Элээди оолдар ха-дуңмазының бүзүрелин канчаар чаалап ап болур?

1. Элээди эр дуңмаларывыс дугайында чүнү чугаалап болур?

ЭРГИМ элээди эр дуңмаларывыс, чыышка эргежок чугула силер. Хөй кезииңер күчү-күштүг, шимченгир (У. ч. 20:29). Силер хуралдың дузалакчызы болуксаар чадавас силер. Ынчалза-даа бодаарыңарга, акы-угбалар силерни чыышка даалгалар күүседиринге ам-даа чедир өспээн, дуржулга чок деп санап турар ышкаш. Каш-даа харлыг болзуңарза, амдан тура акы-угбаларның хүндүткелин чаалап алыр дээш, чыышка хөйнү кылып болур силер.

2. Бо статьяга чүнү сайгарар бис?

² Бо статьяга Давид хаан-биле болган болуушкуннарны сайгарар бис. Оон ыңай Аса биле Иосафат деп хааннарның чижээн кысказы-биле көрүптер бис. Оларның кандыг бергелерге таваржып турганын, ол үелерде чүнү канчап турганын база элээди оолдар олардан чүнү өөренип ап болурун билип алыр бис.

ДАВИД ХААННЫҢ ЧИЖЭЭНДЕН ӨӨРЕНИҢЕР

3. Элээди оолдар чыышта акы-угбаларга канчаар дузалап болур?

³ Давид элээди тургаш-ла, Бурган-биле быжыг найыралдыг турган. Ол дузааргак кижи чораан. Оон ыңай ол чадаганга эки ойнап өөренип алган. А соонда ол Саул хаанга чиик апаар кылдыр ойнап берип турган (1 Хаан. 16:16, 23). Элээди оолдар, силер чыышка акы-угбаларга канчаар дузалажып болур силер? Чижээ, колдуунда улгадып назылай берген улуска электроннуг херекселдерни ажыглаары берге боор. Ынчангаш силер чыышта акы-угбаларга хууда Библияны өөренирде база чыыш үезинде ону канчаар ажыглаарын айтып бээр болзуңарза, олар аажок өөрүүр. Чүге дизе силер, оларга бодаарга, ону дыка эки сайгарар болгай силер.

4. Элээди оолдар, Давид ышкаш, кандыг шынарларны сайзырадыр болза эки? (Журналдың даштында чурукту көрүңер.)

⁴ Давид харыысалгалыг болгаш бүзүрелдиг кижи чораан. Ол элээди тургаш, ачазының хойларын кадарып турган. Ол ажыл айыылдыг турган. Ону бис Давидтиң сөстеринден көрүп болур бис: «Одардан арзылаң азы адыг хой аптар таварылгалар турган. Ындыг таварылгада мен араатанның соондан сүрүп маңнапкаш, олче халдай бергеш, ооң аспаандан хоюмну былаап ап турган мен» (1 Хаан. 17:34, 35). Шынап-ла, Давид харыысалгалыг бооп, ачазының кодан хоюн эки камгалап, карактап чораан. Элээди оолдар база Давидти өттүнүп, чыышта даалгаларын харыысалгалыг күүседип болур.

5. Ырлар 24:14-тен алырга, элээди оолдарга чүү эң-не чугула боор ужурлуг?

⁵ Давид элээди үезинден тура-ла Бурган-биле чоок найыралдыг турган. Ол найырал ооң чадаганга ойнап билиринден-даа, эрес-дидиминден-даа артык чугула турган. Иегова Давидке анаа-ла Бурганы эвес, а ооң чоок Өңнүү турган. (Номчуптуңар: Ырлар 24:14.) Элээди оолдар, Бурган-биле чоок найыралды сайзырадып алырын кызыңар. Ынчан силерге чыышка хүндүткелдиг даалгаларны албан бээр.

6. Чамдык улус Давидти канчаар көөр турган?

⁶ Чамдык улус Давидти чөгенчиг кылдыр көөр турган. Давид Голиаф-биле тулчур дээш үнүп кээрге, Саул ону «ам-даа чаш оол-дур сен» дээш, соксадып турган (1 Хаан. 17:31—33). А ооң акызы ону хойларын каапкан дээш, харыысалга чок деп буруудаткан (1 Хаан. 17:26—30). Ынчалза-даа Иегова Давидти эки билир болгаш, аңаа чүүлзүнүп турган. Давид чоок Өңнүү Иеговага ынанып, Голиафты өлүрүп каапкан (1 Хаан. 17:45, 48—51).

7. Давидтен чүнү өөренип ап болур силер?

⁷ Элээди оолдар, Давидтен чүнү өөренип ап болур силер? Бирээде, шыдамык болуңар. Чүге дизе силерни чажыңардан тура таныыр улуска ам-даа бичии ышкаш силер. Иегова силерниң даштыкы хевириңер көрбейн, иштики бүдүжүңерни база кандыг ажылдарны кылып шыдаарыңарны көрүп турар (1 Хаан. 16:7). Ийиде, Бурган-биле хамаарылгаңарны быжыктырыңар. Давид Бурган-биле хамаарылгазын Ооң чаяалгаларының дугайында ханы боданып тургаш, быжыктырып алган (Ыд. ыр. 8:4, 5; 138:14; Рим. 1:20). Үште, Бургандан күштү дилеңер. Бир эвес силерни чаңгысклассчыларыңар Иегованың Херечизи дээш кыжырып турар болза, канчаар? Ону ажып эртер күштү Иеговадан дилеп, мөргүңер. Ол ышкаш Библиядан, библейжи дептерлерден, интернет-статьялардан болгаш видеороликтерден сүмелерни ажыглаңар. Оон Иегованың дузазын көрген саныңарда-ла, Аңаа бүзүрелиңер күштелир. Ынчан улус Иеговага ынанып турарыңарны чоорту эскерип, силерге бүзүреп эгелээр.

8, 9. Давидке дүжүлгезинге олурарынга чедир шыдамык болурунга чүү дузалаан база элээди оолдар оон чүнү өөренип ап болур?

⁸ Давидтиң таварышкан база бир байдалын көрүптээлиңер. Ол хаан апаргаш, дүжүлгезинге олурарын дыка хөй чылдар ишти манаан (1 Хаан. 16:13; 2 Хаан. 2:3, 4). Аңаа ол хире шыдамык болурунга чүү дузалаан? Ол муңгаралга алыспайн, шыдаар-ла чүүлүн кылып чораан. Давид филистимчилерниң черинге истеп сүрүүшкүннерден чаштынып чораан-даа болза, Иуданың кызыгаарын камгалап, дайзыннарынга удур дайылдажырын уламчылаан (1 Хаан. 27:1—12).

⁹ Давидтиң чижээнден чүнү өөренип ап болур силер, оолдар? Иеговага болгаш ха-дуңмага бараалгаар дээш, кандыг-даа арганы ажыглаңар. Рикардоb дээр акывыстың чижээн көрээлиңер. Ол элээди тургаш, доктаамал эгелекчи болуксаар турган. Ынчалза-даа хуралдың удуртукчулары ону ам-даа белен эвес сен дээн. Рикардо оларже хомудавайн, хөй суртаалдап эгелээн. Ол үлешкен: «Ынчан дуржулга чок турган мен деп ам-на билип тур мен. Ам болза, алыс шынны бичии-ле сонуургаан улусче катап барып, дараазында чугаага эки белеткенип ап турар мен. Безин библейжи кичээлдиг апарган мен. Дуржулгам улгаткан тудум, бодумга база бүзүреп эгелээн мен». Ам Рикардо чедиишкинниг доктаамал эгелекчи база хуралдың дузалакчызы бооп бараалгап чоруур.

10. Давид чугула шиитпир үндүрериниң бетинде чүнү канчалган?

¹⁰ Филистимчилерниң черинге Давид болгаш ооң улузу Саулдан дезип турган үеде чүү болганын көрүптээлиңер. Дайзыннар оларның дайылдажып турган үезин ажыглап, оларның бажың-балгадынче халдааш, өг-бүлезин кулданыгже аппарган. Давид дуржулгалыг дайынчы турган-даа болза, өг-бүлемни бодум хостап алыр мен деп бодаваан. Ол харын-даа Иеговадан арга-сүмени Авиафар дээр бараалгакчы таварыштыр айтырган: «Ол дээрбечилерни сүрейн бе?» Иегова аңаа: «Сүрүп чорувут. Оларга четкеш, бодуңнуң улузуңну эгидип аар сен» — дээн (1 Хаан. 30:7—10). Моон чүнү өөренип алыр силер?

11. Шиитпир хүлээриниң мурнунда чүнү канчаар болза эки?

¹¹ Кандыг-бир шиитпир хүлээр деп баргаш, ада-иеңерниң онал-саналын сонуургап айтырыңар. Оон ыңай дуржулгалыг удуртукчулардан арга-сүмеден дилеңер, чүге дээрге Иегова оларга бүзүреп турар. Бис база оларга ынанып болур бис. Бурган удуртукчуларны чыышка белектер кылдыр берген (Эф. 4:8). Ол акыларның быжыг бүзүрелин өттүнүп, мерген угаанныг сүмелерин ажыглаар болзуңарза, шын шиитпирни хүлээп алыр силер. Ам Аса хаанның чижээн көрүптээлиңер.

АСА ХААННЫҢ ЧИЖЭЭНДЕН ӨӨРЕНИҢЕР

12. Аса хааннап эгелээш, кандыг шынарларлыг турган?

¹² Аса элээди тургаш, биче сеткилдиг болгаш эрес-дидим чораан. Ачазы Авияның соонда ол хаан апаргаш, дүрзү-бурганнарга чүдүүр чорукту узуткап эгелээн. Ол ышкаш «Аса иудейлерге ада-өгбезиниң Бурганы Дээрги-Чаяакчыже чүткүүрүн, Ооң хоойлузун база айтыышкыннарын күүседирин дужааган» (2 Чыл. 14:1—7). А кажан эфиоп Зерах хаан миллион аг-шерии-биле Иудага удур үнүп кээрге, Аса мерген угаанныг бооп, Иеговадан дуза дилээн: «Дээрги-Чаяакчы, күштүглерге удур туржуп турар кошкак улуска чүгле Сен дузалап шыдаар сен. Бурганывыс Дээрги-Чаяакчы, биске дузалап көрем, чүге дээрге Сеңээ ынаныр-дыр бис» — дээн. Дээрде Адазы Иегова чонунга дузалаар деп Асаның бүзүреп турганы ол сөстерден көскү. Оон Иегова эфиоптарны чылча шаапкан (2 Чыл. 14:8—12).

13. Аса кандыг частырыгны кылган база чүге?

¹³ Миллион аг-шериг Асага удур тура халып кээрге, аңаа берге болган деп чөпшээрежир боор силер. Ынчалза-даа ол Иеговага идегээш, тиилеп алган. А кажан Израильдиң шынчы эвес хааны Вааса Иудаже удур халдаар деп баарга, Аса Иеговага ынанмайн, дузаны арамей хаандан дилээн. Оон бээр Асага удур дайыннар үзүлбестээн. Ооң чылдагаанын Иегова Ананий медээчини таварыштыр Асага мынчаар тайылбырлап берген: «Сен арамей хаанга идегеп, бодуңнуң Бурганың Дээрги-Чаяакчыга ынанмаан [сен]» (2 Чыл. 16:7, 9; 3 Хаан. 15:32). Моон чүнү өөренип алыр силер?

14. Иеговага канчаар ынанып болур силер? 1 Тимофейге 4:12-ден алырга, ооң түңнели кандыг боор?

¹⁴ Биче сеткилдиг бооп, Иеговага улаштыр идегеңер. Бүзүрелиңерни илередип, сугга суктуруп алырыңарга, Бурган силерни өг-бүлезинче өөрүшкүлүг хүлээп алган. Ооң соонда-даа Иеговага ынаныры чугула. Чуртталгавысты долузу-биле өскертиптер нарын шиитпирлерни хүлээрде, Иегованың дузазын дилеп турар бис. А өске байдалдарда канчаар бис? Чижээ, оюн-тоглаа, ажыл-агый шилиирде азы сорулгалар салырда база-ла Иегованың удуртулгазын дилээр херек. Кандыг-даа байдалда бодуңарның мерген угааныңарга ынанмаңар. Ооң орнунга, Библиядан силерге тааржыр сүмелерни дилеп, ону ажыглаарын кызыңар (У. ч. 3:5, 6). Ынчан Иегованың сеткилин өөртүп, акы-угбаларның бүзүрелин чаалап алыр силер. (Номчуптуңар: 1 Тимофейге 4:12.)

ИОСАФАТ ХААННЫҢ ЧИЖЭЭНДЕН ӨӨРЕНИҢЕР

15. Иосафат хаан кандыг частырыгларны кылып турган? (2 Чылдар 18:1—3; 19:2).

¹⁵ Кижи бүрүзү тергиин эвес болгаш, частырыгларны кылыр. Ынчалза-даа частырыглар Иеговага долузу-биле бараалгаарынга силерге шаптыктавас ужурлуг. Иосафат хаанның чижээн көрүптээлиңер. Ол дыка эки шынарларлыг чораан. Ол хаан апаргаш-ла, «бодунуң ачазының Бурганынче чүткүп... Бурганның айтыышкыннарын ёзугаар чурттап турган». Оон ыңай Иосафат Иегованың хоойлу-дүрүмнеринге «нояннарны... Иудеяның хоорайларынга чонну өөретсин дээш чорудупкан» (2 Чыл. 17:4, 7). Ынчалза-даа чамдыкта ол чазыптар турган. Ону бир частырыы дээш, Иегованың медээчизи шииткен. (Номчуптуңар: 2 Чылдар 18:1—3; 19:2.) Моон чүнү өөренип алыр силер?

16. Радживтиң чижээнден чүнү өөренип алыр силер?

¹⁶ Улустуң сүмелерин дыңнап, ажыглаңар. Өске элээди оолдарга ышкаш, силерге база Бурганга бараалгалды бирги черге салыры берге бооп болур. Ол дээш муңгараваңар! Раджив дээр дуңмавыстың чижээн көрээлиңер. Ол элээди үезинде кандыг-даа сорулга чок чурттап чораан. Раджив үлешкен: «Мен, эштерим оолдар ышкаш, оюн-тоглаа, спорт сонуургаар турган мен. А чыыштарже баары, суртаалдаары меңээ чалгааранчыг турган. Бир удуртукчу акый ону эскерип кааш, мээң-биле чылыг-чымчак чугаалашкан. Ол меңээ 1 Тимофейге 4:8-те дүрүмнү тайылбырлап берген. Оон ханы бодангаш, ам-на чуртталгамга Иегованы бирги черге салыр деп бодап алган мен. Каш чыл эрткенде, мени хуралдың дузалакчызы кылдыр томуйлап каан».

ДЭЭРДЕ АДАҢАР СИЛЕР ДЭЭШ ЧОРГААРЛАНЗЫН!

17. Чыышта акы-угбалар элээди эр дуңмаларынга кандыг хамаарылгалыг?

¹⁷ Эргим эр дуңмаларывыс, чыышта акы-угбаларыңар силерни аажок үнелеп турар. Чүге дээрге силер олар-биле кады Иеговага чаңгыс эптиг бараалгап чоруур силер (Соф. 3:9). Даалгаларыңарны сонуургалдыг, сеткилиңер ханызындан кылып турарыңарны көөрү оларга дыка-ла магаданчыг! Акы-угбаларыңар силерге дыка ынак (1 Ин. 2:14).

18. Чугаалар 27:11-ден алырга, Иегова элээди эр бараалгакчыларынга кандыг хамаарылгалыг?

¹⁸ Элээди эр дуңмаларывыс, Иегова силерге ынак болгаш бүзүреп чоруур деп кажан-даа утпаңар. Иегова сөөлгү хүннерде боттарын хайыралавас аныяк аг-шериглиг болурун чугаалаан (Ыд. ыр. 109:1—3). Ол силерни Аңаа ынак деп база бар-ла күжүңер-биле бараалгаксап чорууруңарны билир. Бодуңардан хөй чүве негевеңер, ол ышкаш өскелерге шыдамык болуңар. Чазыпкан болзуңарза, акы-угбаларның сүмелерин хүлээп, эттинип алырын кызыңар. Ол сүмелерни Иеговадан кылдыр хүлээңер (Евр. 12:6). Силерге бүзүрээн даалгаларны ак сеткилдии-биле күүседиңер. А эң чугула чүүл, дээрде Адаңар силер дээш чоргаарланыр кылдыр чурттаңар. (Номчуптуңар: Чугаалар 27:11.)