Ocipama 1
Elitokeko Kefendelo Kotembo Yetu Yilo Li Lomboloka Nye?
1, 2. (a) Nye ci kasi loku pita koloneke vietu? (b) Elavoko lipi li komohĩsa vakuotima wa sunguluka va kuete?
KOLUALI luosi kuli ocisoko cimue ciwa ci kuete ocimãho celitokeko kefendelo. Oco ci kasi oku kongela omanu vakualofeka viosi, vakuapata kuenda vakualimi osi. Pole va siata oku kongeliwa vanyamo osi. Ovo va tukuiwa Vembimbiliya okuti “Olombangi” via Yehova kuenda va tukuiwavo hati “owiñi wakahandangala.” Ovo va kasi oku vumba Suku “utanya luteke.” (Isaya 43:10-12; Esituluilo 7:9-15) Momo lie va cilingila? Momo ovo va limbuka okuti Yehova eye lika Suku yocili. Eci ci va vetiya oku endisa omuenyo wavo ndomo mu litava lolonjila viaye viasunguluka. Kuendavo, ovo va siata oku lilongisa okuti tu kasi “koloneke via sulako” violuali lulo luvĩ, okuti ndopo Suku oka lu nyõla, kuenda lu ka piñanyiwa lofeka yelau voluali luaye luo kaliye.—2 Timoteo 3:1-5, 13; 2 Petulu 3:10-13.
2 Embimbiliya li likuminya hati: “Okasimbu kaño handi kuenje ondingaĩvi ka yi kalapo . . . Ambombe puãi va piñala ofeka kuenje va sanjukila okusalala kualua.” (Osamo 37:10, 11) “Olondingesunga vi piñala ofeka, vi tungamo oloneke ka vi pui.” (Osamo 37:29) “[Suku] o[ka] puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalavo vali. Momo ovina viatete via pita.”—Esituluilo 21:4.
3. Ndamupi elitokeko liocili kefendelo li kasi oku tẽlisiwa?
3 Ava va kasi cilo oku kongeliwa kefendelo liocili, ovo vaka linga olonungi viatete violuali luokaliye. Ovo va siata oku lilongisa ocipango ca Suku kuenda va kasi loku ci linga vonepa yavelapo. Poku lekisa esilivilo eli, Yesu wa popia hati: “Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu u wa tuma.” (Yoano 17:3) Upostolo Yoano wa soneha hati: “Oluali lu takata loñeyi yaluo puãi u o lingainga ocipango ca Suku o kala oloneke ka vi pui.”— 1 Yoano 2:17.
Elomboloko Lialio
4. (a) Oku kongeliwa kuomanu valua velitokeko liefendelo kotembo yetu yilo ku lomboloka nye? (b) Ndamupi Embimbiliya li lombolola oku kongeliwa kuaco?
4 Oku kongeliwa kuomanu valua kefendelo liocili kotembo yetu ku lomboloka muẽle nye? Owu uvangi umue wocili u lekisa okuti tu kasi muẽle kesulilo lioluali lulo luvĩ, kuenda oluali luokaliye lua Suku lu kasi ocipepi. Etu tua siata oku mõla oku tẽlisiwa kuovitumasuku Viembimbiliya vi lekisa oku kongeliwa oku ku komohĩsa. Ocitumasuku cimue pokati kovitumasuku viaco ca popia hati: “Koloneke via sulako ci kala okuti omunda yonembele ya Yehova [evokiyo liefendelo liaye liocili] oyo yi lepa, olomunda viosi vikuavo vi sule. Koku lepa yi pitahãla oviwulu [afendelo añi añi] kuenje owiñi womanu wamẽla kokuayo. Kuenje olofeka via lua viya, vi popia, viti, ‘Enjui, tu lamani komunda ya Yehova konjo ya Suku ya Yakoba, oco a tu longise ovituwa viaye ha tu endela volonjila viaye.’”—Mika 4:1, 2; Osamo 37:34.
5, 6. (a) Momo lie ci kasilili ocili okuti olofeka viosi vi kasi oku iya ku Yehova? (b) Apulilo api etu muẽle tu kuete oku lipula?
5 Ndaño okuti kolofeka vimue kuli ava ka va yongola oku fendela Yehova, pole olohuluwa viomanu voluali luosi va kasi loku ci linga. Osimbu ovo va lilongisa eci catiamẽla kocipango co cisola locituwa ciwa ca Yehova Suku, ovitima viavo vi vetiyiwa calua. Ovo lumbombe va sanda oku kũlĩha eci Suku ayongola kokuavo okuti oco ovo va kuete oku linga. Olohutililo viavo via lisetahãla levi viu Kualosamo wa popia hati: “Ndongise oku linga ocipango cove momo ove Suku yange.”—Osamo 143:10.
6 Ocili okuti, koloneke vilo kuli owiñi wakahandangala u kasi loku kongeliwa kefendelo lia Yehova. Ove hẽ o va lete? O tava hẽ kueci wa siata oku lilongisa Vondaka ya Suku? Kuenda wa limbuka okuti Yehova eye Ono yaco? Toke petosi lipi oka “endaila volonjila viaye?”
Ndomo Elitokeko Kefendelo li Tẽliwa
7. (a) Toke petosi lipi elitokeko kefendelo lika tẽliwa? (b) Momo lie oku kala afendeli va Yehova cilo ocina cimue conjanga kuenda, ndamupi tu pondola oku kuatisa vakuetu oku cilinga?
7 Ocipango ca Suku ceci okuti omanu vosi va likuata omunga kefendelo liocili. Hesanjukuolio tuka kuata eci ovina viosi vi kasi lomuenyo vika likuata omunga koku fendela lika Suku yocili. (Osamo 103:19-22) Pole osimbu eteke liaco kalieyile, Yehova oka nyõla vosi vana va likala oku linga ocipango caye. Lohenda yalua, Yehova waeca elungulo lioku sapula eci eye aka linga, oco omanu kolonepa viosi vakuete epuluvi lioku pongolola ovilinga viavo. (Isaya 55:6, 7) Omo liaco, koloneke vietu, ‘olofeka viosi, apata osi, alimi añi añi osi, lomanu vosi,’ va kasi oku lalekiwa hati: “Sumbili Suku. U wihi ulamba, momo owola yaye yoku tetulula yeya. Fendeli u wa lulika ilu losi lokalunga kuenda olono viovava.” (Esituluilo 14:6, 7) Wa siata hẽ oku tava kelaleko eli? Omo liaco, kokuove esumũlũho limue oku laleka vakuene oku kũlĩha loku fendela Suku yocili.
8. Noke yoku lilongisa ovina viavelapo vio Vembimbiliya, oku amamako kupi ava va fetika ndopo va kuete oku linga?
8 Hanjongoleko ya Yehova oku fendeliwa lomanu va popia hati va kolela ko kuaye pole vamamako lolonjongole viavo muẽle. Suku oyongola okuti omanu veya ‘kukũlĩhĩso wocipango caye’ loku cilekisa vomuenyo wavo. (Va Kolosai 1:9, 10) Omo liaco tu panduilako omanu va siata oku lilongisa alongiso avelapo Embimbiliya kuenda va yongola oku kala Akristão valoñoloha. Onjongole yavo, oku kũlĩha vali ciwa Yehova oco va vokiye elomboloko Liondaka yaye lundongosi, loku yikapako vomuenyo wavo. Ovo va sanda oku sokolola kovituwa via Isietu wokilu, kuenda oku kũlĩhĩsa ovina eye asiata oku linga. Eci civa vetiya oku panga onepa kupange woku popela ovimuenyo, u kasi loku lingiwa voluali koloneke vilo. Eyi hẽ oyo vo onjongole yove?—Marko 13:10; Va Heveru 5:12–6:3.
9. Ndamupi ci tava okuti ku kala elitokeko liocili koloneke vilo?
9 Embimbiliya li lekisa okuti ava va vumba Yehova va kuete oku kala omanu va likuete omunga. (Va Efeso 4:1-3) Elitokeko liaco te li kalako muẽle cilo, ndaño okuti tu kasi voluali lumue lua litepa tepa kuenda tu liyaka lekambo lietu lioku lipua. Yesu wa likutilila lutima wosi oco olondonge viaye viosi vi kale vimuamue, poku kuata elitokeko liocili. Eci ci lomboloka nye? Ca tete, eci ci lomboloka okuti ovo va sesamẽla oku kuata ukamba uwa la Yehova kuenda Lomõlaye. Cavali, ci lomboloka okuti ovo va kuete oku likuata omunga omunu lukuavo. (Yoano 17:20, 21) Handi vali, ekongelo Liakristão li talavaya ndocisoko omu Yehova a va longisila ndomanu vaye.
Ovina Vipi vi Kuatisa Kelitokeko?
10. (a) Nye tu kuata eci omunu lomunu pokati ketu tu talavaya Lembimbiliya locimãho cokueca atambululo kapulilo a tu veta? (b) Kũlĩhĩsa ovina vi kuatisa kelitokeko lia Kristão poku tambulula apulilo a sangiwa vocinimbu eci.
10 Ovina epanduvali via velapo vi kuatisa kelitokeko liefendelo, vi sangiwa kovaso. Poku tambulula apulilo akuaĩmo, sokolola ndomo etosi letosi li tiamisiwila kukamba wove la Yehova kuenda la vakuene Akristão. Oku sokolola katosi ava loku tala ovipama Viembimbiliya via tukuiwa pole ka via lomboluiwile, cika ku kuatisa koku amamako kuove kukũlĩhĩso wa Suku, kovisimĩlo kuenda kolondunge okuti ovio ovituwa tu sukila vosi yetu. (Olosapo 5:1, 2; Va Filipoi 1:9-11) Kũlĩhĩsa atosi ava limue limue.
(1) Tua kũlĩha okuti, Yehova o kuete omoko yoku tumbika ovihandeleko viatiamẽla kueci ciwa leci cĩvi. “Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove.”— Olosapo 3:5, 6.
Momo lie tu kuetele oku sanda elungulo kuenda onumbi ya Yehova poku nõla cimue tu yongola oku linga? (Osamo 146:3-5; Isaya 48:17)
(2) Tu kuete Ondaka ya Suku oco yi tu songuile. “Eci wa tambuli ondaka ya Suku, yina wa yevi kokuetu, wa yi tambuli ndomo yi kasi ocili okuti, handaka yomanuko, puãi ondaka ya Suku, haiyo yi talavaya vovitima viene, ene wakuetavo.”—1 Va Tesalonike 2:13.
Ohele yipi yi kasiko eci tu linga ovina etu muẽle tu “sima” okuti via sunguluka? (Olosapo 14:12; Yeremiya 10:23, 24; 17:9)
Nda okuti ka tua kũlĩhĩle elungulo Liembimbiliya liatiamẽla kondaka yimue, nye tu kuete oku linga? (Olosapo 2:3-5; 2 Timoteo 3:16, 17)
(3) Vosi yetu tu kuatisiwa lesokiyo limuamue liokulia kuespiritu. “Omãla vove vosi va longisiwa la Yehova.” (Isa. 54:13) “Tu sokololi ndomo tu tẽla oku livetiya pokati oku kala locisola lovilinga viwa. Ka tu ka liweki oku ongoloka ndomo vamue va lingainga, puãi tu likuatisi pokati lalungulo, ca piãla vali omo vu lete okuti eteke liaco li kasi ocipepi.”—Va Heveru 10:24, 25.
Ovowa api eyilila kuava vopa esilivilo kasokiyo a Yehova okulia kuespiritu? (Isaya 65:13, 14)
(4) Yesu Kristu eye cime cetu, omunu ukuasitu hayeko. “Ko ka tukuiwi, vati, A Rambei, momo ulongisi wene umuamue, lene vosi wamanji. Ko ka tukuili omunu kilu lieve hoti, Isietu, momo Isiene umamue, o kasi kilu. Ko ka tukuiwi, vati, A cime, momo Cime cene umuamue, Kristu.”—Mateo 23:8-10.
Anga hẽ vamue pokati ketu ci tava oku sima okuti tua velapo vakuetu va sule? (Va Roma 3:23, 24; 12:3)
(5) Tua luluvalela Kusoma wa Suku okuti owo lika elavoko liomanu. Oco likutilili ndeci, hoti, ‘A Isietu o kasi kilu. Onduko yove yi sumbiwe. Usoma wove wiye. Ocipango cove ci lingiwe posi ndeci ci lingiwa kilu.’ “Puãi tete vanjiliyi usoma waye kuenda esunga liaye.”—Mateo 6:9, 10, 33.
Ndamupi oku ‘vanjiliya tete usoma’ ci tu kuatisa oku teyuila elitokeko lietu? (Mika 4:3; 1 Yoano 3:10-12)
(6) Espiritu sandu li kuatisa afendeli va Yehova oku kuata ovituwa vi sukiliwa kelitokeko Liakristão. “Puãi epako liespiritu lieli: ocisola, esanju, ombembua, epandi, unu, esunga, ekolelo, umbombe, esuluviko.”—Va Galatia 5:22, 23.
Nye tu sukila oku linga oco espiritu lia Suku li tu kuatise koku kuata epako liaye? (Ovilinga 5:32)
Ndamupi espiritu lia Suku lia siata oku tu vetiya kukamba wetu la vamanjetu Akristão? (Yoano 13:35; 1 Yoano 4:8, 20, 21)
(7) Afendeli vocili va Suku vosi va panga onepa koku kunda olondaka viwa Viusoma waye. “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.”—Mateo 24:14.
Nye ci kuete oku tu vetiya oku kuata onjongole yoku panga onepa ya velapo kupange woku kunda? (Mateo 22:37-39; Va Roma 10:10)
11. Eci tu kapako ocili Cembimbiliya komuenyo wetu, nye ciyililako?
11 Elitokeko koku fendela Yehova li tu kuatisa oku amẽla kokuaye kuenda li tu loñoluisa oku kuata esanju liwa koku livala kuetu ukamba la vamanjetu. Osamo 133:1 yiti: “Tali omo ciwa cimue, ca posoka muẽle, nda ava vasitue va tunga pamosi lombembua!” Hesanjukuolio oku sia oluali locipululu caluo cosi, levĩho, lungangala, kuenje tu likongela kuava va sole muẽle Yehova haivo va pokola kovihandeleko viaye!
Yuvula Olonepele
12. Momo lie tu kuetele oku yuvula ocituwa coku litumĩla?
12 Oco ka tu ka tondakase elitokeko lietu koluali luosi, tu kuete oku yuvula olonepele. Cimue pokati kovina viaco, ocituwa coku litumĩla ale coku lavisa Suku lovihandeleko viaye. Yehova o tu kuatisa oku yuvula ocituwa coku litumĩla, poku situlula usovoli waco, Satana Eliapu. (2 Va Korindo 4:4; Esituluilo 12:9) Satana eye wa vetiya Adama la Heva oku tomba eci Suku a va sapuilile loku nõla evi ka vi litava locipango ca Suku. Eci ceyililako, ohali kokuavo kuenda kokuetu. (Efetikilo 3:1-6, 17-19) Oluali lulo lueyuka ocituwa coku litumĩla okuti oku pokola ku Suku kuenda kovihandeleko viaye hacoko. Omo liaco tu sukila oku yuvula ocituwa caco.
13. Nye cika lekisa okuti ocili muẽle tua liangiliyila omuenyo voluali lua Suku luesunga?
13 Ndeci, kũlĩhĩsa ohuminyo yiwa ya Yehova yoku piñanya oluali lulo lũvi okuti lu kala ilu liokaliye longongo yokaliye “omu mu kala esunga.” (2 Petulu 3:13) Eci hẽ ka ci tu vetiya oku fetika oku liangiliya oco tu kale lomuenyo eci esunga lika viala? Eci ci lomboloka oku kapako elungulo liwa Liembimbiliya okuti: “Ko ka soli oluali pamue ovina vi kasi voluali. Nda omunu o sola oluali, ocisola ca Isia ka ci kasi vutima waye.” (1 Yoano 2:15) Omo liaco, tu yuvuli espiritu li kasiko voluali lulo, ocituwa coku litumĩla, evokiyo lioku lisola etu muẽle, evĩho kuenda ungangala. Tu kuati ocituwa coku yevelela Yehova loku u pokola lutima wetu wosi, ndaño lovisimĩlo vĩvi omo lietimba lietu ka lia lipuile. Ekalo liosi liomuenyo wetu liece uvangi okuti oku sokolola kuetu kuenda evetiyo lietu li songuiwa locipango ca Suku.—Osamo 40:8.
14. (a) Momo lie ca velelapo okupa esilivilo kapuluvi tu kuete cilo, oco tu lilongise olonjila via Yehova loku vi kuama vomuenyo wetu. (b) Ovisonehua via tukuiwa vocinimbu cilo, elomboloko lie vi kuete kokuetu?
14 Eci otembo ya sokiyiwa la Yehova yoku nyõla oluali lulo luevĩho la vosi va sole ekalo liaco yi pitilapo, eye kaka cilua. Eye kaka talamela, ndaño oku pongolola ovihandeleko viaye, oco a ece epuluvi limue kuava va amamako oku kakatela koluali, osimbu okuti nda va li sunguluisa la Suku, oku lilongisa ocipango caye. Yilo oyo otembo yoku ci linga! (Luka 13:23, 24; 17:32; 21:34-36) Hesanjukuolio lioku mõla owiñi wakahandangala okupa esilivilo kepuluvi eli liwa! Kuenda hesanjukuolio vakuate poku sanda onumbi Yehova a eca Vondaka yaye kuenda vocisoko caye, loku litokeka koku endela volonjila viaye vi loña voluali luokaliye! Omo liaco, nda tua lilongisa vali eci catiamẽla ku Yehova, tu ko sola calua kuenda tu kuata vali onjongole yoku u vumba.
Apulilo Voku Pitulula
• Cipi ocipango ca Yehova catiamẽla kefendelo?
• Noke yoku lilongisa alongiso a velapo Embimbiliya, oku amamako kupi tu kuete oku linga?
• Vosi yetu omunu lomunu tu kuete oku linga nye oco tu li tokeke la vakuetu koku fendela Yehova?
[Elitalatu kemẽla 4]
‘Ambombe va ka piñala ofeka, kuenje va sanjukila okusalala kulua’