Dɛn Nti na Ɛsɛ sɛ Wode Bɔne Firi?

BERE bi, Yudani nhomanimfo ne nhoma kyerɛwfo Joseph Jacobs kaa bɔne fafiri ho asɛm sɛ “abrabɔ ho adesua a ɛkorɔn na ɛyɛ den sen biara.” Nokwarem no, ɛyɛ nnipa pii den yiye sɛ wɔbɛka sɛ, “Mede afiri wo.”

Bɔne fafiri reyɛ ayɛ sɛ sika pɛpɛɛpɛ. Obi betumi de adi aboa afoforo de ahu wɔn mmɔbɔ anaa obetumi ama ne nsam ayɛ den wɔ ho. Nea edi kan no na ɛyɛ su pa. Ɛsɛ sɛ yɛde bɔne firi mpɛn pii. Dɛn ntia? Efisɛ Onyankopɔn hyɛ eyi ho nkuran, na afei nso aweredi su a bɔne fafiri nnim betumi asɛe tebea no mmom.

Nnipa pii ka sɛ: “Me bo mfuw; were na midi!” Nea ɛyɛ awerɛhow no, eyi yɛ nnyinasosɛm a ɛkyerɛ nnipa pii asetra kwan nnɛ. Sɛ́ nhwɛso no, ɔbea bi ne n’akummaa yɛɛ aka bɛboro mfe ason, efisɛ sɛnea ɔbea no ka no, “ɔyɛɛ me bɔne kɛse na mintumi mfa mfirii no da.” Nanso akayɛ a ɛte saa a wɔde hwehwɛ ɛkyɛwpa fi nea wɔkyerɛ sɛ wadi mfomso no hɔ anaa wɔde twe n’aso no ntaa nnwudwo aweredi ho akɔnnɔ a wonya no ano. Mmom no, ebia ɛbɛma asɛm no akyɛ kɛkɛ, na ama menasepɔw a emu yɛ den kɛse asɔre. Sɛ wɔansiw ɛyawdi a ɛtra hɔ kyɛ yi ano a, aweredi a ano yɛ den no betumi asɛe obi ne afoforo ntam abusuabɔ ne n’akwahosan mpo.

Asiane a Ɛwɔ Bɔne a Wɔmfa Mfiri Mu

Sɛ obi mfa bɔne mfiri a, akameakame a efi mu ba no de adwennwen ba. Adwennwen nso betumi akowie nyarewa a ɛyɛ hu mu. Dɔkta William S. Sadler kyerɛwee sɛ: “Obiara ntumi nhu nnipa nyarewa ne wɔn amanehunu pii a dadwen, osuro, ntawntawdi, . . . nsusuwii a ɛmfata ne asetra a ɛho ntew na ɛde ba ma ɛyɛ ahodwiriw no yiye te sɛ obi a ɔyɛ dɔkta.” Nanso, nokwarem no, nkate fam basaayɛ pira obi kodu he? Ayaresa nhoma bi bua sɛ: “Akontaabu ahorow . . . daa no adi sɛ na ayarefo baasa biara a wokohu dɔkta no baanu wɔ nyarewa a adwennwen na ɛde bae anaa ɛmaa mu yɛɛ den.”

Yiw, ɔtan, abufuw ne menasepɔw nyɛ ade a asiane nnim koraa. Saa nkate horow a ɛsɛe ade yi te sɛ nkannare a ɛwewe kar bi nkakrankakra. Ebetumi aba sɛ kar no ho yɛ fɛ nanso na ase a wɔnkaa hɔ aduru no resɛe.

Nea ɛho hia sen saa mpo no, bɔne a yɛmfa mfiri bere a mmɔborohunu ho nnyinaso bi wɔ hɔ no nso betumi apira yɛn wɔ honhom mu. Yebetumi ayɛ sɛ akoa a na ɔwɔ Yesu mfatoho mu no wɔ Yehowa Nyankopɔn ani so. Akoa no wura de ɛka kɛse bi kyɛɛ no. Nanso, bere a ne yɔnko akoa bi paa no kyɛw sɛ ɔmfa ɛka bi a sɛ wɔde toto ho a esua koraa nkyɛ no no, odii atirimɔdensɛm, na wamfa ankyɛ no. Yesu maa mu daa hɔ sɛ sɛ yɛn nso yɛannya ɔpɛ sɛ yɛde bɔne befiri a, Yehowa remfa yɛn bɔne mfiri yɛn. (Mateo 18:21-35) Enti, sɛ yɛmfa bɔne mfiri a, yebetumi ahwere ahonim pa a yɛwɔ wɔ Onyankopɔn anim ne daakye ho anidaso a yɛwɔ mpo! (Fa toto 2 Timoteo 1:3 ho.) Ɛnde, dɛn na yebetumi ayɛ?

Sua Sɛ Wode Bɔne Befiri

Bɔne fafiri a edi mu fi koma mu. Ɛhwehwɛ obi bɔne a wɔde befiri no na wɔayi aweredi ho adwene biara afi hɔ. Wɔnam saa kwan no so gyaw ma Yehowa ma awiei koraa no obu atɛntrenee, na ebia odi were.—Romafo 12:19.

Nanso, ɛsɛ sɛ yɛhyɛ no nsow sɛ esiane sɛ “koma wɔ hɔ yi, ɛyɛ okontomponi sen ade nyinaa na emuɔ” nti, ɛnkõm nkɔ bɔne fafiri so bere nyinaa, sɛ ɛsɛ sɛ ɛyɛ saa mpo a. (Yeremia 17:9) Yesu ankasa kae sɛ: “Koma mu na adwemmɔne, awudisɛm, ayerefasɛm, aguamansɛm, awifosɛm, adansekurum ne abususɛm fi.”—Mateo 15:19.

Anigyesɛm ne sɛ, yebetumi atete yɛn koma ma ayɛ nea ɛteɛ. Nanso, ɛsɛ sɛ yenya ntetee a yehia no fi beae bi a ɛkorɔn. Yɛn nkutoo ntumi nyɛ saa. (Yeremia 10:23) Odwontofo bi a wofi soro de honhom kaa no huu eyi, na ɔbɔɔ mpae srɛɛ Onyankopɔn akwankyerɛ. Ɔsrɛɛ Yehowa wɔ mpaebɔ mu sɛ: “Ma minsua w’ahyɛde. Ma minhu wo nsiesiei kwan mu.”—Dwom 119:26, 27.

Sɛnea dwom foforo bi kyerɛ no, Ɔhene Dawid a na ofi tete Israel ‘behuu Yehowa kwan mu.’ N’ankasa huu no tẽẽ, na osuaa biribi fii mu. Enti, otumi kae sɛ: “Mmɔborohunufo ne ɔdomfo ne [Yehowa], ne bo kyɛ fuw, na n’adɔe dɔɔso. Sɛ agya yam hyehye no mma ho no, sɛ [Yehowa] yam yɛ no wɔn a wosuro no ho ne no.”—Dwom 103:8, 13.

Ɛho hia sɛ yesua biribi sɛnea Dawid yɛe no. Fa mpaebɔ sua Onyankopɔn bɔne fafiri ho nhwɛso a ɛyɛ pɛ no, ne ne Ba no nso de ho ade. Yɛnam saa kwan no so betumi asua sɛ yebefi koma mu de bɔne afiri.

Nanso, ebia ebinom bebisa no yiye sɛ: Na bɔne a anibere wom nso ɛ? So ɛsɛ sɛ yɛde bɔne nyinaa firi?

Sɛnea Yɛbɛkari Pɛ

Sɛ wɔyɛ obi bɔne kɛse a, obetumi adi awerɛhow pii. Eyi te saa titiriw sɛ onii a ne ho nni asɛm na wɔyɛ no bɔne a anibere wom a. Ebinom mpo betumi abisa sɛ, ‘Mɛyɛ dɛn atumi de obi a ɔde adwemmɔne ayi me ama na wapira me saa bɔne afiri no?’ Ɛdefa bɔne a anibere wom a ebetumi ama wɔatu obi ho no, ebia ɛho behia sɛ nea wɔayɛ no bɔne no de afotu a ɛwɔ Mateo 18:15-17 no di dwuma.

Sɛnea ɛte biara no, ebia ebegyina nea wayɛ bɔne no so kɛse. Efi bere a ɔyɛɛ bɔne no, so wayɛ biribi a ɛkyerɛ sɛ ofi koma mu anu ne ho? So ɔbɔnefo no asakra, ma ebi mpo a wabɔ mmɔden sɛ ɔbɛtoto nneɛma yiye ankasa? Wɔ Yehowa ani so no, ahonu a ɛte saa yɛ ade a ebetumi ama obi anya fafiri wɔ bɔne a ɛyɛ hu ankasa mpo mu. Sɛ́ nhwɛso no, Yehowa de Manase, Israel abakɔsɛm mu ahemmɔne a wɔsen biara no biako, bɔne firii no. Dɛn na ogyinaa so yɛɛ saa? Onyankopɔn yɛɛ saa efisɛ awiei koraa no, Manase brɛɛ ne ho ase na onyaa adwensakra wɔ n’akwammɔne no ho.—2 Beresosɛm 33:12, 13.

Wɔ Bible mu no, nokware ahonu kyerɛ sɛ obi fi nokwaredi mu sakra ne su, ofi komam di yaw wɔ bɔne biara a wayɛ ho. Baabi a ɛfata na ebetumi ayɛ yiye no, ɔbɔ mmɔden sɛ ɔbɛhyɛ nea wafom no no ananmu wɔ ahonu no akyi. (Luka 19:7-10; 2 Korintofo 7:11) Sɛ ahonu a ɛte saa nni hɔ a, Yehowa mfa mfiri.a Afei nso, Onyankopɔn nhwɛ kwan sɛ Kristofo de wɔn a anka wɔwɔ honhom mu hann mu nanso mprempren wɔboapa de wɔn ho ahyɛ bɔne mu a wonnuu wɔn ho no bɔne befiri wɔn. (Hebrifo 10:26-31) Wɔ tebea horow a ɛtra so dodo mu no, ebia bɔne fafiri bɛyɛ nea ɛmfata koraa.—Dwom 139:21, 22; Hesekiel 18:30-32.

Sɛ́ obi a wɔayɛ no bɔne a anibere wom betumi de afiri anaa ɔmfa mfiri no, ebia obetumi asusuw asemmisa foforo ho: So ɛsɛ sɛ mekɔ so yɛ basaa wɔ nkate fam na mete yaw ne abufuw kɛse nka kosi sɛ wɔbɛka asɛm no ma atwa korakora? Susuw nhwɛso bi ho. Ɔhene Dawid dii yaw kɛse bere a ne sahene Yoab kum Abner ne Amasa, “mmarima baanu a wɔteɛ na woye sen [Yoab]” no. (1 Ahene 2:32) Dawid kaa n’abufuw ho asɛm kyerɛe, na akyinnye biara nni ho sɛ ɔka kyerɛɛ Yehowa wɔ mpaebɔ mu. Nanso, ɛda adi sɛ bere kɔɔ so no, Dawid abufuw no brɛɛ ase. Abufuw anhyɛ ne so ankosi sɛ owui. Dawid kɔɔ so ne Yoab yɛɛ adwuma mpo, nanso ɛnyɛ sɛ ɔde saa owudifo a wannu ne ho yi bɔne firii no kɛkɛ. Dawid hwɛ hui sɛ awiei koraa no, wɔde atɛntrenee yɛɛ adwuma.—2 Samuel 3:28-39; 1 Ahene 2:5, 6.

Ebia ebegye bere ne mmɔdenbɔ ansa na wɔn a afoforo bɔne a anibere wom ahaw wɔn no atumi adi abufuw a wonyaa no mfiase no so. Wɔn koma betumi atɔ wɔn yam ntɛm koraa bere a nea wayɛ bɔne no gye ne mfomso tom na onu ne ho no. Nanso, ɛsɛ sɛ obi a ne ho nni asɛm a wɔafom no no tumi nya awerɛkyekye ne ahotɔ fi Yehowa atɛntrenee ne ne nyansa ho nimdeɛ a ɔwɔ ne Kristofo asafo no mu, ɛmfa ho nea ɔbɔnefo no bɛyɛ.

Afei nso hu sɛ, sɛ wode ɔbɔnefo bi bɔne firi no a, eyi nkyerɛ sɛ woreboa bɔne no. Wɔ Kristoni fam no, bɔne fafiri kyerɛ ahotoso mu a ofi gyaw asɛm no ma Yehowa. Ɔne amansan nyinaa Temmufo a ɔteɛ no, na obebu atɛntrenee wɔ bere a ɛsɛ mu. Nea ɛka eyi ho ne “nguaman ne awaresɛefo” nnaadaafo a obebu wɔn atɛn.—Hebrifo 13:4.

Bɔne Fafiri So Mfaso Horow

Odwontofo Dawid too dwom sɛ: “Na wo, [Yehowa], wuye, na wode firi, na w’adɔe dɔɔso ma wɔn a wɔfrɛ wo nyinaa.” (Dwom 86:5) So “wode firi” ntɛm te sɛ Yehowa? Ɛso mfaso yɛ pii.

Nea edi kan no, afoforo a wɔde wɔn bɔne firi wɔn no kanyan abusuabɔ pa. Bible no hyɛ Kristofo sɛ: “Momma mo yam nyɛ yiye na ɛnhyehye mo mmoma mo ho, momfa mfirifiri mo ho, sɛnea Onyankopɔn nam Kristo so de firii mo no.”—Efesofo 4:32.

Nea ɛto so abien no, bɔne fafiri de asomdwoe ba. Eyi nyɛ yɛne yɛn yɔnko nnipa ntam asomdwoe kɛkɛ, na mmom abotɔyam nso.—Romafo 14:19; Kolosefo 3:13-15.

Nea ɛto so abiɛsa no, afoforo a yɛde wɔn bɔne firi wɔn no boa yɛn ma yɛkae sɛ yɛn ankasa nso hia bɔne fafiri. Yiw, ‘obiara ayɛ bɔne, na Onyankopɔn anuonyam abɔ no.’—Romafo 3:23.

Nea etwa to no, afoforo a yɛde wɔn bɔne befiri wɔn no bue hokwan ma Onyankopɔn de yɛn bɔne firi yɛn. Yesu kae sɛ: “Sɛ mode nnipa mfomso firi wɔn a, mo soro agya de mo de befiri mo nso.”—Mateo 6:14.

Susuw nneɛma bebree a ebia na Yesu redwen ho awia ansa na ɔrebewu no ho. Ná ɔredwen n’asuafo no, asɛnka adwuma no, ne ne titiriw no, ne mudi mu a obekura ama Yehowa no ho. Nanso, bere a na ɔrehu amane kɛse wɔ asɛndua so mpo no, dɛn na ɔkaa ho asɛm? Ne nsɛm a etwa to no bi ne sɛ, “Agya, fa firi wɔn.” (Luka 23:34) Yebetumi asuasua Yesu nhwɛso a ɛyɛ pɛ no denam yɛn ho yɛn ho bɔne a yebefi koma mu de afiri so.

[Ase hɔ asɛm]

[Kratafa 5 mfonini ahorow]

So wotee Yesu mfatoho a ɛfa akoa a wamfa bɔne amfiri ho no ase?

[Kratafa 7 mfonini ahorow]

Afoforo a wɔde wɔn bɔne firi wɔn kanyan abusuabɔ pa na ɛde anigye ba