‘ala faeloa kae tausi olotou mafaufau ke ‵lei.’ (Faitau te 1 Tesalonia 5:1-6.) I aso nei, e fakatali‵tali eiloa tatou ki te fakaseaiga o Papelonia te Sili, te emupaea o lotu ‵se i te lalolagi. Ka fakamailoga ki te mea tenei a te kamataga o te aso lasi o Ieova. Kae fakafetai tatou i ‵tou malamalama i te fakagaluegaga o te fuafuaga a Ieova ko gasolo aka eiloa ki luga. E auala foki i te fakapotopotoga, e maua faeloa ne tatou a fakamasauaga i te taimi tonu kolā e fesoasoani mai ke tausi ‵tou mafaufau ke ‵lei. A te fakatāua o faka‵pulaga konei e aumai sāle e mafai o fakamalosi aka i ei a ‵tou fakaikuga ke tuku atu ki te Atua ‘se taviniga tapu mai te fakaaogaga o te malosi o ‵tou mafaufau.’—Loma 12:1.

5, 6. (a) I te lua o ana tusi ki tino Tesalonia, se a te mea ne faipati ki ei a Paulo? (e) Se a te mea ko pili fua o fai ne te Atua e auala i a Iesu, kae se a te mea e ‵tau mo tatou o ‵sili ifo ki a tatou eiloa?

⁵ Mai tua malie eiloa o tena tusi muamua ki Kelisiano i Tesalonia, ne avatu ne Paulo te lua o ana tusi ki a latou. I konei, ne faipati tou tagata ki te fakalavelave lasi telā ka oko mai, ko te taimi telā ka fakaoko atu ei ne te Aliki ko Iesu a te fakamasinoga a te Atua ki a “latou kolā e se iloa ne latou te Atua mo latou kolā e se faka‵logo ki te tala ‵lei.” (2 Tesa. 1:6-8) E fakaasi mai i te mataupu  e 2 o te tusi tenei i nisi tino i te fakapotopotoga tenā ne sōna “manava‵se” e uiga ki te aso o Ieova, me ne ma‵natu aka latou me ko pili eiloa o oko mai i te taimi tenā. (Faitau te 2 Tesalonia 2:1, 2.) Ne foliki fua a te mea ne iloa ne Kelisiano muamua konā i te fakagaluegaga o te fuafuaga a Ieova, e pelā mo te mea ne fakailoa fakamuli mai ne Paulo e uiga ki valoaga: “E se katoatoa te ‵tou iloa, kae e se katoatoa foki a ‵tou valoaga. Kafai e oko mai te mea telā e katoatoa, ka fakaseai atu ei te mea telā e se katoatoa.” (1 Koli. 13:9, 10) Kae ne mafai o fesoasoani atu ki a latou a faka‵pulaga fakaosofia kolā ne tusi ne Paulo, te apositolo ko Petelu, mo nisi taina fakaekegina fakamaoni i te taimi tenā ke fakatumau te lotou fakatuanaki.

⁶ Ke faka‵tonu aka a mea, ne fakamatala mai ne Paulo me e ‵tau o ‵sae mai se aposetasi lasi mo “te tino solitulafono” mai mua o te aso o Ieova.a Mai tua i konā, “ka fakaseai atu” ei ne te Aliki Iesu, i tena taimi tonu, a latou katoa kolā ne fakaloiloigina. Ne taku tonu mai ne te apositolo a te pogai o te fakamasinoga tenei ki luga i a latou; me “ne seki talia ne latou te munatonu.” (2 Tesa. 2:3, 8-10) Se mea ‵lei ke fesili ifo tatou ki a tatou eiloa: ‘E pefea te lasi o toku fiafia ki te munatonu? E mata, e ‵pau toku malamalama mo mainaga fakamuli nei kolā ne fakatoka i itulau o te mekesini tenei mo nisi tusi faka-te-Tusi Tapu kolā ne fakatoka mō tino o te Atua i te lalolagi kātoa?’

KE POTO KOE I TE FILIFILIGA OU TAUGASOA

7, 8. (a) Ne a tulaga fakama‵taku ne ‵tau o taua atu ki ei a Kelisiano muamua? (e) Se a te mea telā e fakamataku mō Kelisiano ‵tonu i aso nei?

⁷ A te tonuga loa, ka fakafesagai a Kelisiano mo nisi tulaga fakama‵taku i tafa o mea kolā e fai mai ne aposetate mo olotou akoakoga. Ne tusi atu a Paulo ki a Timoteo i “te manako ki tupe ko te mafuaga o mea ma‵sei katoa.” Ne fakaasi mai ne te apositolo i “nisi tino kolā e va‵lea ki ei ko oti ne ‵to ki tua mo te fakatuanaki kae ko fati‵fati nei olotou loto i puapuaga e uke.” (1 Timo. 6:10) Kae e fakama‵taku foki a “galuega o te foitino.”​—Kala. 5:19-21.

⁸ E mafai eiloa koe o loto fakafetai ki te pogai ne fakailoa atu ei ne Paulo mo te loto malamalama ki te kau Tesalonia e uiga ki te tulaga fakamataku ka fai ne tāgata penā, kolā e taku ne ia i nisi koga aka me ne “apositolo ‵loi.” E aofia i a latou ko tāgata kolā e “‵fuli faka‵kotua ne latou a mea ke ‵futi atu ei a soko ki a latou.” (2 Koli. 11:4, 13; Galu. 20:30) Ne fakamālō fakamuli atu Iesu ki te fakapotopotoga i Efeso me ne seki “talia ne [latou] a tāgata ma‵sei.” Ne “tofotofo” ne te kau Efeso konā a tino taki tokotasi kolā, a te tonuga loa ne apositolo ‵loi, ne tino ‵loi. (Faka. 2:2) Se mea ‵lei, me ne tuku atu ne Paulo a te fakamalosiga tenei i te lua o ana tusi ki te kau Tesalonia: “Nei la, ko tuku atu ne matou a fakatonuga, e oku taina, i te igoa o te Aliki ko Iesu Keliso, ke ‵kalo keatea koutou mai so se taina telā e ola i se olaga sonafai.” I konā, ne taku fakapitoa mai ne ia a Kelisiano kolā e “se fia galue.” (2 Tesa. 3:6, 10) Kafai ne fakatonu mai ke ‵kalo kea‵tea mai te taina telā e ola i se olaga sonafai, kae sili atu la te tāua ke ‵kalo kea‵tea mai i a latou kolā ko kamata o fai a faifaiga aposetate! Ao, a te ‵pili o fesokotakiga mo tino taki tokotasi penā i taimi ko ‵teka ne fakamataku ‵ki kae e ‵tau eiloa o ‵kalo kea‵tea mai i ei​—kae penā foki i aso nei.​—Faata. 13:20.

9. Kaia e ‵tau ei mo tatou o ‵kalo kea‵tea mai se tino telā ko kamata o faipati ki manatu tuku taumate io me fai a tala fakamasei tino?

⁹ Ko pili ‵ki tatou ki te kamataga o te fakalavelave lasi mo te gataga o te olaga masei tenei, tela la, a faka‵pulaga fakaosofia kolā ne tuku mai i te senitenali muamua ko tāua malosi atu nei. E se ma‵nako lele tatou ke ‘se lavea ne tatou te aoga’ o te alofa tauanoa o Ieova kae sē maua te ola se-gata-mai telā ne folafola mai, faitalia me i te lagi io me ko te lalolagi. (2 Koli. 6:1) Kafai e vau se tino ki ‵tou fakatasiga kae taumafai o fai tatou ke sau‵tala ki manatu tuku taumate io me ko tala fakamasei tino, e ‵tau mo tatou o ‵kalo kea‵tea mai i ei.​—2 Tesa. 3:13-15.

“PUKE ‵MAU KI MEA KO OTI NE AKOAKO ATU”

10. Ne a mea ne fakamalosi atu ki Kelisiano i Tesalonia ke puke ‵mau ki ei?

¹⁰ Ne fakamalosi atu a Paulo ki ana taina i Tesalonia ke “‵tu ‵mautakitaki” kae ‵piki ‵mau ki mea ko oti ne tauloto ne latou. (Faitau te 2 Tesalonia 2:15.) Ne a “mea” ko oti ne akoako atu ki a latou? E mautinoa me e se ko mea kolā e akoako ne lotu ‵se kae fakatāua ne latou, kae ko mea kolā e maua i Tusitusiga Tapu. Kae, e fakasino atu eiloa a Paulo ki akoakoga kolā ne maua ne ia mo nisi tino mai i a Iesu e pelā foki mo mea kolā ne fakamalosi atu te Atua ki apositolo ke fakaoko atu, kae ko te ukega o mea ne fai mo vaega o Tusitusiga Tapu. Ne fakamālō atu Paulo ki ana taina i te fakapotopotoga i Kolinito ona ko te mea telā ne tusi mai ne ia, me “e masaua ne koutou au i mea katoa kae e puke ‵mau koutou ki mea kolā ne tuku atu ne au ki a koutou.” (1 Koli. 11:2) Ne maua mai a akoakoga penā mai i se tino fakatuagagina kae e ‵tau eiloa o tali‵tonu ki ei.

11. I auala fea e mafai ei o pokotia a nisi tino māfai e fakaloiloigina?

¹¹ I te taimi ne tusi atu ei ki te kau Epelu, ne fai atu a Paulo ke ‵saga tonu ki auala e lua kolā e mafai ei o galo te fakatuanaki o se Kelisiano, ko fakatamala ei o tu ‵mautakitaki. (Faitau te Epelu 2:1; 3:12.) Ne faipati eiloa tou tagata ki te ‘tapeapea kea‵tea’ mo te ‘fano kea‵tea.’ A te pōti telā e tapeapea kea‵tea mai te kaugutu o te vaitafe e tapeapea malielie eiloa kae sē lavea i te taimi muamua. E fanofano malielie eiloa, ko te mea loa ko tai ‵mao. I te suā feitu, a te tagata telā e usu ne ia tena pōti kea‵tea mai te kaugutu o te vaitafe, ne faka‵mao eiloa ne ia tena pōti mai i ei. E fakamatala faka‵lei mai i te avā mea konā a te tulaga o nisi tino kolā ne fakaloiloigina, talia ei ne latou ke vāivāi olotou loto tali‵tonu ki te munatonu.

12. Ne a mea e kausaki ki ei i aso nei kolā e mafai o fakamasei mai ki ‵tou feitu faka-te-agaga?

¹² Kāti e tenā te mea ne pokotia ei a nisi tino i Tesalonia. Kae e a i aso nei? E uke ‵ki a mea fakamāumāu taimi e kausaki ki ei a tino. Mafaufau ki te fia o itula ne fakamāumāu ne koe i te faiga o fesokotakiga i te itaneti, faitau kae tali a fekau i te meli iti, kausaki atu mo te loto finafinau ki mea kolā e fiafia ki ei, io me ko te maua faeloa o tala ki tafaoga. E mafai ne so se mea i mea konei o fai se Kelisiano ke sipa kea‵tea kae fakavāivāi atu ki tena loto finafinau. Kae se a te ikuga? E mafai o pokotia a te faiga o ‵talo mo te loto kātoa, te sukesuke ki te Muna a te Atua, te kau ki fakatasiga, mo te talaiga o te tala ‵lei. Ne a mea e mafai o fai ne tatou ke ‵kalo kea‵tea mai te vave o ‵numi ‵tou mafaufau?

TE PUIPUIGA KE MO A E ‵NUMI

13. E pelā mo te mea ne ‵valo mai, se a te uiga masani o tino e tokouke, kae se a te mea ka puipui ki ei ‵tou fakatuanaki mai te manatu mā‵ma ki ei?

¹³ A te mea mautinoa e tasi telā e manakogina ke fai ne tatou ko te iloa faeloa o te taimi e ‵nofo ei tatou mo te faigofie o fesokotaki mo latou kolā e se fia iloa ne latou i taimi konei ko “aso fakaoti.” Ne tusi mai te apositolo ko Petelu e uiga ki te vaitaimi tenei: “Ka o‵mai a tino fakatauemu mo olotou pati fakatauemu, e ‵tusa eiloa mo olotou manakoga kae fai mai: ‘Ne folafola mai i a ia ka toe fakatasi mai, tefea nei la a ia? Mai te taimi ne ‵moe ei a ‵tou tupuga i te mate, e seai eiloa se ‵fuliga ne lavea atu ki mea katoa talu mai te taimi ne kamata ei o faite a mea.’” (2 Pe. 3:3, 4) A te fai‵tau kae sukesuke faeloa ki te Muna a te Atua i aso katoa ka fesoasoani mai ke ‵saga tonu tatou ki te vaitaimi ko ‵nofo tatou i ei i te fakasologa o taimi​—e fakailoa mai faeloa ki a tatou i a tatou ko ‵nofo i “aso fakaoti.” A te aposetasi telā ne folafola mai ko leva ne fakaasi faka‵sau mai kae koi tumau eiloa ke oko mai ki aso nei. Koi nofo mai eiloa te “tino solitulafono” kae ‵teke atu ki tavini a te Atua. Ona ko te mea tenā, e ‵tau mo tatou o tumau i te mataala malosi i te aso o Ieova ko pili ‵ki mai.​—Sefa. 1:7.

14. E puipui pefea tatou ne te fakalave‵lave faeloa i te galuega a te Atua?

¹⁴ Ko oti ne fakatalitonu mai i tala i te auala e tasi e tumau ei tatou i te matapula‵pula kae ‵kalo kea‵tea mai te ‵numi o te mafaufau, ko te kau faeloa ki te talaiga o te tala ‵lei o te Malo. Tela la, i te taimi ne fakatonu atu ei a Iesu, te Ulu o te fakapotopotoga, ki ana soko ke fai a soko i tino o atufenua katoa, akoako atu latou ke mafaufau ki mea ko oti ne akoako atu ne ia, ne tuku mai i ei ne ia se fakatakitakiga telā ka puipui i ei ana soko. (Mata. 28:19, 20) A te faiga o tena fakatonuga e fakamalosi mai ki a tatou ke loto finafinau i te galuega talai. E mata, e mafaufau koe i ou taina i Tesalonia ne lotoma‵lie o talai kae akoako e aunoa mo te fiafia tonu, e pelā fua me se galuega e sonafai? Mafaufau ki pati a Paulo ki a latou: “Ke mo a ma ‵teke ne koutou a galuega o te agaga a te Atua i otou loto. Ke se fakaseaoga ne koutou a pati fakavaloaga.”(1 Tesa. 5:19, 20) Ko oko eiloa i te fakamalosi loto o valoaga kolā e suke‵suke tatou ki ei kae fakailoa atu ki nisi tino!

15. Ne a mea aoga e mafai o mafau‵fau tatou ki ei i tapuakiga a kāiga?

¹⁵ E manino ‵lei me e ma‵nako tatou o fesoasoani ki ‵tou kāiga ke ati aka te lotou fia‵fia ki te galuega talai. Ne iloa ne taina mo tuagane e tokouke i te auala e tasi ke fai a te mea tenā, ko te fakaaoga se vaega o te lotou tapuakiga a kāiga ki mea kolā ka fai i te galuega talai. Kāti ka iloa aka i ei ne koe me se mea aoga ke sau‵tala ki te auala ka toe āsi atu ei a tino o te kāiga ki tino fia‵fia kolā ne maua ne latou. Ne a mea ka fai‵pati latou ki ei i te suā āsiga? Ne a mataupu ka fakamalosi aka ei a te tumau o te fiafia i āsiga konā? Se a te ‵toe taimi ‵lei ke āsi ki tino? E fakaaoga foki ne tino e tokouke a nisi taimi o te tapuakiga a kāiga ki fakatasiga a te fakapotopotoga, ko te mea ke iloa ne latou a mea kolā ka fai i fakatasiga konā. E mata, e mafai ne koe o fai a mea e uke atu o fakatoka ke fai se tusaga i ei? A te fai ou tusaga ka fakamalosi aka ei a tou fakatuanaki kae fesoasoani atu ki a koe ke ‵kalo kea‵tea mai te ‵numi o tou mafaufau. (Sala. 35:18) Ao, a te sau‵tala fakatasi i tapuakiga a kāiga ka tuku mai i ei se puipuiga ke ‵teke atu ki manatu tuku taumate kae fakalotolotolua.

16. Se a te fakamalosiga e maua ne Kelisiano fakaekegina ke tumau te ma‵losi o olotou mafaufau?

¹⁶ Kafai e fakaataata ne tatou a te auala ne fakamanuia ei ne Ieova ana tino i tausaga e uke fakatasi mo te gasolo aka o te malamalama i valoaga o te Tusi Tapu, e mafai o loto fakafetai tatou ki te taui fakaofoofogia telā e takato mai mua. E maua ne te kau fakaekegina a te fakamoemoega ke ‵kau fakatasi mo Keliso i te lagi. Se fakamalosiga eiloa ki a latou ke tumau te ma‵losi o olotou mafaufau! E ‵tau eiloa o fakaaoga ki a latou a pati a Paulo kolā ne tusi atu ki te kau Tesalonia: “E ‵tau faeloa o fakafetai matou ki te Atua ona ko koutou, e oku taina kolā e alofa ki ei a Ieova, me ne filifili koutou ne te Atua . . . mai te fakatapuga o koutou ki tena agaga mo te otou fakatuanaki ki te munatonu.”​—2 Tesa. 2:13.

17. Se a te fakamalosiga e maua ne koe i pati o te 2 Tesalonia 3:1-5?

¹⁷ E ‵tau foki mo latou kolā e fakamoe‵moe ke ola ki se-gata-mai i te lalolagi o taumafai ke ‵kalo kea‵tea mai te vave o ‵numi olotou mafaufau. Kafai koe e fakamoemoe ke ola i te lalolagi, ke faka‵goto ki tou loto a te fakamalosiga alofa telā ne tusi atu ne Paulo ki taina fakaekegina i Tesalonia. (Faitau te 2 Tesalonia 3:1-5.) E ‵tau mo tatou taki tokotasi o ‵poko ‵tou loto fakafetai ki fakamalosiga a‵lofa konā. Ao, ne tuku mai i tusi ki te kau Tesalonia a faka‵pulaga tāua e uiga ki manatu tuku taumate io me ko manatu fakalotolotolua. A te ola o tatou i te taimi tenei ko pili ‵ki mai ei te gataga, konei eiloa a faka‵pulaga kolā e loto fakafetai malosi ki ei a Kelisiano i aso nei.