4-ТӘТҚИҚ МАҚАЛИСИ
149-НАХША Төләм үчүн миннәтдармиз
Төләмдин Йәһва Худа вә Әйса Мәсиһ тоғрилиқ немини билимиз?
«Тәңриниң меһир-муһәббити бизгә шуниңда көрүндики, Худа Оғли арқилиқ биз һаятлиққа еришишимиз үчүн, Өзиниң ялғуз Оғлини дунияға әвәтти» (ЙОҺ. 1-Х. 4:9).
АСАСИЙ ОЙ-ПИКИР
Төләм қурбанлиғи Йәһва Худа вә Әйса Мәсиһниң есил пәзиләтлирини көрситиду.
1. Немә үчүн һәр жили Хатириләш мәрасимиға қатнишишимиз муһим?
ТӨЛӘМ — Худа бәргән бебаһа соға! (Кор. 2-х. 9:15) Әйса Мәсиһ биз үчүн һаятини пида қилғанлиқтин, сиз Худаниң дости болалайсиз. Шундақла сизниң мәңгү яшаш үмүтиңиз пәйда болди. Йәһва Худа төләмни бизни яхши көргәнликтин бәргән (Рим. 5:8). Төләм биз үчүн аддий бир нәрсигә айланмай, бу соғини дайим қәдирлишимиз үчүн Әйса бизгә һәр жили униң өлүмини Хатириләш мәрасимиға қатнишишни буйриған (Луқа 22:19, 20).
2. Бу мақалидә немини муһакимә қилимиз?
2 Бийил Хатириләш мәрасими 12-апрель, шәнбә күни өткүзүлиду. Сөзсиз, бу мәрасимға һәммимиз қатнашмақчи. Хатириләш мәрасиминиң алдидики вә униңдин кейинки һәптиләрдә Йәһва Худа вә Униң Оғли биз үчүн қилған ишлири һәққидә чоңқур ойлинишимиз муһим. Бу мақалидә биз төләмдин Йәһва Худа вә Әйса Мәсиһ тоғрисида немиләрни билидиғанлиғимизни көрүп чиқимиз. Келәрки мақалидә төләмниң бизгә қандақ бәрикәтләрни әкелидиғанлиғи вә төләм үчүн миннәтдарлиғимизни қандақ көрситәләйдиғанлиғимизни билимиз.
ТӨЛӘМ БИЗГӘ ЙӘҺВА ТОҒРИСИДА НЕМИНИ ҮГИТИДУ?
3. Қандақ қилип бир адәмниң өлүми миллионлиған адәмләрни қутулдуруп қалатти? (Рәсимгиму қараң.)
3 Төләмдин биз Йәһваниң адаләтлик Худа екәнлигини билимиз (Қ. шәр. 32:4). Адәм ата Худаға бойсунмиғанда гунакар болуп, өлүп кәтти (Рим. 5:12). Биз униң әвлатлири болғачқа, бизму гуна қилимиз вә өлүмиз. Йәһва Худа бизни гуна вә өлүмдин қутқузуш мәхситидә Өз Оғлини биз үчүн төләм беришкә әвәткән. Амма пәқәтла бир мукәммәл адәмниң қурбанлиғи миллионлиған адәмләрни қандақ азат қилалайду? Әлчи Паул буни мундақ чүшәндүргән: «Бир инсанниң [Адәм атиниң] итаәтсизлиги нурғунлирини гунакар қилғинидәк, бир инсанниң [Әйса Мәсиһниң] итаәтчанлиғи нурғунлирини һәққаний қилиду» (Рим. 5:19; Тим. 1-х. 2:6). Башқичә ейтқанда, бир мукәммәл инсан Худаға бойсунмиғанлиғи үчүн һәммә инсанлар гуна вә өлүмниң қулиға айланған. Демәк, бизни бу қуллуқтин азат қилиш үчүн бир мукәммәл адәм Худаға бойсунуши керәк еди.
Бир адәмниң кесиридин биз гуна вә өлүмниң қуллириға айландуқ. Шуниңға охшаш, бир адәм бизни бу қуллуқтин қутқузалайду (3-абзацқа қараң)
4. Немә үчүн Йәһва Худа Адәм атиниң итаәтчан әвлатлириниң мәңгү яшишини мундақла рухсәт қилмиған?
4 Бизни қутулдуруш үчүн Әйса чоқум өлүши керәк едиму? Йәһва Худа Адәм атиниң итаәтчан әвлатлириниң мәңгү яшишиға мундақла рухсәт қилса болматтиму? Бу бизгә мәсилини һәл қилишниң әң яхши усули болуп көрүнүши мүмкин. Лекин бу адаләтсиз болатти. Чүнки адил Худайимиз Йәһва Адәм атиниң еғир гуна қилғанлиғи вә униң әвлатлири гунакар болуп қалғанлиғиға көз жуммайду.
5. Немишкә Йәһва Худаниң һәрқачан тоғра иш қилидиғанлиғиға ишәнчимиз камил?
5 Йәһва Худа Өз адалитидин атлап, Адәм атиниң мукәммәлсиз әвладиға мәңгү яшашни рухсәт қилса, немә болатти? Бәлким, шу чағда адәмләр Худаниң һәрдайим адил қарар чиқиридиғанлиғидин гуман қилатти. Мәсилән, биз Худаниң һәммә вәдилирини орунлайдиғанлиғиға толуқ ишинәлмәттуқ. Лекин Худадин гуман қилишқа һеч сәвәвимиз йоқ. Чүнки Йәһва Өзиниң адил Худа екәнлигини испатлиған. Буниң үчүн У әң жуқури һәқ төләп, Өзиниң сөйүмлүк Оғлини қурбанлиққа бәргән. Шуңа Униң һәрқачан тоғра иш қилидиғанлиғиға ишәнчимиз камил.
6. Йәһва Худани төләм беришкә йәнә қайси хисләт дәвәт қилди? (Йоһанниң 1-хети 4:9, 10)
6 Төләм Йәһваниң адил Худа екәнлигинила әмәс, Униң бизни қанчилик яхши көридиғанлиғиниму ениқ көрситиду (Йоһ. 3:16; Йоһанниң 1-хети 4:9, 10ни оқуң). Һә, Йәһва Худа бизниң мәңгү яшишимизни халайду. Лекин У төләмни бәргән йәнә бир мәхсити — бизни Өз аилисигә қайтуруш. Адәм ата гуна қилғанда, у Йәһваниң аилисидин қоғланған. Шуниң кесиридин һазир бизму Худаниң аилисидә әмәс. Бирақ төләмниң асасида Худаға ишинидиған вә бойсунидиған адәмләр күнләрниң бир күни Худаниң аилисигә қайтидин кирәләйду. Йәһва Худа төләмни бәргәнликтин, һәтта һазирниң өзидиму гуналиримиз кәчүрүлүп, биз Униң билән вә қериндашлиримиз билән дост болалаймиз. Һәқиқәтән, Худайимиз бизни чин дилидин яхши көриду! (Рим. 5:10, 11)
7. Әйсаниң азапланғанлиғи Йәһваниң бизни чин дилидин яхши көридиғанлиғини қандақ дәлилләйду?
7 Оғлиниң қийналғанлиғини көргәндә Худаниң көңли қаттиқ азапланған. Бу тоғрилиқ ойланғанда, Униң бизни қанчилик яхши көридиғанлиғини яхширақ чүшинәләймиз. Шәйтанниң ейтишичә, Худаниң һечбир хизмәтчиси қийинчилиқ вақтида Униңға садиқ қалмайду. Лекин Шәйтанниң ялғанчи екәнлигини испатлаш үчүн, Йәһва Худа Оғлиниң өлүмидин авал қаттиқ азап чекишигә йол бәргән (Аюп 2:1—5; Пет. 1-х. 2:21). Йәһва Худа дин рәһбәрлириниң Әйсани мәсхирә қилғанлиғиниму, әскәрләрниң уни рәһимсиз қамчилап, кейин түврүккә миқлап қойғанлиғиниму көрүп турған. Андин әзиз Оғлиниң азаплинип өлгәнлигини көргән (Мәт. 27:28—31, 39). Йәһва Худа буни һәрқандақ вақитта тохтиталатти. Мәсилән, дүшмәнләр «әгәр Худа униңдин хурсән болса, әнди уни қутқузсунчу» дегәндә, Йәһва дәл шундақ қилалатти (Мәт. 27:42, 43, ЙД). Амма Йәһва Худа мошу вәзийәткә арилашқан болса, төләм берилмәтти. Һечқандақ үмүтму болматти. Шуңа бизниң үмүтимиз болуши үчүн, Йәһва Худа Оғлиниң ахирқи нәпәси чиқмиғичә арилашмай чидап олтарди.
8. Оғлиниң азапланғанлиғини көргәндә Йәһваниң көңли ағриғанму? (Рәсимгиму қараң.)
8 Худаниң қудрәтлик болғанлиғи Униң туйғулири йоқ екәнлигини билдүрмәйду. У бизни Өзигә охшаш һис-туйғуларни көрситиш қабилийити билән яратқан. Демәк, Йәһва Худаниңму һис-туйғулири бар. Муқәддәс китапта адәмләрниң Худани рәнҗиткәнлиги вә көңлигә азар бәргәнлиги йезилған (Зәб. 78:40, 41). Ибраһим вә Исһақниң мисалини көрүп чиқайли. Худа Ибраһим пәйғәмбәргә ялғуз оғли Исһақни қурбанлиққа беришни буйриған (Ярит. 22:9—12; Ибр. 11:17—19). Ибраһим оғлини пичақ көтирип өлтүрәй дегәндә, жүриги қанчилик қан жиғлиғанлиғини тәсәввур қилип көрүң. Ундақта, адәмләрниң Әйсани қийнап, түврүккә миқлап өлтүргәнлигини көргәндә, Йәһва Худаниң жүриги қанчилик азапланғанлиғини ойлап көрүң («Уларниң етиқадидин үлгә елиңлар. Ибраһим, 2-қисим» (рус) намлиқ видеони көрүң.).
Оғлиниң азап чәккәнлигини көрүш Йәһва Худаниң көңлини бәк ағритқан (8-абзацқа қараң)
9. Римлиқларға 8:32, 38, 39-айәтләрдин Йәһваниң бизгә болған меһир-муһәббити тоғрилиқ немини биләләймиз?
9 Төләм йәнә бир һәқиқәтни ениқ көрситиду. Йәһваниң меһир-муһәббити һәтта әң йеқин достумиз яки туққинимизниң меһир-муһәббитидин ешип чүшиду (Римлиқларға 8:32, 38, 39ни оқуң). Худайимиз бизни һәтта өзүмиздинму қаттиқ яхши көриду. Сиз мәңгү яшашни халамсиз? Йәһва Худа буни сиздин бетәр халайду. Сиз гуналириңизниң кәчүрүлүшини халамсиз? Йәһва Худа буни сиздинму артуқ арзу қилиду. У сиздин пәқәт төләм үчүн миннәтдар болуп, ишәнч көрситишни вә Униңға бойсунушни сорайду. Һә, төләм қурбанлиғи — Йәһваниң бизгә болған меһир-муһәббитиниң тәңдашсиз испати. Йеңи дунияда болса, Униң меһир-муһәббитиниң техиму көп испатлирини көрүмиз (Вәз 3:11).
ТӨЛӘМДИН МӘСИҺ ТОҒРИЛИҚ НЕМИНИ БИЛИМИЗ?
10. а) Әйса өлүштин авал немә тоғрилиқ қаттиқ әнсиригән? ә) Әйса қайси мәнада Худаниң исмини ақлиған? («Әйсаниң нуқсансизлиғи Худаниң исмини ақлиған» намлиқ рамкиғиму қараң.)
10 Әйса һәммидин авал Атисиниң абройини ойлиған. (Йоһ. 14:31) Әйса өзиниң Худаға күпүрлүк қилған җинайәтчидәк әйиплинип, Атисиниң исмиға дағ кәлтүрүштин қаттиқ әнсиригән. Шуниң үчүн, у мундақ дуа қилған: «Әй, Ата, мүмкин болса, бу қәдәһни мениңдин нери қилғайсән» (Мәт. 26:39, ЙД). Лекин Әйса өлүмигичә садиқ қалғанлиқтин, у Шәйтанниң Йәһва Худа тоғрилиқ ейтқанлири ялған екәнлигини испатлиған.
11. Әйсаниң адәмләргә болған меһир-муһәббити немидин көрүнгән? (Йоһан 13:1)
11 Төләм Әйсаниң адәмләрни қаттиқ сөйидиғанлиғини көрситиду. У болупму өз әгәшкүчилирини яхши көриду (Пәнд н. 8:31; Йоһан 13:1ни оқуң). Мәсилән, Әйса йәрдики хизмитиниң қийин болуп, өзиниң азаплинип өлидиғанлиғини билсиму, адәмләрни яхши көргәнликтин, һәммини чидашқа тәйяр болған. Әйса вәз қилған, тәлим бәргән вә башқиларға ярдәм бәргән. У бу хизмәтни пәқәт борч дәп һесаплимиған. Һәтта өлидиған күни у әлчиләрниң путлирини жуйған вә уларға тәлим вә илһам-мәдәт бәргән (Йоһ. 13:12—15). У түврүккә миқлинип азаплиниватқандиму, йенидики җинайәтчигә үмүт беридиған сөзләрни ейтқан. Шундақла у Йоһанға аниси Мәрийәмгә ғәмхорлуқ қилишни тапшурған (Луқа 23:42, 43; Йоһ. 19:26, 27). Әйса адәмләрни чин дилидин яхши көридиғанлиғини пәқәт җенини пида қилиш арқилиқла әмәс, йәрдә яшиғанда уларға меһрибан муамилә қилиш арқилиқму көрсәткән.
12. Әйса Мәсиһ мошу күнгичә бизгә қандақ ярдәм қилип кәлмәктә?
12 Әйса һаятини «бир қетим» бәргән болсиму, у мошу кәмгичә биз үчүн нурғун ишларни қиливатиду (Рим. 6:10). Биз төләмниң толуқ пайдисини көрүшимиз үчүн, у көп күч вә вақит чиқириватиду. Мәсилән, һазир у Падиша, Баш роһаний вә җамаәтниң беши болуп хизмәт қилмақта (Кор. 1-х. 15:25; Әфәс. 5:23; Ибр. 2:17). Буниңдин башқа, униңға майланғанларни вә башқа қойларни жиғиш вәзиписи тапшурулған. Бу иш чоң балаю апәтниң ахириғичә давамлишидуa (Мәт. 25:32; Марк 13:27). Шундақла, у садиқ қул арқилиқ бизниң Йәһва Худаға садиқ хизмәт қилишимизға керәклик һәммә нәрсини бериватиду (Мәт. 24:45). Миң жиллиқ һөкүмранлиғи вақтидиму у бизгә давамлиқ ғәмхорлуқ қилиду. Растинла, Әйсаниң төләм қурбанлиғи — Йәһва Худаниң бизгә бәргән әң әҗайип соғиси.
ОҚУП-ҮГИНИШНИ ҺЕЧҚАЧАН ТОХТАТМАҢ
13. Йәһва Худа вә Әйса Мәсиһ бизни қанчилик яхши көридиғанлиғи тоғрилиқ чоңқур ойлиниш бизгә қандақ ярдәм бериду?
13 Йәһва Худа вә Әйса Мәсиһ биз үчүн қилған яхшилиқлири тоғрисида давамлиқ чоңқур ойлансақ, улар һәққидә дайим йеңи нәрсиләрни биливалимиз. Мәсилән, бийил Хатириләш мәрасимидин бурун яки униңдин кейинки һәптиләрдә Инҗилниң бир-икки китавини оқуп чиқишқа вақит чиқираламсиз? Бирдинла көп мәлумат оқушум керәк дәп ойлимаң. Униң орниға, алдиримай Йәһва Худа һәм Әйса Мәсиһни яхши көрүшкә дәвәт қилидиған сәвәпләрни издәң. Кейин болса, билгәнлириңизни башқиларға ейтип беришкә тиришиң.
14. Издиниш төләм вә башқа тәлимләр тоғрилиқ көпирәк билишкә қандақ ярдәм бериду? (Зәбур 119:97) (Рәсимгиму қараң.)
14 Һәқиқәтни билгиниңизгә нурғун жиллар болса, бәлким сиз: «Худаниң адалити, меһир-муһәббити вә төләм тоғрилиқ убдан билимәнғу, йеңи ой тепиш мүмкин әмәс»,— дәп ойлайдиғансиз. Әмәлийәттә, Муқәддәс китаптики һәқиқәтләрни һечқачан толуғи билән чүшинәлмәймиз. Биз дайим йеңи нәрсиләрни үгинип туримиз. Шуңа әдәбиятлиримизни чоңқур қезиң. Бәзи айәтләрни яхши чүшәнмисиңиз, издинип көрүң. Күн давамида ойлинип, өзүңиздин мундақ сорап көрүң: «Биливалғанлирим Йәһва Худа, Әйса Мәсиһ вә уларниң маңа көрсәткән меһир-муһәббити тоғрилиқ немә дәйду?» (Зәбур 119:97ни оқуң)
Һәқиқәттә нурғун жиллар болсақму, төләм үчүн миннәтдарлиғимизни давамлиқ ашуралаймиз (14-абзацқа қараң)
15. Немә үчүн Муқәддәс китаптин давамлиқ йеңи нәрсиләрни издишимиз керәк?
15 Муқәддәс китапни һәр қетим оқуп, тәтқиқ қилғанда, йеңи яки қизиқарлиқ бир ойни тапмисиңиз, хапа болмаң. Сизни қандақту бир мәнада алтун издигүчигә охшатса болиду. Алтун издигүчиләр мәйли қанчә саат, қанчә күн кәтмисун, тимақтәк алтунни тепиш үчүн тәр төкүп ишләйду. Чүнки улар үчүн алтунниң һәтта кичиккинә парчиси интайин қиммәтлик. Муқәддәс китаптики һәқиқәтләр алтундин нәқәдәр қиммәтбаһалиқ әмәсму? (Зәб. 119:127; Пәнд н. 8:10) Ундақта, һәр күни сәвир-тақәт билән Муқәддәс китапни оқуп, йеңи нәрсиләрни үгинишкә тиришиң (Зәб. 1:2).
16. Йәһва Худани вә Әйса Мәсиһни қандақ үлгә қилалаймиз?
16 Издиниш давамида биливалғанлиримни әмәлийәттә қандақ қоллансам болиду дәп ойлиниң. Мәсилән, Йәһва Худаға охшаш адаләтлик болушни халисиңиз, һәммисигә тәң қараң. Әйсаниң Атисиға вә башқиларға болған меһир-муһәббитини үлгә қилип, Йәһваниң исми үчүн азап чекишкә вә қериндашлириңизға җанпидалиқ билән ярдәм беришкә тәйяр болуң. Буниңдин башқа, Әйсадин үлгә елип, адәмләргә вәз қилиң. Шу чағда уларму Йәһва Худаниң инсанларға қилған яхшилиқлирини көрүп йетип, төләмгә ишәнч көрситәләйду.
17. Кейинки мақалидә немини көрүп чиқимиз?
17 Төләмниң мәнасини яхширақ чүшәнгәндә вә уни техиму қәдирлигәндә, Йәһва Худа вә Әйса Мәсиһкә болған меһир-муһәббитимиз техиму күчийиду. Буни көрүп, улар бизни техиму яхши көриду (Йоһ. 14:21; Яқуп 4:8). Келиңлар, Муқәддәс китап вә әдәбиятлиримизда төләм тоғрисида ейтилғанларни көпирәк үгинәйли. Кейинки мақалидин төләм бизгә қандақ пайда әкелидиғанлиғини вә Худаниң меһир-муһәббити үчүн миннәтдарлиғимизни көрситишниң бәзи усуллирини көрүп чиқимиз.
50-НАХША Худаниң меһир-муһәббәт үлгиси
a Әйсаниң Мәтта 24:31 вә Марк 13:27дики «таллиғанлирини. . . жиғивалиду» дегән сөзлири Паулниң Әфәсликләргә 1:10-айәттики асманда жиғиш тоғрилиқ сөзлиридин пәриқлиниду. Әлчи Паул Йәһва Худаниң Өз роһий оғуллирини таллап, уларни муқәддәс роһ билән майлайдиған вақит тоғрилиқ ейтқан. Әйса болса, чоң балаю апәт вақтидики йәрдә қалған майланғанлар асманға елинидиған вақит тоғрилиқ ейтқан.