Otuikanda Tuoku Laleka Omanu Oku Enda Konjivaluko Tueciwa Voluali Luosi!
1. Upange upi ulikasi u ka lingiwa voluali luosi eci handi eteke Lionjivaluko ka lia pitilile?
1 “Ci lingili onjivaluiso yange.” (Luka 22:19) Oco afendeli va Yehova va pokole kolondaka evi, keteke 30 kosãi Yelombo yunyamo ulo wo 2010, va ka liongolola oco va linge ocipito conjivaluko co ku fa kua Yesu. Oku upisa keteke 13 toke 30 yosãi Yelombo, voluali luosi mu ka lingiwa upange umue ulikasi woku laleka omanu oku enda kocipito Conjivaluko.
2. Nye tu sukila oku linga poku eca okokanda kelaleko?
2 Ndomo Kueciwa Otuikanda Tuoku Laleka: O pondola oku eca okokanda kelaleko komunu wa sanga konjo, oco a tale ociluvialuvia ci kasi koñoño yaco, noke u sapuila ndoco: “Keteke 30 kosãi Yelombo koñolosi, omanu valua voluali luosi va ka liongolola oco va ivaluke oku fa kua Yesu. Ndi yongola oku eca okokanda kalo kokuove kuenda kepata liove, oco u ka kali kocipito caco. Ci tava okuti, o lalekavo akamba vove.Tukula owola kuenda ocitumãlo ku ka lingiwila ocipito conjivaluko.” Nda otembo yecelela, ci tava oku tanga elivulu lia Luka 22:19, oco o lekise onumbi yi sangiwa Vembimbiliya. Omo okuti tu kuete otembo yitito yoku tokeka ocikanjo, ivaluka okuti, poku sapela lomanu tu teta onimbu.
3. Velie tu sukila oku laleka?
3 Nda ekongelo liene li kuete ocikanjo cinene, akulu vekongelo va pondola oku eca kokuove otuikanda tukuavo tuoku laleka, oco o tu ece komanu vana kua sangele konjo onjanja yatete. Nda ci tava, otuikanda tuoku laleka tueciwile kumosi lolorevista. Ku ka ivaleko oku laleka vana wa sapela lavo onjanja yatete, vana o longisa Embimbiliya, akamba vo kupange, akamba vo kosikola, vakuepata liove, vana o lisungue lavo, kuenda omanu vakuavo.
4. Ocisola Yehova a lekisa kokuetu coku eca ocisembi, ci tu vetiya oku linga nye?
4 Linga Esokiyo Lioku Vokiya Upange Wove: Otembo yocipito Conjivaluko, epuluvi limue liwa lioku vokiya upange wetu woku kunda. Anga hẽ, o pondola oku linga apongoloko kesokiyo liove oco o litumbike kupange wakundi vasokamo? O kuete hẽ, omãla, ale vana o longisa Embimbiliya okuti va kasi oku kula kespiritu? Nda o kuete, sapela lakulu vekongelo oco va kũlĩhĩsiwe nda ci tava oku linga akundi ka va papatisiwile okuti, va panga onepa kupange woku eca otuikanda tuoku laleka omanu. Ocisola Yehova a lekisa kokuetu coku eca ocisembi, ci tu vetiya oku kala pocipito Conjivaluko, kuenda oku laleka valua oco va kalevo pocipito caco.—Yoa. 3:16.