Auala e Lima ke Maua ei se Akoga Faka-te-Tusi Tapu
1. Kafai e faigata ke maua se akoga faka-te-Tusi Tapu i ‵tou koga talai, ne a mea e ‵tau o fai ne tatou, kae kaia?
1 E mata, e faigata ki a koe ke maua se tino ke sukesuke mo koe ki te Tusi Tapu? Ke tumau eiloa i te taumafai. E fakamanuia ne Ieova a latou kolā e se ‵fiu i te faiga o tena loto. (Kala. 6:9) E fakaasi mai i lalo nei a manatu fesoasoani ke fesoasoani atu ki a koe.
2. E mafai pefea o fakaaoga ne tatou a te fesili ‵tonu atu ke kamata se akoga?
2 Fesili ‵Tonu Atu: E iloa ne tino e tokouke me e tufa sāle atu ne tatou a Te Faleleoleo Maluga mo te Ala Mai!, kae kāti e se iloa ne latou me e ofo sāle atu foki ne tatou a a‵koga faka-te-Tusi Tapu. Kaia e se taumafai ei koe o fesili ‵tonu atu māfai ko fanatu koe mai fale ki fale? E mafai o fesili atu koe ki tino fia‵fia kolā e āsi atu koe ki ei me e ma‵nako latou o fai se akoga faka-te-Tusi Tapu. Kafai e se talia ne latou, e mafai o tumau koe i te tukuatuga o tusi kae fakamalosi aka te lotou fia‵fia. Ne āsi atu se taina ki se tauavaga kolā e masani o tuku atu ne ia a mekesini ki a lāua i te fia o tausaga. Mai tua o te tukuatuga ne ia a mekesini ‵fou, ne mafuli aka tou tagata o fano kae toe mafaufau aka ke fesili atu: “E a, e ma‵nako koulua ke fai se akoga faka-te-Tusi Tapu?” Ne ofo masei eiloa a ia me ne tali atu lāua ao. Nei la, ko oti ne papatiso lāua.
3. E mata, e ‵tau o mafau‵fau tatou me i tino katoa kolā e ‵kau mai ki fakatasiga e fai olotou akoga faka-te-Tusi Tapu ne se tino? Fakamatala mai.
3 Tino Kolā e ‵Kau Atu ki Fakatasiga: Ke mo a ma mafaufau koe me i tino fia‵fia kolā e lavea ne koe i fakatasiga a te fakapotopotoga e isi se tino e fai ne ia olotou akoga faka-te-Tusi Tapu. E lipoti mai se taina: “E sili atu i te āfa o aku akoga faka-te-Tusi Tapu ne kamata mai i te faipati atu ki tino kolā e ‵kau mai ki fakatasiga.” Ne fakaiku aka ne se tuagane ke fanatu a ia ki se fafine mata ma telā e isi ne ana tama‵liki fafine papatiso i te fakapotopotoga. Ko oti ne kau sāle mai te fafine tenā ki fakatasiga i tausaga e 15 kae ne fanatu faeloa ki te Kingdom Hall mai mua faeloa o kamata a te fakatasiga kae foki fakavave i te taimi eiloa e palele atu te fakatasiga. Ne talia ne te fafine ke fai tena akoga kae fakamuli ne vau ei a ia ki loto i te munatonu. Ne tusi mai te tuagane tenā, penei: “Ko oko eiloa toku fanoanoa me ne faka‵tali au ki se 15 tausaga ke fesili atu me e fia fai sena akoga!”
4. E mafai pefea o maua ne koe se akoga faka-te-Tusi Tapu mai i te fesili atu ki nisi tino kae fakailoa atu foki me e avanoa koe o fai se akoga?
4 Fesili ki Nisi Tino: E taumafai se tuagane ke kau atu a ia ki nisi tino i olotou akoga faka-te-Tusi Tapu. Mai te taliaga a te faiakoga, i te fakaotiga o te akoga, e fesili atu tou fafine ki te tino akoga me e iloa ne ia a nisi tino kolā kāti e fia fai olotou akoga. Kafai ko ofo atu te tusi ko te Akoakoga a te Tusi Tapu ki se tino telā ne āsi sāle atu koe ki ei, e mafai o fesili atu koe: “E iloa ne koe se tino telā e manako ki se ‵kopi o te tusi tenei?” I nisi taimi, ko se mafai ne tino talai io me ko paenia o fai se akoga mo se tino telā e fetaui mo latou i te koga talai ona ko nisi fakanofonofoga. Tela la, fakailoa atu ki nisi tino me e avanoa koe ke fai se akoga faka-te-Tusi Tapu.
5. Kaia e ‵lei ei ke fesili atu ki avaga sē tali‵tonu o tino i te fakapotopotoga me e fia fai olotou akoga faka-te-Tusi Tapu?
5 A‵vaga sē Tali‵tonu: E mata, e isi ne tino talai i te fakapotopotoga kolā e a‵vaga ki tino sē tali‵tonu? E se fia fai‵pati atu a nisi tino sē tali‵tonu e uiga ki te Tusi Tapu mo olotou avaga Kelisiano kae e mafai o talia ne latou se ‵kamiga ke suke‵suke mo se tino mai tafa o olotou kāiga? E masani eiloa o ‵lei atu ke fesili muamua atu ki te avaga talitonu ko te mea ke iloa ne koe a te ‵toe auala ‵lei ke fesili atu ki te avaga sē talitonu.
6. E pefea te tāua o ‵talo i te taimi e taumafai ei koe ke maua se akoga?
6 ‵Talo: Ke mo a ma manatu māmā ki te malosi o te ‵talo. (Iako. 5:16) E tauto mai a Ieova me ka fakalogologo mai a ia ki ‵tou fakamolemole māfai e fetaui ‵lei mo tena loto. (1 Ioa. 5:14) Ne kamata o ‵talo atu se taina e tokotasi telā ne fakalavelave malosi sāle ke maua sena akoga faka-te-Tusi Tapu. Ne manavase tena avaga me e mata, e mafai ne ia o tausi atu ki tena akoga faka-te-Tusi Tapu, maise eiloa māfai e uke a fakalavelave o tena akoga faka-te-Tusi Tapu. Tela la, ne fakailoa atu ne tou fafine a mea konei e manavase a ia ki ei i te taimi e ‵talo atu ei a ia ke maua se akoga a tena avaga. Ne maua eiloa te tali ki lā ‵talo kāti i se lua vaiaso mai tua ifo i te taimi ne maua ei ne se paenia i te fakapotopotoga, se tagata telā ne fia fai sena akoga kae ne tuku atu ei ne ia ki te taina tenei. Ne tusi mai te avaga, penei: “Ki so se tino telā e mafaufau me ko tō faigata ke fai se akoga faka-te-Tusi Tapu, e fai atu au, penei: Ke taku ‵tonu atu te mea tenā i au ‵talo, kae sa fakagata tou ‵talo atu e uiga ki ei. Ko sili atu nei te fia‵fia o māua i lō te mea ne mafaufau au ki ei.” Mai i te tumau i te taumafai, e mafai foki o maua ne koe se akoga faka-te-Tusi Tapu kae ka lagona foki te fiafia o te fesoasoani atu ki se tino ke fanatu i te “auala telā e tau atu ki te ola.”—Mata. 7:13, 14.