Kaia e ‵Tau o ‵Saga Tonu Tatou ki te Malo o te Atua?

E lau i miliona o tino i te lalolagi kātoa e tali‵tonu me i te Malo o te Atua ko te lotou fakamoemoega mō aso mai mua. E tau‵tali latou ki te fakaakoakoga telā ne tuku atu ne Iesu ki ana soko ke ‵talo atu penei: “Ke oko mai tou Malo, ke fai te mea e loto koe ki ei i lalo nei.”—Mataio 6:10, Tusi Tapu Tuvalu.

E tiga eiloa e tokouke a tino e ‵saga tonu ki te Malo o te Atua, kae ko te ukega o lotu e se fakatāua malosi ne latou te mea tenei. Ne fai mai te tino tusitala ko H. G. Wells me ne “fakatāua malosi ne Iesu a te akoakoga e uiga ki te Malo o te Lagi” kae ne fai mai foki tou tagata, me tenei eiloa te akoakoga e “lasi ‵ki te sē fakatāua ne lotu Kelisiano.”

Ne fakatāua malosi ne Molimau a Ieova a te Malo o te Atua. Ke mafaufau ki te mea tenei: Ko oti ne ‵lomi a te ‵tou mekesini tenei ki ‵gana e 220. Toeitiiti kae kātoa te 46 milliona o ‵kopi ko oti ne ‵lomi aka, telā e fakaasi mai ei me ko te ‵toe mekesini ne lauiloa tena tufatufaatuga i te lalolagi kātoa. Kae se a te manatu tāua e sae mai i te mekesini tenei? Ke mafaufau ki tena igoa: Te Faleleoleo Maluga e Folafola Atu ei te Malo o Ieova.a

Kaia ne fai ei ne Molimau a Ieova a taumafaiga e uke i te folafola mo te fakasalalau atu o te Malo o te Atua? A te pogai e tasi, e tali‵tonu tatou me i te Malo o te Atua ko te fekau tāua telā e maua i loto i te ‵toe tusi tāua i te lalolagi kātoa—ko te Tusi Tapu. Tela la, e mafai eiloa o fai atu tatou me i te Malo o te Atua ko te faka‵leiga fua e tasi ki fakalavelave kolā e fe‵paki mo tino i aso nei.

I te ‵saga faka‵lei atu ki te Malo o te Atua, ne taumafai malosi a Molimau a Ieova o tau‵tali i te fakaakoakoga telā ne tuku mai ne Iesu. I tena nofoga i te lalolagi, ne fai eiloa te Malo o te Atua mo fai te ‵toe mea tāua i tena olaga mo tena galuega talai. (Luka 4:43) Kaia ne fakatāua malosi ei ne Iesu a te Malo? Kae e pefea te tāua ki a koe? E ‵kami atu eiloa koe ke mafaufau ki tali mai te Tusi Tapu kolā ka sau‵tala ki ei i te suā mataupu.