Oku Eciwa Kuotuikanda Tuelaleko Yonjivaluko ku Fetika Keteke 2 ya Kupupu
1. Eteke lipi tu ka eca otuikanda tuelaleko Lionjivaluko, kuenda upange waco u kuete esilivilo lie?
1 Oku upisa keteke 2 toke 17 yosãi ya Kupupu, tu ka eca otuikanda tuelaleko liocipito cimue ca velapo vunyamo, okuti Onjivaluko yolofa via Kristu. Vanyamo a pita, omanu valua va tava kelaleko liaco. Ndeci, keteke Lionjivaluko ukãi umue wa telefonalela kofiliale, loku popia hati: “Eci nda pitila konjo nda sanga okokanda kelaleko vemehi liepito liange. Ndi yongola oku enda, pole sia kũlĩhĩle elivala liaco.” Manji wo lomboluila apa pa sangiwa onumbi yaco vokokanda kelaleko. Ukãi wa malusula ombangulo loku likuminya hati, “Ame ngenda kocipito caco uteke ulo!”
2. Nye tu pondola oku popia poku eca okokanda kelaleko?
2 Ndomo tu Linga Upange Waco: Omo okuti tu kuete otembo yitito yoku talavaya vocikanjo cosi, tu sukila oku teta onimbu poku vangula. Citava oku popia ndoco: “Kalunga. Tu yongola oku eca kepata liove okokanda koku laleka omanu oku enda kocipito cimue ci kuete esilivilo ci ka lingiwa koluali luosi, Calumingu 17 ya Kupupu. [Eca okokanda kaco ku muẽleanjo.] Eteke eli, eteke lionjivaluko yolofa via Yesu. Ku ka lingiwa ohundo yimue yi ka lombolola ndomo tu kuatisiwa locisembi ca Kristu. Okokanda aka, ka lekisa ocitumãlo kuenda elivala liohongele yaco vimbo lietu.”
3. Tu laleka ndati omanu valua?
3 Nda ekongelo liene li kuete ocikanjo cinene, akulu vekongelo va pondola oku eca kokuove otuikanda tukuavo tuoku sia kolonjo vina kua sangele omanu, okuti ka tu muiwa lomanu vakuavo. Ku ka ivaleko oku laleka vana wa sapela lavo onjanja yatete, vakuepata liove, akamba vo kupange, akamba vo kosikola, kuenda omanu vakuavo. Poku talavaya kesulilo liosemana, nda otembo yecelela otuikanda tuaco tu eciwile kumosi lolorevista. O pondola hẽ oku talavaya ndukundi wa sokamo vokuenda kuosãi ya Kupupu loku vokiya upange wove woku kunda?
4. Momo lie tu sukilila oku kapako vana va tava kelaleko lioku kala kocipito Conjivaluko?
4 Ocili okuti vana va ka kala kocipito caco va ka tambula uvangi uwa! Ovo va ka limbuka ocisola ca velapo ca Yehova poku tu ĩha ocisembi. (Yoa. 3:16) Va ka lilongisa ndomo Usoma wa Suku u ka nena ekalo liwa komanu. (Isa. 65:21-23) Ovo va ka vetiyiwa oku sapela la vakuavo, kuenda oku pinga elilongiso Liembimbiliya, oco va vokiye ukũlĩhĩso wavo. Tu likutilila okuti vakuavitima via sunguluka va tava kelaleko lietu oco tu kale kumosi kocipito Conjivaluko!