Adanse a Mubedi Sɛ Abusua
1 “Wo man beyi wɔn yam koraa aba, wo koda no.” Saa nsɛm a ɛwɔ Dwom 110:3 no ka Yehowa ahyehyɛde a ɛwɔ hɔ nnɛ no ho asɛm yiye bere a mmarima, mmea, ne mmofra de nnamyɛ nya Ahenni no ho asɛmpa a wɔka no mu kyɛfa no. Wɔ January mu no, mmusua mufo pii benya ɔkwan a eye a wɔde bɛtrɛw ‘ɔsom adwuma a wofi wɔn pɛ mu yɛ’ no mu denam kyɛfa a wonya wɔ asɛnka mu a wɔbɛma akɔ anim no so. Sɛ ‘yɛbɛtɔ adagyew bere a, ɛho behia sɛ yɛyɛ nhyehyɛe pɔtee na yedi kan yɛ yɛn bere ho nhyehyɛe yiye.—Kol. 4:5, NW; 1 Kor. 9:26.
2 Dɛn nti na monnyɛ adansedi abusua no adwuma? Mo nyinaa ntra ase na munsusuw hokwan ahorow a ɛbɛma mo asɛnka adwuma anya nkɔanim wɔ January mu no ho. Bere a abusua no mufo nyinaa kyerɛ wɔn adwene no, nneɛma pa a mubetumi ayɛ no bɛyɛ mo nwonwa kɛse.—Mmeb. 11:14; 15:22
3 Mmofra betumi anya asɛnka mu kyɛfa kɛse wɔ sukuu akwamma no mu. Sɛ woyɛ sukuuni a, so wubetumi aka mmofra afoforo pii a wɔbɛyɛ akwampaefo aboafo adwuma wɔ January mu no ho? Sɛ saa a, wubenya nhyira pii. Ɛnanom betumi ahu sɛ, sɛ mmofra no fi sukuu ba a, ɛma wonya hokwan a eye a ɛbɛma wɔne wɔn mma no de bere pii ayɛ asɛnka adwuma. So mo agyanom ne ɛnanom betumi ne mo mma ayɛ akwampaefo aboafo adwuma? Anaasɛ, bere a abusua no mufo nyinaa yɛ adwuma bom no, anyɛ yiye koraa no, so mubetumi aboa abusua no muni biako anaasɛ ebia nea ɛboro saa ma wɔyɛ kwampaefo aboafo adwuma? So mubetumi abɔ mmɔden titiriw sɛ mobɛkɔ asɛnka dapɛn awiei biara wɔ January mu? Hwɛ nkuranhyɛ ne biakoyɛ a eyi bɛma mo abusua no mufo nyinaa anya!
MONYƐ NHYEHYƐE PƆTEE
4 Bere a moasusuw hokwan ahorow a ɛbɛma moatrɛw mo som adwuma mu sɛ abusua ho yiye akyi no, ɛho behia sɛ moyɛ nhyehyɛe pɔtee bi na moyere mo ho sɛ mubedi so. Munnye bere kakra mfa nkyerɛw botae horow a mode asi hɔ ama abusua no muni biara ne da biara asɛnka nhyehyɛe mma obiara. Ebia mubetumi akyerɛw eyi wɔ abusua no teokrase kalenda no so. Monkae sɛ, sɛ moanyɛ ho nhyehyɛe a, bere betwam a na ɛnyɛ nea moadu mo botae no ho.
5 Osuahu akyerɛ sɛ Buronya ne Afe Foforo bere no yɛ abasow bere titiriw ma asɛmpa no ka. Mpɛn pii esiane wiase no ahomegye nna pii no nti, yɛto nnipa pii wɔ fie a nneɛma pii nhaw wɔn adwene. Ɛtaa yɛ nea wɔn a wɔpɛ nyamesom no wɔ ɔpɛ sɛ wɔbɛka honhom mu nneɛma ho asɛm. Yɛpɛ sɛ yɛde tebea horow yi di dwuma kɛse de ka asɛmpa no kyerɛ na yɛnam saayɛ so ‘ayi yɛn yam koraa aba’ sɛ abusua wɔ Yehowa koda no mu.