Йәһва Худаниң қоли қисқа әмәс

1. Муса исраилларни Мисирдин елип чиққанда, униң Йәһва Худаға таянғанлиғи немидин көрүнди?

ИБРАНИЙЛАРҒА йезилған хәттә ишәнчиси мәһкәм болған адәмләрниң исимлири йезилған. Уларниң бири — Муса пәйғәмбәр (Ибр. 3:2—5; 11:23—25). Исраилларни Мисирдин елип чиққанда, Муса өз етиқадиниң қанчилик күчлүк екәнлигини көрсәткән. У пирәвн вә униң әскәрлиридин қорқмай, Йәһва Худаға тайинип, исраилларни Қизил деңиздин өткүзүп, кейин чөл-баяванда йетәкләп жүргән (Ибр. 11:27—29). Исраилларниң көпинчиси Йәһваниң уларға ғәмхорлуқ қилидиғанлиғиға гуман қилсиму, Муса пәйғәмбәр Худаниң уларни ташлап кәтмәйдиғанлиғиға толуғи билән ишәнгән. Йәһва Худа чөл-баяванда хәлқигә ичидиған суниму, йәйдиған тамақниму берип турғанa (Чиқ. 15:22—25; Зәб. 78:23—25).

2. Немә үчүн Худа Мусадин: «Йәһваниң қоли калтиму?»— дәп сориған? (Санлар 11:21—23)

² Мисирдин чиққандин кейин тәхминән бир жил өтүп, Муса гуманлинишқа башлиған. У Йәһваниң Өз вәдисини орунлайдиғанлиғиға ишинәлмигән. Муса Йәһва Худаниң чөл-баяванда миллионлиған адәмләр үчүн гөшни нәдин тапидиғанлиғини һеч чүшәнмигән. Шу чағда Йәһва униңдин: «Йәһваниң қоли калтиму?»— дәп сориған (Санлар 11:21—23ни оқуң). Бу йәрдики «Йәһваниң қоли» дегән ибарә Униң муқәддәс роһини, йәни иш-һәрикәт қилиш күчини билдүриду. Башқичә ейтқанда, У мундақ сориған: «Сениңчә, ейтқинимни қилишқа күчүм йәтмәмду?»

3. Немә үчүн Муса вә исраилларниң вақиәси биз үчүн пайдилиқ?

³ Йәһва Худа сизгә вә аилиңизгә ғәмхорлуқ қилалайдиғанлиғиға гуманланған вақтиңиз болғанму? Мәйли қандақ болсун, Муса вә исраилларниң вақиәси һәммимиз үчүн пайдилиқ. Һазир шу вақиәни тәпсилий көрүп чиқайли. Шундақла Йәһваниң қоли қисқа әмәс екәнлигигә ишәнчимизни мустәһкәмләйдиған Муқәддәс китаптики бәзи принципларни муһакимә қилайли.

МУСАДИН ВӘ ИСРАИЛЛАРДИН САВАҚ АЛАЙЛИ

4. Немә үчүн исраиллар Йәһваниң ғәмхорлуқ қилалайдиғанлиғиға гуман қилған?

⁴ Исраиллар Мисирдин чиққанда, улар билән «һәрхил хәлиқләрдин болған көпчилик» чиққан. Вәдә қилинған зиминға йетиш үчүн улар чөл-баяванда бираз вақит маңған (Чиқ. 12:38; Қ. шәр. 8:15). Башқа хәлиқләрдин чиққан адәмләр күндә маннини йейиштин ялиқип кәткән. Кейин уларниң наразилиқ билдүрүшигә исраилларму қошулған (Сан. 11:4—6). Улар Мисирда йегән тамақлирини сеғинишқа башлиған. Хәлиқ ғуңишип, Мусаға шикайәт қиливәргәнликтин, у хәлиқ сориған тамақни мән тепишим керәк дегән ойда болғанду (Сан. 11:13, 14).

5, 6. Башқа хәлиқләрдин чиққан адәмләр исраилларға қандақ тәсир қилғанлиғидин немини үгинәләймиз?

⁵ Башқа хәлиқләрдин чиққан адәмләр Йәһва Худаниң уларға қилған яхшилиқлирини қәдирлимигән вә исраиллар уларниң наразилиқ роһини жуқтурувалған. Миннәтдарлиқни билмәйдиған адәмләрниң арисида болсақ, бизму Йәһваниң ишлирини қәдирлимәй кетишимиз мүмкин. Биз өтмүштики һаятимизни сеғинишқа яки башқиларға көрәлмәслик қилишқа башлишимиз еһтимал. Амма һәрқандақ вәзийәттә шүкүр қилишни билсәк, бәхитлик болалаймиз.

⁶ Исраиллар Йәһваниң вәдисини есидә тутуши керәк еди. Улар Вәдә қилинған зиминға кәлгәндә, һечнемидин қисилмай яшатти. Лекин бу сөзләр чөл-баяванда әмәс, Вәдә қилинған зиминда орунлиниши керәк еди. Бизму бу дунияда қол йәткүзәлмигән нәрсиләр тоғрилиқ әмәс, йеңи дунияда Йәһва Худа бизни ериштүридиған мол бәрикәтләр вә ишәнчимизни күчәйтидиған айәтләр тоғрисида ойлинайли.

7. Йәһва бизгә дайим ярдәм берәләйдиғанлиғиға немишкә ишәнсәк болиду?

⁷ «Йәһваниң қоли калтиму?» Худа немә үчүн дәл шундақ соални қойған? Чүнки У Мусаниң икки нәрсә тоғрисида ойлинишини халиған: 1) Униң күчи чәксиз вә 2) хизмәтчилири мәйли қәйәрдә болсун, Худа уларға ярдәм берәләйду. Шуңа исраиллар қақас чөл-баяванда жүрсиму, Худа уларни гөш билән тойдуралатти. Йәһва күчлүк қолини көрситип яки сөзму-сөз «қолини созуп», хизмәтчилири қәйәрдә болмисун, уларға ярдәм берәләйдиғанлиғини көрсәткән (Зәб. 136:11, 12). Шуңа мәйли қандақ қийинчилиққа дуч келәйли, Йәһва Худа қолини созуп, бизгә ярдәм берәләйдиғанлиғиға гуман қилмайли (Зәб. 138:6, 7).

8. Исраилларниң хаталиғини қайтилимаслиқ үчүн немидин еһтиятчан болушимиз керәк? (Рәсимгиму қараң.)

⁸ Йәһва вәдә бәргәндәк, Өз хәлқигә һәддидин көп бөдүниләрни әвәткән. Лекин исраиллар Худаға рәхмәт ейтишниң орниға, ачкөзлүкни көрсәткән. Улар күн демәй, түн демәй тоймаслиқ билән бөдүниләрни тутқан. Йәһва «нәпси яман» хәлиққә ғәзәплинип, уларни җазалиған (Сан. 11:31—34). Бу вақиә бизни ойландуруп, биз ачкөзлүкниң тузиғиға чүшүп қелиштин сақлинишимиз керәк. Бай болсақму, гадай болсақму, һәрбиримиз Йәһва Худа вә Әйса Мәсиһ билән достлуғимизни күчәйтиш арқилиқ асманда байлиқни топлишимиз лазим. Шундақ қилсақ, Йәһваниң ғемимизни йәйдиғанлиғиға һеч гуман қилмаймиз (Мәт. 6:19, 20; Луқа 16:9).

9. Йәһва Худа бизни қоллап-қувәтләйдиғанлиғиға немә үчүн ишинәләймиз?

⁹ Йәһва Худа Өз хизмәтчилиригә ярдәм беришкә тәйяр. Бу һаятимизда һечқандақ қийинчилиқлар болмай, қосиғимиз тоқ, пулдин қисилмай яшайдиғанлиғимизни билдүрәмдуb?! Яқ. Лекин Худайимиз бизни һечқачан ташлимайду. Қандақ қийинчилиқларни баштин кәчүрсәкму, У бизгә яр-йөләк болуп, күч бериду. Биз Йәһва Худаға тайинидиғанлиғимизни 1) пулдин қисилғанда вә 2) қериғанда мени ким бақиду дәп әнсиригәндә көрситәләймиз.

ПУЛДИН ҚИСИЛҒАНДА

10. Биз қандақ ихтисадий қийинчилиқларға дуч келишимиз мүмкин?

¹⁰ Заман ахири йеқинлашқансири, ихтисадий әһвал техиму начарлишип кетиду дәп күтсәк болиду. Сәясий өзгиришләр, әскирий тоқунушлар, тәбиий апәтләр яки йеңи пандемияниң башлиниши сәвәвидин биз ишимиз, мал-мүлкимиз яки өйүмиздин айрилип қелишимиз мүмкин. Бәлким, җан беқиш үчүн йеңи иш тепишқа яки аилимиз билән башқа йәргә көчүп кетишкә мәҗбур болидиғандимиз. Шундақ вәзийәттә чиқарған қарарлиримиз Йәһва Худаға тайинидиғанлиғимизни қандақ көрситиду?

11. Пулдин қисилғанда немә қилсақ болиду? (Луқа 12:29—31)

¹¹ Ғәм-әндишилиримиз тоғрилиқ Йәһва Худаға ейтип бериш муһим (Пәнд н. 16:3). Худадин тоғра қарар чиқириш үчүн даналиқни вә «ғәм йейишни» тохтитиш үчүн хатирҗәмликни сораң (Луқа 12:29—31ни оқуң). Қолуңизда бариға шүкүр қилиш тоғрилиқ дуа қилиң (Тим. 1-х. 6:7, 8). Буниңдин башқа, әдәбиятлиримиздин ихтисадий қийинчилиқларни һәл қилиш тоғрилиқ мәлумат издәң. Нурғунлириға jw.org торбетидики бу мавзу тоғрилиқ видеолар билән мақалиләр ярдәм бәрди.

12. Аилә беқишқа бағлиқ қарар чиқиришқа қандақ соаллар ярдәм берәләйду?

¹² Бәзиләр аилисидин жирақ бир йәрдә ишләшкә келишиду. Бирақ кейин нурғунлири буниңға өкүнүп қалиду. Бирәр ишқа кириштин авал пәқәт маашини әмәс, униң Йәһва Худа билән болған мунасивитиңизгә қандақ тәсир қилидиғанлиғиниму ойлаң (Луқа 14:28). Мәсилән, «жирақ йәргә берип ишлисәм, бу ярим билән болған муамиләмгә қандақ тәсир қилиду? Учришишларға баралаймәнму? Вәз хизмитигә чиқалаймәнму? Етиқатдашлиримдин жирақлишип кәтмәймәнму?» дәп ойлинип көрүң. Балилириңиз бар болса, «балилиримдин жирақ кетип қалсам, уларни “Йәһва буйриғандәк, тәрбийиләңлар вә нәсиһәт бериңлар” дегән сөзләргә әмәл қилалаймәнму?» дәп ойлинип көрүшиңиз керәк (Әфәс. 6:4). Муқәддәс китаптики принципларни қәдирлимәйдиған уруқ-туққанлар вә достларниң ейтқанлири бойичә әмәс, Худаниң ейтқини бойичә қарар чиқириңc. Мәсилән, Азиядә яшайдиған Тони бурадиримиз бирнәччә қетим чәт әлдә ишләшкә чақирилған. Лекин у дуа қилип, аяли билән мәслиһәтләшкәндин кейин бу тәклипни рәт қилип, буниң орниға чиқимлирини азайтишқа қарар қилди. Тони мундақ дәйду: «Шундақ қарар чиқарғачқа, бирнәччә адәмгә Йәһвани тонуп билишкә ярдәм берәлидим. Балилиримизму Йәһва Худани интайин яхши көриду. Биз Мәтта 6:33тики сөзләргә әмәл қилсақ, Йәһваниң бизгә дайим ғәмхорлуқ қилидиғанлиғини чүшәндуқ».

ӘТИНИҢ ҒЕМИНИ ОЙЛИҒАНДА

13. Яшанған вақтимизда муһтаҗлиқта қалмаслиқ үчүн һазир немә қилалаймиз?

¹³ Яшанғанда өзүмни қандақ бақимән дәп әнсиришимиз мүмкин. Биз бу мәсилидиму Йәһва Худаға тайинидиғанлиғимизни көрситәләймиз. Муқәддәс китап бизни тиришчанлиқ билән әмгәк қилип, әтиниң ғемини алдин-ала ясашқа дәвәт қилиду (Пәнд н. 6:6—11). Шуңлашқа мүмкинчилигимиз болса, азирақ пул жиғип қойсақ яхши. Чүнки пулиңиз болса, қайсибир дәриҗидә көңлүңиз хатирҗәм болиду (Вәз 7:12). Бирақ пул һаятимиздики әң муһим нәрсә болуп кетишидин пәхәс болушимиз керәк.

14. Ибранийларға 13:5тики сөзләр әтиниң ғемини ойлап кәтмәсликкә қандақ ярдәм бериду?

¹⁴ Әйса мисал кәлтүрүп, мал-дуния топлашниң ахмақлиқ екәнлигини көрсәткән (Луқа 12:16—21). Биз әтә немә болидиғанлиғини, бешимизға қандақ күн чүшидиғанлиғини билмәймиз (Пәнд н. 23:4, 5; Яқуп 4:13—15). Әйса ейтқандәк, униң һәммә әгәшкүчилири мал-мүлкидин ваз кечишкә тәйяр болуши керәк (Луқа 14:33). Йәһудийәдә яшиған биринчи әсирдики Мәсиһ әгәшкүчилири барлиқ мүлкидин айрилишқа тәйяр болған (Ибр. 10:34). Бүгүнки күндиму нурғун қериндашлиримиз сәясәтни қоллимиғанлиқтин, мал-мүлкидин яки ишидин айрилип қалған (Вәһ. 13:16, 17). Улар Йәһваниң «Сени һәргиз қалдурмаймән һәм сени һечқачан ташлимаймән» дегән вәдисигә толуқ ишәнгән (Ибранийларға 13:5ни оқуң). Әлвәттә, яшинип қалғанда йетәрлик пулумиз болуши үчүн һазир қолумиздин келишичә һәрикәт қилимиз. Лекин күтүлмигән вәзийәтләр йүз бәрсә, Йәһва Худа бизгә ғәмхорлуқ қилидиғанлиғиға толуғи билән ишинимиз.

15. Мәсиһий ата-анилар балилардин немини күтүши вә немини күтмәслиги керәк? (Рәсимгиму қараң.)

¹⁵ Бәзи мәдәнийәтләрдә әр-аяллар яшинип қалғинимизда бизни бақсун дәп, балиларни туғиду. Лекин Муқәддәс китапта йезилғандәк, бала ата-анисини әмәс, ата-ана балисини қамдиши керәк (Кор. 2-х. 12:14). Әлвәттә, ата-анилар яшанған вақитта ярдәмгә муһтаҗ болуши мүмкин вә нурғун балилар ата-анисиға хошаллиқ билән ярдәм бериду (Тим. 1-х. 5:4). Бирақ Йәһваға хизмәт қилидиған ата-анилар балилиримиз бизни бақиду демәй, уларға Йәһваниң хизмәтчиси болушқа ярдәм бериштин хошаллиқ тапиду (Йоһ. 3-х. 4).

16. Келәчәктә балилири өзини беқиши үчүн ата-аниси немә қилалайду? (Әфәсликләргә 4:28)

¹⁶ Балилириңизға җан беқишни үгәткәндә, Йәһваға тайинишниң қанчилик муһим екәнлигини ейтип туруң. Буни өз үлгиңиз биләнму көрситишиңиз зөрүр. Балилириңизға әмгәк қилишниң муһимлиғини кичигидин үгитиң (Пәнд н. 29:21; Әфәсликләргә 4:28ни оқуң). Уларға мәктәптә яхши оқушқа ярдәм бериң. Балилириңизға мәктәптин кейин қандақ билим елишни қарар қилишқа ярдәм бәргәндә, шәхсий тәтқиқ қилип, Муқәддәс китап принциплириға мас һәрикәт қилиң. Шу чағда келәчәктә балилириңиз һәм өзини бақалайду, һәм қизғин вәз қилалайду, һәтта пионер болуп хизмәт қилалайду.

17. Немигә гуман қилмисақ болиду?

¹⁷ Йәһваниң садиқ хизмәтчилири буниңға ишәнсә болиду: Униң уларға ғәмхорлуқ қилишқа қудрити йетиду вә У буни халайду. Бу дунияниң ахири йеқинлашқансири, Йәһва Худаға болған ишәнчимиз техиму көп синилиду. Мәйли немә болсун, Йәһваниң бизгә һәрдайим ғәмхорлуқ қилидиғанлиғиға қилчиму гуман қилмайли. Қандақ вәзийәттә болмайли вә қәйәрдә жүрмәйли, Йәһва бизгә ярдәм қолини созалайду. Чүнки Худайимиз Йәһваниң қоли қисқа әмәс!