Lavulula Otembo Kuenda Oku yi Tepisa Ciwa

NDAÑO okuti ocina ca velapo vali oku pitiya elongiso liwa, lopo o sukilavo oku lavulula otembo olohundo viove vi tumãla. Olohongele vietu via sokiyiwila oku fetika kuenda oku malusuiwa votembo ya sokiyiwa. Oco eci ci tẽliwe, ci sukila okuti vosi va kuete ovipama kohongele, va kapako otembo ya ilikiwila ovipama viavo.

Kosiahũlu, ocisimĩlo comanu catiamẽla kotembo ca litepele calua leci comanu vokolonepa vialua etaili. Poku tukula olowola, omanu va siataile oku popia cimue ca soka ndeci “[k]omẽle,” “ekumbi pongunji,” kuenda “kekumbi.” (Efet. 24:11; 43:16; 1 Olos. 18:26) Omo liaco, ka kua kale esakalalo lioku linga ovina votembo ya suapo. Kolonepa vimue violuali etaili, omanu va kuetevo ocisimĩlo cimuamue catiamẽla kotembo.

Ndaño okuti ocituwa cokocitumãlo ale oku linõlela kuomunu ku lingisa okuti o lipolapo kueci catiamẽla kotembo, oku lilongisa oku kapako ciwa otembo ci tu kuatisa calua. Eci okuti kuli valua va ilikiwila oku linga onepa kohongele yimue, ci sukila okuti omunu lomunu pokati kavo o kapako otembo ya ilikiwila ocipama caye. Onumbi ya linga hati “ovina viosi puãi vi sokiyiwe ciwa loku lingiwa lesumbilo” yi pondola oku kapiwako ciwa konepa eyi.​—1 Va Kor. 14:40.

Ndomo ku Yuvuiwa Oku Pitahãla Votembo ya Sokiyiwa. Ocina ca velapo oku lipongiya ciwa. Ndomo ca siata, olohundi vina vi kuete ekatanga lioku mãla olonepa viavo votembo ya sokiyiwa, ka via siatele oku li pongiya eci ci tẽla. Ovo pamue va kuete ocituwa coku li kolela enene. Ale pamue va lipongiya ño cina okuti otembo yoku linga onepa yavo yi kasi ocipepi. Oco omunu kaka pitahãle votembo ya sokiyiwa, ca tete o kuete oku sola onepa a ilikiwila kuenda oku likolisilako oku yi pongiya ciwa.

Anga hẽ va ku ĩha ocikele coku tanga? Tete pitulula oku tanga elilongiso 4 toke 7, okuti mua kongela oku vangula ciwa, atulo a sunguluka, etõliso lia sunguluka liondaka, kuenda oku tukula longusu ovisimĩlo via velapo. Noke, kapako olonumbi vi sangiwamo poku tanga lolukandi onepa wa ilikiwila. Lavulula otembo yove. Anga hẽ o sukila oku tanga lonjanga oco o mãle votembo ya sokiyiwa? Tanga lonjanga polonepa vina okuti eci ca sonehiwapo ka ci kuete esilivilo lialua. Pole, tanga levando kuenda tula tula poku tanga ovisimĩlo via velapo oco ece ongusu kokuavio. Poku lipongiya pitololamo olonjanja vialua. Osimbu wamamako oku mioñoloha koku vangula ciwa, cika leluka vali oku lavulula otembo yove.

Anga hẽ oka linga ohundo yina yoku kuama ño atosi amue a sonehiwa? Ka ci sukila oku soneha ño atosi alua, ale oku soneha cosi oka vangula oco o mãle votembo ya sokiyiwa. Eci wa talavaya velilongiso 25, ove wa lilongisa onjila yiwa yoku ci linga. Patekela atosi a-a atãlo: (1) Pongiya ocipama ciwa, pole ka ci kalue ño enene. (2) Kũlĩhĩsa ciwa atosi a velapo, pole kuka seteke oku patekela ovinimbu viaco viosi. (3) Soneha vopapelo yove yohundo otembo wa sokiyila oku ka lombolola onepa lonepa yohundo yove, ale otembo wa sokiyila oku ka pesila koku lombolola atosi amue. (4) Poku pongiya, kũlĩhĩsa atosi ana okuti nda otembo ya ku kambelako yitito, ci tava okuti o va tetamo. (5) Pitolola oku pongiya ndomo oka linga ohundo yove.

Ci kuete esilivilo liocili oku likisa ndomo oka linga ohundo yove. Poku ci linga, lavulula otembo ya sokiyiwila konepa lonepa yohundo yove. Osimbu o pongiya ohundo yove, linga amue apongoloko a sukiliwa. Pitolola vohundo yove olonjanja vialua toke eci o tẽla oku yi linga votembo ya sokiyiwa. Kuka kongelemo ño enene ovipama vialua. Supisako otembo yimue, momo oku lingila ohundo kovaso yowiñi ca siata oku ambata otembo yaluapo vali okuti otembo yoku pongiya ohundo yi sule.

Ndomo ku Tepisiwa Ciwa Otembo. Ci kuete elitokeko limue linene oku linga ohundo votembo ya sokiyiwa loku tepisila otembo yaco konepa lonepa yohundo. Otembo yaluapo vali yi kuete oku pesiwila koku lombolola eci ci kasi vokati kohundo, momo omo mu sangiwa atosi a velapo elilongiso. Olondaka vioku fetika vikuete oku ambata otembo yisoka ño koku tẽlisa ovimãho vitatu vi sangiwa kelilongiso 38. Handi vali, eci ci lomboluiwa vokati kohundo, ka ci kalue ño enene okuti ka ku supi otembo yoku sulako ciwa lohundo ndomo ca lomboluiwa kelilongiso 39.

Alikolisilo ove oku lavulula ciwa otembo, aka lingisa okuti ohundo yove yi mioñoloha vali ciwa kuenda oka lekisa esumbilo ku vakuẽle vana va kuetevo onepa kohongele. Handi vali, oka lekisavo esumbilo kekongelo liosi.