1 Va Korindo
9 Ame hẽ si kuete elianjo? Ame hẽ siupostoloko? Sia muile hẽ Yesu Ñala yetu? Heneko hẽ vunima yupange wange vu Ñala? 2 Ndaño okuti komanu vakuavo siupostoloko, kokuene ndupostolo! Momo vu Ñala, ene muẽle wundimbukiso yange yupostolo.
3 Kuava va kasi oku ndi sombisa etambululo liange lieli: 4 Ka tu kuete hẽ omoko yoku lia loku nyua? 5 Ka tu kuete hẽ omoko yoku ambata ukãi* umue ukuetavo, ndeci ovapostolo vakuavo, la vamanji a Ñala kuenda Kefa?* 6 Ale ame lika la Barnaba okuti ka tu kuete omoko yoku liwekapo oku linga upange woku sanda eteku? 7 Esualali lipi li lifetela ovina viaye muẽle? Helie wa kũla ocumbo cayuva kuenje ka li epako liaco? Ungombo upi o lisa ocunda okuti ka nyui kasenjele ocunda caco?
8 Anga ñasi oku tukula ovina evi lovisimĩlo viomanu? Anga Ocihandeleko ka ci tukulavo ovina viaco? 9 Momo Vocihandeleko ca Mose mua sonehiwa citi: “Ku ka munihe omẽla wongombe osimbu yi sasa olomema.” Anga Suku wa ci popela muẽle olongombe? 10 Ale wa ci popela mekonda lietu? Eci ca sonehiwila mekonda lietu, momo omunu o lima lu o sasa, te o ci linga lelavoko lioku tambula onepa yimue.
11 Nda tua kũla vokuene ovina vi tunda ku Suku, ci linga hẽ cimue nda tu ungula vokuene ovina vietimba? 12 Nda omanu vakuavo va kuete omoko yaco vokuene, etu hẽ ka ca piãlele vali enene? Ka tua kuatele omoko yoku ci linga, pole, tua pandikisa kovina viosi oco ka tu ka tateke olondaka viwa viatiamẽla ku Kristu. 13 Ka wa kũlĩhĩli okuti ava va linga upange u kola va lia ovina vionembele kuenda vana va vumba vumba kowatale va tambula ovina viowatale? 14 Haico Ñala a handeleka ku vana va kunda olondaka viwa okuti va muila eteku kolondaka viwa.
15 Ame puãi, sia kuatele cimue covina evi. Pole, sia sonehele ovina viaco oco ci kale lame ndoco, momo kokuange hĩse oku fa okuti—umue oku njupa esunga lioku lipanda hacoko! 16 Nda ñasi oku kunda olondaka viwa, si kuete esunga lioku lipanda laco, momo ca ñundikiwa. Pole, ngongo yange nda si kundi olondaka viwa! 17 Nda ndi ci linga lutima wosi, ndi sanga onima; pole, ndaño si ci lingi lutima wosi haimo lumue, nda kundikiwa ocikele caco. 18 Oco onima yange nye? Eci ndi kunda olondaka viwa, ngeca olondaka viwa ocali, si ci lingila omo lioku kuata omoko yolondaka viwa.
19 Momo nda yovoka komanu vosi, nda linga upika womanu vosi okuti nganyala omanu valua. 20 Ku va Yudea nda linga lavo ndu Yudea okuti nganyala va Yudea; vakuacihandeleko nda linga lavo ndukuacihandeleko okuti nganyala vakuacihandeleko, ndaño ame siukuacihandelekoko. 21 Kuava ka va kuete ocihandeleko nda linga lavo ndu ka kuete ocihandeleko okuti nganyala ava ka va kuete ocihandeleko, hamomoko okuti si kuete ocihandeleko ca Suku, pole, ñasi kocihandeleko ca Kristu. 22 Kuava va hongua nda linga lavo ndu nda hongua okuti nganyala ava va hongua. Nda linga lomanu vosi ndukuavina viosi okuti ndi popela vamue. 23 Puãi ovina viosi ndi vi lingila olondaka viwa okuti, lamevo nambuilako esumũlũho.
24 Ka wa kũlĩhĩli okuti vakuakuyoloka vosi yavo va yoloka, pole, umosi lika o tambula onima? Oco yoloki okuti vu tambulavo onima. 25 Wosi iñila kolomapalo,* o lipokuisa kovina viosi. Kuenje va ci lingila oco va tambule ekolowa li nyõleha, etu puãi lieli ka li nyõleha. 26 Ame si yoloka loku tatãla; si yaki ndu o veta ño ofela; 27 pole, mbeta* etimba liange loku li pokuisa ndupika, oco okuti noke yoku kundila vakuetu, ame muẽle si pisiwa.*