Ovolandu

◼ Ko Australia: John, ndaño tunde vutila wa endaile konembele, pole noke wa tava “kelongiso liokuti ka kuli Suku.” Ukundi umue wotembo yosi wa eca kokuaye ombrochura losapi hati, A Vida—Teve um Criador? Noke kepaso likuavo wa eca kokuaye ombrochura losapi, A Origem da Vida. Ukundi wotembo yosi wa amamako oku vetiya ombili yaye poku u nenela olorevista viokaliye kuenda alivulu akuavo a lombolola ovina via lulikiwa ale ovitumasuku Viembimbiliya. Eci a limbuka okuti John wa kala oku lekisa onjongole, wa eca kokuaye elivulu losapi hati, A Bíblia—Palavra de Deus ou de Homem? Noke yoku li tanga, John wa limbuka okuti ocisimĩlo caye cokuti “ka kuli Suku, ca kala oku pongoloka.” Noke ukundi wotembo yosi wa fetika oku konomuisa la John elivulu losapi hati, Embimbiliya li Longisa, ocinimbu 8 kemẽla 20 kuenda ovinimbu 13-16 kamẽla 23-24. Ovisonehua via tukuiwa kovolandu aco, via vetiya calua John kuenje wa popia hati: “Pamue, ndi sukila oku sokiya epuluvi likuavo lioku konomuisa Embimbiliya.”

◼ Ko Mesiku: Ulume umue wa sapuila ukundi umue hati, ka tava okuti Embimbiliya lia tunda ku Suku. Ukundi wo lekisa ovolandu a lombolola okuti Embimbiliya lia tunda ku Suku. Noke yoku ­sapela olonjanja vialua, ulandu a kala oku lilongisa Vembimbiliya, via vetiya calua utima waye. Wa yeva esanju lialua eci a lilongisa olonumbi via Suku. Wa sapuila ukundi hati: “Kefetikilo eci ove lame tua tangela kumosi Embimbiliya, ca kala ndelungulo lielivulu limue kuenda ulandu waco ka wa mbetiyile. Pole cilo eci ndi tanga Embimbiliya, ca piãla enene alungulo atiamẽla kekalo liomuenyo, ci mbetiya calua.”

◼ Ko Estados Unidos: Poku talavaya kupange woku kunda, kovitumãlo ku sangiwa omanu valua, ohueli yimue ya vangula lukãi umue wo kofeka yo Taiwan, okuti o tava ku Suku pole wa kuata ocisimĩlo cokuti, Embimbiliya lia pangiwila lika omanu vo kolofeka Viokutundilo. Eye wa enda ocipepi lomesa pa kala alivulu omo okuti wa kala ndu a nyelelã ndaño wa kuatele esumulũho lioku kuata omuenyo. Ukãi waco wa kala lelavoko liokuti Embimbiliya liukuatisa oku kuata ocimãho komuenyo. Ohueli ya fetika oku tanga laye elivulu Embimbiliya li Longisa, lombrochura losapi hati, Como Ter Verdadeira Paz e Felicidade. Ovo va nõlapo oku lilongisa onepa yimue yombrochura losapi hati, “Um guia prático para beneficiar toda a humanidade” okuti, ka va lilongisile ocipama 2 celivulu. Noke yoku lilongisa ocinimbu 6 conepa yaco, ukãi loku komõha wa popia hati, Embimbiliya lialitepa lovolandu akuavo a sonehiwa atiamẽla ketavo. Noke yoku kũlĩhisa ovitumasuku Viembimbiliya via tẽlĩsiwa, eye wa popia hati: “Ka kuli elivulu likuavo liasuapo nda kũlĩha, okuti Embimbiliya lisule!”

◼ Ko Japão: Ndaño okuti omunu a sanga wa sapuila kukundi hati ka tava ku Suku, ukundi wa amamako oku linga apasu, loku konomuisa laye ovipama vio Despertai! losapi hati, “Teve um Projeto?” Vokuenda kuotembo ulume wa pongolola ovisimĩlo viaye kuenje wa fetika oku tava okuti, kuli Ululiki. Kaliye, eye o tava okuti kuli Suku kuenda ukundi o kasi oku lilongisa laye ombrochura losapi hati, Olondaka Viwa vi Tunda ku Suku!

◼ Ko Kanada: Manji umue ukãi, wa eca olorevista kukãi umue osimbu a kala oku tunda vonjo yaye, oku loña kekãlu liaye. Eci manji ukãi opasuisa, ukãi waco lonyeño yalua wo sapuila hati, ka kuete onjongole kuenda ka tava ku Suku. Manji ukãi ka liwekelepo oku u pasuisa pole, wo nenẽla ombrochura losapi hati, Como Ter uma Vida Satisfatória. Eci manji o sanga konjo yaye, wo sapuila hati, ndaño wa kũlĩhile okuti ukãi waco ka tava ku Suku, wo sokolola momo, wa kũlĩhile okuti o kasi oku tekula omãla lika liaye. Manji wa lekisa kukãi waco ocinimbu 6 kemẽla 4 liombrochura, ku lombolola oku ku sangiwa olonumbi viwa. Wo vetiya oku tanga ocipama 2 ci lombolola olonumbi viatiamẽla koku tekula omãla. Ukãi wa yeva esanju lialua eci a tambula ombrochura yaco.