Asɛmmisa Afã

◼ So ɛyɛ papa sɛ atiefo bɔ wɔn nsam wɔ Teokrase Ɔsom Sukuu anaa Ɔsom Nhyiam dwumadi no fã biara akyi?

Bere a Ɔbɔadeɛ, Yehowa, yɛɛ asase no, “adekyee nsoromma boom too ahurusi dwom, na Onyankopɔn mma nyinaa bɔɔ ose.” (Hiob 38:7) Ná Onyankopɔn mma a wɔyɛ abɔfo yi pɛ sɛ wɔkamfo Yehowa wɔ n’adebɔ a ɛyɛ nwonwa a na ɛreda ne nyansa, ne papayɛ ne ne tumi adi wɔ ɔkwan foforo so no ho.

Eye sɛ yɛbɛkyerɛ yɛn nuanom mmɔdenbɔ, ɔkasa a wɔma ne ɔyɛkyerɛ ahorow a wɔyɛ no ho anisɔ. Sɛ nhwɛso no, yɛtaa bɔ yɛn nsam bere a wɔma ɔkasa ahorow wɔ yɛn nhyiam atitiriw te sɛ amansin ne amantam nhyiam ase no. Egyee bere pii ne mmɔdenbɔ na wotumi siesiee dwumadi ahorow no. Ɛnyɛ adwumaden a wɔn a wɔmaa ɔkasa no yɛe no nkutoo na yɛbɔ yɛn nsam de kyerɛ ho anisɔ, na mmom yɛkyerɛ Yehowa ne nkyerɛkyerɛ a ɔnam n’Asɛm ne n’ahyehyɛde so de ma no nso ho anisɔ.—Yes. 48:17; Mat. 24:45-47.

Na yɛn nsam a yɛbɔ wɔ Teokrase Ɔsom Sukuu ne Ɔsom Nhyiam ase no nso ɛ? Mmara biara nni hɔ a etia nsambɔ bere a yɛn koma ka yɛn ma yɛyɛ saa, te sɛ bere a osuani foforo bi yɛ ne sukuu dwumadi a edi kan no. Nanso, nsambɔ betumi abɛyɛ biribi a yɛyɛ ara kɛkɛ wɔ asafo no mu a ntease biara nni mu. Ne saa nti, yɛntaa mmɔ yɛn nsam wɔ dwumadi biara akyi.

Bere a yɛremmɔ yɛn nsam wɔ Teokrase Ɔsom Sukuu ne Ɔsom Nhyiam dwumadi biara akyi no, yɛwɔ akwan foforo a yɛn nyinaa betumi afa so akyerɛ wɔn a wɔyɛ dwumadi no nkyerɛkyerɛ ne wɔn mmɔdenbɔ ho anisɔ. Yebetumi ayɛ eyi bere a yɛyɛ aso tie ɔkasafo no yiye no. Sɛ wɔpɔn nhyiam no a, yɛtaa nya kwan kɔ wɔn a wɔyɛɛ dwumadi no nkyɛn kɔkyerɛ wɔn mmɔdenbɔ no ho anisɔ.—Efe. 1:15, 16.