So Ɛyɛ Bere Tiaa Mu Ɔsoro Adehu?

“NÁ ƐNO ne bere tiaa mu adehu a ɛyɛ fɛ sen biara wɔ wiase no nyinaa mu, bere a mifii saa nipadua no mu no! . . . Nea mihui nyinaa yɛ anika yiye! Mintumi nhu biribi a ɛwɔ wiase yi mu anaa akyi a wobetumi de atoto ho koraa. Asetra mu bere a ɛyɛ anigye sen biara mpo nyɛ nea wobetumi de atoto nea na merehu no ho.”​—Obi a wadi mfe 54 a ɔyare a wɔreyɛ no oprehyɛn.

“Bere a na mewɔ ɔdan a wɔyɛ oprehyɛn wɔ mu no mu no, nea mekae ne sɛ na ɛte sɛ nea mesɛn nsɛmso no ho baabi ara kwa. . . . Na ɛyɛ ade a ɛyɛ anika yiye efisɛ na mewɔ soro na na nipadua yi wɔ fam. . . . Mitumi hu wɔn sɛ wɔreyɛ m’akyi oprehyɛn. . . . Afei mekae sɛ na Oduruyɛfo D reka sɛ, ‘Dompe no ni. Ɛno ni.’ Wɔ ha no, mebaa fam pɛɛ sɛ merebɛhwɛ nea ɛbɛba.”​—Missouri ɔbea bi a wadi mfe 42 a ɔreka sɛnea “ohuu” oprehyɛn a wɔreyɛ ɔno ankasa no.

“Wɔ oyikyerɛ a minyae yi mu no, mantumi anhu m’ankasa me ho nanso na migyina biribi a ɛkorɔn so, efisɛ na sare a ɛyɛ mommono sen biara na ɛyɛ fɛ sen biara wɔ m’ase. . . . Ná ɛte sɛ da bi a owia rebɔ ara pɛ. . . . Na ade mũ no nyinaa te sɛ nea wɔredua sare wɔ faako a wobɔ golf a wodi hɔ ni no so.”​—Ade a obi a ɔyɛ adwuma wɔ faako a wɔnwene ntama “hui” bere a onyaa koma yare mpofirim no.

Ade biako bɛn na ɛda adi wɔ osuahu ahorow abiɛsa yi mu? Ɛno ne nea mprempren wɔfrɛ no nnipa a ade tɔ wɔn so osuahu ahorow no. Nsɛm a ɛtete sɛɛ ɔhaha pii yɛ nea nnuruyɛfo ne nyansahufo akyerɛw ato hɔ. Saa ayarefo a ade tɔɔ wɔn so no mu pii nyaa nea wɔfrɛ no nipadua mu a wofi mu osuahu ahorow no bi. Wɔka sɛ wohuu hann bi a ɛhyerɛn, anaasɛ wɔkɔɔ beae bi a ɛhɔ yɛ fɛ yiye, na wɔ tebea horow bi mu no wohuu Yesu anaa Onyankopɔn.

Wɔ ne nhoma Recollection of Death mu no, ɔbenfo Michael Sabom ka sɛ: “Saa nnipa yi mu pii a wɔanya komayare ne owuyare ahorow kaee nsɛm pii a ɛyɛ nwonwa a ‘esisii’ bere a ade tɔɔ wɔn so na anka wɔreyɛ awu no. Ebinom bu osuahu yi sɛ hokwan a wonya de hu trabea foforo bi wɔ bere tiaa bi mu.”

Ebia worebisa sɛ ebia saa osuahu ahorow yi di owu akyi asetra ho adanse sɛnea saa ayarefo yi mu binom susuw no. Nokwarem no, wɔn a ade tɔ wɔn so osuahu ahorow a ɛtete sɛɛ ma nsemmisa ahorow a wɔhwehwɛ sɛ wɔbɛma ho mmuae sɔre. Sɛ nhwɛso no, So saa nnipa yi ‘nyaa owu akyi asetra ho anisoadehu wɔ bere tiaa bi mu’? So wotumi kaa wɔn oprehyɛn no mu nsɛm esiane sɛ na wɔte ase sɛ ɔkra anaa honhom a aniwa nhu nti? So wowɔ ɔkra a enwu da a ɛbɛkɔ so atra ase wɔ wo wu akyi? So asetra foforo bi wɔ owu akyi? Nsɛm ahorow a edidi so no bɛhwehwɛ adanse a ɛfa nsemmisa ahorow a ɛtete sɛɛ ho no mu?