Mareko

Te Evanelia a Mareko ra

TE TOROA A IOANE BAPETIZO RA.

1 Te haamataraa o te evanelia o te Tamaiti a te Atua ra o Iesu Mesia; 2 tei papaihia i roto i ta te mau peropheta ra, Inaha, e tono vau i tau vea i mua ia oe, e na ˈna e haamaitai i to oe eˈa i mua ia oe. 3 E reo no te hoê i te tiaororaa i te medebara, E haamaitai outou i te eˈa o Iehova, e faatitiaifaro i to ˈna haerea. 4 Oia hoi te haerea mai o Ioane i te bapetizoraa i te medebara ra, e te faaite haerea i te bapetizo tatarahapa ia matara te hara. 5 Ua faahope maira to te fenua ra o Iudea e to Ierusalema ia ˈna ra, e bapetizohia ihora e ana i te pape ra i Ioridana, ma te faˈi i ta ratou hara. 6 Te ahu ra Ioane i te ahu huruhuru kamela, ma te tatuahia to ˈna tauupu i te iri puaa; e akaride e te meli o te fenua aihere ta ˈna maa. 7 E poro haere atura oia, na ô atura, Te haere mai nei te hoê i muri iho ia ˈu e mana rahi to ˈna i to ˈu, o te ore ïa e au ia ˈu ia piˈo i raro a tatara ˈi i te tapea tamaa no ˈna ra. 8 I bapetizo noa na hoi au ia outou i te pape, e bapetizo râ oia ia outou i te Varua Maitai.

9 Ua haere maira Iesu i reira ra mai Nazareta mai i Galilea ra, e bapetizohia ihora e Ioane i Ioridana. 10 E tei te haerea mai oia i nia mai te pape maira, ite aˈera oia i te raˈi i te haearaa, e te Varua i te pouraa mai i nia ia ˈna, mai te uupa ra. 11 E ua itea maira te hoê reo no te raˈi mai, i te na ôraa mai, O tau Tamaiti here oe, ua mauruuru roa vau ia oe. 12 I reira ra te Varua i te tonoraa ia ˈna i te medebara ra. 13 E e piti taau o ˈna rui i te medebara ra, ma te râmâhia mai e Satani; i rotopu i te mau puaa taehae ra; e ua poihere maira te mau melahi ia ˈna. 14 Ia tapeahia râ Ioane, haere atura Iesu i Galilea, i te parau haerea i te parau maitai o te basileia o te Atua. 15 Na ô atura, Ua tae i te tau, te fatata mai nei te basileia o te Atua; a tatarahapa, a faaroo mai i te evanelia nei. 16 E te haere ra oia na te hiti i te roto i Galilea ra, ite atura oia ia Simona, e tana taeae ia Anederea, i te tuuraa i te upeˈa i taua roto ra, e pue ravaai hoi raua. 17 Ua parau atura Iesu ia raua, A pee mai ia ˈu, e faariro vau ia orua ei ravaai taata. 18 Faarue ihora raua i ta raua tau upeˈa i reira ra, e ua pee atura ia ˈna. 19 Haere atura oia e pihai iti atu, ite atura ia Iakobo a Zebedaio ra, raua o tana taeae o Ioane, tei nia i te boti te ene ra i ta raua tau upeˈa; 20 ua parau atura oia ia raua i reira ra: vaiiho ihora raua i to raua metua ia Zebedaio e na tavini tarahuhia ra i nia i te boti, pee atura raua ia ˈna. 21 Haere atura ratou i Kaperena; e tae aˈera i te sabati, haere atura oia i roto i te sunago, haapii atura i te taata. 22 Maere ihora ratou i te huru o ta ˈna parau; i haapii hoi oia ia ratou ma te mana, e ere mai ta te mau papai parau ra. 23 Tei roto i to ratou sunago te hoê taata i uruhia e te varua faufau, e ua pii hua maira, 24 na ô maira, Auě e Iesu i Nazareta e! eaha ta oe ia matou nei? i haere mai oe e haapohe ia matou? Ua ite au ia oe, o te Mea Moˈa ïa o te Atua ra. 25 Ua avau atura Iesu ia ˈna, na ô atura, A mamû, a haere i rapae au, e vaiiho atu ia ˈna. 26 Ua rave uˈana ihora taua varua faufau ra ia ˈna, ua pii hua maira te reo e oti aˈera, haere maira i rapae au. 27 Ua maere anaˈe ihora ratou atoa, ua uiui ihora ia ratou iho, i te na ôraa e, Eaha râ teie? eaha teie nei parau apî? te faaue nei hoi oia i te mau varua faufau ma te mana, e te faaroo nei ratou ia ˈna. 28 Tui atura to ˈna roo e ati noa aˈera taua fenua ra o Galilea. 29 E tae maira ratou i rapae au i taua sunago ra, haere atura ratou e Iakobo raua o Ioane i roto i te fare o Simona raua o Anederea. 30 Te vai noa ra te metua hoovai vahine o Simona ua pohe i te fevera, ua faaite maira ratou ia Iesu ia ˈna i reira ra. 31 Haere atura oia rave atura i tana rima, faatia aˈera ia ˈna i nia; pee ê atura te fevera i reira ra, ua raverave maira oia i te maa na ratou. 32 E ahiahi atura, ia mairi te mahana ra, ua hopoi maira ratou i te mau taata atoa i pohe i te maˈi ia ˈna ra, e te uruhia e te mau demoni ra; 33 ua rǔrǔ atoa maira to te oire atoa i te uputa fare ra. 34 Ua faaora ihora oia i te taata e rave rahi, i tei pohe i te mau maˈi atoa e rave rahi te huru, tiavaru atura i te mau demoni e rave rahi i rapae; e ua faaore atura oia, eiaha te demoni e parau e, ua ite ratou ia ˈna. 35 E aahiata aˈera, tia aˈera oia i nia i te poipoi roa, haere atura i te hoê vahi moemoe, e ua pure ihora i reira. 36 Ua pee atura o Simona ma i muri iho ia ˈna. 37 E ite atura ratou ia ˈna, ua parau atura, Te maimi nei te taata atoa ia oe. 38 Ua parau maira oia ia ratou, Mai haere tatou i te mau oire fatata nei ia parau haere atoa vau i te basileia i reira; o to ˈu hoi ïa tere i haere mai ai. 39 Ua aˈo haere atura oia i roto i to ratou mau sunago e ati noa ˈˈe Galilea, e ua tiavaru i te mau demoni i rapae. 40 Ua haere maira te hoê lepera ia ˈna ra, tuu maira i te turi i raro i mua ia ˈna, ma te parau maitai mai ia ˈna, na ô maira, Ia tia ia oe ra, e mâ vau ia oe. 41 Aroha aˈera Iesu ia ˈna, faatoro atura i te rima, faatiaia ˈtura ia ˈna, na ô atura, Ua tia ïa ia ˈu, ia mâ oe. 42 E tei te parauraa ˈtu oia ra, pee atura te lepera o taua taata i reira ra, mâ ˈtura oia. 43 Ua aˈo hua ˈtura Iesu ia ˈna, e tuu atura ia ˈna ia haere na; 44 na ô atura ia ˈna, Eiaha roa oe e parau noa ˈtu i te hoê taata; e haere râ e faaite ia oe iho i te tahuˈa; e hopoi atu no te tamâraa ia oe i mau mea ta Mose i parau maira, ei faaite atu i te taata. 45 Haere atura râ taua taata ra, faaite haere atura i taua parau ra, e haaparare haere atura, aita ˈtura e tia ia haere e faaite Iesu i taua oire ra; parahi noa ihora râ i te mau vahi moemoe ra, e ua haere maira ratou ia ˈna ra no te mau vahi atoa e ati noa ˈˈe.