“Vakuosuke Wovutima Va Sumũlũha”

ECI olonjila vi pasuka komẽle, vimba ovisungo vokuenda kuakukutu amue. Noke vienda koku sanda okulia. Koñolosi, eci vi tiuka, vimba vali ovisungo. Noke vienda povianju viavo oku pekela. Kuli otembo yimue okuti olonjila vimbila asala, noke vi totola omãla. Ovinyama vikuavo vi kuetevo ovituwa vimuamue.

Etu tumanu tu kuete ovituwa vialitepa. Momo ndaño okuti, tu lia, tu pekela, kuenda tu licita, pole, valua pokati ketu ka va sanjukila lika ovina evi. Etu tu yongolavo oku kũlĩha esunga lieci tu kasilili mulo voluali. Kuenda tu yongola oku kuata elomboloko liomuenyo wetu. Handi vali, tu yongolavo oku kũlĩha eci cikeya kovaso. Ovina evi vi lomboloka okuti, omanu va litepa lovinyama. Momo va lulikiwa lonjongole yoku kũlĩha ovina viespiritu.

Omanu va Lulikiwa Lesetahãlo Lia Suku

Embimbiliya li lombolola esunga lieci omunu a sukilila ovina viespiritu. Olio li popia hati: ‘Suku wa lulika omunu ukuesetahãlo liaye okuti, ulume lukãi.’ (Efetikilo 1:​27) Oku lulikiwa kuetu lesetahãlo lia Suku, ku lomboloka okuti, ndaño ka tua lipuile, tu pondola oku lekisa ovituwa ndevi via Suku. (Va Roma 5:​12) Tua lulikiwa luloño woku linga ovina vialua. Handi vali, tu kuetevo ovituwa vimue ndeci: Olondunge, esunga, kuenda onjongole yoku lekisa ocisola ku vakuetu. Tu kuete olondunge vioku sokolola ovina via pita konyima kuenda evi vi keya kovaso.​—⁠Olosapo 4:7; Ukundi 3:​1, 11; Mika 6:8; Yoano 13:34; 1 Yoano 4:⁠8.

Onjongole yetu yoku kũlĩha ovina viespiritu, yi limbukiwilavo kombili yetu yoku fendela Suku. Nda ka tua kuatele ukamba la Yehova, ka tu tẽla oku kuata esanju liocili. Yesu wa popia hati: “Vakuosuke wovutima va sumũlũha.” (Mateo 5:⁠3) Tu pondola oku kuata ukamba la Yehova poku kũlĩha ovihandeleko viaye kuenda ocipango caye catiamẽla koluali. Oco hẽ pi tu sanga ukũlĩhĩso waco? Tu u sanga Vembimbiliya.

“Ondaka Yove Oyo Ocili”

Upostolo Paulu wa popia hati: “Ovisonehua vi kola viosi ovitumasuku, kuenje vi silivila oku longisa, loku lungula, loku pindisa.” (2 Timoteo 3:​16) Olondaka via Paulu vi kuete elitokeko levi Yesu a popia eci a likutilila ku Yehova hati: “Ondaka yove oyo ocili.” Koloneke vilo, tua kũlĩha okuti, Embimbiliya Ondaka ya Suku. Omo liaco, tu sukila oku kũlĩhĩsa nda etavo lietu lovituwa vietu vi kuete elitokeko lolonumbi Viembimbiliya.​—⁠Yoano 17:⁠17.

Poku kũlĩhĩsa etavo lietu lovina vi kasi Vembimbiliya, ci tu kuatisa oku kuama ongangu yomanu voko Berea. Ovo va enda oku kũlĩhĩsa elongiso lia Paulu nda lia tunda muẽle Vembimbiliya. Luka ka pisile ocituwa comanu vaco. Pole wa va pandiya loku popia hati: “[Ovo] va yeva ondaka lombili kuenje, oloneke viosi, va tanga tanga ovisonehua oku kũlĩhĩsa nda hẽ ovina viaco viocili nda ndati.” (Ovilinga 17:​11) Koloneke vilo atavo esanda kuenda elongiso liatiamẽla kovituwa vĩvi, via livokiya calua. Omo liaco, tu sukila oku kuama ongangu Yakristão voko Berea.

Onjila yikuavo yoku limbuka ocili Condaka ya Suku, oku kũlĩhĩsa ndomo ya siata oku kuatisa omanu. (Mateo 7:​17) Oku pokola kolonumbi Viembimbiliya ku kuatisa ulume lukãi oku kala onjali yiwa. Kuenda kuecelela okuti epata li kuata esanju. Yesu wa popia hati: “Ava va yeva ondaka ya Suku kuenje va yi pokola ovo va sumũlũha.”​—⁠Luka 11:⁠28.

Olondaka via Yesu vi tu ivaluisa vina Yehova a sapuilile va Isareli hati: ‘Ame ndi Yehova Suku yove, hu longisa eci cu ku kuatisa, hu songuila vonjila ya sunguluka. Nda wa yevelile ovihandeleko viange, nda ombembua yove ya linga ndolui. Kuenda esunga liove nda lia linga ndakimba okalunga.’ (Isaya 48:​17, 18) Omanu vana va sole ohenda lesunga, va siata oku pokola kolonumbi evi.

Vamue ka va Tava Oku Yevelela

Suku wa ecelela okuti, va Isareli vana va sunguluka va yapuiwa lelongiso liatavo esanda. (Osamo 106:​35-​40) Etu tu sukilavo oku lunguka oco ka tuka wile valongiso aco. Catiamẽla Kakristão vesanda, Paulu wa popia hati: “Kuiya oloneke okuti omanu ka va tava kokulongisa kuocili, puãi, omo vakasi lovatui a yua, oco va liongoluila alongisi ndovipango viavo. Kuenje vopa ovatũi koku yevelela ovina viocili.”​—⁠2 Timoteo 4:​3, 4.

Ovitunda viatavo esanda via siata oku sanjuisa omanu poku ecelela ovituwa vĩvi ndeci: Oku lipekela kuomanu ka va tokekisile olohuela, oku lipekela kualume lalume, kuenda ovoholua. Embimbiliya li lombolola okuti, ava va ecelela ovituwa viaco la vana va siata oku vi linga, ‘ka vaka piñala Usoma wa Suku.’​—⁠1 Va  Korindo 6:​9, 10; Va Roma 1:​24-32.

Etu tu sukila oku pokola kolonumbi Viembimbiliya. Capiãla enene eci tu liyaka lelambalalo. Vocisoko ca Yehova, muli vamanji valua okuti kosimbu va kuatele ovituwa vĩvi ndeci: Oku sipa eliamba, ukahonga, oku ponda omanu, oku nyana kuenda uhembi. Pole, omo lioku pokola Kondaka ya Suku loku kuatisiwa lespiritu sandu, va siapo ovituwa viaco. Cilo, va kuãi onjila yi sanjuisa Yehova. (Va Kolosai 1:​9, 10; 1 Va  Korindo 6:​11) Omo lioku kuata ukamba la Yehova, cilo va kuete ombembua yovutima. Kuenje, va kuete elavoko lio kovaso.

Elavoko Liusoma

Embimbiliya li lombolola okuti, omanu vana va pokola ku Yehova vaka kuata ombembua ka yi pui Vusoma wa Suku. Yesu wa likutilila ku Yehova hati: “Usoma wove wiye. Ocipango cove ci lingiwe posi ndeci ci lingiwa kilu.” (Mateo 6:​10) Usoma wa Suku owo lika u pondola oku tẽlisa ocipango ca Yehova palo posi. Momo lie? Momo Usoma waco una u kasi peka lia Yesu Kristu, owo Yehova aka kemãlisa lawo uviali Waye voluali luosi.​—⁠Osamo 2:​7-12; Daniele 7:​13, 14.

Yesu okuti eye Osoma yuviali wokilu, oka yovola omanu kekandu kuenda kolofa tua piñala ku Adama. Elivulu Liesituluilo 21:​3, 4, li popia hati: “Tala, onjo ya Suku yi kasi pokati komanu. . . . [Yehova] o puenya asuẽlẽla osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.”

Voluali luokaliye, muka kala lika ombembua. Momo lie tu kuetele ekolelo liaco? Momo Elivulu lia Isaya 11:​9, li popia hati: ‘Ava va vaka piñala Usoma wa Suku, ka vaka linga cĩvi ndaño oku nyõla komunda yi kola ya Yehova. Momo kilu lieve kuka yuka ukũlĩhĩso wa Yehova ndeci ovava eyuka vokalunga.’ Omanu vosi vaka kala palo posi, vaka kuata ukũlĩhĩso wa Yehova. Kuenda vaka pokola lika kokuaye. Anga hẽ elavoko liaco ka li vetiya utima wove? Nda li ku vetiya, yilo oyo otembo yoku kuata ‘ukũlĩhĩso wa Yehova.’

Ove hẽ o Tava Oku Yevelela Kesapulo Liusoma?

Lekuatiso Liusoma, Yehova oka mãlako ovilinga viosi via Satana. Kuenje omanu oka va longisa lika olonjila viaye viesunga. Eci Yesu a kala palo posi, wa longisa ovina vialua viatiamẽla kusoma wa Suku. Eye wa popia hati: “Ñuete ocikundi coku kundila ondaka yiwa yusoma wa Suku vovaimbo akuavo, momo eci oco nda tumiwila.” (Luka 4:​43) Yesu wa tuma olondonge viaye oku kundila ku vakuavo esapulo liaco. (Mateo 28:​19, 20) Eye wa popia hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.” (Mateo 24:​14) Esulilo lioluali lulo li kasi ocipepi. Omo liaco, vakuavitima via sunguluka, va sukila oku yeva olondaka viwa oco va popeliwe.

Albert una wa tukuiwa vocipama catete, wa yeva esapulo Liusoma eci ukãi waye lomõla, va kala oku lilongisa Embimbiliya Lolombangi via Yehova. Poku fetika, Albert wa kuata atatahãi alua. Eteke limue wa pingile kocitunda cimue cetavo vimbo liavo oco a situlule uhembi Wolombangi via Yehova kukãi waye lomõlaye. Pole, ocitunda caco ka ca tavele oku ci linga. Omo liaco, Albert wa nõlapo oku yevelela osimbu epata liaye li kasi oku lilongisa. Momo wa yonguile oku kũlĩha nda Olombangi via Yehova vi kasi oku longisa ocili Condaka ya Suku. Eci va mãla oku lilongisa, Albert wa sola calua elilongiso liaco. Kuenje wa kuata onjongole yoku kũlĩha ovina vialua viatiamẽla kondaka yaco. Noke wa lombolola esunga lieci a pongoluila ocituwa caye cĩvi. Eye wa popia hati: ‘Eli olio esapulo liesanju nda kala oku sanda.’

Lekuatiso Liembimbiliya, Albert wa fetika oku kũlĩha ovina vialua viatiamẽla Kondaka ya Suku. Kuenda lalimue eteke a kuatele owesi. Embimbiliya lio kuatisa oku sanga eci a kala oku sanda komuenyo waye. Kuenje cilo wa kũlĩha ohuminyo ya Suku yokuti, voluali luokaliye ka muka kala vali evĩho lungangala. Kuenda o kuete elavoko liomuenyo ko pui. Ocili Cembimbiliya co kuatisavo oku sanga ombembua yo vutima. Ove hẽ o kasi oku tẽlisa onjongole yove yovina viespiritu? Sokiya otembo yoku konomuisa apulilo a kasi pokakasia kemẽla 6. Nda o yongola oku kuata elomboloko liasuapo liondaka ya Suku, sandiliya Olombangi via Yehova oco vi ku kuatise.

[Okakasia Lelitalatu kemẽla 6]

OVE HẼ O KASI OKU TẼLISA ONJONGOLE YOVE YOVINA VIESPIRITU?

Ove hẽ wa sanjukila ovina viespiritu o kasi oku lilongisa? Tu ku vetiya oku tanga loku kũlĩhĩsa apulilo akuãimo kuenda oku limbuka nda wa kũlĩha atambululo aco.

□ Suku helie? Onduko yaye helie?

□ Yesu Kristu helie? Momo lie a fila? Olofa viaye vi ku kuatisa ndati?

□ Eliapu li kasiko muẽle? Nda li kasiko, pi lia tunda?

□ Nye ci pita letu eci tu fa?

□ Cipi ocipango ca Suku loluali lulo kuenda omanu?

□ Usoma wa Suku u lomboloka nye?

□ Vipi olonumbi vimue via Suku viatiamẽla kovituwa?

□ Vepata Suku wa eca ocikele cipi kulume kuenda kukãi? Olonumbi vipi Viembimbiliya vi kuatisa oku nena esanju vepata?

Nda ku tẽla oku tambulula apulilo a lingiwa ndeti, pinga okalivulu losapi ya linga hati: Suku Oyongola Nye Kokuetu? Okalivulu kaco, ka sandekiwa Lolombangi via Yehova. Cilo ka pongoluiwa kueci ci panda 300 kalimi. Oko ka kuete eci ci soka 16 kovipama vi tambulula apulilo Embimbiliya a lingiwa ndeti.

[Elitalatu kemẽla 4]

Omanu va litepa lovinyama. Momo va kuete onjonjole yovina viespiritu

[Elitalatu kemẽla 5]

‘Vaka liongoluila alongisi ndovipango viavo.’ ​—⁠2 Timoteo 4:⁠3.

[Elitalatu kemẽla 7]

Usoma wa Suku u kasi peka lia Yesu, uka nena ombembua ka yi pui