Ti Ade A Ɛfata A Wobegye

SƐNEA na ɛte wɔ Bible mmere mu no, ɛnnɛ, amammerɛ binom hwehwɛ sɛ ɔbarima tua ti ade ansa na watumi aware ɔbea bi. Yakob ka kyerɛɛ Laban a na ɔbɛyɛ n’ase barima no sɛ: “Wo ba akumaa Rahel nti mɛsom wo mfe ason.” (Genesis 29:18) Esiane ɔdɔ a na Yakob wɔ ma Rahel nti, ɔkae sɛ ɔbɛma bo a ɛkɔ soro—nea ɛne mfe ason akatua yɛ pɛ! Laban penee nea Yakob de mae no so, nanso ɔdaadaa no ma ɔwaree ne babea panyin Lea. Sɛnea Laban ne Yakob dii akyiri yi yɛɛ nnaadaa nkutoo. (Genesis 31:41) Esiane honam fam nneɛma a Laban de n’ani sii so nti, ne mmabea no ankyerɛ obu amma no. Wobisae sɛ: “So ommu yɛn ahɔho? Efisɛ watɔn yɛn, na wadi yɛn ti sika awie.”—Genesis 31:15.

Awerɛhosɛm ne sɛ, wɔ honam fam ade dodowpɛ wiase yi mu no, awofo pii yɛ wɔn ade te sɛ Laban. Ebinom yɛ ade kɔ akyiri sen saa. Afrika atesɛm krataa bi ka sɛ “mfaso a agyanom adifudepɛfo pɛ ara kɛkɛ nti” na wɔde wɔn mma binom ma aware. Sikasɛm mu ahokyere yɛ ade foforo a ɛma awofo binom bu wɔn mmabea sɛ wɔn a wobetumi ama wɔn ho atɔ wɔn wɔ sikasɛm mu nsɛnnennen ho.a

Awofo binom mma wɔn mmabea kwan mma wɔnware ntɛm esiane sɛ wɔrepɛ obi a ɔbɛma bo kɛse nti. Eyi betumi de ɔhaw kɛse aba. Atesɛm krataa nsɛnkyerɛwfo bi a ɔwɔ Afrika apuei fam kyerɛwee sɛ: “Mmofra paw sɛ wɔne wɔn a wɔbɛware wɔn no beguan na ama wɔakwati ti ade kɛse a wɔn nsenom a wɔyɛ katee gye no.” Ɔhaw biako a efi ti ade kɛse a wogye mu ba ne nna mu ɔbrasɛe. Afei nso, mmofra binom bɔ mmɔden tɔ ɔyere nanso ɛde ka kɛse brɛ wɔn. South Africa asetra yiyedi ho dwumayɛni bi tuu fo sɛ: “Ɛsɛ sɛ awofo da ntease adi. Ɛnsɛ sɛ wogye bo akɛse. Ehia sɛ wɔn a wɔaware foforo no nya nea wɔde bɛbɔ wɔn bra . . . Enti adɛn nti na ɛsɛ sɛ wode aberante no to ka mu?”

Ɛbɛyɛ dɛn na Kristofo awofo atumi ada ntease adi wɔ nhwɛso a wɔbɛyɛ ho bere a wɔregye ti ade anaa wɔretua no? Eyi yɛ aniberesɛm efisɛ Bible no hyɛ sɛ: “Momma nnipa nyinaa nhu mo ntease.”—Filipifo 4:5, NW.

Bible Nnyinasosɛm Ahorow a Ntease Wom

Sɛ Kristofo awofo besi gyinae sɛ wɔbɛka ti ade ho asɛm anaasɛ wɔrenyɛ saa no yɛ wɔn ankasa gyinaesi. Sɛ wɔpaw sɛ wɔbɛyɛ saa a, ɛsɛ sɛ wɔma adeyɛ a ɛte sɛɛ ne Bible nnyinasosɛm ahorow hyia. Onyankopɔn Asɛm ka sɛ: “Mommma sikanibere mmma mo abrabɔ mu.” (Hebrifo 13:5) Sɛ ɔwofo a ɔyɛ Kristoni amfa nnyinasosɛm yi anni dwuma bere a wɔreka awaregye ho asɛm a, na ɔreda no adi sɛ ɔnyɛ nhwɛso pa. Ɛsɛ sɛ mmarima a wɔwɔ dibea wɔ Kristofo asafo no mu no yɛ wɔn a ‘wɔwɔ ntease,’ ‘wɔnyɛ sikanibere’ anaasɛ “adifudepɛfo.” (1 Timoteo 3:3, 8) Wobetumi mpo atu Kristoni a ofi adifudepɛ mu gye ti ade a ne bo yɛ den na ɔnkyerɛ ahonu no afi asafo no mu.—1 Korintofo 5:11, 13; 6:9, 10.

Esiane ɔhaw ahorow a adifudepɛ de ba nti, aban binom ayɛ mmara a ɛkyerɛ ti ade a ɛsɛ sɛ wogye. Sɛ nhwɛso no, wɔ Afrika Atɔe fam man bi a wɔfrɛ no Togo mu no, wɔahyɛ mmara bi sɛ “wobetumi de nneɛma anaa sika anaa n’abien nyinaa ama” sɛ ti ade. Mmara no kyerɛ nso sɛ: “Ɔkwan biara so no, ɛnsɛ sɛ sika no boro France sika CFA 10,000 (America sika $20.00).” Bible no hyɛ Kristofo mpɛn pii sɛ ɛsɛ sɛ wɔyɛ ɔman mma a wodi mmara so. (Tito 3:1) Sɛ aban no nyɛɛ mmara no katee mpo a, obi a ɔyɛ nokware Kristoni no bɛpɛ sɛ odi so. Saa a ɔbɛyɛ no bɛma no anya ahonim pa wɔ Onyankopɔn anim na ɛremma ɔnto afoforo hintidua.—Romafo 13:1, 5; 1 Korintofo 10:32, 33.

Hena na Ɛsɛ sɛ Ogye Ti Ade?

Wɔ aman bi mu no, ebia sɛnea wogye ti ade no betumi ne nnyinasosɛm foforo a ehia abɔ abira. Bible no kyerɛ sɛ ɛyɛ agya no asɛyɛde sɛ odi ne fie nsɛm ho dwuma. (1 Korintofo 11:3; Kolosefo 3:18, 20) Enti, ɛsɛ sɛ wɔn a wɔwɔ dibea wɔ asafo no mu no yɛ mmarima a ‘wotumi di wɔn mma ne wɔn ankasa afi so yiye.’—1 Timoteo 3:12.

Nanso, wɔ ɔman bi mu no, ebia wɔtaa ma abusua ti no abusuafo na wɔka awaregye no ho asɛm. Na saa abusua yi ka sɛ wɔmma wɔn ti ade no bi. Eyi de sɔhwɛ ba Kristofo abusua no so. Abusua ti binom gyina amammerɛ so ma mmusua a wonnye nni no gye ti ade a ne bo yɛ den. Ɛtɔ da bi a eyi ma Kristoni abeawa no kɔware obi a ɔnyɛ gyidini. Eyi ne afotu a ɛse ɛsɛ sɛ Kristofo ware wɔ “Awurade mu nko” no bɔ abira. (1 Korintofo 7:39) Wɔrentumi mmu abusua ti a ɔma kwan ma abusuafo a wɔnyɛ gyidifo si gyinae a ɛde ne mma honhom fam yiyedi to asiane mu no sɛ obi a “odi n’ankasa fi so yiye.”—1 Timoteo 3:4.

Sɛnea tete agya Abraham a na osuro Onyankopɔn no yɛe no, sɛ ɛba sɛ agya a ɔyɛ Kristoni amfa ne ho anhyɛ aware a wogye ma ne mma mu biako mu nso ɛ? (Genesis 24:2-4) Sɛ agya a ɔyɛ Kristoni tu obi sɛ onkodi eyi ho dwuma a, ɛsɛ sɛ ohu sɛ nea obegye ti ade no de akwankyerɛ a ɛne Bible nnyinasosɛm a ɛfata hyia di dwuma. Afei nso, ansa na awofo Kristofo bɛyɛ nhyehyɛe bi akodi ti ade ano no, ɛsɛ sɛ wosusuw nsɛm ho yiye na wɔamma amammerɛ anaa bo a wogye a ntease nnim amma wɔanyɛ ade antra so.—Mmebusɛm 22:3.

Su a Ɛnyɛ Kristofo De a Yɛbɛkwati

Bible no kasa tia ahantan ne ‘obi asetrade a ɔde hoahoa ne ho.’ (1 Yohane 2:16; Mmebusɛm 21:4) Nanso ankorankoro bi a wɔwɔ Kristofo asafo mu no yii su a ɛte sɛɛ adi bere a na wɔreka wɔn aware asɛm no. Ebinom suasua wiase no ama wɔatua anaa wɔagye ti ade kɛse de ahoahoa wɔn ho. Nanso, Ɔwɛn Aban Asafo no baa dwumadibea biako a ɛwɔ Afrika bɔ amanneɛ sɛ: “Okununom binom nkyerɛ obu bere a abusua no da ntease adi wɔ kakraa bi a wogye wɔn mu, na wobu wɔn yerenom abomfiaa sɛ wɔn bo yɛ fow.”

Ti ade a ne bo yɛ den a wɔma wɔn ani bere anya Kristofo binom so tumi ma ɛde ɔhaw kɛse na aba. Sɛ nhwɛso no, susuw amanneɛbɔ a efi Ɔwɛn Aban Asafo no baa dwumadibea foforo hɔ yi ho: “Ɛyɛ den ma anuanom asigyafo nyinaa sɛ wobenya ahokafo. Nea afi mu aba ne sɛ aguamammɔ nti wɔatu nnipa pii. Anuanom mmarima binom kɔ mmeae a wotu sika ne dɛnkyɛmmo kɔhwehwɛ bi sɛnea ɛbɛyɛ a wɔbɛtɔn de anya nea wɔde bɛware. Eyi betumi agye wɔn afe anaa mfe abien anaa nea ɛboro saa, na wɔtaa yɛ mmerɛw honhom mu bere a wɔtew wɔn ho fi anuanom ne asafo no ho no.”

Nea ɛbɛyɛ na awofo a wɔyɛ Kristofo akwati awerɛhosɛm yi no, ɛsɛ sɛ wosuasua asafo no mufo a wɔn ho akokwaw no. Ɛwom sɛ na ɔsomafo Paulo nyɛ ɔwofo de, nanso na ɔne ne mfɛfo gyidifo di wɔ ntease mu. Ɔyɛɛ ahwɛyiye sɛnea ɛbɛyɛ a ɔmfa adesoa kɛse biara nto obi so. (Asomafo no Nnwuma 20:33) Nokwarem no, ɛsɛ sɛ awofo a wɔyɛ Kristofo susuw ne nhwɛso a pɛsɛmenkominya nnim no ho bere a wɔreka ti ade ho asɛm no. Nokwarem no, wɔde honhom kaa Paulo ma ɔkyerɛwee sɛ: “Anuanom, munsua me, na monhwɛ wɔn a wɔnam saa, sɛnea mowɔ yɛn sɛ nsusuwso no.”—Filipifo 3:17.

Ntease a Wɔda no Adi Ho Nhwɛso Horow

Awofo a wɔyɛ Kristofo pii ada nhwɛso pa adi wɔ aware a wogye mu. Susuw asɛm a ɛfa Joseph ne ne yere Mae a wɔsom sɛ bere nyinaa asɛmpakafo ho no ho.b Wɔte nsupɔw a wɔfrɛ no Solomon Islands no mu biako so faako a ɛtɔ da a ti ade a wɔka ho asɛm yɛ nsɛnnennen no. Nea ɛbɛyɛ na Joseph ne Mae akwati nsɛnnennen a ɛte saa no, wɔmaa wɔn babea Helen kwan ma ɔkɔwaree nsupɔw a ɛbɛn hɔ no mu biako so. Wɔyɛɛ saa ara bere a wɔn babea foforo a wɔfrɛ no Esther rekɔware no. Afei nso, Joseph pene maa n’ase barima Peter tuaa ti ade a ɛwɔ fam koraa. Bere a wobisaa Joseph nea enti a ɔyɛɛ saa no, ɔkyerɛkyerɛɛ mu sɛ: “Na mempɛ sɛ mede adesoa bɛto m’ase ɔkwampaefo no so.”

Yehowa Adansefo pii a wɔwɔ Afrika no nso ayɛ nhwɛso pa wɔ ntease a wɔda no adi mu. Wɔ mmeae binom no, abusua santen no taa hwɛ kwan sɛ wobetua sika kɛse ama wɔn ansa na wɔama kwan ma wɔaka ti ade ankasa no ho asɛm. Na ansa na wɔde ɔbea no bɛma ɔbarima no, wɔma ɔhyɛ bɔ sɛ obetua ɔbea a ɔrebɛware no no nua barima kumaa yere ti ade ama no daakye.

Nanso, susuw Kossi ne ne yere Mara nhwɛso no ho. Nnansa yi, wɔn babea Beboko waree Yehowa Adansefo ɔhwɛfo kwantufo bi. Ansa na ɔrebɛware no, abusuafo no hyɛɛ awofo no denneennen sɛ wonnye ti ade kɛse mma wɔn. Nanso, awofo no gyinaa pintinn, na wɔannye bo a ɛte saa. Mmom no, wɔne wɔn ase barima no ankasa kɔkaa ho asɛm, na wogyee wɔn babea no ti ade kakraa bi, na wɔde emu fã maa awarefo no sɛ wɔmfa nyɛ wɔn ayeforo.

Nhwɛso foforo a esii wɔ ɔman koro no ara mu no fa Ɔdansefo kumaa Itongo ho. Mfiase no, n’awofo kae sɛ wobegye ti ade kakraa bi. Nanso abusuafo no kae sɛ wɔnto bo no mu. Asɛm no mu yɛɛ den, na ɛyɛɛ sɛnea abusuafo no benya nea wɔhwehwɛ no. Ɛwom sɛ na Itongo yɛ obi a ɔfɛre ade de, nanso ɔsɔre kae wɔ obu so sɛ, wasi ne bo sɛ ɔbɛware Kristoni mmɔdenbɔfo a wɔfrɛ no Sanze sɛnea na wɔayɛ ho nhyehyɛe no. Na afei ofi akokoduru mu kae sɛ, “Mbi ke” (kyerɛ sɛ, “Yɛaka asɛm no awie”) na ɔtraa ase. Ne maame Sambeko, a ɔyɛ Kristoni no gyinaa n’akyi. Wɔantoa asɛm no so bio, na nnipa baanu no waree sɛnea na wɔahyehyɛ no ara.

Nneɛma pii ho hia awofo Kristofo a wɔwɔ ɔdɔ sen mfaso a wobenya afi ti ade mu. Okunu bi a ɔwɔ Cameroon kyerɛkyerɛ mu sɛ: “M’ase bea de hokwan biara a na ɔwɔ ka kyerɛɛ me sɛ biribiara a mewɔ a mede bɛma no sɛ ti ade no, memfa nhwɛ ne babea no.” Awofo a wɔwɔ ɔdɔ dwen wɔn mma honhom fam yiyedi ho nso. Sɛ nhwɛso no, susuw Farai ne Rudo a wofi Zimbabwe a wɔde wɔn bere fã kɛse ka Onyankopɔn Ahenni ho asɛm no ho. Ɛwom sɛ wonnye akatua de, nanso wɔde wɔn mmabea baanu maa aware gyee ti ade a ɛwɔ fam koraa sen nea wɔtaa gye no. Adɛn nti na wɔyɛɛ saa? Na wɔpɛ sɛ wɔn mmabea no ware mmarima a wɔdɔ Yehowa nokwarem. Wɔkyerɛkyerɛɛ mu sɛ: “Nea na yebu no sɛ ehia paa ne yɛn mma no ne yɛn nsenom honhom fam yiyedi.” Hwɛ anigye ara a ɛyɛ! Nsenom a wofi ɔdɔ mu susuw wɔn mma a wɔaware honhom fam ne honam fam yiyedi ho no fata nkamfo kɛse.

Ntease a Wɔda no Adi Mu Mfaso Horow

Joseph ne Mae a wofi Solomon Islands no nyaa nhyira pii wɔ ayamye ne ahwɛyiye mu a wofi dii wɔn mmabea aware ho dwuma no mu. Enti, wɔamfa ɛka ammɛto wɔn nsenom so. Mmom no, awarefo no nyinaa atumi ayɛ bere nyinaa som adwuma a wɔde trɛw Ahenni asɛm no mu no mfe pii. Bere a Joseph susuw nea abɛsen kɔ ho no, ɔka sɛ: “Gyinae a me ne m’abusua sisii no ama yɛanya nhyira pii. Ɛyɛ nokware sɛ ɛtɔ da bi a na yehyia nhyɛso pii fi wɔn a wɔnte yɛn asɛm ase hɔ de, nanso mewɔ ahonim pa ne abotɔyam bere a mihu sɛ me mma yɛ pii na wɔyɛ den wɔ Yehowa som mu no. Wɔn nso wɔn ani agye, na me ne me yere ani agye pii.”

Mfaso foforo nso ne abusuabɔ pa a ɛwɔ nsenom ntam no. Sɛ nhwɛso no, Zondai ne Sibusiso ne wɔn yerenom a wɔyɛ honam fam anuanom no som sɛ adwumayɛfo a wɔatu wɔn ho ama wɔ Ɔwɛn Aban Asafo no baa dwumadibea a ɛwɔ Zimbabwe no mu. Wɔn ase barima a wɔfrɛ no Dakarai som sɛ bere nyinaa ɔsɛnkafo a onnye akatua. Bere a na wɔregye ti ade no, ɔka kyerɛɛ wɔn sɛ wontua nea wobenya biara. Zondai ne Sibusiso ka sɛ: “Yɛdɔ yɛn ase barima no kɛse, na sɛ ɛba sɛ ohia biribi a, yɛbɛyɛ nea yebetumi biara de aboa no.”

Yiw, ntease a wɔda no adi bere a wɔreka ti ade ho asɛm no de abusua mu anigye ba. Sɛ nhwɛso no, ɛmfa awarefo foforo no nto ka mu, na ɛma ɛyɛ mmerɛw kɛse ma wɔn sɛ wɔbɛtra ase sɛ awarefo. Eyi ama awarefo afoforo atumi ahwehwɛ honhom fam nneɛma, te sɛ som a wɔsom sɛ bere nyinaa asɛmpakafo wɔ asɛnka ne asuafoyɛ adwuma a egye ntɛmpɛ no mu. Afei nso, eyi hyɛ Yehowa Nyankopɔn a ofi ɔdɔ mu Yɛɛ aware ho nhyehyɛe no anuonyam.—Mateo 24:14; 28:19, 20.

[Ase hɔ nsɛm]

[Kratafa 27 adaka]

WƆSAN DE TI ADE NO MAA WƆN

Wɔ mmeae bi no, wobu ayeforo no ne n’awofo animtiaa bere a wotua ti ade ketewaa bi no. Enti, ɛtɔ da bi a, ahantan ne abusua no dibea a wɔpɛ sɛ wohu nti ɛma wogye sika kɛse. Abusua bi a ɛwɔ Lagos, Nigeria, yɛɛ nhwɛso foforo a ɛfata. Wɔn ase barima Dele kyerɛkyerɛ mu sɛ:

“Me yere abusuafo de ti ade a ne bo yɛ den a wɔn amammerɛ hwehwɛ, te sɛ ntama ahorow a ne bo yɛ den a wɔma wɔtɔ, kyɛɛ me. Bere a m’abusuafo de ti ade no maa wɔn mpo no, wɔn kasamafo no bisae sɛ: ‘Mopɛ sɛ mofa ɔbea yi sɛ ɔyere anaasɛ ɔbabea?’ M’abusua no de nne biako maa mmuae sɛ: ‘Yɛpɛ sɛ yɛde no yɛ ɔbabea.’ Ɛno akyi no, wɔsan de ti ade no a ɛwɔ nhoma kotoku koro no ara mu no maa yɛn.

“Ɛde besi nnɛ no, m’ani sɔ nea me nsenom yɛe wɔ yɛn ayeforo no ho no. Ɛmaa minyaa obu kɛse maa wɔn. Wɔn honhom fam mmɔdenbɔ no ma mibu wɔn sɛ m’abusuafo pɛɛ. Enyaa sɛnea mibu me yere no so tumi kɛse nso. Manya anisɔ kɛse ama no esiane sɛnea n’abusua no ne me dii no nti. Sɛ akasakasa sɔre yɛn ntam a, memma ɛnnan nsɛnnennen. Esiane sɛ minim abusua a ofi mu nti, mema akasakasa no ba fam.

“M’abusua ne ne de no anya adamfofa a emu yɛ den. Ɛnnɛ mpo, wɔ mfe abien wɔ yɛn ayeforohyia no akyi no, me papa da so de akyɛde ne nnɔbae kɔma me yere abusuafo.”