Иеговага бүгү-ле чүлдү-чүрээңерден бараалгаңар

1—3. Иеговага бүгү-ле чүлдү-чүрээнден бараалгаары дээрге чүү дээни ол? Тайылбырлап көрүңерем.

БИС шуптувус бачыттыг болгаш, частырыгларны кылып чоруур бис. Ынчалза-даа бачыттарывысты миннип, Иисус Христостуң өргүлүнге үндезилеп, Иеговадан биче сеткилдии-биле өршээлди дилээр болзувусса, Ол «биске кем-буруувус ёзугаар хамаарылга» көргүспес (Ыд. ыр. 102:10). Ынчалзажок Иегованың сеткилинге кирер дизе, Аңаа «бүгү сеткил-сагыжындан» бараалгары чугула (1 Чыл. 28:9). Бис, бачыттыг улус, ону канчаар кылып болур бис?

² Бо айтырыгның харыызын билип алыр дээш, Аса биле Амасия деп ийи иудей хааннарның чижээн көрээлиңер. Бо ийи хаанның кайызы-даа Иегованың мурнунга шын чүүлдер кылып чораан, ынчалза-даа Асаның чүрээ «Дээрги-Чаяакчыга бүрүнү-биле бердинген турган» (2 Чыл. 15:16, 17; 25:1, 2; У. ч. 17:3). Олар бачыттыг улус болганда, кайызы-даа частырыгларны кылып чораан. Ынчалза-даа Аса хөй кезиинде Бурганның айтыышкыннарындан быжыг туттунуп чораан, чүге дээрге ол Аңаа бүрүнү-биле бердинген турган. Амасияның дугайында ынча деп болбас. Ол Иегованың дайзыннарын тиилээш, оларның дүрзү-бурганнарын эккеп алгаш, оларга мөгейип эгелээн (2 Чыл. 25:11—16).

³ Бурганга «бүгү-ле чүлдү-чүрээ-биле» бараалгаары дээрге Ону кажан-даа кагбайн, Аңаа бүрүнү-биле бердинген болуру-дур. Библияныы-биле алырга, чүрек кижиниң иштики бүдүжүн илередип турар. Олче кижиниң күзелдери, бодалдары, хөөнү, сундугуушкуннары, арга-шинээ, чүткүүшкүннери болгаш сорулгалары кирип турар. Ынчап кээрге, бүгү-ле чүлдү-чүрээ-биле бараалгап турар кижи Иеговага анаа-ла карак чаап эвес, а ак сеткилдиг бараалгап турар. А бистиң дугайывыста чүнү чугаалап болурул? Бис, бачыттыг улус, Бурганга бүрүнү-биле бердинген бооп, сеткиливистиң ханызындан Аңаа улаштыр бараалгаар болзувусса, ынчан Иеговага бүгү-ле чүлдү-чүрээвистен бараалгап турарывыс ол боор (2 Чыл. 19:9).

4. Бо статьяга чүнү сайгарар бис?

⁴ Бурганга бүгү-ле чүлдү-чүрээнден бараалгаары дээрге чүл ол дээрзин билип алырда, Иеговага бердинген чораан иудей хааннарның: Асаның, Иосафаттың, Эзекияның болгаш Иосияның дугайында боданып көрээлиңер. Олар частырыгларны кылып чораан-даа болза, Иегова оларны эки деп санап турган. Иегова оларны Аңаа бүгү-ле чүлдү-чүрээнден бараалгап чораан деп чүге санап турганыл? Оларны канчаар өттүнүп болур бис?

АСАНЫҢ ЧҮРЭЭ ИЕГОВАГА БҮРҮНҮ-БИЛЕ БЕРДИНГЕН ТУРГАН

5. Аса кандыг шиитпирлиг хемчеглерни алганыл?

⁵ Аса он израиль аймактың аңгыланганының соонда тыптып келген Иуда күрүнениң үшкү хааны турган. Ол чуртун дүрзү-бурганнардан арыглааш, дүрзү-бурганнар өргээлеринге самыын-садар эр кижилерни үндүр сывырыпкан. Аса «бодунуң кырган-авазы Мааханың кадын адын безин... чүдек-бужар адагаш тургузуп алганы дээш казып каапкан» (3 Хаан. 15:11—13). Оон аңгыда Аса чонга Иеговаже «чүткүүрүн, Ооң хоойлузун база айтыышкыннарын күүседирин дужааган». Ол алыс шын чүдүлгени чүткүлдүү-биле деткип турган (2 Чыл. 14:4).

6. Асаның чуртунче эфиоптар халдап кээрге, ол канчалган?

⁶ Иегова Иуданы йөрээген: Асаның башкарылгазының баштайгы он чылында ол күрүнеге дайын-чаа болбаан. Ынчалза-даа ооң соонда оларга удур эфиоп Зерах миллион дайынчылыг аг-шерии-биле, үш чүс дайынчы тергези-биле үнүпкен (2 Чыл. 14:1, 6, 9, 10). Бо белен эвес таварылгада хаан канчалган? Ол Иеговага бүрүнү-биле ынанган. (2 Чылдар 14:11 номчувут.) Бурган Асаның мөргүлүн дыңнааш, эфиоп аг-шеригни чылча шаварынга дузалаан (2 Чыл. 14:12, 13). Иеговага чамдык хааннар шынчы эвес турган-даа болза, Ол бодунуң ады дээш оларга тиилелгени берип турган (3 Хаан. 20:13, 26—30). Ынчалза-даа Аса Иеговага ынаныр боорга, Ол ооң мөргүлүнге харыылаан. Ынчалзажок Асаның шын эвес кылдыр алдынып турган үелери база турган. Бир катап ол дузаны Иеговадан эвес, а Сирияның хаанындан дилээн (3 Хаан. 15:16—22). Ындыг-даа болза Библияда Асаның дугайында мынча дээн: «Ооң чүрээ бүгү назынында Дээрги-Чаяакчыга бүрүнү-биле бердинген турган». Асаны канчаар өттүнүп болур бис? (3 Хаан. 15:14).

7, 8. Иеговага бараалгап тургаш, Асаны канчаар өттүнүп болур силер?

⁷ Бурганга бүрүнү-биле бердингенин хынаар дээш, кижи бүрүзү бодунуң чүрээн шинчилеп болур. Бодуңардан айтырыңар: «Бурганга таарымчалыг чүүлдерни кылырынга болгаш Бурганның чонун багай салдардан камгалаарынга белен мен бе?» Бодап көрүңер даан, Иуданың кадыны Маахага удур чүве чугаалаарынга Асага кайы хире дидим чорук херек турган-дыр! Силерниң таныыр улузуңарның аразында Мааха ышкаш алдынып турар кижи чок боор, ынчалза-даа Асаның чүткүлдүг хөөнүн өттүнер таварылгалар тургустунуп болур. Чижээ, бир чоок эжиңерни азы төрелиңерни кылган бачыды дээш, буруузун миннивес боорга, чыыштан үндүрүпкен дижик. Шиитпирлиг алдынар силер бе? Ооң-биле чугаалажырын соксадыр силер бе? Чүрээңер силерни чүүже оттурар?

⁸ Аса ышкаш, Бурганга бүгү-ле чүлдү-чүрээңерден бараалгап турарыңарны көргүзүп болур силер. Удурланыышкынга таваржы бергеш, Иеговага долузу-биле ынаныңар. Школага чамдык уругларны, олар Иегованың Херечилери боорга, кыжырып турар. Чамдык ха-дуңма шуулган баар дээш, шөлээ алырга азы ажыл шагындан дашкаар ажылдаваска, ооң кады ажылдап турар улузу оларны мелегей деп санап турар. Ындыг таварылгалар силерге таныш болза, Аса хаанны өттүнүп, Бурганга мөргүңер. Эрес-дидим бооп, шын чүүлдерден туттунуп, Иеговага ынаныңар. Бурган Асаны быжыктырып, аңаа дузалаан деп утпаңар. Ол силерге база дузалаар.

9. Өскелерге суртаалдап тургаш, Бурганга бүгү-ле чүлдү-чүрээвистен бараалгап турарывысты канчаар көргүзүп болур бис?

⁹ Бурганның бараалгакчылары чүгле боттарының дугайында бодавайн турар. Чижээ, Аса алыс шын чүдүлгени деткип турган. Бис, Аса ышкаш, өскелерге Иеговаже чүткүүрүнге дузалап турар бис. Бис Иеговага ынак болгаш, база кижилерниң келир үезин бодааш, улуска Ооң дугайында чугаалаарывыска, Ол аажок өөрүп турар.

ИОСАФАТ ИЕГОВАЖЕ ЧҮТКҮП ТУРГАН

10, 11. Иосафатты канчаар өттүнүп болур силер?

¹⁰ «Иосафат бодунуң ачазы Асаның оруктары-биле чоруп» турган (2 Чыл. 20:31, 32). Ол, адазы ышкаш, чонну Иеговаже чүткүүр кылдыр деткип турган. Ол Иудеяның бүгү хоорайларынче эр улусту «Дээрги-Чаяакчының хоойлузунуң дүрүг-номунуң» дузазы-биле чонну өөредир кылдыр чоргузупкан (2 Чыл. 17:7—10). Иосафат улусту Иеговаже ээлдирер дээш, соңгу Израиль күрүнениң Эфрем дагларынга чедир чоруп турган (2 Чыл. 19:4). Иосафат хаан «бүгү-ле сеткил-чүрээ-биле Дээрги-Чаяакчыже чүткүп турган» (2 Чыл. 22:9).

¹¹ Кижи бүрүзү амгы үеде Иегованың удуртуп турар өөредилге ажылынга киржип болур. Бо кайгамчык ажылга ай санында киржир сорулганы салып тур силер бе? Кижилер Иеговага мөгейип эгелээр кылдыр, Библияны оларга өөредирин күзээр силер бе? Ооң дугайында мөргүүр-дүр силер бе? Бурганга ынанмышаан, күжениишкиннерни үндүрер болзуңарза, библейжи кичээлди эгелеп ап болур силер. Библейжи кичээлдер эрттирер дээш, хостуг үеңерни үндүреринге белен силер бе? Соңгу Израиль күрүнениң чурттакчыларын Иеговаже ээлдирер дээш, Эфремче чорупкан Иосафат дег, бис база суртаалдаарын соксаткан ха-дуңмага барып болур бис. Оон аңгыда хуралдан үндүрткен, ынчалза-даа бачыт кылырын соксаткан улуска баар дээш, удуртукчулар сагыш човап турар.

12, 13. а) Иосафат берге байдалга канчалганыл? б) Бис Иосафаттың үлегерин чүге эдерер ужурлуг бис?

¹² Иудаже дүк-түмен аг-шериг безин халдаар деп баарга, Иосафат, адазы Аса ышкаш, Бурганга шынчы арткан. (2 Чылдар 20:2—4 номчувут.) Ол корга берген-даа болза, Иеговадан «дуза дилээр деп шиитпирлээн». «Бисче кел чыдар эңдерик хөй аг-шеригге удур туржур күжүвүс чок-тур. Чүнү канчаптар аайын тыппас-тыр бис» — деп, Иосафат Иеговага мөргээн. Ол Иеговага долузу-биле ынанып: «Карактарывыс чүгле Сенче көрүп тур!» — дээн (2 Чыл. 20:12).

¹³ Чамдыкта бис база чүнү канчаар аайын тыппайн, коргуушкунга безин алзып болур бис (2 Кор. 4:8, 9). Ынчалза-даа Иосафаттың чижээн сактып чоруңар. Ол чон мурнунга Иеговага мөргүп, дайзыннарынга бодаарга, боттарының күш чогун ажыы-биле чугаалаан (2 Чыл. 20:5). Өг-бүлелерниң баштыңнары база ону өттүнүп болур. Иегова силерге болгаш өг-бүлеңерге берге байдалды ажып эртеринге дузалаар кылдыр дилеңер. Чоок улузуңар силерниң Иеговадан дуза дилеп, чаннып турарыңарны дыңнап каарындан эпчоксунмаңар. Ынчалдыр олар силерниң Аңаа кайы хире идегеп турарыңарны көрүп каар. Бурган Иосафаттың мөргүлүнге харыылаан болганда, Ол силерге база албан дузалаар.

ЭЗЕКИЯ ТААРЫМЧАЛЫГ ЧҮҮЛДЕР КЫЛЫП ТУРГАН

14, 15. Эзекия Бурганга долузу-биле ынанып турганын канчаар көргүскенил?

¹⁴ Эзекия Иеговага бердингени-биле билдингир хаан чораан. Иосафатка бодаарга, ол дүрзү-бурганнарга чүдүп турган адазының багай салдарынга удур туржуп турган. «Эзекия мөгейиишкин кылыр бедик черлерни узуткап, ыдыктыг даш көжээлерни буза шаап, Ашера бурганга тураскааткан адагаштарны кезип каапкан. Ол Моисейниң кылып каан чес чыланын база чуура шаап каапкан», чүге дээрге израильчилер аңаа чүдүп эгелээн. Эзекия Иеговага «аажок бердинип, Ону салдыкпайн эдерип, Ооң Моисейни дамчыштыр айтып-чагаан айтыышкыннарын күүседип чораан» (4 Хаан. 18:1—6).

¹⁵ Ол үеде делегей чергелиг Ассирия күрүнениң аг-шерии Иудаже халдап кире бергеш, Иерусалимни узуткаар деп турда безин, Эзекия Иеговага долузу-биле ынанган. Ассирий хаан Сеннахирим Иегованы кочулап, Эзекияны дүжүп бээр кылдыр коргудуп турган. Ынчалза-даа Эзекия Иеговага мөргүп, Ол оларны камгалаптар деп быжыг бүзүрелди илереткен. (Исайя 37:15—20 номчувут.) Иегова ооң мөргүлүнге харыылаан: Ооң чоруткан дээрниң төлээзи 185 000 ассирийжини узуткап каапкан (Иса. 37:36, 37).

16, 17. Эзекияны канчаар өттүнүп болур бис?

¹⁶ Кезек үе эрткенде Эзекия аарый бергеш, өлүрүнүң кырында келген. Ол Иеговага кайы хире шынчы бараалгап чораанын сактып кээр кылдыр Оон дилээн. (4 Хааннар 20:1—3 номчувут.) Бурган хаанның мөргүлүнге харыылап, ону экиртипкен. Ынчалзажок амгы үеде Бурган бисти кайгамчыктыг арга-биле экиртпес азы назынывысты узатпас деп, Библиядан билир бис. Ындыг-даа болза бис, Эзекия ышкаш, Иеговага: «Мен Сээң мурнуңга шынчы чурттап, сеткилимден бердинип келдим» деп, мөргүп болур бис. Аар аарый берген болзуңарза, Иегова силерни быжыктырар деп бүзүрээр силер бе? (Ыд. ыр. 40:4).

¹⁷ Эзекияны канчаар өттүнүп болур бис? Иегова-биле найыралды быжыглаарынга азы Аңаа бараалгаарынга шаптыктап турар чүүлдерден адырлып тургаш. Сураглыг улустуң чуртталгазын сонуургаар дээш, социал четкилерден үнмейн турар улуска дөмей болуксавас бис. Ийе, чамдык христианнар интернет таварыштыр өг-бүлези болгаш чоок эш-өөрү-биле чугаалажып турар. Ынчалза-даа бо делегейде кижилерниң хөй кезии социал четкилерде, дүн-хүн дивейн, олуруп турар. Олар танывазы сураглыг улустуң арыннарынга бижидип алгаш, шак-шагы-биле чуруктарын көрүп, оларның чуртталгазында чүү болуп турарын номчуп-ла турар. Христиан кижи база үезин социал четкилерге хоозун чарып, олче бажы-биле кире бээр айыыл аңаа тургустунуп болур. Ооң чуруун азы бижээн чүүлүн хөй улус сонуургаан деп, ол мактанып болур, чок болза ооң арнындан үндүр бижидип алган улуска хорадап болур. Павел элчин азы Акила биле Прискилла бистиң үевисте чурттап турар дижик. Олар чуруктарын хүннүң-не социал четкилерге салып азы христиан эвес улустуң чуртталгазында чүү бооп турарын сонуургап туруп бээр деп бе? «Павел бодун суртаал кылырынга бараалгадып» турган деп Библияда бижээн. Прискилла биле Акила Бурганның оруун өскелерге оон-даа долузу-биле тайылбырлаар дээш, үезин чарып турган (Аж.-ч. 18:4, 5, 26). Бодуңардан айтырыңар: «Кижилерни бурганчыдып турар мен бе? Үемни шын ажыглап турар мен бе?» (Эфесчилерге 5:15, 16 номчувут.)

ИОСИЯ ИЕГОВАНЫҢ АЙТЫЫШКЫННАРЫН КҮҮСЕДИП ТУРГАН

18, 19. Иосияның чүзүн өттүнүксээр силер?

¹⁸ Эзекияның оглунуң оглунуң оглу Иосия хаан Иегованың айтыышкыннарын «бүгү чүлдү-чүрээнден» күүседип чораан (2 Чыл. 34:31). Ол элээди тургаш-ла, «Давидтиң Бурганынче чүткүп эгелээн», а 20 харлыында Иуданы дүрзү-бурганнардан арыглап эгелээн. (2 Чылдар 34:1—3 номчувут.) Иосия, өске иудей хааннарга бодаарга, Бурганга таарымчалыг чүүлдерни кылырын бар шаа-биле кызып чораан. Ынчалзажок Моисейниң хоойлузу (оригинал чадавас) тыптып кээрге, ону Иосия хаанга номчуп бээрге, ол Иеговага бараалгаарынга оон-даа хөй күжениишкиннер үндүрер болза эки деп билип каан. Ол өскелерни Иеговага бараалгаар кылдыр деткип эгелээн. Түңнелинде Иосияның «чуртталгазының үезинде израильчилер... Дээрги-Чаяакчыдан ойталап көрбээн» (2 Чыл. 34:27, 33).

¹⁹ Бурганче, Иосия ышкаш, бичиизинден тура чүткүүрү чугула. Бачыттарын миннинген Манассия хаан Иосияга Бурганның энерелиниң дугайында чугаалап турган чадавас. Оолдар-кыстар, өг-бүлеңерде азы чыышта Бурганга шынчы улуг назылыг христианнар-биле хөй чугаалажып, Иегованың оларны канчаар йөрээгенин сонуургаңар. Бурганның Сөзү Иосияның чүрээнге дээштиг болган, ынчангаш ол хөделип үнген деп утпаңар. Библияны номчуп тургаш, силер база Иеговага хөйнү кылыксай бээр чадавас силер. Ынчан оон-даа аас-кежиктиг апарып, Бурганче чоокшулап, Ооң дугайында өскелерге чугаалаар күзелдиг апаар силер. (2 Чылдар 34:18, 19 номчувут.) Библияны өөренип тургаш, Бурганга оон-даа эки бараалгаар дээш, бодуңарда чүнү өскертип болурун көрүп каар силер. Ынчан, Иосия дег, ол-ла дораан хөделиңер!

ИЕГОВАГА БҮГҮ-ЛЕ ЧҮЛДҮ-ЧҮРЭЭҢЕРДЕН БАРААЛГАҢАР

20, 21. а) Сайгарып көргенивис дөрт хаанның чүзү дөмей турган? б) Дараазында статьядан чүнү билип алыр бис?

²⁰ Иеговага бүгү-ле чүлдү-чүрээнден бараалгап чораан дөрт иудей хаанның үлегериниң сайгарылгазы силерге солун болду бе? Олар Бурганның күзел-соруун чүткүлдүг күүседип, Аңаа бүгү назынында бердинген бооп артып калган. Дайзыннар кыжанып турда безин, ол хааннар Иеговага долузу-биле ынанып турган. Эң-не кол чүүл — олар Аңаа ак сеткилинден бараалгап турган.

²¹ Ол хааннар частырыгларны кылып чораан деп, дараазында статьядан билип алыр бис. Ынчалзажок чүректерни шылгап турар Бурган оларның Аңаа бүрүнү-биле бердингенин көрүп турган. Бис база бачыттыг бис. Ынчалза-даа Иегова бисти шылгап тургаш, Аңаа бүгү-ле чүлдү-чүрээвистен бараалгап турарывысты көрүп турар бе? Ону дараазында статьядан билип алыр бис.