Әйсани үлгә қилип, қизғин вәз қилиң

1. Худаниң хәлқи бу дуниядики адәмләрдин немә билән пәриқлиниду?

ХУДАНИҢ һәқиқий хизмәтчилири билән өзини мәсиһий дәп атавалғанларниң қандақ пәрқи бар? Йәһва Худаниң хизмәтчилири қизғин вәз қилиду (Тит. 2:14). Бирақ бәзидә вәз хизмитигә қизғинлиқ билән қатнишиш оңай болмаслиғи мүмкин. Бир тиришчан ақсақал мундақ дегән: «Бәзидә вәзгә чиққум кәлмәй, өзүмни сөрәпла чиқиримән». Сизму униң сөзлиригә қошулидиғансиз?

2. Бәзидә қизғинлиқ билән вәз қилиш немә үчүн қийин болуши мүмкин?

² Бәлким, вәз қилишқа қариғанда хизмәтниң башқа түрлирини көпирәк яқтуридиғансиз. Немә үчүн шундақ болуши мүмкин? Ибадәт өйлирини селиш яки асрап күтүшкә қатнашқанда, тәбиий апәттин зәрдап чәккәнләргә ярдәмләшкәндә яки башқиларни илһамландурғанда, нәтиҗисини бирдин көрүп қанаәт алимиз. Қериндашлар билән һәмкарлашқанда интайин хошал болимиз, чүнки аримизда меһир-муһәббәт вә инақлиқ бар. Улар әмгигимизни байқап, қәдирләйду. Вәз хизмити болса, тамамән башқичә. Бәзи йәрләрдә жиллар бойи вәз қилип жүрсәкму, һәқиқәткә қизиқидиған адәмләр аз. Буниңдин башқа, хуш хәвәрни яқтурмай, бизни тиллайдиған адәмләрму бар. Шәйтан дуниясиниң ахири йеқинлашқансири, бизгә қарши чиқидиған адәмләрниң сани көпийиду (Мәт. 10:22). Ундақта, вәз хизмитигә паал қатнишип, техиму қизғин болуш үчүн немә қилалаймиз?

3. Луқа 13:6—9 айәтләрдин Әйсаниң қизғинлиғи тоғрилиқ немини билимиз?

³ Қизғин вәз қилишни Әйсадин үгинәләймиз. Әйса йәрдә хизмәт қилғанда, униң қизғинлиғи һечқачан совумиған. Әксинчә, у күндин-күнгә техиму қизғин вәз қилған (Луқа 13:6—9ни оқуң). Әйса мисал кәлтүрүп, өзини бағвән билән селиштурған. Бағвән әнҗир дәриғини үч жил пәрвиш қилсиму, у бирму мевә бәрмәпту. Шу чағда у мевә бериду дәп үмүт қилип, дәрәқни кәстүрмәйду. Дәл шундақ, Әйса үч жил давамида йәһудийларға вәз қилсиму, хуш хәвәрни тиңшиғанлар аз болған. Буниңға қаримастин, Әйса болди қилмай, қизғин вәз қилишни давамлаштурған.

4. Бу мақалидә қандақ төрт нәрсини көрүп чиқимиз?

⁴ Бу мақалидә биз Әйсаниң болупму хизмитиниң ахирқи алтә ай ичидә қизғинлиқни қандақ көрсәткәнлигини көрүп чиқимиз (Луқа 10:1). Униң немиләрни үгәткәнлиги вә қилғанлиғи тоғрилиқ көпирәк билсәк, бизму қизғин болалаймиз. Һазир Әйсаға ярдәм бәргән төрт нәрсигә көңүл бөләйли: 1) Йәһва Худаниң ирадиси униң үчүн әң муһим болған, 2) у Муқәддәс китаптики пәйғәмбәрлик сөзләргә мас яшиған, 3) Йәһваға таянған вә 4) башқилар уни тиңшимисиму, үмүт үзмигән.

ЙӘҺВА ХУДАНИҢ ИРАДИСИ УНИҢ ҮЧҮН ӘҢ МУҺИМ БОЛҒАН

5. Йәһва Худаниң ирадисини орунлаш Әйса үчүн муһим екәнлигини у қандақ көрсәткән?

⁵ Әйса Мәсиһ Падишалиқ һәққидики хуш хәвәрни қизғин вәз қилған. Чүнки бу ишни Йәһва Худаниң Өзи тапшурған (Луқа 4:43). Әйса вәз хизмитини һаятида биринчи орунға қойған. У һәтта йәр йүзидики хизмитиниң ахиридиму «адәмләргә тәлим бәргәч шәһәр-йезилардин өтти» (Луқа 13:22). Буниңдин башқа, у йеңи шагиртларға вәз қилишни үгәткән (Луқа 10:1).

6. Вәз хизмитиниң башқа вәзипилиримиз билән қандақ бағлиниши бар? (Рәсимгиму қараң.)

⁶ Йәһва Худа вә Әйса Мәсиһ бизгә тапшурған әң муһим иш — хуш хәвәрни вәз қилиш (Мәт. 24:14; 28:19, 20). Тәшкилаттики һәммә башқа хизмәт түрлири вәз хизмити билән зич бағлиқ. Мәсилән, Ибадәт өйлирини қурғанлиқтин, биз адәмләрни җамаәт учришишлириға чақиралаймиз. Бәйтәлдики хизмәтләрниң һәммиси вәз ишини қоллап-қувәтләйду. Тәбиий апәттин зәрдап чәккән қериндашларға керәк нәрсиләрни тәминләштин башқа, биз уларға роһий җәһәттинму ярдәм беримиз. Шундақ қилип, улар қайтидин роһий ишлар билән шуғуллинип, вәз қилишни давамлаштуралайду. Әгәр биз вәз хизмитиниң Йәһва Худа тапшурған әң муһим иш екәнлигини унтумисақ, пат-пат вәз қилип туримиз. Венгриядә ақсақал болуп хизмәт қилидиған Януш мундақ дәйду: «Мән тәшкилаттики һечқандақ вәзипә вәз қилишниң орнини басалмайдиғанлиғини вә бу әң муһим тапшуруқ екәнлигини пат-пат әскә елип туримән».

7. Йәһва Худа немә үчүн һармай-талмай вәз қилишимизни халайду? (Тимотийға 1-хәт 2:3, 4)

⁷ Вәз хизмитидә техиму қизғин болушимизға немә ярдәм бериду? Биз адәмләргә Йәһва Худа қариғандәк қаришимиз керәк. У көпирәк адәмләрниң хуш хәвәрни аңлап, У тоғрилиқ һәқиқәтни билишини халайду (Тимотийға 1-хәт 2:3, 4ни оқуң). Шу сәвәптин, У адәмләрниң һаятини қутқузидиған бу хәвәрни техиму үнүмлүк ейтишимизға ярдәм бериду. Мәсилән, «Инсанларни сөйүп шагиртларни тәйярлаң» дегән китапчидә нурғун пайдилиқ мәслиһәтләр бар. Униңда шагирт тәйярлаш үчүн адәмләр билән қандақ сөз башлаш керәклиги яхши чүшәндүрүлиду. Адәмләр һазир хуш хәвәргә қулақ салмисиму, чоң балаю апәт ахирлишиштин бурун уларниң һәқиқәтни қобул қилиш мүмкинчилиги болиду. Чоң балаю апәттә улар ейтқанлиримизни әсләп, Йәһва Худаға хизмәт қилишни башлиши мүмкин. Бирақ буниң үчүн биз һазир һармай-талмай вәз қилишимиз керәк.

У ПӘЙҒӘМБӘРЛИК СӨЗЛӘРГӘ МАС ЯШИҒАН

8. Пәйғәмбәрлик сөзләрни яхши чүшәнгәнликтин, Әйса вақтини қандақ ишләткән?

⁸ Әйса Муқәддәс китаптики пәйғәмбәрлик сөзләрниң қандақ әмәлгә ашидиғанлиғини чүшәнгән. Шуңа у йәрдики хизмитиниң пәқәт үч йерим жил давамлишидиғанлиғини билгән (Дан. 9:26, 27). Шундақла у өзиниң азап-оқубәтләргә дуч келип, қийнилип өлидиғанлиғини билгән (Луқа 18:31—34). Өзи тоғрилиқ алдин-ала ейтилғанларни әстә тутуп, Әйса вақтини даналиқ билән ишләткән. У өзигә тапшурған вәзипини ахириғичә орунлаш үчүн, җан-җигәри билән вәз қилған.

9. Пәйғәмбәрлик сөзләр немишкә бизни қизғин вәз ейтишқа үндәйду?

⁹ Бизму Муқәддәс китаптики бәшарәтләрни яхши чүшәнсәк, вәз хизмитигә паал қатнишимиз. Билгинимиздәк, бу дунияниң санақлиқ күнлири қалди. Муқәддәс китапта ахирқи күнләрдә адәмләрниң қандақ болидиғанлиғи вә дуния сәһнисидә қандақ вақиәләр йүз беридиғанлиғи алдин-ала йезилған. Буниңдин башқа, Америка билән Британия вә Россия билән униң иттипақдашлириниң арисидики тоқунушларниму көрүватимиз. Буму Муқәддәс китаптики пәйғәмбәрлик сөзләрниң орунлиниши. Униңда ахир заманда шималий вә җәнубий падишаларниң риқабәтлишидиғанлиғи ейтилған (Дан. 11:40). Шундақла биз Даниял 2:43—45 айәтләрдики йоған һәйкәлниң путлири Англо-Америка дуниявий империясини билдүридиғанлиғини чүшинимиз. Биз Худа Падишалиғи пат арида адәмләрниң қол астидики һәммә һөкүмәтләрни кукум-талқан қилидиғанлиғиға ишәнчимиз камил. Бу вақит көзүмизни жумуп ачқичә келиду. Буларниң һәммиси вақитниң қанчилик аз қалғанлиғини ениқ көрситиду, шундақ әмәсму? Ундақта, қалған вақитни үнүмлүк пайдилинип, бар күчимиз билән қизғин вәз қилайли!

10. Муқәддәс китаптики йәнә қандақ пәйғәмбәрлик сөзләр бизни қизғин вәз қилишқа үндәйду?

¹⁰ Биз Муқәддәс китаптики үмүт беридиған пәйғәмбәрлик сөзләрни башқиларға ейтишни халаймиз. Доминикан Җумһурийитидә яшайдиған Кэрри қериндишимиз мундақ дәйду: «Йәһваниң парлақ келәчәк тоғрисидики әҗайип вәдилири мени һәқиқәтни башқилар билән бөлүшүшкә үндәйду. Бүгүнки күндә адәмләр нурғун қийинчилиқлар билән күришиватиду. Шундақ адәмләрни көргәндә, уларму Худаниң әҗайип вәдилирини билиши керәклигини чүшинимән». Пәйғәмбәрлик сөзләр һәр түрлүк адәмләргә қорқмай вәз қилишқа ярдәм бериду, чүнки биз бу Йәһва Худаниң иши екәнлигини билимиз. Венгриядики Лэйла қериндаш мундақ дәйду: «Бәзидә адәм хуш хәвәрни тиңшимайду дәп ойлаймән, лекин мән униң үчүн қарар қилмаслиққа тиришимән. Йәшая 11:6—9 айәтләрдә йезилғандәк, Йәһва Худаниң ярдими билән һәрқандақ адәм өзгирәләйду». Замбиядә яшайдиған Кристофер бурадәр болса мундақ дегән: «Марк 13:10да алдин-ала ейтилғандәк, хуш хәвәр дунияниң җай-җайлирида ейтиливатиду вә бу ишқа һәссәмни қошуш мән үчүн чоң шан-шәрәп». Сизничу, қайси пәйғәмбәрлик сөзләр қизғин вәз қилишқа дәвәт қилиду?

У ЙӘҺВАҒА ТАЯНҒАН

11. Қизғин вәз қилиш үчүн Әйса немишкә Йәһваниң ярдимигә тайиниши керәк еди? (Луқа 12:49, 53)

¹¹ Әйса Мәсиһ Йәһваниң ярдимигә таянғанлиқтин, қизғин вәз қилалиған. У хуш хәвәрни силиқ-сипайә ейтсиму, ейтқан хәвири һәммисигә яқмайдиғанлиғини, һәтта бәзиләр қаттиқ қаршилиқ көрситидиғанлиғини билгән (Луқа 12:49, 53ни оқуң). Дин рәһбәрлири Әйсани вәз қилғанлиғи үчүн бирнәччә қетим өлтүрүшкә урунған (Йоһ. 8:59; 10:31, 39). Лекин Йәһва Худаниң униң билән биллә екәнлигини билгәнликтин, Әйса вәз қилишни тохтатмиған. У мундақ дегән: «Ялғуз әмәсмән, мени әвәткән Атам мән билән биллә. . . У мени ялғуз қоймиди, чүнки мән һемишәм Уни хуш қилидиған ишларни қилимән» (Йоһ. 8:16, 29).

12. Әйса шагиртлирини қаршилиққа қаримастин давамлиқ вәз қилишқа қандақ тәйярлиған?

¹² Әйса шагиртлирини Йәһва Худаниң ярдимигә тайинишқа пат-пат дәвәт қилған. У Йәһваниң һәрқачан, һәтта дүшмәнләр қарши чиққандиму, уларға ярдәм беридиғанлиғиға ишәндүргән (Мәт. 10:18—20; Луқа 12:11, 12). Шундақ болсиму, у шагиртлирини еһтиятчан болушқа үндигән (Мәт. 10:16; Луқа 10:3). Әгәр адәм хуш хәвәрни тиңшиғуси кәлмисә, уни мәҗбурлимаңлар дәпму үгәткән (Луқа 10:10, 11). Әйса ейтқандәк, уларни тәқиплисә, улар башқа шәһәргә қечип кетиши керәк еди (Мәт. 10:23). Әйсаниң өзи қизғин болуп, Йәһва Худаға таянған болсиму, у еһтиятчанлиқ көрситип, хәтәрлик вәзийәтләрдин нери турған (Йоһ. 11:53, 54).

13. Йәһва Худаниң бизни қоллайдиғанлиғиға немишкә ишәнсәк болиду?

¹³ Бүгүнки күндә нурғун адәмләр бизгә қарши чиқиду. Шуңа қизғин вәз ейтиш үчүн биз Йәһва Худаниң ярдимигә муһтаҗ (Вәһ. 12:17). Йәһваниң бизни қоллайдиғанлиғиға немишкә ишәнсәк болиду? Келиңлар, Йоһан 17-баптики Әйсаниң дуасини көрүп чиқайли. Мәсиһ Йәһва Худадин униң шагиртлирини қоғдашни сориған вә У бу дуаға җавап бәргән. Әлчиләр китавидин Йәһва Худаниң Мәсиһ әгәшкүчилиригә қаршилиққа қаримай, қизғин вәз ейтишқа ярдәм бәргәнлигини оқуймиз. Әйса Йәһвадин әлчиләр ейтқан хәвәргә қулақ селип, униң әгәшкүчиси болидиғанларниму қоғдашни сориған. Демәк, у сиз үчүнму сориған. Йәһва Худа Әйсаниң дуасиға мошу кәмгичә җавап берип келиватиду. У әлчиләргә ярдәм бәргәндәк, сизгиму ярдәм бериду (Йоһ. 17:11, 15, 20).

14. Оңай болмисиму, давамлиқ қизғин вәз қилалайдиғанлиғимизға немә үчүн ишәнсәк болиду?

¹⁴ Бу дунияниң ахири йеқинлашқансири, хуш хәвәрни қизғин ейтиш қийин болуши мүмкин. Бирақ Әйса ейтқандәк, биз ярдәмсиз қалмаймиз (Луқа 21:12—15). Әйса вә униң шагиртлириға охшаш, бизму адәмләр билән талаш-тартиш қилмаймиз. Әксинчә, хуш хәвәрни аңлаш яки аңлимаслиқни өзлириниң қарар қилишиға йол беримиз. Һәтта паалийитимиз чәкләнгән йәрләрдиму қериндашлиримиз өзлиригә әмәс, Йәһва Худаға таянғанлиқтин, давамлиқ вәз қилалайду. Йәһва Худа биринчи әсирдики хизмәтчилиригә күч бәргәндәк, бизгиму күч бериду вә биз вәз қилиш тапшуруғини ахириғичә атқуралаймиз (Тим. 2-х. 4:17). Йәһваға таянсақ, биз чоқум қизғин вәз қилалаймиз.

У АДӘМЛӘРДИН ҮМҮТ ҮЗМИГӘН

15. Әйсаниң адәмләрдин үмүт үзмигәнлиги немидин көрүниду?

¹⁵ Әйса үмүт үзмәй, бәзи адәмләрниң хуш хәвәргә чоқум қулақ салидиғанлиғиға ишәнгән. Шу сәвәптин у қизғинлиғини совутмай, давамлиқ вәз қилалиған. Мәсилән, милади 30-жилиниң ахирида Әйса нурғун адәмләрниң хуш хәвәргә қулақ селишқа тәйяр екәнлигини көргән. У уларни ома үчүн пишқан етиз билән селиштурған (Йоһ. 4:35). Тәхминән бир жилдин кейин Әйса шагиртлириға һосулниң көп екәнлигини ейтқан (Мәт. 9:37, 38). Бираз вақит өтүп, у қайтидин: «Һосул һәқиқәтән мол. . . Шуңлашқа һосул Егисидин омиға ишчиларни көпирәк әвәтишини сораңлар»,— дегән (Луқа 10:2). Әйса Мәсиһ бәзи адәмләрниң хуш хәвәрни қобул қилидиғанлиғиға ишәнгән вә шундақ адәмләрни тапқанда, интайин хошал болған (Луқа 10:21).

16. Әйса кәлтүргән мисаллар вәз хизмитигә иҗабий көзқараш сақлашқа қандақ ярдәм бериду? (Луқа 13:18—21) (Рәсимгиму қараң.)

¹⁶ Шагиртлири қизғинлиғини йоқатмаслиғи үчүн, Әйса вәз хизмитиниң қандақ әҗайип нәтиҗә әкелидиғанлиғини чүшәндүргән. Келиңлар, у кәлтүргән икки мисални көрүп чиқайли (Луқа 13:18—21ни оқуң). Биринчисидә у хуш хәвәрни чоң бир дәрәққә айлинидиған қича уруғи билән селиштурған. Демәк, хуш хәвәргә нурғун адәмләр қулақ селип, униң кәң тарқилип кетидиғанлиғини ейтқан. Иккинчи мисалда у хуш хәвәрни хемиртуруч билән селиштурған. Бу мисал билән ейтмақчи болғини: хуш хәвәр кәң тарқилип, униңға қулақ салидиғанларниң һаятидики өзгиришләр бирдин көзгә көрүнмәслиги мүмкин. Шундақ қилип, Әйса хуш хәвәрниң чоқум мол нәтиҗә әкелидиғанлиғини көрсәткән.

17. Немә үчүн биз давамлиқ һармай-талмай вәз қилишимиз керәк?

¹⁷ Давамлиқ қизғин вәз қилиш үчүн, вәз хизмитимиз дунияниң җай-җайлиридики адәмләргә қандақ ярдәм бериватқанлиғи тоғрилиқ ойлинип турайли. Һәр жили миллионлиған адәмләр Муқәддәс китапни оқуп үгиниду вә Хатириләш мәрасимиға келиду. Шундақла йүз миңлиған адәм чөмдүрүлүштин өтүп, вәз қилишни башлайду. Хуш хәвәргә йәнә қанчә адәм қулақ салидиғанлиғини билмәймиз, лекин бир нәрсини ениқ билимиз: һазир Йәһва Худа чоң балаю апәт вақтида қутқузидиған зор бир топ халайиқни жиғиватиду (Вәһ. 7:9, 14). Һосул егиси Йәһва йәнә нурғун адәмләрниң һәқиқәтни қобул қилидиғанлиғини билиду. Шуңа һармай-талмай давамлиқ вәз қилайли.

18. Мәсиһниң әгәшкүчилири екәнлигимизни немә көрситиду?

¹⁸ Әйсаниң шагиртлири хуш хәвәрни қизғинлиқ билән вәз қилип кәлгән. Мәсилән, әлчиләрниң җасурлуқ билән сөзләватқанлиғини көргән хәлиқ уларниң «Әйса билән биллә болғанлиғиниму тонуди» (Әлч. 4:13). Бизму Устазимиз Әйса Мәсиһтәк бар күчимизни чиқирип, җасурлуқ билән вәз қилишни халаймиз.