Йәһва Худа дайим йенимизда

1, 2. а) Қийинчилиқларға дуч кәлгәндә ялғуз әмәс екәнлигимизгә немишкә ишинимиз? ә) Бу мақалидә немиләрни көрүп чиқимиз?

ЕҒИР қийинчилиқларға дуч кәлгәндә, өзүмизни боран-чапқунлуқ деңизда кичик бир қейиқта ялғуз үзүватқандәк һис қилишимиз мүмкин. Бирақ биз ялғуз әмәс, асмандики көйүмчан Атимиз һәммә қийинчилиқлиримизни көрүп, бизгә ярдәм беришни вәдә қилған. Йәһва Худа садиқ хизмәтчилиригә мундақ дегән: «Мән сени мустәһкәмләп, ярдәм беримән» (Йша 41:10).

² Бу мақалидә Йәһва Худа бизгә ярдәм беридиған төрт усулни көрүп чиқимиз: 1) Худа бизгә йол-йоруқ бериду, 2) ғәмхорлуқ қилиду, 3) бизни қоғдайду вә 4) бизгә тәсәлли бериду. Биз мәйли қандақ синақларға дуч кәлсәкму, Йәһва бизни һечқачан унтумайдиғанлиғиға ишәндүриду. У бизни һечқачан ташлимайду, шуңа биз өзүмизни ялғуз һис қилмаймиз.

ЙӘҺВА ХУДА БИЗГӘ ЙОЛ-ЙОРУҚ БЕРИДУ

3, 4. Йәһва Худа бизни қандақ йетәкләйду? (Зәбур 48:14)

³ Зәбур 48:14ни оқуң. Худайимиз Йәһва бизниң өзүмизни башқуралмайдиғанлиғимизни вә Униң йол-йоруғиға муһтаҗ екәнлигимизни убдан билиду. Ундақта, бүгүнки күндә Худа бизни қандақ йетәкләйду? Буниң бир йоли — У бизгә Муқәддәс китап арқилиқ йол-йоруқ бериду (Зәб. 119:105). Муқәддәс китапниң ярдими билән Йәһва Худа бизгә тоғра қарарларни чиқиришни, Униң ой-пикир қилиш тәрзини вә иш-һәрикәтлирини үлгә қилишни үгитиду. Йәһваниң нәсиһәтлиригә қулақ салсақ, биз һазирниң өзидә бәхитлик болуп, кәлгүсидә мәңгү яшалаймизa. Мәсилән, У бизни башқиларни кәчүрүп, адавәт сақлимаслиқни, һәммә ишларда растчил болушни вә башқиларни чин жүрәктин яхши көрүшни үгитиду (Зәб. 37:8; Ибр. 13:18; Пет. 1-х. 1:22). Буларға әмәл қилғанда, биз яхширақ ата-ана, яхширақ әр яки аял вә техиму яхши дост болалаймиз.

⁴ Шундақла Йәһва Худа Муқәддәс китапқа бизниңкигә охшаш қийинчилиқларни баштин кәчүргән адәмләрниң вақиәлирини яздурған (Кор. 1-х. 10:13; Яқуп 5:17). Биз бу адәмләрниң һаяти тоғрилиқ оқуғанда, униң кам дегәндә икки пайдисини көримиз. Биринчиси, биз өзүмизниң ялғуз әмәс екәнлигимизни чүшинимиз. Башқиларниңму бизниңкигә охшаш қийинчилиқлири болған вә Йәһва Худаниң ярдими билән улар бәрдашлиқ берәлигән (Пет. 1-х. 5:9). Иккинчиси, қийинчилиқларни хошаллиқ билән йеңишни үгинимиз (Рим. 15:4).

5. Йәһва Худа бизни кимләр арқилиқ йетәклиши мүмкин?

⁵ Буниңдин башқа, Йәһва Худа етиқатдашлар арқилиқму бизни йетәкләйдуb. Мәсилән, районға җавапкар ақсақаллар җамаәттикиләрни илһамландуруш үчүн дайим келип туриду. Улар ейтқан нутуқлар ишәнчимизни мустәһкәмләп, инақлиқни сақлишимизға ярдәм бериду (Әлч. 15:40—16:5). Ақсақалларму күч чиқирип, һәрбиримизниң Йәһва Худа билән достлуқ мунасивәттә болушимизға ярдәм бериду (Пет. 1-х. 5:2, 3). Ата-анилар болса, балилириға Йәһвани яхши көрүшни, дана қарарларни чиқиришни вә яхши адәтләрни риваҗландурушни үгитиду (Пәнд н. 22:6). Роһий җәһәттин йетилгән аял қериндашлар яш аялларға үлгә көрситип, уларға илһам-мәдәт вә әмәлий мәслиһәтләрни бериду (Тит. 2:3—5).

6. Йәһваниң мәслиһәтлиридин пайда елишимиз үчүн немә қилишимиз керәк?

⁶ Йәһва Худа бизгә тоғра қарарларни чиқиришимиз вә бәхитлик һаят кәчүрүшимиз үчүн керәклик мәслиһәтләрни бәргән. Лекин бу мәслиһәтләрниң пайдисини көрүш үчүн немә қилишимиз керәк? Пәнд-нәсиһәтләр 3:5, 6дә мундақ йезилған: «Пүткүл қәлбиң билән Йәһваға ишинип, өз әқлиңгә зади таянма». Шундақ қилғинимизда У бизни дурус йолға башлайду, йәни Худа бизниң нурғун қийинчилиқлардин нери турушимизға вә техиму бәхитлик һаят кәчүрүшимизгә ярдәм бериду. Биз көйүмчан Яратқучимизниң һәрбиримизни яхши билип, керәклик мәслиһәтләрни беридиғанлиғиға интайин миннәтдар! (Зәб. 32:8)

ЙӘҺВА ХУДА БИЗГӘ ҒӘМХОРЛУҚ ҚИЛИДУ

7. Йәһва Худа бизгә қандақларчә ғәмхорлуқ қилиду? (Филипиликләргә 4:19)

⁷ Филипиликләргә 4:19ни оқуң. Бизгә йол-йоруқ бериштин башқа, Йәһва Худа өзүмизни беқиш үчүн қилған әмгигимизниму бәрикәтләйду. Йемәк-ичмәк, кийим-кечәк сетивелиш вә яшайдиған җайни тепиш тоғрилиқ әнсирәш тәбиий нәрсә (Мәт. 6:33; Сал. 2-х. 3:12). Шундақ болсиму, Худайимиз Йәһва бизни булар тоғрилиқ һәддидин зиядә ғәм-әндишә қилмаслиққа дәвәт қилиду (Мәт. 6:25). Немә үчүн? Чүнки У садиқ хизмәтчилиригә: «Сени һечқачан ташлимаймән»,— дәп вәдә қилған (Мәт. 6:8; Ибр. 13:5). Биз Униң Өз сөзидә туруп, бизгә ғәмхорлуқ қилидиғанлиғиға қилчиму гуман қилмаймиз.

8. Йәһва Худа Давутқа қандақ ярдәм бәргән?

⁸ Йәһва Худаниң Давутқа қандақ ярдәм бәргәнлигини көрүп чиқайли. У Саул падишадин қечип жүргән қийин вақитларда, Йәһва Худа уни вә әскәрлирини керәклик һәммә нәрсиләр билән тәминлигән. Шу жиллар давамида Йәһваниң ғәмхорлуғи тоғрилиқ ойлинип Давут мундақ дегән: «Мән яш едим, әнди қеридим, лекин һәққаний қалдурулғанлиғини һәм униң балилириниң нан сориғанлиғини һәргиз көрмидим» (Зәб. 37:25). Бәлким, Давутқа охшаш сизму Йәһва Худаниң қийин вақитларда сизгә яки етиқатдашлириңизға ярдәм қолини сунғанлиғини өз көзиңиз билән көргәнсиз.

9. Йәһва Худа тәбиий апәт вақтида Өз хизмәтчилиригә қандақ ғәмхорлуқ қилиду? (Рәсимләргиму қараң.)

⁹ Шундақла Йәһва Худа Өз хизмәтчилиригә тәбиий апәт вақтидиму ғәмхорлуқ қилиду. Мәсилән, биринчи әсирдики ачарчилиқ вақтида җай-җайлардики етиқатдашлар муһтаҗлиқта болған қериндашлириға йемәкликләрни әвәткән (Әлч. 11:27—30; Рим. 15:25, 26). Бүгүнки күндиму Худаниң хизмәтчилири ярдәмгә муһтаҗ етиқатдашлириға тәйярлиқ билән ярдәмлишиду. Йәһва Худа Өз хизмәтчилирини тәбиий апәт йүз бәргән йәрләрдә яшайдиған етиқатдашлирини тамақ, су, кийим-кечәк вә дорилар билән тәминләшкә дәвәт қилиду. Қурулуш топлири вәйран болған өйләрни вә Ибадәт өйлирини қайта әслигә кәлтүриду. Буниңдин ташқири, Йәһва гувачилири өйидин яки йеқинидин айрилғанларға Муқәддәс китаптики айәтләрниң ярдими билән тәсәлли вә илһам-мәдәт беришкә алдирайдуc.

10, 11. Борисниң мисалидин немини үгәндиңиз?

¹⁰ Йәһва Худа Униңға хизмәт қилмайдиған кишиләрдинму Өз яхшилиғини айимайду. Бизму Йәһвадин үлгә елип, Гувачи әмәсләргиму ярдәм қолини сунуш мүмкинчиликлирини издәймиз (Гал. 6:10). Шундақ қилип, биз уларниң Йәһва Худа тоғрилиқ көпирәк билишигә ярдәм берәлишимиз мүмкин. Украинада яшайдиған Борис исимлиқ мәктәп мудириниң мисалини көрүп чиқайли. У Йәһва гувачиси болмисиму, Гувачи болған оқуғучиларға дайим меһрибанлиқ көрситип, уларниң көзқаришини һөрмәтлигән. Борис урушқа бағлиқ өзи яшиған йезидин кетип, дөләтниң бехәтәр җайиға көчүшни қарар қилғанда, қериндашлиримиз униңға ярдәм бәрди. Кейин Борис Хатириләш мәрасимиға қатнашти. Қериндашлиримизниң униңға қилған яхшилиқлири тоғрисида у мундақ деди: «Йәһва гувачилириға чин жүрәктин рәхмәт ейтқум келиду. Улар маңа көңүл бөлүп, еһтияҗлиримға ғәмхорлуқ қилди».

¹¹ Бизму меһрибан асмандики Атимизға охшаш, ярдәмгә муһтаҗ болғанларға, мәйли улар Гувачи болсун яки болмисун, меһир-муһәббәт көрситәләймиз (Луқа 6:31, 36). Биз адәмләргә көрсәткән меһир-муһәббитимиз уларни Мәсиһ әгәшкүчилири болушқа дәвәт қилиду дәп үмүт қилимиз (Пет. 1-х. 2:12). Лекин улар Йәһва Худаға хизмәт қилишни башлимисиму, биз уларға ярдәм бериштин хошаллиқ алимиз. Чүнки «елиштин көрә бериш бәхитлигирәк» (Әлч. 20:35).

ЙӘҺВА ХУДА БИЗНИ ҚОҒДАЙДУ

12. Йәһва Өз хәлқини қандақ қоғдашқа вәдә бәргән? (Зәбур 91:1, 2, 14)

¹² Зәбур 91:1, 2, 14ни оқуң. Бүгүнки күндә Йәһва Худа Өз хизмәтчилирини Униң билән болған достлуқ мунасивитини бузидиған һәрқандақ нәрсидин қоғдашқа вәдә бериду. Шуңа Шәйтан бизниң Худаға ибадәт қилишимизға һечқачан тосалғу қилалмайду (Йоһ. 17:15). Биз Йәһваниң Өз вәдисини орунлап, чоң балаю апәт вақтида ишәнчимизни мәһкәм сақлашқа ярдәм беридиғанлиғиға вә бизни қутқузидиғанлиғиға ишәнчимиз камил (Вәһ. 7:9, 14).

13. Йәһва Худа һәрбир хизмәтчисини қандақ қоғдайду?

¹³ Йәһва Худа һәрбир хизмәтчисини қандақ қоғдайду? У бизгә Өз Сөзи арқилиқ неминиң тоғра вә неминиң хата екәнлигини үгитиду (Ибр. 5:14). Биз Муқәддәс китаптин үгәнгәнлиримиз бойичә яшисақ, Худа билән болған мунасивитимизни қоғдаймиз вә бәхитлик һәм сағлам һаят кәчүрүшкә ярдәм беридиған яхши қарарларни чиқиримиз (Зәб. 91:4). Буниңдин башқа, Йәһва Худа бизни җамаәт арқилиқму қоғдайду (Йәшая 32:1, 2). Қериндашлиримиз Йәһвани яхши көрүп, Униңға бойсуниду. Шуңа улар билән җамаәт учришишлири, вәз хизмити вә олтиришларда вақит өткүзгинимиз яманлиқтин нери турушимизға ярдәм бериду (Пәнд н. 13:20).

14. а) Немә үчүн Худа бизни синақлардин һимайә қилмайду? ә) Зәбур 9:10 бизни немигә ишәндүриду? (Изаһәткиму қараң.)

¹⁴ Өтмүштә Йәһва Худа бәзи хизмәтчилирини зәхим яки өлүмдин һимайә қилған. Лекин У дайим шундақ қилмиған. Муқәддәс китапта һәрбир адәм күтүлмигән қийинчилиқларға дуч келиши мүмкин екәнлиги ейтилған (Вәз 9:11). Шундақла Шәйтанниң ялғанчи екәнлигини испатлаш үчүн, Худа айрим хизмәтчилириниң зиянкәшликкә учрап, һәтта өлүмгә кесилишигә йол қойған (Аюп 2:4—6; Мәт. 23:34). Бизму шундақ синақларға дуч кәлсәкчу? Гәрчә Йәһва Худа қийинчилиқлиримизни йоқ қилмисиму, У бизни һәргиз ташлимайдуd (Зәб. 9:10).

ЙӘҺВА ХУДА БИЗГӘ ТӘСӘЛЛИ БЕРИДУ

15. Худаниң Сөзи, дуа вә етиқатдашлиримиз бизгә қандақ тәсәлли бериду? (Коринтлиқларға 2-хәт 1:3, 4)

¹⁵ Коринтлиқларға 2-хәт 1:3, 4ни оқуң. Бәзидә биз ғәм-қайғуға дуч келишимиз яки тәшвишләргә берилишимиз мүмкин. Бәлким, сизму қийин әһвалда болуп, өзүңизни ялғуз һис қиливатқансиз? Сизни чүшинидиған бирси барму? Һә, Йәһва Худа сизни яхши чүшиниду. Буниңдин башқа, Яратқучимиз бизгә һәммә дәртлиримиздә тәсәлли бериватиду. Биз Йәһва Худаға қизғин дуа қилип, Униңға ич бағримизни төккәндә, У бизгә «һәрқандақ инсаний чүшиниктин үстүн туридиған» җан арамлиғини бериду (Флп. 4:6, 7). Йәнә биз Йәһваниң Муқәддәс китаптики сөзлирини оқуғанда илһам-мәдәт алимиз. Өз Сөзидә Йәһва Худа бизни қанчилик яхши көридиғанлиғини ейтиду, бизгә дана болушни үгитиду вә үмүт бериду. Шундақла биз җамаәт учришишлирида Муқәддәс китаптин үгәнгәнлиримиздин вә қериндашлиримиз билән арилишиштин тәсәлли тапимиз.

16. Нейтан билән Присцилланиң үлгисидин қандақ савақ алдиңиз?

¹⁶ Йәһваниң Өз Сөзи арқилиқ қандақларчә илһам-мәдәт вә тәсәлли беридиғанлиғини бир мисал көрситиду. Бирнәччә жил бурун Америкида яшайдиған Нейтан билән Присцилла вәз ейтқучилар аз болған җайға көчүп барди. Нейтан: «Йәһва Худа чиқарған қараримизни бәрикәтләйду дәп ишәндуқ»,— деди. Лекин улар шу йәргә көчүп барғандин кейин, күтүлмигән йәрдин саламәтлиги начарлишип, ихтисадий қийинчилиқларға дуч кәлди. Ахирида улар өйигә қайтишқа мәҗбур болуп, давамлиқ пулдин қисилди. Нейтан шу вақитни әсләп мундақ дәйду: «Худаниң бизгә немишкә ярдәм бәрмигәнлигини зади чүшәнмидим, мән бир хата ишни қилип қойдумму дәп әнсиридим». Лекин бираз вақиттин кейин Нейтан билән Присцилла Худаниң шу қийин вақитларда уларни ташлап кәтмигәнлигини чүшәнди. «Шу вақитларда Муқәддәс китап бизгә илһам вә йол-йоруқ беридиған дана достумизға айланди. Биз бар диққитимизни синақларға әмәс, Йәһва Худаниң бизгә қандақ ярдәм бәргәнлигигә қаритишқа тириштуқ. Бу бизни Йәһваниң келәчәктиму чоқум ярдәм беридиғанлиғиға ишәндүрди».

17. Йәһва Худа Хельга қериндишимизға қандақ тәсәлли бәргән? (Рәсимгиму қараң.)

¹⁷ Шундақла Йәһва Худа бизгә қериндашлиримиз арқилиқ тәсәлли берәләйду. Буни Венгриядә яшайдиған Хельга қериндишимизниң мисали көрситиду. Нурғун жиллар давамида, у қийинчилиқлардин баш көтәрмәй қалған. Кәйни-кәйнидин кәлгән синақлар сәвәвидин, у чүшкүнлүккә чүшүп, өзини әрзимәс һис қилған. Бирақ Йәһва Худа униңға җамаәттикиләр арқилиқ тәсәлли бәргән. Хельга мундақ дәйду: «Мән җапалиқ ишләп, ағриқчан баламға қаридим вә башқиму җапа-мәшәққәтләрдин яман қийнилип кәттим. Лекин шу пәйтләрдә Худайим мени һечқачан ялғуз қалдурмиған. Ахирқи 30 жил давамида Йәһва Худа һәр күни Өз вәдисидә туруп, маңа тәсәлли берип кәлгән. У мени башқиларниң иллиқ, меһрибан сөзлири арқилиқ күчләндүриду. Дәл керәк вақитта бирәр қериндаш мени махтап, иллиқ сөзләрни йезип әвәтәтти».

18. Биз башқиларға қандақ тәсәлли берәләймиз?

¹⁸ Бизму Худани үлгә қилип, башқиларға тәсәлли берәләймиз. Биз уларни зәң қоюп тиңшалаймиз, көңлигә арам беридиған сөзләрни ейталаймиз вә әмәлий ярдәм қилалаймиз (Пәнд н. 3:27). Биз азап чекиватқан һәммә кишиләргә, һазирчә Худаға хизмәт қилмайватқанларғиму тәсәлли беришкә тиришимиз. Башқилар бирәр қайғуға дуч кәлгәндә, еғир ағриқтин азапланғанда яки ғәм-тәшвишкә берилгәндә биз уларни йоқлап, зәң қоюп тиңшап, уларға Муқәддәс китаптин илһам беридиған айәтләрни оқуп бәрсәк яхши болиду. Биз «һәрқандақ тәсәллиниң Пәрвәрдигари» Йәһвани дорап, етиқатдашлиримизға еғир синақларда садиқ болуп қелишқа ярдәм берәләймиз. Буниңдин башқа, қилған яхшилиғимиз Худаға хизмәт қилмайдиғанларниму Униң тоғрилиқ көпирәк билишкә үндиши мүмкин (Мәт. 5:16).

ЙӘҺВА ҺӘРҚАЧАН БИЗГӘ ЯРДӘМ БЕРИШКӘ ТӘЙЯР

19. Йәһва Худа биз үчүн немә қилиду вә биз Униңдин қандақ үлгә алалаймиз?

¹⁹ Йәһва Худа Уни яхши көргән һәммә кишиләргә чин дилидин көйүниду. Биз қийинчилиқларға дуч кәлгәндә, У бизни һәргиз ташлимайду. Худди көйүмчан ата-ана балисиниң ғемини йегәндәк, Йәһва Худа садиқ хизмәтчилириниң ғемини йәйду. У бизгә йол-йоруқ бериду, ғәмхорлуқ қилиду, бизни қоғдайду вә тәсәлли бериду. Башқилар синақларға дуч кәлгәндә, уларға илһам-мәдәт берип, яр-йөләк болсақ, биз меһир-муһәббәтлик асмандики Атимизни үлгә қилимиз. Бу дунияда һәрбиримиз қийинчилиқларға вә ғәм-қайғуларға дуч келишимиз мүмкин. Лекин шуни билимизки, Йәһва Худа бизгә чоқум ярдәм бериду. Худайимиз: «Қорқма, чүнки Мән сениң билән»,— дәп ейтқан (Йәшая 41:10). Шуңа Йәһваниң дайим йенимизда болидиғанлиғиға ишәнчимиз камил.