“Ke Oko Mai Tou Malo”—Se ‵Talo e Fai Faeloa ne te Fia Miliona o Tino
Kai ‵talo aka loa koe ke na oko mai te Malo o te Atua? I se fia senitenali ko ‵teka, ko fai fakafia ne te fia miliona o tino a pati konei “Ke oko mai tou malo.” Kaia e ‵talo ei latou penā? Me ne fai atu a Iesu ki ana soko ke ‵talo ke na oko mai te Malo o te Atua.
Muamua la, ne seki malamalama a soko o Iesu i pati katoa ne fai mai ne ia e uiga ki te Malo. Ne fesili atu latou ki a ia i se taimi: “Te Aliki, e a, ka toe fakafoki mai ne koe a te malo ki Isalaelu i te taimi tenei?” Kāti ne ‵poi eiloa latou me seki tali ‵tonu atu a Iesu ki a latou. (Galuega 1:6, 7) E mata, e fakauiga i ei me ka se mafai eiloa o iloa ne tatou a tali ki ‵tou fesili e uiga ki te Malo? Ikai e se penā loa!
A te lomiga tenei o Te Faleleoleo Maluga ka fesoasoani atu ki a koe ke tali aka a fesili konei:
Kaia e ma‵nako ei tatou ki te Malo o te Atua?
Ko oi te Tupu i te Malo o te Atua?
Ka pule mai mafea a te Malo o te Atua ki te lalolagi?
Ne a mea ka fai ne te Malo o te Atua?
Kaia e ‵tau o fakaiku aka ne tatou ke ‵lago atu ki te Malo o te Atua i te taimi nei?
Se a te Malo o te Atua?