Худаға садиқ болған әр кишиләрниң вәсийәтлиридин үгинәйли

1. Биз яшанғанлардин немини үгинәләймиз?

ҺАЯТИМИЗДА дурус қарарларни чиқириш үчүн һәммимизгә мәслиһәтләр керәк. Шундақ мәслиһәтләрни ақсақаллардин яки роһий пишип йетилгән етиқатдашлардин тапалаймиз. Уларниң йеши биздин чоң болсиму, бәргән мәслиһәтлири бүгүнки күндә конирап кәтти дәп ойлимаслиғимиз керәк. Йәһва Худа бизниң яшанғанлардин үгинишимизни халайду. Улар бизгә қариғанда узағирақ яшиғанлиқтин, мол тәҗрибигә, чүшәнчигә вә даналиққа егә (Аюп 12:12).

2. Бу мақалидә немини қараштуримиз?

² Қедимқи заманда Йәһва Худа өзигә садиқ болған яшанғанлар арқилиқ хәлиқни илһамландуруп, уларға рәһбәрлик бәргән. Муса пәйғәмбәр, Давут падиша вә әлчи Йоһанниң мисаллирини қараштурайли. Уларниң яшиған вақитлири билән шараитлири һәртүрлүк болған. Улар һаятиниң ахирида яшларға даналиқ мәслиһәтләрни бәргән. Бу яшанған Худаға садиқ әр кишиләрниң һәрқайсиси Йәһва Худаға бойсунушниң муһим екәнлигини тәкитлигән. Йәһва Худа уларниң сөзлирини Муқәддәс китапқа яздурған. Биз яш болайли яки яшанған болайли, бу сөзләрдин һәммимиз көп нәрсиләрни үгинәләймиз (Рим. 15:4; Тим. 2-х. 3:16). Бу мақалидә яшанған әр кишиләрниң өлүминиң алдида ейтқан сөзлиридин қандақ савақ алалайдиғанлиғимизни қараштуримиз.

«ӨЗӘҢМУ ҺӘМ ӘВЛАДИҢМУ ЯШАЙДУ»

3. Муса пәйғәмбәр ким болуп хизмәт қилған?

³ Муса пәйғәмбәр Йәһва Худаға өмүр бойи бар вуҗуди билән хизмәт қилған. У пәйғәмбәр, сотчи, әскәр беши, тарихчи болуп хизмәт қилған. Муса мол тәҗрибигә егә киши болған. У исраиллиқларни Мисир қуллуғидин елип чиққанда, Йәһваниң көплигән мөҗүзилирини өз көзи билән көргән. У Муқәддәс китапниң дәсләпки бәш китавини, Зәбурниң 90-бабини язған. Шундақла Зәбурниң 91-бабини вә Аюп китавиниму язған болуши мүмкин.

4. Муса кимләрни илһамландурған?

⁴ 120 яшқа кәлгән Муса пәйғәмбәр көз жумушниң алдида пүткүл Исраил хәлқини жиғип, Йәһваниң уларға қилған яхшилиқлирини есигә салди. Көп жил бурун бәзи исраиллар Йәһваниң мөҗүзилирини өз көзлири билән көргән. Мәсилән, улар Худаниң мисирлиқларни қандақ җазалиғанлиғини көргән (Чиқ. 7:3, 4). Улар қақ йерилған Қизил деңизниң түви билән меңип өткән вә пирәвн билән әскәрлириниң кукум-талқан болғанлиғиниң гувачиси болған (Чиқ. 14:29—31). Улар чөл-баяванда жүргәндә, Йәһва Худа уларни хәвп-хәтәрдин сақлап ғәмхорлуқ қилған (Қ. шәр. 8:3, 4). Мана әнди, Исраил хәлқи Вәдә қилинған зиминға кириш алдида турмақта. Муса мошу ахирқи мүмкинчиликни пайдилинип уларға илһам бәргүси кәлдиa.

5. Исраиллар Қанун шәрһи 30:19, 20-айәттики Мусаниң сөзлирини аңлиғанда, келәчәккә мунасивәтлик немини чүшәнди?

⁵ Муса немә дегән? (Қанун шәрһи 30:19, 20ни оқуң). Исраил хәлқини гөзәл келәчәк күтүп туратти. Улар Вәдә қилинған зиминда Йәһва Худаниң бәрикити билән узақ өмүр сүрүши керәк еди. У йәрниң ашлиғи мол, гөзәл макан еди. Муса уларға: «Йәһва Тәңриң сән топлимиған байлиқларға толған өйләрни, сән таштин қазмиған қудуқларни, сән тикмигән үзүмзарлиқлар билән зәйтун дәрәқлирини бериду», — деди (Қ. шәр. 6:10, 11).

6. Немишкә Йәһва Худа исраил хәлқигә башқа хәлиқләрдин мәғлуп болушиға йол қойди?

⁶ Бирақ Муса уларға бир муһим нәрсини әскәртти. Шу ашлиғи мол йәрдә узақ һаят кәчүрүши үчүн, улар Йәһваниң қанунлириға бойсунуши керәк еди. Муса пәйғәмбәр уларни Йәһва Худани тиңшап, Униңға садиқ болуп қелиш арқилиқ «өмүрни таллавелишқа» дәвәт қилди. Амма исраил хәлқи Йәһва Худаға бойсунмиди. Шуниң үчүн Худа уларни асурийәликләрниң, кейин бабиллиқларниң қолиға берип, уларни тутқунға елип кетишигә йол қойди (Пад. 2-яз. 17:6—8, 13, 14; Тар. 2-яз. 36:15—17, 20).

7. Мусаниң ейтқан сөзлиридин немигә үгинимиз? (Рәсимгиму қараң.)

⁷ Биз өзүмизгә қандақ савақ алимиз? Әгәр Йәһва Худаға бойсунсақ, мәңгү яшалаймиз. Вәдә қилинған зиминниң босуғисида турған исраилларға охшаш, бизму Худаниң вәдә қилған йеңи дуниясиға кириш алдида туримиз. Шу вақитта йәр йүзи җәннәткә айлиниду (Йәшая 35:1; Луқа 23:43). Иблис билән униң җин-шәйтанлири болмайду (Вәһ. 20:2, 3). Инсанларни һәқиқий йолдин адаштуридиған сахта динму болмайду (Вәһ. 17:16). Әнди кишиләр һөкүмәтләрниң бесимидин хали болиду (Вәһ. 19:19, 20). Йәһва Худа җәннәттә һечкимниң исиян көтиришигә йол бәрмәйду (Зәб. 37:10, 11). Барлиқ йәрдә кишиләр Йәһваниң адил қануниға бойсунуп, инақ-иттипақ һаят кәчүриду (Йәшая 11:9). Шундақ қилип, һәммиси бир-бирини яхши көрүп, бир-биригә ишинидиған болиду. Бизни немә дегән гөзәл һаят күтүп турмақта! Буниңдин башқа, Йәһва Худаға бойсунсақ, йәр йүзидики җәннәттә йүз жилму, миң жилму әмәс, мәңгү һаят кәчүримиз (Зәб. 37:29; Йоһ. 3:16).

8. Бир миссионерға мәңгү һаят кәчүрүш үмүти қандақ ярдәм бәрди? (Йәһуда 20, 21)

⁸ Биз Йәһва Худаниң бәргән вәдиси тоғрисида чоңқур мулаһизә қилсақ, қандақла синаққа дуч кәлмәйли, Униңға бойсунуш асан болиду (Йәһуда 20, 21ни оқуң). Шундақла Худаниң бәргән бу вәдиси аҗизлиқлиримиз биләнму күришишкә күч бериду. Узақ жиллар давамида Африкида миссионер болуп хизмәт қиливатқан бир бурадәр аҗизлиқлири билән күрәшкән еди. У мундақ дәйду: «Әгәр мән Йәһва Худаға бойсунмисам, йәр йүзидики җәннәттә мәңгү яшалмаймән. Буни чүшәнгиним Йәһва Худаға ялвуруп дуа қилишқа вә қийинчилиқлирим билән күришишкә ярдәм бериду. Униң ярдими билән ахири аҗиз тәрәплиримни йеңип чиқтим».

«ПӘМ-ПАРАСӘТЛИК БОЛУСИЗ»

9. Давут падиша қандақ синақларни баштин кәчүргән?

⁹ Йәһва Худаға садиқ болған Давут падиша Униң хәлқигә һөкүмранлиқ қилған. У йәнә сазәндә, шаир, җәңчи вә пәйғәмбәр болған. У нурғун синақларни баштин кәчүргән еди. Бирнәччә жиллар давамида уни өлтүрмәкчи болған һәсәтхор Саул падишадин қечишқа мәҗбур болди. Давут падиша болғандин кейин униңға қайтидин қечишқа тоғра кәлди. Чүнки оғли Абшалом атисиниң тәхтини тартивелип, уни өлтүрмәкчи болди. Давут падишаниң һаятида нурғунлиған қийинчилиқлар болуп, өзиму җиддий хаталиқларни өткүзди. Шундақ болсиму, у һаятиниң ахириғичә Йәһва Худаға садиқ болуп қалди. Йәһва Худа Давут падишани «у қәлбимгә лайиқ адәм» дәп тәсвирләйду. Шуңа Давут падишаниң дана мәслиһәтлиригә қулақ селиш бәк муһим (Әлч. 13:22; Пад. 1-яз. 15:5).

10. Немишкә Сулайман атисиниң бәргән нәсиһитигә муһтаҗ болди?

¹⁰ Мәсилән, Давут падишаниң оғли вә тәхтиниң мирасхори болған Сулайманға бәргән нәсиһитини қараштурайли. Йәһва Худа Сулайманни ибадәтхана селиш үчүн таллавалди. Хәлиқ у йәрдә Йәһва Худаға ибадәт қилалатти (Тар. 1-яз. 22:5). Сулайманға Исраил хәлқини башқуруп, келәчәктә нурғунлиған ишларни қилиш үчүн Йәһва Худаниң ярдими керәк болған еди. Давут падиша униңға немә деди? Келиңлар қарап бақайли.

11. Падишалар 1-язма 2:2, 3-айәтләрдә Давут Сулайманға немә деди вә бу сөзләрниң растлиғи қандақ испатланди?

¹¹ Давут падиша немә дегән? (Падишалар 1-язма 2:2, 3ни оқуң). Давут падиша әгәр Сулайман Йәһва Худаға қулақ салса, у бәрикәткә еришип, яхши падиша болидиғанлиғини ейтқан. Нурғун жиллар давамида Йәһва Худа Сулайман падишаға һәр түрлүк йоллар билән ярдәм берип кәлгән (Тар. 1-яз. 29:23—25). У ғайәт зор ибадәтхана селип, Муқәддәс китапниң бирнәччә китаплирини язған. У һәм даналиғи, һәм байлиғи билән атақлиқ болған (Пад. 1-яз. 4:34). Амма Давут падиша оғлиға пәқәт Йәһва Худаға бойсунса, униң утуқлуқ болидиғанлиғини уқтурған. Әпсуски, Сулайман падиша яшинип қалғанда, сахта илаһларға сәҗдә қилишни башлиған. Шундақ қилип, Сулайман Йәһва Худаниң рәһим-шәпқитидин айрилди. Әнди Йәһва Худа униңға Исраил хәлқини меһрибанлиқ вә адаләтлик билән башқуруш үчүн йетәрлик даналиқ бәрмәйдиған болди (Пад. 1-яз. 11:9, 10; 12:4).

12. Давут падишаниң сөзидин немини үгинимиз?

¹² Биз өзүмизгә қандақ савақ алимиз? Йәһва Худаға бойсунсақ, У бизни бәрикәтләп, ярдәм бериду (Зәб. 1:1—3). Әлвәттә, Йәһва Худа бизниң Сулайманға охшаш бай вә шан-шөһрәтлик болидиғанлиғимизға вәдә бәрмигән. Әгәр биз Худаға бойсунсақ, У бизгә рәһбәрлик берип, тоғра қарарларни чиқиришқа даналиқ бериду (Пәнд н. 2:6, 7; Яқуп 1:5). Униң принциплири ишләш, билим елиш, көңүл көтүрүш, пулға тегишлик мәсилиләрдә тоғра қарарларни қобул қилишқа ярдәм бериду. Әгәр биз Худаниң бәргән мәслиһәтлирини ишләтсәк, Йәһва Худа билән болған достлуғимизни сақлап, мәңгүлүк һаятқа еришәләймиз (Пәнд н. 2:10, 11). Шундақла, бизниң яхши достлиримиз болиду. Йәһва Худаниң рәһбәрлигигә риайә қилсақ, аилимизму бәхитлик болиду.

13. Мувәппәқийәтлик һаятқа еришиш үчүн Карменға немә ярдәм бәрди?

¹³ Мозамбикта яшайдиған Кармен алий билим алса, мувәппәқийәткә еришиду дәп ойлиған. Шуңа, у алий мәктәптә архитектор кәспини оқушқа башлайду. У: «Мениң еливатқан билимим маңа қаттиқ яқатти»,— дәп язған. Кармен: «Амма оқуш мениң көп вақтим билән күчүмни алатти. Мән оқушта әтигәнлиги саат 7:30дин башлап, кәчқурун 18:00ғичә болаттим. Шу сәвәплик җамаәт учришишлириға бериш қийин болуп, Йәһва Худа билән болған мунасивитим аҗизлишишқа башлиди. Мән бир вақитта икки ғоҗайинға тәң хизмәт қилишқа тиришиватқанлиғимни чүшәндим» — дегән (Мәт. 6:24). У бу тоғрилиқ Йәһваға дуа қилип, бизниң әдәбиятлиримизни ишлитип, тәтқиқ қилди. Кармен: «Мән ақсақаллар вә апам билән мәслиһәтләшкәндин кейин алий мәктәпни ташлап, Йәһва Худаға толуқ вақитлиқ хизмәт қилишни қарар қилдим. Шундақ қилип, мән әң яхши һаятни таллиғинимға пушайман қилмаймән» — дегән.

14. Муса пәйғәмбәр вә Давут падиша башқиларға қандақ асасий ойни йәткүзүшни халиған?

¹⁴ Муса пәйғәмбәр билән Давут падиша Йәһва Худани яхши көрүп, Униңға бойсунушниң қанчилик муһим екәнлигини чүшәнгән. Улар һаятиниң ахирида башқиларни улардин үлгә елишқа вә Йәһва Худаға садиқ болуп қелишиға дәвәт қилған. Муса пәйғәмбәр билән Давут падиша Йәһва Худани ташлап кәтсәк, Униң рәһим-шәпқитидин айрилип, Йәһва Худа бәргән бәрикәтлиридин мәһрум қалидиғанлиғимизни әскәрткән. Уларниң бәргән мәслиһәтлири бүгүнки күндиму зор әһмийәткә егә. Йүзлигән жиллардин кейин яшиған Худаниң башқа бир хизмәтчисиму Йәһва Худаға садиқ болуп қелишниң нәқәдәр муһим екәнлигини чүшәндүргән.

ХОШАЛЛИҚҚА ЕРИШИМИЗ

15. Әлчи Йоһан немиләрни баштин кәчүргән?

¹⁵ Әлчи Йоһан Әйса Мәсиһниң йеқин дости болған (Мәт. 10:2; Йоһ. 19:26). У Әйса Мәсиһ билән көп хизмәт қилған вә униң ясиған мөҗүзилирини көргән. Қийин вәзийәтләрдә садиқ дости болуп қалған. Әлчи Йоһан Әйса Мәсиһниң өлтүрүлгәнлиги вә униң қайта тирилдүрүлгәнлигини көргән. У мәсиһийләр җамаитиниң өсүп, хуш хәвәрниң «асман астидики пүткүл мәвҗудатқа вәзә қилинғанлиғиниң» гувачиси болған (Кол. 1:23).

16. Әлчи Йоһанниң язған хәтлириниң пайдисини кимләр көрди?

¹⁶ Яшинип қалған әлчи Йоһан бизни бәк һаяҗанландуридиған Вәһий китавини йезиш шән-шәрипигә егә болған еди (Вәһ. 1:1). У йәнә Инҗилниң бир китавини язған. Униңдин сирт, әлчи Йоһан роһландурулған үч хәтни язған. У үчинчи хетини өз оғлидәк сөйидиған Гай исимлиқ мәсиһийгә әвәткән еди (Йоһ. 3-х. 1). Шу вақитта у нурғунлиған бурадәр-қериндашларни өзиниң роһий балилиридәк яхши көргән. Бу яшанған садиқ әр кишиниң язғанлири қедимий мәсиһийләрни қандақ илһамландурған болса, бизниму шундақ илһамландуриду.

17. Йоһанниң 3-хетиниң 4-айитигә асасән, һәқиқий хошаллиққа немә ериштүриду?

¹⁷ Әлчи Йоһан немә язди? (Йоһанниң 3-хети 4ни оқуң) У бурадәр-қериндашларниң Худаға бойсунғанлиғини көргәндә, өзиниң хошал болғанлиғи тоғрилиқ язған. Шу вақитта бәзи бир адәмләр сахта тәлиматларни тарқитип, җамаәтниң бөлгүнчилигигә сәвәпчи болған. Шундақ болсиму, башқилар һәқиқәт йолида меңишни давамлаштурған еди. Улар Йәһва Худаға бойсунуп, «шу әмирләргә әмәл қилишни» тохтатмиди (Йоһ. 2-х. 4, 6). Бу садиқ мәсиһийләр пәқәт әлчи Йоһанни хурсән қилмай, Йәһва Худаниму хошал қилди (Пәнд н. 27:11).

18. Йоһанниң сөзлиридин немигә үгинимиз?

¹⁸ Биз өзүмизгә қандақ савақ алимиз? Әгәр Йәһва Худаға садиқ болуп қалсақ, өзүмизму бәхитлик болуп, башқиларниму бәхитлик қилалаймиз (Йоһ. 1-х. 5:3). Мәсилән, Йәһва Худани хошал қилғанлиғимиздин, биз бәхитлик болумиз. У бизниң аздурулушларға қарши туруп, һәқиқәт йолида меңиватқанлиғимизни көрүп хурсән болиду (Пәнд н. 23:15). Асмандики пәриштиләрму бизгә қарап шат-хорам болиду (Луқа 15:10). Шундақла, биз бир-биримизниң садақәтмәнлигимизни, болупму синақларға, аздурулушларға тәқабил туруватқанлиғимизни көрүп хошал болумиз (Сал. 2-х. 1:4). Келәчәктә йоқ болидиған Шәйтанниң дуниясида Йәһва Худаға садиқ болуп қалғанлиғимизға шатлинимиз.

19. Рейчел қериндишимиз башқиларға һәқиқәтни үгитиш тоғрилиқ немә дәйду? (Рәсимгиму қараң.)

¹⁹ Биз башқиларға һәқиқәтни ейтқанда, чоң хошаллиққа чөмүмиз. Доминикан Җумһурийитидә яшайдиған Рейчел қериндишимиз башқиларға Худайимиз Йәһва тоғрилиқ үгитишни чоң шан-шәрәплик иш дәп һесаплайду. У бирнәччә адәмгә чөмдүрүштин өтүшкә ярдәм бәргәнлигини ойлап мундақ дәйду: «Уларниң Йәһва Худаға болған меһир-муһәббити, Униңға таянғанлиғини, Худани хошал қилиш үчүн һаятини өзгәрткәнлигини көргәндә, һис қилған хошаллиғимни сөз билән ипадиләш мүмкин әмәс. Бу хошаллиғим уларға тәлим бериш үчүн чиқарған күчүм билән қилған қурбанлиқлиримдин ешип чүшиду».

САДИҚ ӘР КИШИЛӘРНИҢ ВӘСИЙӘТЛИРИГӘ ӘМӘЛ ҚИЛАЙЛИ

20. Муса пәйғәмбәр, Давут падиша вә әлчи Йоһан билән қандақ охшаш тәрәплиримиз бар?

²⁰ Муса пәйғәмбәр, Давут падиша билән әлчи Йоһанниң яшиған вәзийәтлири бизниңкидин пәриқлиниду. Шундақ болсиму, бизниң улар билән охшаш тәрәплиримиз наһайити көп. Улар хизмәт қилған Худаға бизму хизмәт қилимиз. Бизму Йәһваға дуа қилип, Униңға тайинимиз вә рәһбәрлик сораймиз. Мошу садиқ кишиләргә охшаш Өзигә бойсунғанларни Йәһва Худа мол бәрикәтләйдиғанлиғиға бизниңму ишәнчимиз камил.

21. Муса пәйғәмбәр, Давут падиша, әлчи Йоһанға охшаш яшанғанларниң вәсийәтлиригә әмәл қилсақ, қандақ бәрикәтләргә еришәләймиз?

²¹ Шу әр кишиләрниң бизгә қалдурған вәсийәтлиригә қулақ селип, Йәһва Худаниң әмирлиригә бойсунайли. Шу чағда немә қилишимиздин қәтъийнәзәр, У һәрбир ишимизни бәрикәтләп, ярдәм бериду. Шундақла узақ яшап, мәңгү һаят кәчүрәләймиз (Қ. шәр. 30:20). Асмандики меһрибан Атимизни мәмнун қилғанлиғимизни билип, бизму хошал болумиз. Шундақла Йәһва Худаниң келәчәктә беридиған бәрикәтлири биз ойлиғандинму ешип чүшиду (Әфәс. 3:20).