A Fakamasauaga A Ieova E Fakatuagagina

1. Ne a mataupu e sau‵tala faeloa ki ei a tino o te Atua, kae e aoga pefea ki a tatou a te ‵toe suke‵suke ki ei?

A KOI fakatokatoka koe ki se sukesukega ki te Faleleoleo Maluga, kai mafaufau aka eiloa koe penei, ‘E mata, ne seki sukesuke matou ki te mataupu tenei muamua?’ Kafai ne ‵kau fakatasi koe mo te fakapotopotoga Kelisiano mō se vaitaimi, kāti e matea ne koe i nisi ulutala ko oti ne sau‵tala sāle ki ei. A te sukesuke e uiga ki te Malo o te Atua, te togiola, te faiga o soko, mo uiga pelā mo te alofa mo te fakatuanaki, se vaega masani o ‵tou mea‵kai faka-te-agaga. Mai i te ‵toe sukesuke ki mataupu konei, ko fesoasoani mai ki a tatou ke tumau te ma‵losi o ‵tou fakatuanaki kae ke fai “mo tino kolā e fakagalue a te muna, kae e se ko te fakalogo‵logo fua ki ei.”​—Iako. 1:22.

2. (a) Se a te mea e fakasino atu faeloa ki ei a fakamasauaga a te Atua? (e) E ‵kese pefea a fakamasauaga a te Atua mo tulafono a tāgata?

² A te nauna Epelu telā e fakauiga ki te “fakatonuga” io me ko fakamasauaga e masani o fakasino atu ki tulafono mo fakatonuga kolā e tuku atu ne te Atua ki ana tino. E ‵kese mo tulafono a tāgata kolā e manakogina faeloa ke fakatonutonu aka io me faka‵fou, a tulafono mo fakatonuga a Ieova e fakatuagagina faeloa. E tigā eiloa e tuku atu a nisi fakatonuga mō se taimi io me se tulaga fakapito, e se mafai o ‵se io me sē ‵lei. Muna a te faisalamo: “Au fakatonuga e ‵tonu faeloa ki te se gata mai.”​—Sala. 119:144.

3, 4. (a) Ne a mea e mafai o aofia i fakamasauaga a Ieova? (e) Ka aoga pefea ki tino Isalaelu māfai e faka‵logo latou ki ei?

³ E se taumate ne matea ne koe i fakamasauaga a Ieova e aofia i ei a faka‵pulaga i nisi taimi. Ne maua faeloa ne te fenua o Isalaelu a faka‵pulaga e auala i pelofeta a te Atua. Pelā me se fakaakoakoga, mai mua malie eiloa o ulu atu te kau Isalaelu ki te Fenua o te Folafolaga, ne fai atu a Mose ki a latou: “Sa fulitua ki te Aliki [Ieova] o tapuaki atu ki nisi atua fakaatea. Kafai e fai koutou penā, ko te Aliki ka kaitaua ki a koutou.” (Teu. 11:16, 17) E fakaasi mai i te Tusi Tapu me ne tuku atu ne te Atua ki ana tino a fakamasauaga e uke.

⁴ I nisi taimi, ne fakamalosi atu a Ieova ki tino Isalaelu ke ma‵taku ki a ia, faka‵logo ki tena leo, kae faka‵malu a tena igoa. (Teu. 4:29-31; 5:28, 29) Kafai e faka‵logo latou ki fakamasauaga konei, e maua eiloa ne latou a fakamanuiaga e uke.​—Levi. 26:3-6; Teu. 28:1-4.

TE AUALA NE ‵SAGA ATU EI A TINO ISALAELU KI FAKAMASAUAGA A TE ATUA

5. Kaia ne taua ei a Ieova mō te tupu ko Hesekia?

⁵ I te tala fakasolopito o te kau Isalaelu, ne tausi eiloa te Atua ki tena tautoga. Pelā me se fakaakoakoga, i te taimi ne oso atu ei a te tupu o Asulia ko Sanelivi o taumafai o fakatakavale a te tupu ko Hesekia, ne fesoasoani atu a Ieova mai te ugamaiga o se agelu. I te po fua e tasi, ne tamate ne te agelu a te Atua “a sotia mo ofisa” o te kautau Asulia, tenā ne faimālō ei a Sanelivi ke toe foki ki tena fale mo te māsiasi. (2 Nofo. 32:21; 2 Tupu 19:35) Kaia ne taua ei te Atua mō te tupu ko Hesekia? Me i “a ia [Hesekia] e fakamaoni eiloa ki te Aliki [Ieova] kae e seki ‵teke eiloa ki ei; e tausi faka‵lei eiloa a ia ki fakatonuga katoa a te Aliki [Ieova].”​—2 Tupu 18:1, 5, 6.

6. Ne fakaasi atu pefea ne te tupu ko Iosia a tena talitonu fakamaoni ki a Ieova?

⁶ A te suā fakaakoakoga o se tino telā ne fakalogo ki fakatonuga a Ieova ko te tupu ko Iosia. E kamata mai i te valu tausaga, “ne fai ne ia a mea e fiafia ki ei te Aliki [Ieova] . . . me ne tausi fakamaoni eiloa a ia ki tulafono katoa a te Atua. “ (2 Nofo. 34:1, 2) Ne fakaasi atu ne Iosia a tena talitonu ki a Ieova mai te faka‵maga o te fenua mai i tupua kae toe fakafoki mai a te tapuakiga tonu. I te faiga penā, ne maua ei ne te fenua kātoa a fakamanuiaga kae e se ko Iosia fua.​—Faitau te 2 Nofoaiga Tupu 34:31-33.

7. I te taimi ne fakaseaoga ei ne tino Isalaelu a fakamasauaga a Ieova, se a te ikuga ne maua mai i ei?

⁷ Se mea fakafanoanoa i tino o te Atua ne seki tali‵tonu katoatoa faeloa ki fakamasauaga a Ieova. I senitenali e uke, ne fulifuli faeloa ne latou olotou mafaufau i te va o te fakalogo mo te sē fakalogo. I te taimi ne gasolo ifo ei o vāivāi te lotou fakatuanaki, ne fakaaoga sāle ki a latou a pati a te apositolo ko Paulo, ko “agina valevale ne matagi o akoakoga.” (Efe. 4:13, 14) Kae pelā mo te mea ne ‵valo mai, kafai e se tali‵tonu fakamaoni latou ki fakamasauaga a te Atua, e tau ne latou a fuataga ‵kona.​—Levi. 26:23-25; Iele. 5:23-25.

8. E mafai pefea o tauloto tatou mai i te fakaakoakoga a te kau Isalaelu?

⁸ I te auala fea e maua ei ne tatou a mea aoga mai i te fakaakoakoga a te kau Isalaelu? E pelā mo te mea ne fai ne latou, e maua ne tavini a te Atua i aso nei a pati fakatonutonu mo pati polopoloki. (2 Pe. 1:12) E pelā ne tino saoloto, e mafai tatou o filifili ke faka‵logo ki a Ieova io me kausaki atu ki mea kolā e ‵tonu i ‵tou kilokiloga. (Faata. 14:12) Ke mafau‵fau tatou ki nisi pogai e ‵tau ei o tali‵tonu fakamaoni tatou ki fakamasauaga a Ieova mo te auala e maua ei ne tatou a mea aoga mai te faka‵logo ki ei.

FAKALOGO KI TE ATUA KE OLA KOE

9. I te taimi ne ma‵laga ei te kau Isalaelu i loto i te koga lavaki, ne fakatalitonu atu pefea ne Ieova me e ‵lago atu a ia ki a latou?

⁹ I te taimi ne ma‵laga atu ei a te kau Isalaelu i se malaga loa e 40 tausaga “i te vao lauefa kae fakamataku,” ne seki tuku muamua atu ne Ieova a fakamatalaga fakapito ki te auala ka ‵taki, puipui, kae tausi atu ei a ia ki a latou. Ne fakaasi atu faeloa ne ia me e ‵tau o tali‵tonu fakamaoni latou ki a ia mo ana fakatonuga. Ne fakamasaua atu a Ieova ki te kau Isalaelu me e ‵lago atu a ia ki a latou mai te fakaaogaga o se pou kaumana i te ao mo se pou afi i te po, i te taimi e ‵taki ei ne ia latou i loto i te fenua sē uiga talimālō tenā. (Teu. 1:19; Eso. 40:36-38) Ne tuku mai foki ne ia a mea kolā e ma‵nako latou ki ei. “A olotou gatu e se mafai o ma‵sei, mo olotou vae e seki ‵pala aka eiloa.” E tonu, “ne tuku atu faeloa ne koe a mea e ma‵nako latou ki ei.”​—Nee. 9:19-21.

10. E takitaki pefea ne Ieova ana tino i aso nei?

¹⁰ E ‵tu atu a tavini a te Atua i aso nei i te kaugutu o se lalolagi fou kae amiotonu. E mata, e tali‵tonu fakamaoni tatou ki a Ieova ke tuku mai ne ia a mea kolā e manakogina ne tatou ko te mea ke ‵sao atu tatou i te “fakalavelave lasi” telā ka oko mai? (Mata. 24:21, 22; Sala. 119:40, 41) E tonu, ne seki fai ne Ieova se pou kaumana io me se pou afi ke takitaki ei tatou ki loto i te lalolagi fou. Kae ne fakaaoga ne ia a tena fakapotopotoga ke fesoasoani mai ke tumau tatou i te matapula‵pula. Pelā me se fakaakoakoga, e uke a fakamalosiga ne tuku mai ke ati aka ne tatou a ‵tou feitu faka-te-agaga e auala i te fai‵tau ki te Tusi Tapu, faiga o se Tapuakiga a te Kāiga i te afiafi, pelā foki mo te ‵kau faeloa ki te fakatasiga mo te galuega talai. E mata, ko oti ne fai ne tatou ne fakatokaga ke tau‵tali i fakatonuga konei? Ka fesoasoani mai a te faiga penā ke ati aka ne tatou a te vaegā fakatuanaki telā ka fai ei ke ulu ola atu tatou ki loto i te lalolagi fou.

11. Ne a auala e fakaasi mai i ei i te Atua e tausi mai ki a tatou?

¹¹ I tafa o te fesoasoani mai ke ala faeloa tatou i te feitu faka-te-agaga, ne fesoasoani mai foki a fakatakitakiga kolā ne maua ne tatou ki ‵tou olaga i aso takitasi. E aofia i ei te fakatumauga o se kilokiloga paleni ki mea faka-te-foitino mo te fakafaigofiega o te kilo ko te mea ke fakamāmā aka i ei a te manavase. Ko oti foki ne maua ne tatou a mea aoga mai i fakatakitakiga e uiga ki ‵tou gatu mo teuga, te filifiliga o fakafiafiaga ‵lei, mo te fakaikuga e uiga ki akoakoga. Kae mafaufau foki la ki fakamasauaga tāua kolā ko oti ne maua ne tatou ke puipui ‵tou fale, mea fakateletele, Kingdom Halls, mo te fakatokatoka mō se fakalavelave tupu fakafuasei. E fakaasi mai i pati fakatonutonu penā i te Atua e tausi mai ki te ola ‵lei o tatou.

NE FESOASOANI ATU A FAKAMASAUAGA KI KELISIANO MUA KE TUMAU I TE FAKAMAONI

12. (a) Se a te mataupu e tasi telā ne faipati faeloa a Iesu ki ana soko e uiga ki ei? (e) Se a te galuega loto maulalo ne fai mo fai se fakaakoakoga tumau ki a Petelu, kae e ‵tau o pokotia pefea tatou i ei?

¹² I te senitenali muamua, ne maua faeloa ne tino o te Atua a fakamasauaga. Ne faipati faeloa a Iesu ki ana soko e uiga ki te tāua ke ati aka a te loto maulalo. E ui i ei, ne fai ne ia a mea e uke atu i lō te faipati atu fua ki ana soko a te uiga o te loto maulalo​—ne fakaasi atu ne ia ki a latou a te auala e fai ei penā. I tena toe aso i te lalolagi e pelā me se tagata, ne fakamaopoopo ne Iesu a te kau apositolo mō te ‵kaiga o te Paseka. A koi ‵kai ana apositolo, ne tu aka a Iesu ki luga kae ‵fulu olotou vae​—se galuega telā e masani o fai ne se tavini. (Ioa. 13:1-17) Ne fai a te galuega loto maulalo tenei mo fai se fakaakoakoga tumau ki a latou. I se tolusefulu tausaga fakamuli ifo, ne tuku atu ne te apositolo ko Petelu telā ne nofo atu i te ‵kaiga tenā, a pati fakatonutonu e uiga ki te loto maulalo ki taina tali‵tonu. (1 Pe. 5:5) E ‵tau o fakama‵losi aka tatou ne te fakaakoakoga a Iesu ke loto mau‵lalo tatou katoa i faifaiga a tatou e fai te suā tino ki te suā tino.​—Fili. 2:5-8.

13. Se a te uiga tāua ‵ki telā ne fakamasaua atu ne Iesu ki ana soko me e manakogina ke ati aka?

¹³ A te suā mataupu ne sau‵tala sāle ki ei a Iesu mo ana soko ko te manakoga ke maua se fakatuanaki malosi. I te taimi ne seki mafai ei ne latou o ‵tuli te temoni kea‵tea mai i se tamaliki tagata ne pukea ne se temoni, ne fesili atu a soko ki a Iesu: “Kaia ne seki mafai ei ne matou o afuli te temoni tenā?” Ne tali atu a Iesu: “Ona ko te foliki o te otou fakatuanaki. Au e fai ‵tonu atu ki a koutou: Kafai te otou fakatuanaki e pelā mo te lasi o te fuaga o te sinapi, . . . seai eiloa se mea e se mafai ne koutou o fai.” (Mata. 17:14-20) I te galuega talai a Iesu, ne akoako ne ia ki ana soko i te fakatuanaki se uiga tāua ‵ki telā e manakogina. (Faitau te Mataio 21:18-22.) E mata, e fakaaoga faka‵lei ne tatou a avanoaga kolā e maua ne tatou ke fakama‵losi aka ei a ‵tou fakatuanaki e auala i fakatonuga fakamalosi loto kolā ne tuku mai i fono o te atufenua, fono o fenua, mo fakatasiga faka-Kelisiano? E sili atu a mea konei i lō maopoopoga fia‵fia; i taimi penei e fakaasi atu ei ne tatou a te tali‵tonu fakamaoni ki a Ieova.

14. Kaia e tāua ei ke ati aka ne tatou a te alofa o Keliso i aso nei?

¹⁴ E ‵fonu eiloa a Tusitusiga Tapu Eleni i fakamasauaga ki a tatou ke fakaasi atu te alofa o te suā tino ki te suā tino. Muna a Iesu i te lua o tulafono tafa sili ko te “alofa ki tou tuakoi e pelā mo koe ki a koe eiloa.” (Mata. 22:39) Ne taku foki ne te āfa taina o Iesu ko Iakopo a te alofa ki “te tulafono fakatupu.” (Iako. 2:8) Ne tusi mai te apositolo ko Ioane: “Aku fagasele, e se tusi atu ne au ki a koutou se fakatonuga fou, kae se fakatonuga mua loa telā ko leva ne maua ne koutou mai i te kamataga.” (1 Ioa. 2:7, 8) Se a te mea ne fakasino atu a Ioane ki ei pelā me se “fakatonuga mua”? Ne fakasino atu eiloa a ia ki te fakatonuga e uiga ki te alofa. Ne fai pelā me se mea “mua” me ko leva ne tuku mai ne Iesu a te fakatonuga tenā i te fia sefulu tausaga mai mua atu, “mai i te kamataga.” Kae se mea “fou” foki me e manakogina i ei te alofa sē fakapito, ko te alofa telā e manakogina ne soko māfai e fe‵paki latou mo fakanofonofoga ‵fou. E pelā me ne soko o Keliso, e mata, e se loto fakafetai tatou ki faka‵pulaga kolā e fesoasoani mai ke puipui tatou mai te atiakaga o se agaga kaimanako telā e lauiloa i te lalolagi tenei, telā e mafai o fakagalo aka i ei a ‵tou a‵lofa ki tuakoi?

15. Se a te galuega tonu a Iesu ne vau o fai i te lalolagi?

¹⁵ Ne fakaasi mai ne Iesu a tena fiafia ki tino. E lavea ne tatou a tena alofa atafai i te taimi ne faka‵lei ei ne ia a tino ma‵saki mo tino sē kātoatoa mo te taimi ne faka‵tu aka ei a tino ‵mate. E ui i ei, a te galuega tonu a Iesu ne vau o fai e se ko te faka‵leiga o tino i te feitu faka-te-foitino. Ne lasi fakafia atu te aoga o tena talaiga mo ana akoakoga ki olaga o tino. E pefea la? E iloa ne tatou i tino kolā ne faka‵lei ne Iesu kae toe faka‵tu aka i te senitenali muamua, ne olo aka o ma‵tua kae ‵mate atu, kae ko latou kolā ne tali fia‵fia ki te fekau telā ne talai atu ne ia e mafai o maua ne latou a te ola se-gata-mai.​—Ioa. 11:25, 26.

16. E pefea te lasi o te talaiga o te Malo mo te faiga o soko i aso nei?

¹⁶ Ko lasi ‵ki atu i aso nei a te faiga o te galuega talai telā ne kamata ne Iesu i te senitenali muamua. Ao, ne fakatonu atu a Iesu ki ana soko: “Tela la, olo atu koutou ki fenua katoa o fai a tino i ei mo fai a soko.” (Mata. 28:19) E tonu, ne fai ne latou, kae e mafai o fai aka tatou, ao, ne fai eiloa ne matou! E silia atu i te fitu miliona o Molimau a Ieova e talai atu mo te loto finafinau a te Malo o te Atua i atufenua e silia atu i te 230, kae suke‵suke faeloa a Molimau mo te fia miliona o tino ki te Tusi Tapu. E fakamaoni mai i te talaiga tenei me ko ola tatou i aso fakaoti.

TALITONU FAKAMAONI KI A IEOVA I ASO NEI

17. Ne a pati fakatonutonu ne tuku mai ne Paulo mo Petelu?

¹⁷ E manino ‵lei, me ne fesoasoani atu a fakamasauaga ki Kelisiano mua ke ‵mautakitaki i te fakatuanaki. Mafaufau ki te fakamalosiga ne maua ne Timoteo i te taimi ne fai atu ei ki a ia a te apositolo ko Paulo, telā ne nofo i te falepuipui i Loma i te taimi tenā: “Tausi faeloa ki pati aoga masani kolā ne lagona ne koe mai i a au.” (2 Timo. 1:13) Mai tua o te fakamalosiga o taina mo tuagane Kelisiano ke ati aka a uiga pelā mo te kufaki, alofa fakataina, mo te loto pulea, ne fai atu te apositolo ko Petelu: “Ka fakamasaua atu faeloa ne au a mea konei ki a koutou, e tiga eiloa e iloa ne koutou a mea konā kae ‵mautakitaki foki koutou i te munatonu.”​—2 Pe. 1:5-8, 12.

18. Ne ‵kilo atu pefea a Kelisiano i te senitenali muamua ki fakamasauaga?

¹⁸ Ao, ne fakaoko mai ne tusi kolā ne tusi ne Paulo mo Petelu “a pati kolā ne fai atu muamua ne pelofeta tapu.” (2 Pe. 3:2) E mata, ne ita a ‵tou taina i te senitenali muamua i te mauaga o fakatakitakiga penā? Ikai, i mea konā se fakaasiga o te alofa o te Atua, telā ne fesoasoani atu ki a latou “ke ola faeloa . . . i te alofa tauanoa mo te poto e uiga ki te ‵tou Aliki mo te ‵tou Fakaola ko Iesu Keliso.”​—2 Pe. 3:18.

19, 20. Kaia e ‵tau ei o tali‵tonu tatou ki fakamasauaga a Ieova, kae e aoga pefea ki a tatou a te faiga penā?

¹⁹ I aso nei, e uke a pogai e ‵tau ei o tali‵tonu tatou ki fakamasauaga a Ieova, kolā e maua i tena Muna fakatuagagina, ko te Tusi Tapu. (Faitau te Iosua 23:14.) I loto i ei, e maua ne tatou a faifaiga a te Atua ki tino sē ‵lei katoatoa i te fia afe tausaga. Ne tusi a te tala fakasolopito tenei ke aoga ki a tatou. (Lo. 15:4; 1 Koli. 10:11) Ko oti ne lavea ne tatou a te fakataunuga o valoaga i te Tusi Tapu. E mafai o faka‵tusa a valoaga ki fakamasauaga kolā e fakailoa muamua mai. Pelā me se fakaakoakoga, e lau i miliona a tino ko oti ne ua‵lolo mai ki te tapuakiga tonu a Ieova, e pelā mo te mea ne ‵valo mai me ka tupu “i aso mai mua nei.” (Isa. 2:2, 3) A te tulaga masei o te lalolagi e fakataunu foki i ei a valoaga i te Tusi Tapu. Kae pelā mo te mea ne taku mai, a te lasi o te galuega talai telā e fai nei i te lalolagi kātoa se fakataunuga tonu o pati a Iesu. ​—Mata. 24:14.

²⁰ Ko oti ne fai ne ‵tou Mafuaga se tusi telā e mafai o tali‵tonu tatou ki ei. E mata, e maua ne tatou a mea aoga mai i ei? E ‵tau o fakatuanaki tatou ki ana fakamasauaga. Tenā te mea ne fai ne Rosellen. E fai mai tou fafine: “A koi kamata au o talitonu katoatoa ki a Ieova, ne kamata o lavea faka‵lei ne au ana lima a‵lofa e puke mai o fakamalosi au.” E maua foki ne tatou a mea aoga mai te tausi ki fakamasauaga a Ieova.