Yɛn Adwene Wɔ Daakye Ho

Bible mu nkɔmhyɛ bi a ɛwɔ nkɛntɛnso kɛse wɔ sɛnea yɛtra ase no so ne nea wohu wɔ Adiyisɛm 21:3 ne 4 no. Ɛkenkan sɛ: “Onyankopɔn ankasa ne [adesamma] bɛtra. Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.”

Mpɛn pii na Bible no ka wiase bi a eye kyɛn so a Onyankopɔn bɛbɔ ho asɛm. “Na sɛnea [Onyankopɔn] bɔhyɛ te no, yɛretwɛn ɔsoro foforo ne asase foforo a trenee te mu.”—2 Petro 3:13; Dwom 37:9-11, 29; Yesaia 11:6-9; 35:5, 6.

Yehowa Adansefo gye di sɛ saa bɔhyɛ yi mmamu ne adesamma nsɛnnennen ano aduru biako pɛ sɛnea Yesu daa no adi bere a ɔkyerɛɛ n’asuafo sɛ wɔmmɔ mpae sɛ: “W’ahenni mmra, nea wopɛ nyɛ asase so, sɛnea ɛyɛ wɔ ɔsoro” no. (Mateo 6:10) Sɛnea yegye di no, Onyankopɔn Ahenni no yɛ nniso ankasa. (Yesaia 9:6, 7) Ɛno nkutoo ne nniso a ebetumi ayi tebea horow nyinaa a ɛde adesamma haw ba afi asase so na ɛde daa asomdwoe aba.

Wɔaka nea Onyankopɔn Ahenni no mmae bɛkyerɛ ama nnɛyi nniso horow no nyinaa wɔ Bible mu nkɔmhyɛ foforo mu: “Ɔsoro Nyankopɔn bɛma ahenni a wɔrensɛe no da . . . so . . . na ebebubu ahenni horow no nyinaa ama asa, na ɛno de, ebegyina daa.”—Daniel 2:44.

Esiane sɛ yegye di sɛ saa nsakrae yi abɛn yiye nti, yɛn mmofra no gye di sɛ eye mmom sɛ wobesiesie wɔn ho ama adwuma bi a wɔde wɔn nkwa nna nyinaa bɛyɛ a ɛno ne yɛn gyidi a yɛwɔ wɔ paara a Onyankopɔn Ahenni no yɛ no mu no hyia no. Yɛn botae titiriw ne sɛ yɛbɛka daakye pa a ɛda yɛn anim no ho asɛm akyerɛ nkurɔfo. Yɛhwɛ kwan sɛ mprempren awerɛhow ne amanehunu yi betwam na yɛatra ase anya nhyira horow a Onyankopɔn de asie ama wɔn a wɔsom No no. Onyankopɔn bɔhyɛ a enni huammɔ ne sɛ: “Wiase ne n’akɔnnɔ retwam, na nea ɔyɛ ade a Onyankopɔn pɛ no tra hɔ daa.”—1 Yohane 2:17.

Wɔatew Wɔn Ho Afi Wiase No Ho

Sɛnea obi betumi ahwɛ kwan no, daakye ho adwene yi nyaa Kristofo a wodi kan no nso so nkɛntɛnso kɛse. Ɛma wɔbɛyɛɛ nnipa soronko a wɔatew wɔn ho afi wiase no ho. Sɛnea abakɔsɛm kyerɛwfo E. G. Hardy kyerɛe wɔ ne nhoma Christianity and the Roman Government mu no: “Ná Kristofo no yɛ ahɔho ne akwantufo wɔ wiase a atwa wɔn ho ahyia no mu; ná wɔn man wɔ ɔsoro; ahenni a wɔde wɔn ani too so no nyɛ wiase de. Ɛno nti efi mfiase pɛɛ no wɔn ani a ennye ɔman mu nsɛm ho no bɛyɛɛ Kristosom mu ade a ɛda adi yiye.”

Yesu maa mu daa hɔ pefee sɛ n’asuafo ho a wɔbɛtew no bɛyɛ su titiriw a ɛda wɔn adi. Ɔkae sɛ: “Womfi wiase.” (Yohane 17:16; 15:19) Nea ɛne nnyinasosɛm yi hyia no, Yehowa Adansefo bɔ mmɔden sɛ ‘wɔrenyɛ wiase no fã.’ Nanso ɛno nkyerɛ sɛ yɛbɛyɛ ntwehofo na yɛakohintaw afi wiase. Yefi yɛn koma nyinaa hwehwɛ afoforo yiyedi wɔ ɔman no ne sukuu ahorow mu. Yɛn mmofra no pɛ sɛ wonya sukuu dan mu dwumadi ahorow mu kyɛfa wɔ ɔkwan a ɛbɛboa so.

Nanso, wɔ bere koro no ara mu no, yegye di sɛ Bible no ma emu da hɔ pefee sɛ “wiase no da ɔbɔne no mu.” (1 Yohane 5:19; Yohane 12:31; 2 Korintofo 4:4) Eyi nti, yedwen sɛnea wiase yi nkɛntɛnso betumi aka yɛn mmofra no wɔ ɔkwammɔne so no ho. Mpɛn pii na wiase no ani gye asetra kwan bi a yegye di sɛ enye no ho. Na ebi wɔ sukuu ahorow mu. Enti Yehowa Adansefo pɛ sɛ wɔn mma kwati nkɛntɛnso bɔne a ɛtete saa no kosi baabi a ebetumi ayɛ yiye.

[Asɛm a wɔafa aka wɔ kratafa 6]

“Na wiase . . . retwam, na nea ɔyɛ ade a Onyankopɔn pɛ no tra hɔ daa.”—1 Yohane 2:17

[Kratafa 7 mfonini]

Adansefo mmofra pɛ sɛ wɔyɛ nea wobetumi wɔ sukuu dan mu dwumadi ahorow mu