Te rata i to Ephesia
1 E rata na Paulo, e aposetolo na te Mesia ra o Iesu na roto i te hinaaro o te Atua, i te feia moˈa haapao maitai i Ephesia+ tei hoê e te Mesia ra o Iesu:
2 Ei ia outou te hamani maitai rahi e te hau no ǒ mai i te Atua ra to tatou Metua e i te Fatu ra o Iesu Mesia.
3 Ia aruehia te Atua e Metua o to tatou Fatu ra o Iesu Mesia, mai te raˈi mai hoi to ˈna horoaraa mai i te mau haamaitairaa pae varua atoa ia tatou tei hoê e te Mesia.+ 4 Mai te reira atoa to ˈna maitiraa ia tatou hou te omuaraa mai â o teie nei ao ia hoê tatou e o ˈna,* e ia moˈa tatou e te hapa ore+ i mua i te Atua i roto i te here. 5 Ua maiti atea hoi oia ia tatou+ ia riro ei tamaiti na ˈna+ na roto ia Iesu Mesia, ia au i to ˈna hinaaro e mai tei au ia ˈna,+ 6 ia aruehia to ˈna hamani maitai rahi+ ta ˈna i horoa noa mai na roto i ta ˈna Tamaiti herehia.+ 7 No ˈna i noaa ˈi ia tatou te tiamâraa maoti te hoo* na roto i to ˈna ra toto,+ oia mau, te faaoreraa i ta tatou mau hapa,+ ia au i te rahi o te hamani maitai o te Atua.
8 Ua horoa rahi mai oia i teie hamani maitai ia tatou, oia atoa te paari e te haroˈaroˈa* taatoa 9 a faaite mai ai i te parau huna moˈa+ o to ˈna hinaaro. Ua tu taua parau huna moˈa ra i ta ˈna e au, i opua ˈi oia 10 e haamau i te hoê tereraa ohipa* i te hopea o te tau faataahia no te tahoê i te mau mea atoa i te Mesia ra, to te raˈi e to te fenua.+ Oia mau, e tahoêhia te mau mea atoa ia ˈna. 11 Ua hoê matou e te Mesia e ua maitihia no te fatu atoa+ i ta te Atua i fafau mai. Ua maiti-atea-hia matou ia au i te opuaraa a te Atua o te faatupu noa i ta ˈna i faaoti ia au i to ˈna hinaaro, 12 e na roto ia matou, te feia matamua tei tiai i te mea maitai na roto i te Mesia, e faahanahanahia ˈi e e aruehia ˈi te Atua. 13 Ua faaroo hoi outou i te poroi o te parau mau, te parau apî oaoa o to outou faaoraraa, e ua tiaturi outou i te Mesia. I muri aˈe i to outou tiaturiraa, ua tapaohia outou+ i te varua moˈa* i fafauhia na roto ia ˈna, 14 ei haapapuraa* hoi e e fanaˈo iho â tatou+ i ta te Atua i fafau, no ta ˈna opuaraa e faatiamâ i to ˈna iho nunaa+ maoti te hoo,+ e ia aruehia e ia faahanahanahia oia.
15 No reira, mai te taime i faaroo ai au i te parau o to outou faaroo i te Fatu ra o Iesu e i te here ta outou e faaite ra i te feia moˈa, 16 aita roa vau i faaea i te haamauruuru i to tatou Atua e Metua no outou. Te faahiti noa ra vau ia outou i roto i ta ˈu mau pure, 17 e ia horoa te Atua, te Metua no ˈna te hanahana, te Atua hoi o to tatou Fatu ra o Iesu Mesia, i te puai e paari ai to outou feruriraa e e taa ˈi ia outou te mau heheuraa, a noaa ˈtu ai te ite mau no nia ia ˈna.+ 18 Ua haamaramarama oia i te mata o to outou aau ia ite outou i te tiaturiraa i titau-manihini-hia ˈi outou, e te rahi o te hanahana o te faufaa a te Atua ta ˈna e faafatu i te feia moˈa,+ 19 e i te rahi hau ê o to ˈna puai i nia ia tatou e tiaturi ra ia Iesu.+ Ua itehia te mana rahi o to ˈna puai 20 i to ˈna faatiaraa i te Mesia mai te pohe mai e i to ˈna haaparahiraa ia ˈna i to ˈna rima atau+ i te raˈi, 21 i nia ê roa i te mau faatereraa e mana e puai e hau atoa, e i nia ê roa i te mau iˈoa atoa,+ eiaha noa i roto i teie nei ao,* i to a muri aˈe atoa râ. 22 Ua tuu atoa te Atua i te mau mea atoa i raro aˈe i to ˈna avae+ e ua faariro ia ˈna ei upoo i nia i te mau mea atoa i roto i te amuiraa,+ 23 to ˈna ïa tino+ tei î i to ˈna mau huru maitatai atoa, e te ohipa ra oia i roto i te mau mea atoa i te ravea e rave rau.