MATAUPU I TE ‵KAVA: KAIA KO UKE ‵KI EI A LOGO‵MAEGA? KA OTI ATU MAFEA?

E Tokouke a Tino e Seai ne Olotou Mea ‵se ne Fai ne ‵Mate!

A Noelle se tamaliki matafiafia kae fiafia o ‵lomi ata. I se afiafi po e tasi ne sasale a ia i te koga i tua o tena fale kae poi eiloa me ko to ki loto i te koga kou‵kou o te kāiga. Ne malemu tou fafine kae toe lua fua a vaiaso kae oko ki te fa o ana  aso fanau.

Charlotte, Daniel, Olivia, Josephine . . . Konei a igoa o te toko 20 mai te 26 tamaliki kolā e taki ono ki te fitu tausaga te ma‵tua kolā ne fanafana i se akoga i Connecticut, U.S.A., i a Tesema 14, 2012. I se lotu ne fai e fakamanatu ei te ‵mate o tamaliki, ne laulau ne te Pelesitene ko Obama a igoa o tamaliki kae fai atu ki tino fanoa‵noa kolā e fakalogo‵logo mai: “A fakalavelave konei e ‵tau o fakagata.”

Ne tiakina ne Bano telā ko sefuluvalu ana tausaga a Iraq kae olo mo tena kāiga ki Norway. Ne fakaigoa tou fafine ne ana taugasoa ki tena igoa fakasalasala ko Sun Rays. I a Iulai 22, 2011, ne tupu se mea fakafanoanoa me ne aofia a Bano i te toko 77 tino kolā ne tamate ne se tino takafiatoa, telā ne fai mai mo te fakamatamata: “E fiafia au o fakatoese atu . . . me ne seki mafai ne au o tamate a tino e tokouke atu.”

Ko oti ne fakasalalau faeloa a tala faka‵mae loto penā i te lalolagi kātoa. Mafaufau ki te fanoanoa mo te ‵mae ne maua mai i fakalavelave ‵tupu fakafuasei, amioga solitulafono, taua, amioga takafia‵toa, fakalavelave o te natula, mo nisi fakalavelave aka. E tokouke a tino ko oti ne ‵mate io me logo‵mae kae seai se pogai ‵lei!

E ‵losi atu a nisi tino ki te Atua, kae fai mai olotou fakamasakoga i te ‵tou Mafuaga e se fia saga mai ki te kaukāiga o tino. E fakaiku aka ne nisi tino me e lavea ne te Atua a ‵tou logo‵maega kae e filifili fua a ia ke sē fia saga mai. Kae koi fai mai eiloa a nisi tino me ko oti eiloa ne fakatoka a fakalavelave penā ke ‵tupu. E foliga mai me seai se gataga o manatu ki te mataupu. E maua i fea ne tatou a tali fakatuagagina kae fakamalie loto? I mataupu kolā e ‵soko mai, ka ‵kilo tatou ki loto i te Muna a te Atua, ko te Tusi Tapu, ke maua mai a tali me e māfua mai pefea a logo‵maega kae ka fakagata aka pefea.

[Ata i te itulau e 3]