Йәһваниң меһир-муһәббити қандақ бәрикәтләргә йол ачти?

1. Йәһва Худани хошал қилиш үчүн немә қилалаймиз?

ЙЕҚИН достуңизға бир чирайлиқ вә пайдилиқ соғини бәрдиңиз дәйли. Әгәр у соғиңизни бир йәргә селип қоюп, шу пети унтуп қалса, бәлким сиз хапа болуп қалаттиңиз. Лекин достуңиз соғиңизни пайдилинип, униң үчүн рәхмәт ейтса, сиз хошал болуп қалисиз. Бу мисалдин немини үгинимиз? Йәһва Худаму бизни яхши көргәнликтин, Өз Оғлини биз үчүн қурбан қилған. Биз Униң бу бебаһа соғисини қәдирлигәндә, У интайин хошал болиду (Йоһ. 3:16; Рим. 5:7, 8).

2. Бу мақалидә немиләрни муһакимә қилимиз?

² Лекин вақитниң өтүши билән биз төләмни бебаһа бир соға дәп қаримай кетишимиз мүмкин. Буни Худаниң соғисини көрүнмәйдиған бир йәргә селип қоюп, уни унтуп қелиш билән селиштурсақ болиду. Бундақ болуп қалмаслиғи үчүн, биз Йәһва Худа вә Әйса Мәсиһ биз үчүн қилған яхшилиқлири тоғрилиқ дайим ойлинип турушимиз муһим. Шундақ қилишимизға бу мақалә ярдәм берәләйду. Биз төләмниң һазир қандақ пайдисини көрүватқанлиғимизни вә келәчәктә төләм бизни қандақ бәрикәтләргә ериштүридиғанлиғини көрүп чиқимиз. Шундақла биз Йәһваниң меһир-муһәббити үчүн миннәтдар екәнлигимизни қандақ билдүрәләйдиғанлиғимизни көрүмиз. Биз буни болупму Хатириләш мәрасиминиң алдидики вә униңдин кейинки һәптиләрдә қандақ қилидиғанлиғимизни муһакимә қилимиз.

ТӨЛӘМДИН ҺАЗИР ҚАНДАҚ ПАЙДА КӨРҮВАТИМИЗ?

3. Бүгүнки күндә төләмниң қандақ пайдисини көрәләймиз?

³ Биз Мәсиһниң төләм қурбанлиғидин һазирниң өзидиму көп пайда еливатимиз. Мәсилән, төләмниң асасида Йәһва Худа гуналиримизни кәчүриду. У бизни кәчүрмисиму болатти, лекин У бизни Өзи халиғанлиқтин кәчүриду. Буниң үчүн интайин миннәтдар болған зәбур язғучиси: «Әй Йәһва, Сән меһрибан вә әпу қилишқа тәйярсән»,— дәп күйлигән (Зәб. 86:5; 103:3, 10—13, ЙД).

4. Йәһва Худа төләмни кимләр үчүн бәргән? (Луқа 5:32; Тимотийға 1-хәт 1:15)

⁴ Бәзи адәмләр «мән Худаниң кәчүрүмигә лайиқ әмәс» дәп ойлиши мүмкин. Растини ейтқанда, һечбир адәм лайиқ әмәс. Әлчи Паул буни чүшинип, өзи тоғрилиқ мундақ дегән: «Мән. . . әлчи дәп атилишқиму лайиқсиз». У давамлаштуруп: «Амма Рәббимниң мол меһирлиги түпәйлидин мән һазир силәр көрүватқан дәриҗигә йәттим»,— дегән (Кор. 1-х. 15:9, 10). Биз гуналиримизға товва қилғанда, Йәһва Худа бизни кәчүриду. Немә үчүн? Биз буниңға лайиқ болғанлиғимиз үчүн әмәс, У бизни қаттиқ яхши көргәнликтин. Әгәр өзүңизни налайиқ һис қилсиңиз, Йәһва Худаниң төләмни гунасиз адәмләр үчүн әмәс, бәлки товва қилған гунакарлар үчүн бәргәнлигини унтумаң (Луқа 5:32; Тимотийға 1-хәт 1:15ни оқуң).

5. Қилған хизмитимиз үчүн Йәһва Худа бизни кәчүрүши керәк дәп ойлаш немә үчүн натоғра? Чүшәндүрүп бериң.

⁵ Йәһва Худаға узун жиллар давамида хизмәт қилип кәлгән болсақму, қилған хизмитимиз үчүн У чоқум бизни кәчүрүши керәк дәп ойлимаслиғимиз зөрүр. Әлвәттә, У қилған хизмитимизни қәдирләйду (Ибр. 6:10). Худайимиз Оғлини хизмитимиз үчүн һәқ сүпитидә әмәс, бәлки соға сүпитидә бәргән. Қилған хизмитимиз үчүн биз Худаниң кәчүрүмигә яки алаһидә муамилисигә лайиқ дәп ойлаш натоғра. Ундақ ойлисақ, Мәсиһниң өлүми бекар болатти (Галатилиқларға 2:21ни селиштуруң).

6. Әлчи Паул немә үчүн Йәһва Худаға тәр төкүп хизмәт қилған?

⁶ Әлчи Паул өз күчи билән Худаниң рәһим-шәпқитигә еришәлмәйдиғанлиғини чүшәнгән. Ундақта, у Йәһва Худаға немә үчүн тәр төкүп хизмәт қилған? У буни Йәһваниң кәчүрүмигә лайиқ екәнлигини испатлаш үчүн әмәс, бәлки төләм үчүн қанчилик миннәтдар екәнлигини көрситиш үчүн қилған (Әфәс. 3:7). Паулға охшаш, бизму Йәһваниң кәчүрүмигә еришиш үчүн әмәс, бәлки Униңға миннәтдарлиғимизни көрситиш үчүн қизғин хизмәт қилимиз.

7. Төләмниң йәнә қандақ бәрикитигә еришиватимиз? (Римлиқларға 5:1; Яқуп 2:23)

⁷ Биз һазирниң өзидә төләмдин еливатқан йәнә бир бәрикәт — Йәһва Худа билән йеқин дост болалайдиғанлиғимизa. Өткән мақалидин көргинимиздәк, гунакар болғанлиқтин, һечбиримиз Худаниң дости болуп туғулмаймиз. Лекин төләмниң асасида биз Худа билән инақлиқта болуп, Униң дости болалаймиз (Римлиқларға 5:1; Яқуп 2:23ни оқуң).

8. Дуа қилиш шән-шәрипини немә үчүн қәдирлишимиз керәк?

⁸ Йәһва Худа билән дост болғанлиқтин, биз Униңға дуа қилалаймиз. Бу биз үчүн чоң бир соға. Худайимиз пәқәт хизмәтчилири җәм болуп ейтқан дуалиринила әмәс, һәрбиримизниң өз алдиға ейтқан дуалиримизниму тиңшайду. Дуа қилғанда биз ой-пикир вә көңүл хатирҗәмлигигә еришимиз. Лекин дуа қилишниң башқиму пайдиси бар. Худаға дуа қилғанда, Униң билән болған достлуқ риштимиз техиму күчийиду (Зәб. 65:2; Яқуп 4:8; Йоһ. 1-х. 5:14). Әйса Мәсиһ йәрдә яшиғанда пат-пат дуа қилип турған. Чүнки у Атисиниң дуалирини тиңшиғанлиғини вә дуа қилиш арқилиқ Униң билән болған мунасивити техиму мустәһкәм болидиғанлиғини билгән (Луқа 5:16). Төләм қурбанлиғиниң асасида биз Яратқучимиз билән дост болуп, һәтта Униңға дуа қилиш шән-шәрипигә ериштуқ.

КӘЛГҮСИДӘ ЕРИШИДИҒАН БӘРИКӘТЛӘР

9. Йәһваниң садиқ хизмәтчилири келәчәктә қандақ бәрикәтләргә еришиду?

⁹ Йәһваниң садиқ хизмәтчилири төләмниң пайдисини келәчәктиму көриду. Улар мәңгү һаятқа еришиду. Адәмләр әзәлдин өлүп келиватқанлиқтин, нурғун кишиләр мәңгү яшаш мүмкин әмәс дәп ойлайду. Лекин Йәһва Худаниң дәсләпки нийитигә мас, адәмләр мәңгү яшиши керәк еди. Әгәр Адәм ата гуна қилмиған болса, мәңгү һаят һечкимгә һазирқидәк чөчәк болуп көрүнмәтти. Һазир мәңгү яшайдиғанлиғимизни тәсәввур қилиш қийин болсиму, бизниң буниңға ишәнчимиз камил. Чүнки Йәһва Худа буни мүмкин қилиш үчүн әң жуқури һәқни, йәни әң сөйүмлүк Оғлиниң һаятини, қурбан қилған (Рим. 8:32).

10. Майланғанларниң вә башқа қойларниң қандақ үмүти бар?

¹⁰ Мәңгү һаятқа кәлгүсидә еришсәкму, Йәһва Худа у тоғрилиқ һазирдин башлап ойлинишимизни халайду. Майланғанлар Мәсиһ Әйса билән бирликтә йәрни башқуридиған вақитни төрт көзи билән күтмәктә (Вәһ. 20:6). Башқа қойлар болса, йәр йүзидики җәннәттә ағриқ вә қайғусиз яшайду (Вәһ. 21:3, 4). Әгәр сиз башқа қойларниң бири болсиңиз, йәрдә мәңгү яшаш үмүти майланғанларниң үмүтидин һеч кам әмәслигини унтумаң. Әксичә, Йәһва Худа адәмләрни мәңгү яшаш үчүн яратқан. Шуниң үчүн йәрдики һаятиңиз мәналиқ вә бәхитлик болидиғанлиғиға қилчиму гуман қилмаң.

11, 12. Биз җәннәттә еришидиған бәзи бәрикәтләрни тәсвирләп бериң. (Рәсимләргиму қараң.)

¹¹ Җәннәттики һаятниң қандақ болидиғанлиғини көз алдиңизға кәлтүрүп көрүң. Шу чағда сиз ағрип қалимән яки өлүп кетимән дәп әнсиримәйсиз (Йәшая 25:8; 33:24). Йәһва Худа һәрбир яхши арзуюңизни әмәлгә ашуриду. Сиз җәннәттә немә билән шуғуллинишни ойлап турамсиз? Һайванатларни тәтқиқ қилғуңиз келәмду? Йә болмиса, қандақту бир саз әсвапни челишни үгинәмсиз? Бәлким, сүрәт селишни үгинидиғансиз. Җәннәттә архитекторлар, қурулушчилар, деханлар керәк болиду. Тамақ етидиған, қурал-сайманларни ясайдиған, бағларни күтүп асрайдиған адәмләрму һаҗәт болиду (Йәшая 35:1; 65:21). Һаятимиз мәңгү болидиғанлиқтин, немини үгинимән десиңизму, вақит һәммисигә йетиду.

¹² Ойлап беқиң, җәннәттә биз тирилгән йеқинлиримизни қарши алғанда, хошаллиғимиз қин-қинимизға патмайду! (Әлч. 24:15) Буниңдин башқа, сан-санақсиз мәвҗудатларни тәтқиқ қилип, Яратқучимиз тоғрилиқ билимимиз техиму ашиду (Зәб. 104:24; Йәшая 11:9). Биз әнди гуна қилмайдиғанлиқтин, Йәһва Худаға пак виждан билән ибадәт қилалаймиз. Сиз «гуна билән вақитлиқ һөзүрлиниш» үчүн җәннәттики мәңгү һаяттин ваз кечәттиңизму? (Ибр. 11:25) Әлвәттә, яқ! Кәлгүсидики бәрикәтләр һазир ваз кечишкә тоғра келидиған һәрқандақ нәрсидин ешип чүшиду. Унтумаңки, йәрдики җәннәт дайим үмүт болуп қалмай, бир күни һәқиқәткә айлиниду. Худаниң чәксиз меһир-муһәббити Уни Өз Оғлини биз үчүн қурбан қилишқа дәвәт қилмиған болса, буниң һечқайсиси әмәлгә ашмас еди.

ЙӘҺВАНИҢ МЕҺИР-МУҺӘББИТИНИ ҚӘДИРЛӘЙДИҒАНЛИҒИҢИЗНИ КӨРСИТИҢ

13. Худаниң меһир-муһәббити үчүн миннәтдарлиғимизни қандақ көрситәләймиз? (Коринтлиқларға 2-хәт 6:1)

¹³ Йәһва Худаға төләм үчүн миннәтдар екәнлигимизни қандақ көрситәләймиз? Буниң үчүн Худаға хизмәт қилиш һаятимизда әң муһим орунда болуши керәк (Мәт. 6:33). Чүнки Әйса «яшаватқанлар әнди өзлири үчүн әмәс, бәлки улар үчүн өлүп тирилгән үчүн яшисун» дәп өлгән (Кор. 2-х. 5:15). Ундақта, Худаниң бизгә немә үчүн мол меһирлик көрсәткәнлигини әстин чиқармайли (Коринтлиқларға 2-хәт 6:1ни оқуң).

14. Йәһва Худаға ишинип, Униң көрсәтмилиригә бойсунидиғанлиғимизни қандақ көрситәләймиз?

¹⁴ Йәһва Худаға ишинип, көрсәтмилиригә бойсунсақ, Униң меһир-муһәббитини қәдирләйдиғанлиғимизни көрситимиз. Бу чиқарған қарарлиримиздин көрүниду. Мәсилән, алий мәктәптә оқуш-оқумаслиқни яки бирәр ишқа киришни қарар қилғанда, Йәһва Худа билән мәслиһәтлишишимиз керәк (Кор. 1-х. 10:31; Кор. 2-х. 5:7). Биз Йәһваниң көрсәтмилиригә қулақ салғанда, иш-һәрикәтлиримиздин Униңға ишинидиғанлиғимиз көрүниду. Бу болса, достлуқ риштимизни күчәйтиду. Нәтиҗидә, мәңгү яшаш үмүтимиз техиму мәһкәм болиду (Рим. 5:3—5; Яқуп 2:21, 22).

15. Хатириләш мәрасиминиң алдидики вә униңдин кейинки һәптиләрдә төләм үчүн миннәтдарлиғимизни қандақ көрситәләймиз?

¹⁵ Төләм үчүн миннәтдар екәнлигимизни йәнә қандақ көрситәләймиз? Хатириләш мәрасиминиң алдидики вә униңдин кейинки һәптиләрдә көпирәк вәз қилишқа бар күчимизни чиқиралаймиз. Хатириләш мәрасимиға өзүмиз қатнишиштин башқа, башқиларниму чақиришқа унтумайли (Тим. 1-х. 2:4). Уларға бу мәрасимниң қандақ өткүзүлидиғанлиғини чүшәндүрүп бериң. Мәсилән, уларға jw.org торбетимиздин «Әйса Мәсиһ немә үчүн өлди?» вә «Әйса пәйғәмбәрниң өлүмини хатириләш» дегән видеоларни көрсәтсиңиз болиду. Ақсақаллар, җамаәт учришишлириға келишни тохтатқан қериндашларни чақиришқа унтумаңлар. Йәһваниң йоқап кәткән қойлири җамаәткә қайтип кәлсә, асмандиму, йәрдиму қанчилик зор хошаллиқ болидиғанлиғини ойлап беқиң (Луқа 15:4—7). Хатириләш мәрасимида пәқәт бир-биримизнила әмәс, йеңидин кәлгәнләрни яки бираз вақит кәлмәй қойғанларниму қучақ йейип қарши алайли (Рим. 12:13).

16. Хатириләш мәрасиминиң алдидики вә униңдин кейинки һәптиләрдә көпирәк хизмәт қилишниң қандақ пайдиси бар?

¹⁶ Хатириләш мәрасиминиң алдидики вә униңдин кейинки һәптиләрдә көпирәк хизмәт қилаламсиз? Шундақ қилип, Йәһва Худа вә Әйса Мәсиһниң сиз үчүн қилған яхшилиқлири үчүн миннәтдар екәнлигиңизни көрситәләйсиз. Йәһва Худаға қанчилик көп хизмәт қилсақ, Униң қоллап-қувәтлишини шунчилик көп һис қилимиз. Нәтиҗидә, Униңға болған ишәнчимиз техиму мәһкәм болиду (Кор. 1-х. 3:9). Шундақла Хатириләш мәрасимиға мунасивәтлик айәтләрни оқуп чиқиң. Уларни «Муқәддәс язмиларни һәр күни тәтқиқ қилиш» китапчиси яки Иш дәптиридин тепишқа болиду. Бәлким, бәзи айәтләрни шәхсий үгиниш вақтида чоңқурирақ тәтқиқ қилишни халайдиғансиз.

17. Йәһва Худани немә хошал қилиду? («Йәһваниң муһәббити үчүн миннәтдарлиғиңизни көрситиң» дегән рамкиғиму қараң.)

¹⁷ Бу мақалидики нәсиһәтләрниң һәммисигә әмәл қилишқа мүмкинчилигиңиз болмиса, буни унтумаң: Йәһва Худа һечқачан хизмитиңизни башқиларниңки билән селиштурмайду. У сизниң Уни яхши көридиғанлиғиңизни билиду. Шундақла У төләм үчүн миннәтдар екәнлигиңизни көргәндә интайин хошал болиду (Сам. 1-яз. 16:7; Марк 12:41—44).

18. Биз Йәһва Худа вә Әйса Мәсиһкә немә үчүн миннәтдар?

¹⁸ Гуналириңизниң кәчүрүлүши, Йәһва Худа билән болған достлуғиңиз вә мәңгү һаятқа болған үмүт пәқәт төләмниң асасида мүмкин болди. Бу бәрикәтләргә Йәһва Худаниң меһир-муһәббити йол ачқан. Шуңа униң үчүн миннәтдар екәнлигимизни һәрдайим көрситәйли (Йоһ. 1-х. 4:19). Әйса Мәсиһкиму миннәтдарлиқ билдүрүшни унтумайли. У бизни өз җенидин артуқ яхши көрүп, биз үчүн һаятини пида қилған (Йоһ. 15:13).