Амыр-тайбың үени мерген угаанныг ажыглаңар

1. Иеговага кажан бараалгаары берге?

ЧҮҮ деп бодаар силер, Иеговага кажан бараалгаары берге: хөй бергелер турда бе азы шупту чүве эки турда бе? Бергелерге таваржы бергеш, дораан-на Иеговадан дуза дилээр бис. Ынчалза-даа чуртталгавыста шупту чүве эки турда, Бурганга бараалгалды бирги черге салбайн баар айыыл тыптып кээп болур. Бурунгу үеде Иегова Бодунуң чонунга ындыг айыылдың дугайында сагындырган (Ы. х. к. 6:10—12).

2. Аса биске кандыг чижекти көргүскен?

² Аса хаанның чижээн көрээлиңер. Ол бүрүнү-биле Иеговага ынанып чораан болгаш, мерген угаанныг алдынып турган. Ол эки-даа үеде, берге-даа үеде Иеговага бараалгап турган. Библияда: «Ооң чүрээ бүгү назынында Дээрги-Чаяакчыга бүрүнү-биле бердинген турган» деп бижээн (3 Хаан. 15:14). Чижээ, Аса Иуда чуртунда меге бурганнарга чүдүүр чоруктуң когун үскен: «ол хары бурганнарга өргүл салыр бедигээштерни, мөгейиишкин кылыр бедик черлерни чайладып каапкан, ыдыктыг көжээлерни чуура шапкаш, Ашера бурганга тураскааткан адагаштарны кезип каапкан» (2 Чыл. 14:3, 5). Асаның кырган-авазы Мааха чонну, дүрзү-бурганга чүдүүр кылдыр, соора баштап турган боорга, ол ооң кадын адын безин казып каапкан (3 Хаан. 15:11—13).

3. Бо статьяга чүнү сайгарар бис?

³ Аса дүрзү-бурганнарга чүдүүр чорукту узуткаанындан аңгыда, Иуданың чурттакчыларын Иеговаже эглип кээринче кыйгырып турган. Бурган Асаны болгаш израиль чонну йөрээген: «чер-чурт он чыл дургузунда тайбыңчаанb» (2 Чыл. 14:1, 4, 6). Асаның тайбың үени канчаар ажыглап турганын бо статьяга сайгарар бис. Оон ыңай бирги христианнарның хостуг үезин канчаар мерген угаанныг ажыглап турганын сайгарар бис. А сөөлүнде, бистиң чурттувуста Иеговага хостуг бараалгап болур болза, ол үени канчаар эң-не дээре ажыглап болурувусту көөр бис.

АСА ТАЙБЫҢ ҮЕНИ КАНЧААР АЖЫГЛАП ТУРГАН?

4. 2 Чылдар 14:2, 6, 7-ден алырга, Аса тайбың үени канчаар ажыглап турган?

⁴ Номчуптуңар: 2 Чылдар 14:2, 6, 7. Аса чонга мынча дээн: «[Иегова] биске бүгү талалардан амыр-тайбыңны хайырлаан-дыр». Ынчалза-даа ам-на амыр-шөлээн чурттап болур деп, хаан санаан бе? Чок, ол быжыглалдыг хоорайларны тудуп эгелээн. Аса Иуданың чурттакчыларынга: «Чер амдыызында бистии-дир» — дээн. Ол чүнү чугаалаксааныл? Олар бодунуң черинге, дайзыннарның халдаашкынындан кортпайн, хостуг аргыжып, тудуг ажылдарын кылып болур турганнар. Аса тайбың үени шын ажыглаарынче чонну оттурган.

5. Аса бодунуң аг-шериин дайынга чүге белеткеп турганыл?

⁵ Ол чылдар дургузунда Аса бодунуң аг-шериин дайынга белеткеп, чепсеглендирген (2 Чыл. 14:8). Ындыг болганда, ол Иеговага ынанмайн турганы ол бе? Канчап-даа чок. Чонну келир үеде таваржып болур бергелерге белеткээри — ооң хүлээлгелериниң бирээзи-дир деп, Аса билир турган. Оон ыңай Иудага тайбың үе кажан-бир төнүп каап болур деп, ол билип турган. Ооң бодап турганы шын болган.

БАШТАЙГЫ ХРИСТИАННАР ТАЙБЫҢ ҮЕНИ КАНЧААР АЖЫГЛАП ТУРГАН?

6. Бирги векте христианнар амыр-тайбың үени канчаар ажыглап турган?

⁶ Бирги векте христианнар истеп сүрүүшкүннерге бо-ла таваржыр турган. Ынчалза-даа оларның чуртталгазынга тайбың үелер база тургулаан. Олар ол үелерни канчаар ажыглап турганыл? Буянныг медээни соксаал чокка суртаалдап турганнар. Ажыл-чорудулга номунда мынча деп бижээн: «Дээрги-Чаяакчыны хүндүлеп, Оон коргуп чурттаар боорга... өөреникчилерниң саны көвүдеп кел-ле чыткан». Акы-угбаларның улаштыр чүткүлдүг суртаалдап турганын көргеш, Иегова ол тайбың үеде оларның бараалгалын йөрээп турган (Аж.-ч. 9:26—31).

7, 8. Павел болгаш өске-даа христианнар буянныг медээ-биле үлежир аргаларны эрттирбейн турган деп чүүден көскү?

⁷ Баштайгы христианнар буянныг медээ-биле үлежир аргаларны эрттирбейн турган. Чижээ, Павел элчин Эфеске ооң мурнунда «делгем орук ажыттынган» деп билип кааш, суртаалдаар болгаш өөреникчилер белеткээри-биле, ол хоорайга артып калган (1 Кор. 16:8, 9).

⁸ Павел болгаш өске-даа христианнар б. э. 49 чылда база дыка хөй улуска суртаалдап турган. Ол чылын элчиннер болгаш удуртукчулар Иерусалимде кыртыжап демдектээриниң дугайында айтырыгны шиитпирлээннер (Аж.-ч. 15:23—29). Акы-угбалар ол шиитпирниң дугайында билип кааш, «Дээрги-Чаяакчының Буянныг Медээзин» идепкейлиг суртаалдап эгелээннер (Аж.-ч. 15:30—35). Оларның ажылы үре-түңнелдиг болган бе? Библияда мынча дээн: «Христиан ниитилелдерниң бүзүрели быжыгып, улузу хүн санай немежип турган» (Аж.-ч. 16:4, 5).

АМЫР-ТАЙБЫҢ ҮЕНИ ШЫН АЖЫГЛАҢАР

9. Хөй чурттарда Иегованың Херечилеринде кандыг арга бар? Бодувустан чүнү айтырып болур бис?

⁹ Амгы үеде хөй чурттарга хостуг бараалгап болур. Силер ындыг чурттарның бирээзинде чурттап турар болзуңарза: «Иеговага хостуг бараалгаар арганы канчаар ажыглап турар мен?» деп бодуңардан айтырыңар. Бис бо делегейниң сөөлгү хүннеринде, кажан-даа катаптаттынмас үеде чурттап чоруур бис. Төөгүде болуп көрбээн, эң-не улуг хемчээлдиг суртаал ажылынга болгаш өөреникчилер белеткээр ажылга киржип турар бис (Мк. 13:10). Ынчангаш бистиң мурнувуста хөй аргалар ажыттынган.

10. 2 Тимофейге 4:2-де сөстер бисти чүү чүвеже оттуруп турар?

¹⁰ Амыр-тайбың үени канчаар шын ажыглап болурул? (Номчуптуңар: 2 Тимофейге 4:2.) Силер азы өг-бүлеңерден бир кижи, оон-даа хөй суртаалдаар дээш (безин эгелекчи кылдыр бараалгаар дээш), чуртталгаңарда бир-ле чүүлдү өскертип шыдаар силер бе? Бо үеде байып алырын кызып, акша-төгерикти болгаш эт-хөреңгини чыгган херээ чок. Чүге дизе коргунчуг хилинчек үезинде биске оларның ажыы чок болур (У. ч. 11:4; Мф. 6:31—33; 1 Ин. 2:15—17).

11. Өскелерге Иегованың дугайында билип алырынга дузалаар дээш, чамдык акы-угбалар чүнү канчап турарыл?

¹¹ Өске улуска Иегованың дугайында билип алырынга дузалаар дээш, хөй акы-угбалар чаа дылды өөренип алган. Бурганның организациязы ындыг суртаалчыларны деткип, библейжи дептерлерни болгаш өске-даа материалдарны аңгы-аңгы дылдарда үндүрүп турар. Чижээ, 2010 чылда бистиң дептерлеривис 500 хире дылга үнүп турган болза, бо хүн ол 1 000 ажыг дылда үнүп турар!

12. Улус алыс шынны төрээн дылынга дыңнааш, чүнү миннип турар? Чижектен чугаалаңар.

¹² Улус алыс шынны төрээн дылынга дыңнааш, чүнү миннип турар? Американың Теннесси штадының Мемфис хоорайынга болуп эрткен регион шуулганынче барган угбавыстың чижээн көрээлиңер. Ол шуулган ооң төрээн дылынга, киньяруандага, болуп эрткен. Ол дылга колдуунда Руанданың, Демократтыг Республика Конгонуң болгаш Уганданың чурттакчылары чугааланыр. «Америкаже 17 чыл бурунгаар көжүп келген хиремде, шуулганның программазын чүгле ам долузу-биле билип алган мен» — деп угбавыс үлешкен. Төрээн дылынга программа угбавыска ол хире дээштиг болган! Силерниң чыыжыңарның девискээринде өске дылдыг улус чурттап турар болза, оларның дылын өөренип ап шыдаар силер бе? Бир эвес буянныг медээни улустуң төрээн дылынга чугаалаар болзуңарза, олар күзелдии-биле силерни дыңнаар чадавас. Силерниң үндүрген күжениишкиниңер хилис барбас!

13. Россияда акы-угбалар тайбың үени канчаар ажыглап турганыл?

¹³ Шупту акы-угбаларывысты хостуг бараалгап турар деп болбас. Чамдык чурттарда эрге-чагырга ээлээннер ажыл-чорудулгавысты кызыгаарлап турар. Чижээ, Россияда байдалды алыр болза, он-он чылдар дургузунда Иегованың Херечилерин истеп сүрүп келген. Ынчалза-даа 1991 чылдың март айда оларның ажыл-чорудулгазын чөпшээрепкен. Ол үеде Россияга Бурганның бараалгакчыларының саны 16 000 хире турган. А 20 чыл эрткенде, оларның саны 160 000 ашкан! Чугаажок, ха-дуңмавыс хостуг суртаалдаар арганы мерген угаанныг ажыглап турган. Амыр-тайбың үе үр уламчылаваан, ынчалза-даа оларның бараалгаар чүткүлү өшпээн. Олар боттарының байдалында шыдаар чүүлдү кылып, Иеговага улаштыр бараалгап чоруур.

АМЫР-ТАЙБЫҢ ҮЕ УДАВАС ТӨНЕР

14, 15. Иегова күчү-күжүн көргүзүп, Асага канчаар дузалаан?

¹⁴ Кажан эфиоп Зерах миллион аг-шерии-биле Иудея черинче халдай бээрге, Асаның хүннеринде амыр-тайбың үе ынчан төнген. Зерах Асаны болгаш ооң аг-шериин белени-биле тиилеп аар деп бодап турган. Ынчалзажок Аса дайзыннарының хөйүнден кортпаан, чүге дизе ол бодунуң Бурганы Иеговага идегеп турган. Аса мынча деп мөргээн: «Бурганывыс Дээрги-Чаяакчы, биске дузалап көрем, чүге дээрге Сеңээ ынаныр-дыр бис, бо аг-шеригге удур Сээң адың дээш тулчуп үнүп келген-дир бис» (2 Чыл. 14:11).

¹⁵ Эфиоп аг-шеригниң саны иудей аг-шеригниң санындан ийи хире катап хөй турган-даа болза, бүрүн күчүлүг Иегова Бодунуң чонунга дузалаар деп, Аса билир турган. Иегова Асаның идегелин ышкындырбаан: эфиоптар чылча шаптырткан (2 Чыл. 14:8—13).

16. Амыр-тайбың үе төнүп каар деп, кайыын билир бис?

¹⁶ Келир үеде хууда бистиң-биле чүү болурун билбес бис, ынчалза-даа Иеговага шаптараазын чок бараалгаар үе кажан-бир төнүп каар деп билир бис. Иисус сөөлгү хүннерде шупту чоннар ооң өөреникчилерин көөр хөңнү чок апаар деп баш удур чугаалаан (Мф. 24:9). Павел элчин: «Бурганны хүндүлеп, Христос Иисус-биле сырый харылзаалыг амыдыраар дээн улустуң шуптузу истедип-сүрдүре бээр» — деп база чугаалаан (2 Тим. 3:12). Амгы үеде Эрлик «хөлчок килеңнээн» деп Библиядан билир бис (Ажыд. 12:12). Ооң килеңи бисти оюп эрте бээр деп бодаары шын эвес.

17. Бистиң бүзүреливис канчаар шенеттинип болур?

¹⁷ Чоокку келир үеде бистиң кижи бүрүзүнүң бүзүрели шенеттинер. «Бо делегейни чаяаганындан бээр, амдыгаа чедир кажан-даа болбаан... коргунчуг хилинчек ол үеде болур» (Мф. 24:21). Ынчан бистиң чоок улузувус биске удурланыр чадавас, а бистиң ажыл-чорудулгавысты хоруп каап болур (Мф. 10:35, 36). Иегова силерге дузалаар база камгалаар дээрзинге, Аса ышкаш, бүзүрээр силер бе?

18. Еврейлерге 10:38, 39-тан алырга, келир үеде болуушкуннарга белеткенип алырынга биске чүү дузалаар?

¹⁸ Иегова бисти келир үеде болуушкуннарга белеткээр дээш, бүзүреливисти быжыктырып турар. Төнчүзүнге чедир быжыг туруштуг бооп артып каар кылдыр, Ол «шынчы болгаш сарыылдыг» чалча таварыштыр чогуур үеде «аъш-чемни» биске берип турар (Мф. 24:45). Ынчалза-даа бодувустуң талавыстан база кызып, Иеговага бүзүреливисти быжыглаар ужурлуг бис. (Номчуптуңар: Еврейлерге 10:38, 39.)

19, 20. 1 Чылдар 28:9-тан сөстерни кичээнгейге ап, бодувуска кандыг айтырыгларны салыр болзувусса эки? Ол айтырыгларның дугайында боданыры чүге чугула?

¹⁹ Бис, Аса дег, Иеговаже «чүткүүр» болзувусса эки (2 Чыл. 14:4; 15:1, 2). Баштай Бурганны эки билип алгаш, сугга суктуруп алганывыс-биле Олче чүткүп эгелээн бис. Ол үеден тура, Иеговага ынакшылывыс күштүг болзун дээш, шыдаар шаавыс-биле кызып чоруур бис. Бодувусту хынанып: «Чыыштарны үзүп турар мен бе?» деп айтырып болур бис. Ол ужуражылгаларга бис, Иеговага улаштыр бараалгаар кылдыр, күш кирип, кады бүзүрээн ха-дуңмавыстың деткимчезин ап турар бис (Мф. 11:28). Оон ыңай мындыг айтырыгларның дугайында база боданып көрүңер: Бурганның Сөзүн доктаамал өөренип турар мен бе? Өг-бүлелиг болзумза, неделя санында өг-бүле мөгейиишкинин эрттирип турар мен бе? А бир эвес чааскаан чурттап турар болзумза, өске өг-бүлелер ышкаш, неделя санында Библияны ханы шинчилээринче үени үндүрүп турар мен бе? Суртаалдаар болгаш өөреникчилер белеткээр дээш, болдунар-ла чүүлдү кылып турар мен бе?

²⁰ Ол айтырыгларның дугайында чүге боданыры чугула? Иегова «бүгү улустуң чүрээн шылгап, оларның бодалдарының шимчээшкиннерин билир» деп Библияда бижээн. (Номчуптуңар: 1 Чылдар 28:9.) Бис база ону кылыр ужурлуг бис. Бир эвес сорулгаларыңарны азы үзел-бодалыңарны өскертир херек деп билип турар болзуңарза, Иеговадан дузаны дилеңер. Келир үеде болур шенелделерге белеткенири кажангызындан-даа артык чугула үе-дир бо. Амыр-тайбың үени мерген угаанныг ажыглаарынга силерге чүү-даа шаптыктавазын!