Te Filemu Mō Se Afe Tausaga—Kae Silia Atu Foki!
“Ko te mea ke pule katoatoa atu te Atua ki ana mea katoa.”—1 KOLINITO 15:28.
E MAFAI NE KOE O FAKAMATALA MAI?
Se a te uiga o te fakataunuga o tusi siki konei ki a koe?
1. Se a te fakamoemoega fakafiafia e fakatali‵tali ki ei a te “vaitino tokouke”?
EMATA, e mafai o fakaataata i tou mafaufau a mea ‵lei katoa kolā e mafai o fai ne se malo malosi ki ana tino mai lalo i se pule alofa kae fai mea tonu i loto i te afe tausaga? E faka‵tali mai a mea fakaofoofogia ki te “vaitino tokouke”—ko tino kolā ka ‵sao atu i “te fakalavelave lasi,” telā ka fakagata kātoatoa atu i ei a te olaga masei tenei.—Fakaasiga 7:9, 14.
2. Ne a mea ko oti ne oko atu ki tino i te 6,000 tausaga ko ‵teka?
2 I te 6,000 tausaga o tala fakasolopito o tino, ko oti ne taumafai a tino o pule atu ki a latou eiloa kae ne maua i ei ne tino te tigāina mo logo‵maega e uke. Ko leva ne fai mai te Tusi Tapu: “Ka ko tino kolā e ‵nofo i se tulaga malalo, e ‵nofo puapuaga i te pulega a tino ma‵luga.” (Failauga 8:9) Se a te mea e matea ne tatou i aso nei? I tafa o taua mo ‵tekeatuga, e isi ne fakalavelave ma‵sei pelā mo te mativa, masaki, fakamaseiga o te enivalomene, mafuli‵fuliga o tau o aso, mo nisi mea e uke atu. Ko oti ne faka‵pula mai ne tino o te malo me kafai e se ‵fuli a ‵tou faifaiga faipisinisi masani, e masei ‵ki a te ikuga e maua mai i ei.
3. Se a te mea ka fakataunu i te Pulega i te Afe Tausaga?
3 Mai lalo i te Tupu faka-Mesia ko Iesu Keliso mo ana pule lagolago e toko 144,000, ka fai eiloa ne te Malo o te Atua ne faiga mautinoa ke fakaseai a fakamaseiga katoa kolā ne fai ki tino mo te lotou koga ‵nofo, ko te Lalolagi. Ka fakataunu ne te Pulega i te Afe Tausaga a te tautoga fakamafanafana loto a Ieova te Atua: “Ko toe faite nei ne au se lalolagi fou mo ne lagi ‵fou. A mea ne ‵tupu i aso ko ‵teka ka sē toe manatua eiloa.” (Isaia 65:17) Ne a mea ‵tupu fakaofoofogia kae sē lavea e faka‵tali tatou ki ei? Mai te fesoasoani o te Muna fakapelofeta a te Atua, ke onoono malie aka tatou ki mea fakaofoofogia kolā “e se lavea.”—2 Kolinito 4:18.
‘KA FAITE OLOTOU FALE KAE ‵TOKI TOGĀVINE’
4. Ne a tulaga o fale e fakafesagai mo tino e tokouke i aso nei?
4 Ko oi te tino e se manako ke maua sena fale totino eiloa, se koga telā e ‵sao kae tokagamalie ei a ia mo tena kāiga? I te lalolagi i aso nei, a te mauaga o fale se ma‵tugā fakalavelave lasi ‵ki. Ko ī takitaki a fa‵kai ‵lasi i tino. A te tokoukega o tino ko ‵nofo fua i fale sē tumau kae ma‵sei i kogā koga i tafatafa o fa‵kai ‵lasi. A te mauaga o se fale totino o latou koi fai eiloa pelā me se moemiti ki a latou.
5, 6. (a) Ka fakataunu pefea a te Isaia 65:21 mo te Mika 4:4? (e) E mafai pefea o maua ne tatou a te fakamanuiaga tenā?
5 Mai lalo i te pulega a te Malo, ka fakataunu eiloa a manakoga o tino taki tokotasi ke maua se fale totino mō ia, me e tenā eiloa te mea ne ‵valo mai e auala i a Isaia: “A tino ka faite olotou fale ko ‵nofo ei i ei—ka sē toe fakaaoga eiloa ne nisi tino fakaatea. Ka ‵toki olotou togāvine kae inu fia‵fia i te uaina mai i olotou togāvine konā.” (Isaia 65:21) E ui i ei, a te mauaga o se fale e se ko te mea fua e tasi e fakamoe‵moe ki ei. A nisi tino i aso nei e ‵nofo eiloa i olotou fale totino, kae ne nāi tino fua e ‵nofo i fale ‵lasi. Kae e isi faeloa se manavase me e mafai o galo atu te fale māfai ko sē mafai ne latou o ‵togi io me ulu atu a tino kai‵soa o ofa te fale. Ko oko eiloa te ‵kese a mea katoa kolā ka fai mai lalo i te pulega o te Malo! Ne tusi mai a te pelofeta ko Mika: “A tino katoa ka ‵nofo filemu i olotou togāvine mo togāmati, kae ka seai se tino e toe fai ne ia ke ma‵taku latou.”—Mika 4:4.
6 I te mafaufau ki te fakamoemoega fakaofoofogia tenā, se a te mea e ‵tau o fai ne tatou? E tonu, a tatou katoa e ma‵nako ki fale. Tela la, i lō te taumafai ke maua te fale tenā i te taimi nei—e se taumate mai te faiga o se kaitalafu lasi ke fai te mea tenā—e mata, e sē se mea poto ke ‵saga atu tatou ki te tautoga a Ieova? Ke masaua a pati a Iesu ne fai e uiga ki a ia eiloa: “E isi ne lua o alope, a ko manu eva e isi ne olotou ofaga, ka ko te Tama a te tagata e seai sena fale mo ana nofo.” (Luka 9:58) E nofo mo Iesu a te malosi ke faite io me maua a te ‵toe fale gali eiloa telā e se mafai o maua ne so se tino. Kaia ne seki fai ei ne ia te mea tenā? E manino ‵lei me ne seki manako a Iesu ke fakalavelave mai ki a ia so se mea telā ka taofi aka ei a ia mai te fakamuamuaga o te Malo. E mata, e mafai ne tatou o tau‵tali i tena fakaakoakoga kae ke fakafaigofie ‵tou ‵kilo—ke saoloto mai te tulaga faigata mo te manavase ki kope faka-te-foitino?—Mataio 6:33, 34.
“A KULĪ VAO MO TAMĀ MAMOE KA ‵KAI FAKATASI”
7. Se a te fesokotakiga i te va o tino mo manu ne fai ne Ieova i te kamataga?
7 I te faitega o mea, ne faite fakamuli ne Ieova a tino, ko te ‵toe galuega tāua eiloa o ana galuega faka-te-lalolagi ne fai. Ne fai atu a Ieova ki tena Tino Galue Sili, tena Tama toekimua: “Ka faite nei ne tāua a tino, ke foliga ki a tāua. Ka pule latou i ika, i manu eva, mo manu vaefa katoa, manu ‵lata mo manu vao, manu ‵lasi mo manu fo‵liki.” (Kenese 1:26, NW) E ‵tusa mo te mea tenā, ne fakatonu atu ki a Atamu mo Eva, kae fakamuli ifo ki tino katoa, ke pule atu ki luga i manu.
8. Se a te uiga o manu e lauiloa i aso nei?
8 E mata, e mafai eiloa ne tino o pule atu ki manu katoa kae fai ke fealofani latou? E tokouke a tino e ‵pili ‵ki ki olotou manu fagai, e pelā mo kulī mo pūsi. Kae pefea la a manu fe‵kai? E fai mai te li‵poti e tasi: “Ne maua aka ne saienisi kolā ne ‵nofo pili ki manu fe‵kai kae sukesuke ne latou me i manu katoa e isi ne olotou lagonaga.” E tonu, e lavea ne tatou a manu māfai ko ma‵taku io me sauā malosi i te taimi e fakamatakutaku atu ei ki a latou, kae e mata, e mafai ne latou o fakaasi atu a lagonaga atafai? E fai mai te li‵poti: “E fakaasi mai i te putiakaga o olotou tama a te ‵toe uiga tafasili o manu—te lasi o te lotou a‵lofa atafai.”
9. E uiga ki manu, ne a ‵fuliga e mafai o fakamoe‵moe tatou ki ei?
9 Tela la, e se ‵tau o ‵poi tatou i te taimi e fai‵tau ei ki te Tusi Tapu me ka fealofani eiloa a tino mo manu. (Faitau te Isaia 11:6-9; 65:25.) Kaia la? Masaua, me i te taimi ne ulu mai ei a Noa mo tena kāiga ki tua mo te vaka i te otiga o te Lolo, ne fai atu a Ieova ki a latou: “A manu vaefa katoa, mo manu eva, e pelā foki mo ika ka ola mo te ma‵taku ki a koutou.” Ne fai te mea tenā mō te puipuiga o manu. (Kenese 9:2, 3) E mata, e se mafai ne Ieova o tapale kea‵tea te mataku tenā, ko te mea ke taunu a tena fakatonuga i te kamataga? (Hosea 2:18) Ma‵faga o taimi fakafiafia e faka‵tali mai ki a latou katoa kolā ka ‵sao atu ke ola i luga i te lalolagi i te taimi tenā!
“KA ‵SOLO KEATEA NE IA A LOIMATA KATOA”
10. Kaia e masani ei o ‵tagi a tino?
10 I te laveaga ne Solomona a “amioga ma‵sei katoa konei e fai i te lalolagi tenei,” ne tagi fanoanoa a ia penei: “A tino puapuaga e ‵tagi, kae e seai se tino e fesoasoani ki a latou.” (Failauga 4:1) E ‵pau eiloa a mea e fai i aso nei, io me e ma‵sei atu. Ko oi te tino i a tatou e seki ‵sali aka eiloa ana loimata? E tonu, i nisi taimi kāti ne loimata o te fiafia. E pelā mo te masani, e fakaasi mai i loimata a te tigāina o te loto.
11. Se a te tala i te Tusi Tapu ne fanoanoa ei tou loto?
11 Mafau‵fau ki tala fakaotia loto e uke ne fai‵tau tatou ki ei i te Tusi Tapu. I te taimi ne mate ei a Sala kae ko 127 ana tausaga, “ne tagi fanoanoa Apelaamo i te mate o tena avaga.” (Kenese 23:1, 2) I te taimi ne fakamāvae atu ei a Naomi ki avaga a ana tama ta‵gata e tokolua, “ne kamata ei lāua o ‵tagi,” kae oti aka, “ne toe ‵tagi foki a latou.” (Luta 1:9, 14) I te taimi ne poko ei a te tupu ko Hesekia i te masaki telā e mate eiloa a ia i ei, ne ‵talo atu tou tagata ki te Atua kae kamata o “tagi a ia i te fanoanoa,” telā ne otia ei te loto o Ieova. (2 Tupu 20:1-5) Kae ko oi ne seki fanoanoa tena loto i te tala o te fakafitiga ne te apositolo ko Petelu a Iesu? I te lagonaga ne ia a te ‵tagi o te moa, ne fano a Petelu “ki tua o tagi mautuutu i ei.”—Mataio 26:75.
12. Ka aumai pefea ne te pulega o te Malo a te fakatapūga tonu ki tino?
12 Ona ko te matagā o mea ‵tupu konei—mea ‵lasi mo mea fo‵liki—kolā ka oko mai ki a tatou, e ma‵nako malosi a tino ki fakamafanafanaga mo se fakatapūga. E tenā eiloa te mea ka aumai ne te Pulega i te Afe Tausaga ki ana tino: “Ka ‵solo keatea ne [te Atua] a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae.” (Fakaasiga 21:4) E pelā mo te gali me ka sē toe ai se fanoanoa, se ‵tagi, mo te ‵mae, e aofia foki i te tautoga a te Atua a te fakaseaiga o te ‵toe fili o tino—ko te mate. Ka fai pefea a te mea tenā?
‘TINO KATOA KOLĀ I LOTO I TANUGA KA ULU MAI KI TUA’
13. Ne pokotia pefea a tino i te mate talu mai te pakūga o Atamu?
13 Talu mai te taimi ne agasala ei Atamu, ne pule atu te mate e pelā me se tupu ki luga i tino. Ko oti ne fai mo fai se fili telā e se mafai o fakatakavale, e seai se tino agasala e sao i ei, kae ko te māfuaga o te fanoanoa lasi. (Loma 5:12, 14) A te tonuga loa, ona ko te “ma‵taku ki te mate,” e lau i miliona a tino e “‵nofo e pelā me ne pologa i olotou olaga kātoa.”—Epelu 2:15.
14. Ne a ikuga ka maua māfai ko fakaseai a te mate?
14 E fakasino atu te Tusi Tapu ki te taimi o “te ‵toe fili telā e ‵tau o fakaseai atu ko te mate.” (1 Kolinito 15:26) E lua a potukau ka mafai o maua a mea aoga mai i te mea tenei. Mō te “vaitino tokouke” kolā koi ola nei, ka mafai eiloa o ‵sao atu latou ki loto i te lalolagi fou mo te fakamoemoega ke ola ki te se-gata-mai. Mō te fia piliona o tino kolā ko oti ne ‵mate, ka mafai eiloa o toe‵tu mai latou. E mata, e mafai o fakaataata i tou mafaufau a te lasi o te fiafia māfai ko fakafetaui atu a latou kolā i te potukau muamua ki a latou kolā i te potukau fakamuli? A te sukesuke faka‵lei ki tala o toe‵tuga i te Tusi Tapu e tuku mai i ei ki a tatou se ata o te mea telā ka fai i te taimi mai mua.—Faitau te Maleko 5:38-42; Luka 7:11-17.
15. Ka pefea ou lagonaga māfai e kilo atu ki se tino pele ko toe ola mai?
15 Mafaufau ki tugāpati konei “kae ne ofo masei lāua i te fia‵fia” kae “ne kamata o tavae atu ki te Atua.” Moi fai ne nofo atu koe i mea konā ne ‵tupu, e se taumate ka penā foki ou lagonaga. E tonu, ka fia‵fia malosi eiloa tatou māfai e ‵kilo atu ki ‵tou tino pele kolā ne ‵mate ko toe ola mai e auala i te toe‵tuga. Muna a Iesu: “Sa ofo koutou i te mea tenei, me ka oko mai eiloa te itula e lagona ei ne tino katoa kolā e i loto i tanuga a tena leo, ko ulu mai ei ki tua.” (Ioane 5:28, 29) E seai eiloa se tino i a tatou kai lavea ne ia se vaegā penā e tupu; e mautinoa ‵lei i te mea tenā se tasi o mea tafasili i te tāua i “mea e se lavea” ki mata.
“KE PULE KATOATOA ATU TE ATUA KI ANA MEA KATOA”
16. (a) Kaia e ‵tau ei o loto finafinau tatou o fai‵pati atu e uiga ki fakamanuiaga kolā e seki lavea? (e) Ne a pati a Paulo ne fai ke fakamalosi atu ki Kelisiano i Kolinito?
16 Ao, a tino kolā e tumau i te fakamaoni ki a Ieova i taimi faiga‵ta konei, ka maua eiloa ne latou se taimi gali mai mua. E tigā eiloa e se lavea a fakamanuiaga kolā ka oko mai, a te mafaufau faeloa ki ei ka fesoasoani mai ke ‵saga atu fua tatou ki mea kolā e tāua tonu kae ‵teke atu ki mea o te olaga tenei kolā e fakalavelave mai. (Luka 21:34; 1 Timoteo 6:17-19) I taimi o tapuakiga a kāiga i afiafi, i sau‵talaga mo taina tali‵tonu, mo sau‵talaga mo akoga faka-te-Tusi Tapu mo tino fia‵fia, ke fai‵pati atu mo te loto finafinau e uiga ki te ‵tou fakamoemoega gali. Ka fesoasoani mai a te mea tenei ke fai a ‵tou fakamoemoega e pelā me se mea tonu ki a tatou. Ne fai ne Paulo a te mea tenā i te fakamalosiga o ana taina Kelisiano. Ne fesoasoani atu ana pati ki a latou ke mafau‵fau ki mea kolā ka ‵tupu i te fakaotiga o te Pulega a Keliso i te Afe Tausaga. Taumafai o fakaataata i tou mafaufau a te uiga kātoa o pati a Paulo i te 1 Kolinito 15:24, 25, 28.—Faitau.
17, 18. (a) I te auala fea ne “pule kātoatoa atu [ei Ieova] ki ana mea katoa” i te kamataga o te tala fakasolopito o tino? (e) Se a te mea ka fai ne Iesu ke toe maua te filemu mo te ‵kaufakatasi?
17 E seai se fakamatalaga e uiga ki te olaga i te fakaotiga o te afe tausaga e ‵lei atu i lō pati konei “ko te mea ke pule katoatoa atu te Atua ki ana mea katoa.” Se a la te uiga o te mea tenā? Toe mafaufau ki Etena i te taimi ne fai ei a tino ‵lei kātoatoa, ko Atamu mo Eva, mo fai se vaega o te kau kāiga filemu kae tokagamalie o Ieova i te lagi mo te lalolagi. Ne pule tonu eiloa a Ieova, te Pule i te lagi mo te lalolagi, ki luga i ana mea katoa ne faite, ko agelu mo tino. Ne mafai eiloa o fesokotaki atu lāua ki a ia, tapuaki atu ki a ia, kae fakamanuia ne ia. Ne “pule katoatoa atu te Atua ki ana mea katoa.”
18 Ne fakamakosu a te tokagamalie o te fesokotakiga tenā i te taimi ne fakamalosi atu ei Satani ki tino ke ‵teke atu ki te pulega a Ieova. Talu mai te 1914, ko oti ne fai ne te Malo faka-Mesia a faiga ke toe fakafoki mai a te filemu mo te ‵kaufakatasi tenā. (Efeso 1:9, 10) I te taimi o te Pulega i te Afe Tausaga, a mea fakaofoofogia kolā “e se lavea” i te taimi nei ka ‵tupu tonu eiloa. Ka oti, ko oko mai ei “te gataga,” telā ko te fakaotiga o te Pulega a Keliso i te Afe Tausaga. Se a la te mea ka tupu mai tua ifo? E ui eiloa ne tuku atu ki a ia te “pule i mea katoa i te lagi mo te lalolagi,” a Iesu e se fia maluga. E seai eiloa sena fakamoemoega ke puke ne ia te tulaga o Ieova. E loto maulalo eiloa a ia o “toe tuku atu . . . te Malo ki tena Atua mo tena Tamana.” Ka fakaaoga ne ia tena tulaga mo te pulega fakapito “mō te vikiga o te Atua te Tamana.”—Mataio 28:18; Filipi 2:9-11.
19, 20. (a) Ka fakaasi mai pefea ne tino kolā e ‵nofo mai lalo i te pulega a te Malo me e talia ne latou te pulega a Ieova? (e) Ne a mea fakaofoofogia ka fia‵fia tatou ki ei i te taimi mai mua?
19 Mai te taimi tenā, a latou katoa kolā e ola i te lalolagi mai lalo i te pulega o te Malo ka ‵lei kātoatoa. Ka tau‵tali atu latou i te fakaakoakoga a Keliso kae fia‵fia o talia mo te loto maulalo a te pulega a Ieova. Ka fakaasi atu ne latou te lotou manakoga ke fai a te mea tenā mai te taumafai ke ‵sao atu mo te manuia i te ‵toe tofotofoga. (Fakaasiga 20:7-10) Mai tua ifo i konā, a tino ‵teke katoa—tino mo agelu—ka fakaseai atu ki te se-gata-mai. Ko oko eiloa i te fakafiafia loto a te taimi tenā! A te kau kāiga kātoa i te lagi mo te lalolagi ka ‵viki atu mo te fia‵fia ki a Ieova, telā ka ‘pule katoatoa atu ki ana mea katoa.’—Faitau te Salamo 99:1-3.
20 E mata, ka fakamalosi aka koe ne mea fakaofoofogia kolā ko pili o aumai ne te Malo ke tuku tonu tou mafaufau mo taumafaiga ki te faiga o te loto o Ieova? E mata, e mafai ne koe o ‵teke atu ke mo a e takitaki‵segina koe ne fakamoemoega mo fakamafanafanaga ‵loi kolā e ofo mai ne te lalolagi a Satani? E mata, ka fakamalosi aka ne koe a tau fakaikuga ke ‵lago kae fakamaluga a te pulega a Ieova? Ke na fakatalitonu mai i au faifaiga me ko tou manakoga loa ke fai penā ke oko eiloa ki te se-gata-mai. I konā, ko mafai ei koe o fiafia i te filemu mo te manuia mō se afe tausaga—kae silia atu foki!
[Ata i te itulau e 16]
Kafai ko oti a tena tofiga e pelā me se Tupu, ka loto maulalo eiloa a Iesu o toe tuku atu a te Malo ki tena Tamana