Henanom Na Wobenya Nkwa ‘Yehowa Da’ No?

“Nnipa bɛn na ɛsɛ sɛ moyɛ wɔ abrabɔ kronkron ne onyamesom pa mu, sɛ motwɛn na moma Onyankopɔn da no ba yɛ ntɛm.”—2 PETRO 3:11, 12.

1. Henanom na wɔde Elia honhom ne tumi ayɛ adwuma?

YEHOWA NYANKOPƆN apaw ankorankoro bi a wɔne ne Ba, Yesu Kristo, bɛbom adi ade wɔ ɔsoro Ahenni mu no afi adesamma mu. (Romafo 8:16, 17) Bere a Kristofo a wɔasra wɔn no da so wɔ asase so no, wɔde Elia honhom ne tumi ayɛ adwuma. (Luka 1:17) Wɔ asɛm a edi eyi anim mu no, yɛkaa nsɛdi bi a ɛwɔ wɔne Elia dwumadi mu no ho asɛm. Na adwuma a Elia dedifo, odiyifo Elisa, bɛyɛe no nso ɛ?—1 Ahene 19:15, 16.

2. (a) Dɛn ne Elia anwonwade a etwa to, ne Elisa de a edi kan? (b) Adanse bɛn na ɛwɔ hɔ a ɛkyerɛ sɛ Elia ankɔ soro?

² Anwonwade a etwa to a Elia yɛe ne Yordan Asubɔnten no a ɔde ne nguguso bɔɔ mu de paee mu no. Eyi maa Elia ne Elisa tumi faa asase kesee so twa kɔɔ agya. Bere a wɔnam asubɔnten no apuei fam no, ahum bi faa Elia kɔɔ asase so fã baabi. (Hwɛ adaka a ɛwɔ kratafa 15 a n’asɛmti ne “Ɔsoro Bɛn na Elia Foro Kɔe?” no.) Elia gyaw ne nguguso no hɔ. Bere a Elisa de bɔɔ Yordan mu no, emu paee bio, na ɛmaa otumi san faa asase kesee so twa kɔɔ agya. Anwonwade yi ma ɛdaa adi sɛ Elisa abɛyɛ Elia dedifo a ɔrebɛma nokware som akɔ so wɔ Israel.—2 Ahene 2:6-15.

Su Pa Ahorow Ho Hia

3. Dɛn na Paulo ne Petro ka faa Yesu mmae ne ‘Yehowa da’ no ho?

³ Elia ne Elisa nna no akyi mfehaha pii no, asomafo Paulo ne Petro de ‘Yehowa da’ no bataa Yesu Kristo mmae ne “ɔsoro foforo ne asase foforo” a na ɛbɛba akyiri yi no ho. (2 Tesalonikafo 2:1, 2; 2 Petro 3:10-13) Sɛ yebenya yɛn ti adidi mu wɔ Yehowa da kɛse—bere a Onyankopɔn sɛe n’atamfo na ogye ne nkurɔfo—no mu a, ɛsɛ sɛ yɛhwehwɛ Yehowa na yɛda ahobrɛase ne trenee adi. (Sefania 2:1-3) Nanso bere a yɛresusuw odiyifo Elisa ho nsɛm ho no, su pa afoforo bi da adi.

4. Dwuma bɛn na nsiyɛ di wɔ Yehowa som mu?

⁴ Sɛ yebenya yɛn ti adidi mu wɔ ‘Yehowa da’ no mu a, nsi a yɛbɛyɛ wɔ Onyankopɔn som adwuma no mu ho hia. Ná Elia ne Elisa yɛ nsi wɔ Yehowa som adwuma mu. Nsi a ɛte saa ara na Kristofo a wɔasra wɔn no nkaefo a wɔwɔ hɔ nnɛ no nam so de ɔsom kronn ma Yehowa, na wɔde di asɛmpaka adwuma no anim.a Efi 1930 mfe no mfinimfini no, wɔahyɛ wɔn a wogye Ahenni asɛm no na wɔhwɛ kwan sɛ wɔbɛtra asase so daa no nkuran sɛ wonhyira wɔn ho so mma Yehowa, na wɔmmɔ asu. (Marko 8:34; 1 Petro 3:21) Ɔpepem pii ayɛ nkuranhyɛ yi ho ade ɔkwampa so. Bere bi na anka wɔwɔ honhom fam sum mu, na na wɔawu wɔ bɔne mu, nanso afei de wɔasua Onyankopɔn nokware no, agye daa nkwa wɔ asase so paradise ho anidaso no atom, na wɔde nsi reyɛ Yehowa som adwuma no. (Dwom 37:29; Adiyisɛm 21:3-5) Wɔnam wɔn nsiyɛ, biakoyɛ, ahɔhoyɛ, ne nnwuma pa foforo so ma Kristo honhom fam nuanom a wɔda so wɔ asase so no nya ahotɔ kɛse.—Mateo 25:31-46.

5. Dɛn nti na ɛho hia paa sɛ yɛyɛ Yesu “nuanom” papa, na nhwɛso bɛn na yɛwɔ wɔ Elisa nna no mu?

⁵ Wɔn a wɔyɛ Yesu “nuanom” papa esiane sɛ saafo a wɔasra wɔn yi yɛ n’akyidifo nti no hwɛ kwan sɛ wobenya wɔn ti adidi mu wɔ ‘Yehowa da’ no mu. Wohyiraa awarefo bi a na wɔte akuraa Sunem ase no kɛse wɔ ayamye ne ahɔhoyɛ su a woyii no adi kyerɛɛ Elisa ne ne somfo no ho. Ná saa awarefo yi nni ba, na na okunu no anyin. Nanso Elisa hyɛɛ Sunemni bea no bɔ sɛ ɔbɛwo ɔbabarima, na ɔwoe nso. Bere a ɔbabarima koro yi wui mfe bi akyi no, Elisa kɔɔ Sunem konyan no. (2 Ahene 4:8-17, 32-37) Hwɛ akatua kɛse a wonyae wɔ ahɔhoyɛ su a woyii no adi kyerɛɛ Elisa no mu!

6, 7. Nhwɛso bɛn na Naaman yɛe, na eyi fa yɛn ti a yebenya adidi mu wɔ ‘Yehowa da’ no mu ho dɛn?

⁶ Egye ahobrɛase na obi atumi agye akwankyerɛ a egyina Bible so afi Kristo “nuanom” hɔ na ama wanya anidaso sɛ obenya ne ti adidi mu wɔ Yehowa da no. Ná ɛsɛ sɛ Siriafo sahene Naaman a na ɔyare kwata no nya ahobrɛase, na ama watie Israelni abeawa a na wɔafa no dommum no nyansahyɛ, akɔ Israel akɔhwehwɛ Elisa ma wɔasa no yare. Sɛ anka Elisa befi adi akohyia Naaman no, ɔsoma ma wɔkɔka kyerɛɛ no sɛ: “Kɔ na koguare mpɛn ason Yordan mu, na wo ho bɛsan aba wo ho, na wo ho afi.” (2 Ahene 5:10) Naaman tee nka sɛ wɔabrɛ no ase, na ne bo fuwii, nanso bere a ofii ahobrɛase mu de ne ho kɔbɔɔ Yordan mu mpɛn ason no, “ne ho san baa mu sɛ abofra ketewa honam, na ne ho fii.” (2 Ahene 5:14) Ansa na Naaman rekɔ fie no, otwaa kwan san kɔɔ Samaria tɔnn kɔdaa Yehowa diyifo no ase. Esiane sɛ na Elisa abɔ ne tirim sɛ ɔremfa Onyankopɔn tumi a ne nsa aka no mpɛ honam fam mfaso nti, ofii adi kohyiaa Naaman, nanso wannye akyɛde biara. Naaman fi ahobrɛase mu ka kyerɛɛ Elisa sɛ: “W’akoa remmɔ ɔhyew afɔre anaa afɔre biara mma onyame biara bio sɛ [Yehowa, NW] nko.”—2 Ahene 5:17.

⁷ Nnipa ɔpepem pii anya nhyira kɛse wɔ ahobrɛase mu a wofi di Kyerɛwnsɛm mu afotu a wɔn a wɔasra wɔn no de ma akyi no ho. Afei nso, esiane sɛ nnipa komapafo yi akyerɛ Yesu agyede afɔrebɔ no mu gyidi nti, wɔn ho atew wɔ honhom fam. Seesei wɔanya hokwan abɛyɛ Yehowa Nyankopɔn ne Yesu Kristo nnamfo. (Dwom 15:1, 2; Luka 16:9) Na wobenya wɔn ho a wɔde ama Onyankopɔn ne ne som adwuma no so akatua denam wɔn ti a wobenya adidi mu wɔ daa ɔsɛe a ɛda hɔ retwɛn abɔnefo ahantanfo a wonnu wɔn ho wɔ ‘Yehowa da’ a ɛreba ntɛmntɛm mu no mu so.—Luka 13:24; 1 Yohane 1:7.

“Hena na Ɔwɔ M’afã, Hena?”

8. (a) Su bɛn na wɔn a wobenya wɔn ti adidi mu wɔ ‘Yehowa da’ no kura mu wɔ Onyankopɔn apɛdeyɛ ho? (b) Ahyɛde bɛn na wɔde maa Yehu? (d) Dɛn na na ɛbɛba Isebel so?

⁸ Ɛsɛ sɛ wɔn a wɔpɛ sɛ wonya wɔn ti didi mu wɔ ‘Yehowa da’ no mu yɛ wɔn ade ntɛm so nso wɔ Onyankopɔn apɛdeyɛ ho. Elia de akokoduru kaa Ɔhene Ahab abusuafo awudifo a na wɔsom Baal no sɛe ho asɛm siei. (1 Ahene 21:17-26) Nanso, ansa na ɔsɛe yi bɛba no, na ɛsɛ sɛ Elia dedifo Elisa wie adwuma bi a na wonwiei. (1 Ahene 19:15-17) Bere a Yehowa bere dui no, Elisa ka kyerɛɛ ɔsomfo bi sɛ ɔnkɔsra ɔsahene Yehu sɛ Israel hene foforo. Bere a ohwiee ngo guu Yehu tiri so wiei no, ɔsomafo no ka kyerɛɛ no sɛ: “Sɛ [Yehowa, NW] Israel Nyankopɔn se ni: Masra wo masi wo [Yehowa, NW] man Israel so hene; na wobɛbɔ wo wura Ahab fi, na madi me nkoa adiyifo no mogya ne [Yehowa, NW] nkoa nyinaa mogya so were Isebel nsam na Ahab fi nyinaa asɛe.” Ná wɔbɛtow Ɔhemmaa Isebel otirimɔdenfo no ama akraman, na ɔrennya osie pa.—2 Ahene 9:1-10.

9, 10. Ɔkwan bɛn so na Elia asɛm baa mu wɔ Isebel so?

⁹ Yehu mmarima no gyee ne sra no toom, na wɔpaee mu kae sɛ ɔne Israel hene foforo. Yehu yɛɛ ade ntɛm so tutuu mmirika kɔɔ Yesreel kofii n’adwuma no ase kokunkum Baalsom mu akannifo awaefo no. Ahab babarima, Yehoram, na Yehu bɛmma dii kan kaa no. Ofii kurow no mu kobisaa Yehu sɛ ebia ɔbaa no asomdwoe so anaa. Yehu buae sɛ: “Asomdwoe ne dɛn, sɛ wo nã Isebel aguamammɔ ne n’abayigoru bebree no rekɔ so yi?” Ɛhɔ ara na Yehu bɛmma hwirow Yehoram koma mu.—2 Ahene 9:22-24.

¹⁰ Mmea a wosuro Onyankopɔn kwati sɛ wɔbɛyɛ wɔn ho sɛ Isebel anaasɛ obiara a ɔte sɛ ɔno. (Adiyisɛm 2:18-23) Bere a Yehu duu Yesreel no, na Isebel abɔ mmɔden asiesie ne ho fɛfɛɛfɛ. Isebel fii mfɛnsere mu hwɛɛ no kyiaa no ɔyaw so. Yehu bisaa Isebel asomfo no sɛ: “Hena na ɔwɔ m’afã, hena?” Ntɛm ara ahemfie adwumayɛfo baanu anaa baasa fi soro hwɛɛ no. So na wɔwɔ Yehu afã? Ɔhyɛɛ wɔn sɛ: “Montow no nhwe fam!” Ɔkaa saa pɛ, wɔyɛɛ ade ntɛm so tow ɔbɔnefo Isebel faa mfɛnsere mu hwee fam. Ɛbɛyɛ sɛ apɔnkɔ tiatiaa ne so. Bere a nkurɔfo kɔe sɛ wɔrekosie no no, “wɔanhu ne ho biribi gye ne tikora ne ne nan ne ne nsayam.” Hwɛ sɛnea Elia asɛm no nyaa ne mmamu ma ɛyɛɛ nwonwa sɛ: “Akraman bedi Isebel nam.”—2 Ahene 9:30-37.

Komam a Wofi Boa Nokware Som

11. Hena ne Yehonadab, na ɔkwan bɛn so na ɔboaa nokware som?

¹¹ Ɛsɛ sɛ wɔn a wɔpɛ sɛ wonya wɔn ti didi mu wɔ ‘Yehowa da’ no, na wɔtra ase daa wɔ asase so no fi koma nyinaa mu boa nokware som. Ɛsɛ sɛ wɔyɛ sɛ Yehonadab, anaa Yonadab, Yehowa somfo bi a na ɔnyɛ Israelni no. Bere a Yehu kɔɔ so de nsiyɛ dii n’ahyɛde ho dwuma no, Yehonadab pɛe sɛ ɔda n’anisɔ ne ne mmoa adi. Enti ofii adi kohyiaa Israel hene foforo no a na ɔrekɔ Samaria akokunkum Ahab abusuafo a aka no. Bere a Yehu huu Yehonadab no, obisaa no sɛ: “So wowɔ me ho koma sɛ mewɔ wo ho no?” Mmuae pa a Yehonadab de mae no kaa Yehu ma ɔteɛɛ ne nsa maa Yehonadab frɛɛ no sɛ ɔmmra n’akodi teaseɛnam no mu, kae sɛ: “Wo ne me nkɔ, na kɔhwɛ me ninkunu a metwe mema [Yehowa, NW].” Yehonadab gyee hokwan a wanya sɛ ɔbɛboa Yehowa brafo a wɔasra no no toom a wantwentwɛn ne nan ase.—2 Ahene 10:15-17.

12. Dɛn nti na ɛfata sɛ Yehowa hwehwɛ ɔsom a edi mũ?

¹² Akyinnye biara nni ho sɛ komam a yefi boa nokware som no fata, efisɛ Yehowa ne Ɔbɔadeɛ ne Amansan Hene, a ɔhwehwɛ sɛ yɛde ɔsom a edi mũ ma no, na ɛsɛ no nso. Ɔhyɛɛ Israelfo no sɛ: “Nyɛ ohoni bi anaa ade a ɛwɔ wim wɔ ɔsoro anaa nea ɛwɔ asase so wɔ fam anaa nea ɛwɔ nsu mu wɔ asase ase nsɛso biara mfa; nkotow wɔn, na nsom wɔn. Na me, [Yehowa, NW] wo Nyankopɔn, meyɛ Onyankopɔn ninkufo.” (Exodus 20:4, 5) Ɛsɛ sɛ wɔn a wɔpɛ sɛ wonya wɔn ti didi mu wɔ ‘Yehowa da’ no mu no som ɔno nkutoo, na wɔyɛ saa wɔ “honhom ne nokware mu.” (Yohane 4:23, 24) Ɛsɛ sɛ wogyina nokware som akyi pintinn, te sɛ Elia, Elisa, ne Yehonadab.

13. Sɛnea na Yehonadab koma bata Yehu ho no, henanom na wogye Mesia Hene no tom, na ɔkwan bɛn so na wɔda eyi adi?

¹³ Ahab fiefo kum akyi no, Ɔhene Yehu faa akwan foforo so huu Baal asomfo, na oyii saa atoro som yi fii Israel. (2 Ahene 10:18-28) Ɛnnɛ, wɔapaw ɔsoro Hene Yesu Kristo sɛ onkunkum Yehowa atamfo, na ɔntew N’amansan tumidi ho. Sɛnea na Yehonadab koma bata Yehu de ho no, “nnipakuw kɛse” a wɔyɛ Yesu “nguan foforo” no mufo a wɔwɔ hɔ nnɛ no fi koma nyinaa mu agye Kristo atom sɛ Mesia Hene, na wɔne ne nuanom a wɔwɔ asase so no ayɛ biako. (Adiyisɛm 7:9, 10; Yohane 10:16) Wɔnam nokware som mu a wɔde wɔn ho ahyɛ, ne nsi a wɔde reyɛ Kristofo som adwuma no so de kɔkɔbɔ rema Onyankopɔn atamfo wɔ ‘Yehowa da’ a ɛreba ntɛmntɛm no ho de di eyi ho adanse.—Mateo 10:32, 33; Romafo 10:9, 10.

Nsɛm a Ɛyɛ Nwonwa Wɔ Yɛn Anim Pɛɛ!

14. Dɛn na ɛda hɔ retwɛn atoro som?

¹⁴ Yehu yɛɛ ade maa Baalsom baa awiei wɔ Israel. Wɔ yɛn mmere yi mu no, Onyankopɔn nam Yehu Ɔkɛseɛ, Yesu Kristo, so na ɛde Babilon Kɛse, wiase atoro som ahemman no, sɛe bɛba. Ɛrenkyɛ yebehu ɔbɔfo no nsɛm a ɔka kyerɛɛ ɔsomafo Yohane yi mmamu: “Mmɛn du a wuhui no, ne aboa no, wɔn na wɔbɛtan aguaman [Babilon Kɛse] no, na wɔayɛ no pasaa, na wada adagyaw, na wɔadi ne nam, na wɔde ogya ahyew no. Na Onyankopɔn na ɔde ahyɛ wɔn komam sɛ wɔmma ne tirim asɛm mmra mu, na wɔnyɛ adwenkoro, na wɔmfa wɔn ahenni mma aboa no nkosi sɛ Onyankopɔn nsɛm no beba mu.” (Adiyisɛm 17:16, 17; 18:2-5) “Mmɛn du” no yɛ amammui mu atumfoɔ a wɔredi tumi wɔ asase so no ho mfonini. Ɛwom sɛ wɔne Babilon Kɛse no rebɔ aguaman honhom mu seesei de, nanso ne bere a aka yɛ tia. Wiase amammuifo yi bɛsɛe atoro som, na “aboa no”—Amanaman Nkabom no—ne “mmɛn du” no benya kyɛfa titiriw bi wɔ ne sɛe no mu.b Ɛda a wobeyi Yehowa ayɛ bɛn ara ni!—Adiyisɛm 19:1-6.

15. Sɛ wɔbɔ mmɔden sɛ wɔbɛsɛe Onyankopɔn asase so ahyehyɛde no a, dɛn na ɛbɛba?

¹⁵ Bere a Ɔhene Yehu de ntua baa Baalsom so akyi no, n’adehye abusua no danee adwene kɔɔ Israel amammui mu atamfo so. Ɔhene Yesu Kristo bɛyɛ saa ara. Amammui mu atumfoɔ bɛwɔ hɔ wɔ atoro som a ɛte sɛ Baal de no sɛe akyi. Wɔ Satan Ɔbonsam nkɛntɛnso ase no, Yehowa tumidi ho atamfo yi bɛbɔ mmɔden sɛ wɔbɛtow ahyɛ Onyankopɔn asase so ahyehyɛde so asɛe no. (Hesekiel 38:14-16) Nanso Yehowa bɛma Ɔhene Yesu Kristo abɔ wɔn adwerɛw wɔn denam ɔsɛe a ɔde bɛba wɔn so wɔ Harmagedon, “ade nyinaa so tumfoɔ no, da kɛse no mu ko no” mu, de awie Yehowa tumidi ho a wɔbɛtew no.—Adiyisɛm 16:14, 16; 19:11-21; Hesekiel 38:18-23.

Elisa Nsi a Yɛde Bɛsom

16, 17. (a) Yɛyɛ dɛn hu sɛ Elisa yɛɛ nsi kosii ne wuda? (b) Dɛn na ɛsɛ sɛ yɛde nokware ho agyan no yɛ?

¹⁶ Enkosi sɛ ‘Yehowa da’ no de Satan nneɛma nhyehyɛe bɔne yi nyinaa bɛba awiei no, Onyankopɔn asomfo bɛyɛ akokodurufo ne nsiyɛfo te sɛ Elisa. Adwuma a Elisa yɛe sɛ Elia somfo akyi no, ɔno nkutoo somee sɛ Yehowa diyifo bɛboro mfe 50! Na Elisa yɛɛ nsi kosii ne wuda. Aka kakra ma wawu no, Yehu banana, Ɔhene Yoas kɔsraa no. Elisa ka kyerɛɛ no sɛ ɔntow agyan mfa mfɛnsere mu. Agyan no kɔe ara kɔwɔɔ baabi a ɔkyerɛɛ no no, na Elisa teɛɛm sɛ: “[Yehowa, NW] nkonimdi agyan, Siria so nkonimdi agyan! Na wobɛbɔ Siria wɔ Afek akosi sɛ wobɛdwerɛw wɔn.” Nea edi hɔ no, Elisa kae sɛ Yoas ntow n’agyan no mmɔ fam. Nanso wamfa nsi anyɛ eyi, ɔde bɔɔ hɔ mprɛnsa pɛ. Afei Elisa kae sɛ, saa nti Yoas bedi Siria so nkonim mprɛnsa pɛ, na saa ara na ɛbae. (2 Ahene 13:14-19, 25) Ɔhene Yoas ammɔ Siria ‘annwerɛw’ wɔn koraa.

¹⁷ Nanso, nkaefo a wɔasra wɔn no de nsi a ɛte sɛ Elisa de no kɔ so ko tia atoro som. Wɔn ahokafo a wɔwɔ asase so anidaso no nso reyɛ saa ara. Afei nso, ɛyɛ papa sɛ wɔn a wɔpɛ sɛ wonya wɔn ti didi mu wɔ ‘Yehowa da’ no mu nyinaa kae Elisa nsɛm a ɛfa asase so a yɛbɛbɔ no ho no. Momma yɛmfa nokware agyan no, na yɛmfa nsiyɛ ntow no—ntoatoaso—yiw, nkosi sɛ Yehowa bɛka sɛ yɛawie adwuma a yɛde reyɛ no.

18. Ɛsɛ sɛ yɛyɛ yɛn ade dɛn wɔ nsɛm a ɛwɔ 2 Petro 3:11, 12 no ho?

¹⁸ Ɛrenkyɛ na ‘Yehowa da’ no de mprempren nneɛma nhyehyɛe yi aba awiei. Enti momma yɛmma ɔsomafo Petro nsɛm a ɛka koma yi nkanyan yɛn. Petro kae sɛ: “Sɛ eyinom nyinaa bɛsɛe a, nnipa bɛn na ɛsɛ sɛ moyɛ wɔ abrabɔ kronkron ne onyamesom pa mu, sɛ motwɛn na moma Onyankopɔn da no ba yɛ ntɛm.” (2 Petro 3:11, 12) Sɛ Onyankopɔn abufuw mu gya a ɔnam Yesu Kristo so de bɛba no sɛe nhyehyɛe yi mu biribiara a, wɔn a wɔn abrabɔ yɛ papa na wɔwɔ onyamesom pa no nkutoo na wobenya wɔn ti adidi mu. Abrabɔ ne honhom fam ahotew ho hia. Saa ara na yɛn yɔnko nnipa ho dɔ a yɛda no adi denam wɔn ahiade ho dwuma a yedi so, titiriw bere a yɛnam yɛn Kristofo som adwuma so di ho dwuma wɔ honhom fam no nso ho hia.

19. Dɛn na ɛsɛ sɛ yɛyɛ na yɛanya yɛn ti adidi mu wɔ ‘Yehowa da’ no mu?

¹⁹ So wo nsɛm ne wo nneyɛe da no adi sɛ woyɛ Onyankopɔn somfo nokwafo ne nsiyɛfo? Sɛ ɛte saa a, wubetumi ahwɛ kwan sɛ wubenya wo ti adidi mu wɔ ‘Yehowa da’ no mu akɔ Onyankopɔn wiase foforo a wahyɛ ho bɔ no mu. Yiw, sɛ woyɛ Kristo honhom fam nuanom papa esiane sɛ wɔyɛ n’akyidifo nti, sɛnea Sunem awarefo no yɛɛ Elisa papa no a, wubetumi anya wo ti adidi mu. Sɛ wubenya wo ti adidi mu a, ɛsɛ sɛ woyɛ w’ade nso te sɛ Naaman a ofi ahobrɛase mu gyee Onyankopɔn akwankyerɛ toom na ɔbɛyɛɛ Yehowa somfo no. Sɛ wo kɔn dɔ sɛ wobɛtra asase so paradise mu a, ɛsɛ sɛ wufi komam boa nokware som, sɛnea Yehonadab yɛe no. Ɛno bɛma woaka Yehowa asomfo anokwafo a ɛrenkyɛ wobehu Yesu nsɛm yi mmamu no ho: “Mo a m’agya ahyira mo, mommra mmɛfa ahenni a wɔasiesie ama mo fi wiase asefi mu no nni!”—Mateo 25:34.

[Ase hɔ nsɛm]

Wubebua Dɛn?

◻ Su ahorow a yehia na ama yɛanya yɛn ti adidi mu wɔ ‘Yehowa da’ no mu bi ne dɛn?

◻ Nhwɛso bɛn na Sunem awarefo no yɛe wɔ Elisa nna no mu?

◻ Asuade bɛn na yebetumi anya afi Naaman hɔ?

◻ Yɛbɛyɛ dɛn atumi adi Yehonadab nhwɛso no akyi?

◻ Ɛsɛ sɛ 2 Petro 3:11, 12 ka yɛn dɛn?