“Sanjukila Yehova”
“Sanjukila Yehova, kuenje eye o ku iha evi [utima wove u] yongola.”—OSAMO 37:4.
1, 2. Helie Ono yesanju liocili kuenda ndamupi Soma Daviti a lekisa esilivilo lieci catiamẽla kondaka yaco?
EMBIMBILIYA li popia ndoco: “Vakuosuke wovutima va sumũlũha, ... vakuahenda va sumũlũha, ... [kuenda] ava va koka ombembua va sumũlũha.” Yesu poku fetika Ohundo yaye Yavelapo a lingila Komunda, wa lombolola atosi epandu a lekisa eci catiamẽla komanu vana va sumũlũha, ndomo ca lomboluiwa Vevanjeliu lia sonehiwa la Mateo. (Mateo 5:3-11) Olondaka via Yesu vi tu ĩha ekolelo liokuti, tu pondola oku kuata esanju liocili.
2 Osamo yimue ya sonehiwa la Soma Daviti wo ko Isareli yosimbu, yi lekisa okuti Yehova eye Ono yesanju liocili. Soma Daviti wa popia hati, “sanjukila Yehova, kuenje eye o ku iha evi [utima wove u] yongola.” (Osamo 37:4) Pole, nye ci pondola oku tu kuatisa oku kũlĩha Yehova kuenda eci catiamẽla kekalo liaye ‘lesanju’? Ndamupi ekonomuiso liovina Yehova a siata oku linga kuenda evi aka linga vali kotembo yokovaso poku tẽlisa ocipango caye, vi ku ĩha elavoko lioku tambula ‘ovina viosi utima wove u yongola’? Tu pondola oku sanga etambululo poku konomuisa lutate wocili Osamo 37 okupisa kocinimbu 1 toke 11.
“Ku ka Livele”
3, 4. Ndomo Osamo 37:1 yi lombolola, elungulo lipi Daviti a eca? Kuenda momo lie ca sungulukila oku pokola kelungulo liaco koloneke vilo?
3 Tu kasi ‘koloneke via sulako viohali yalua’ kuenda evĩho lia livokiya calua. Etu, tua siata oku limbuka oku tẽlisiwa kuolondaka viupostolo Paulu wa popia hati: “Omanu vãvi lolohembi vamamako loku linga [eci] cĩvi haivo va kemba kemba loku kembiwa.” (2 Timoteo 3:1, 13) Ca leluka calua oku yapuisiwa lolondingaĩvi vina vi molẽha soketi vi kasi oku litunda ciwa kovina viosi va kasi oku linga komuenyo wavo! Ovina viaco evi, vi pondola oku tu tateka oco tu tepulule onjongole yetu kovina viespiritu. Konomuisa ndomo olondaka viatete Viosamo 37 vi tu lungula kueci catiamẽla kohele yaco poku popia ndoco: “Ku ka lisakalaise mekonda liolondingaĩvi. Ku ka livele ava va linga evĩho.”
4 Vovikanda viasapulo vina vi sandekiwa oloneke viosi, mua siata oku sangiwa ovolandu alua atiamẽla kungangala. Uhembi kolomĩlu wa livokiya calua. Olomondi via siata oku amamako lelinga liavo vuyombeki kuenda ka via siatele oku kuatiwa oco vi tambule onima vi sesamẽla. Ovolandu osi ava atiamẽla koku lavisa esunga, a pondola oku wengula onyeño kuenda oku nyõla ombembua yetu yo vutima. Omo okuti olondingaĩvi vi molẽha soketi vi kasi oku litunda ciwa komuenyowavo, eci ca siata oku vetiya omanu oku livela ekalo liavo. Anga hẽ esumuo lietu lika ecelela okuti ka ku kala vali ekalo liaco lĩvi? Nda tua livela ekalo liolondingaĩvi, anga hẽ eci cika pongolola ekalo liavo liwa? Sio, hacoko! Etu ka tu sukila oku ‘sakalala.’ Momo lie?
5. Momo lie olondingaĩvi vi sokisiwila lowangu?
5 Ukualosamo wa tambulula hati: ‘Olondingaĩvi ndopo vika kukuta ndowangu wowuka, ndocisĩla ci talala.’ (Osamo 37:2) Owangu wokaliye u talala wa fina calua, pole noke wuvuka lonjanga kuenda u fa. Eci oco cika pita lolondingaĩvi. Ukuasi wavo ka uka kalako otembo yosi. Eci ovo va fa, ovokuasi avo ka a pondola oku va kuatisa. Omo liaco, omunu lomunu o lavoka oku tambula onima yeci esunga li kisika. Upostolo Paulu wa soneha ndoco: “Onima yekandu okufa.” (Va Roma 6:23) Olondingaĩvi viosi kumue lomanu vana okuti havakuesungako, vaka tambula “onima” yavo kuenda ka vaka kalako vali. Eyi onjila yimue ka ya sungulukile kekalo liomuenyo!—Osamo 37:35, 36; 49:16, 17.
6. Nye tu pondola oku lilongisila kolondaka Viosamo 37:2?
6 Anga hẽ etu tu ecelela okuti ekalo liwa liolondingaĩvi li tu sakalaisa? Tu pondola oku lilongisila kolondaka viovinimbu vivali viatete vielivulu Liosamo 37 vina vi popia ndoco: Ku ka ecelele okuti ekalo liwa liolondingaĩvi li ku yapuisa vonjila yove wa nõla yoku vumba Yehova. Pole, amamako lovimãho viove kovina viespiritu oco o tambule asumũlũho alua.—Olosapo 23:17.
“Kolela Yehova, Linga Esunga”
7. Momo lie tu sukilila oku kolela ku Yehova?
7 Ukualosamo o tu vetiya hati: “Kolela Yehova, linga esunga.” (Osamo 37:3a) Nda tu kasi lasakalalo alua ale pamue tu kuete atatahãi, tu sukila oku lekisa ekolelo liocili ku Yehova. Suku eye lika o tẽla oku tu kuatisa okuti tu kolapo konepa yespiritu. Mose wa soneha ndoco: “U wa tunga vociwundilo ca Fũ eye o tumala vulembo wa Tõlo.” (Osamo 91:1) Omo okuti elaviso liovihandeleko lia livokiya calua voluali lulo luevĩho, eci ci pondola oku tu sumuisa calua. Pole, tu sukila oku kolela lika ku Yehova oco a tu kuatise. Nda tua teka onengo kuenje ekamba lietu li yongola oku tu kuatisa, etu tu sanjuka calua. Cimuamue haico tu linga poku likolisilako oku kala vakuekolelo, okuti tu sukila ekuatiso lia Yehova.—Isaya 50:10.
8. Ndamupi upange wetu woku kunda u tu kuatisa oku yuvula oku yapuisiwa omo lioku livela ukuasi wolondingaĩvi?
8 Onjila yimue yoku yuvula oku yapuisiwa omo liukuasi wolondingaĩvi, oku litumbika kupange woku sandiliya omanu vana va kasi ndolomeme poku va longisa oco va kuate ukũlĩhĩso watiamẽla kocipango ca Yehova. Omo okuti evĩho li kasi oku livokiya calua, tu sukila oku vokiyavo upange wetu woku kuatisa vakuetu. Upostolo Paulu wa popia hati: “Ko ka ivaliko oku lingainga ciwa, loku liavela pokati, momo Suku o sanjukila ovilumba ndevi.” “Uwa” wa velapo okuti owo tu pondola oku ‘lingila omanu, oku va sapuila olondaka viwa Viusoma wa Suku. Upange wetu woku kundila omanu owo ‘ovilumba viesivayo.’—Va Heveru 13:15, 16; Va Galatia 6:10.
9. Lombolola evetiyo Daviti a lekisa liatiamẽla koku “tumala hũ vofeka.”
9 Soma Daviti wamamako lolondaka viaye hati: “O tumala hũ vofeka, kuenje o koka.” (Osamo 37:3b) ‘Ofeka’ yo kotembo ya Daviti, ya kala Ofeka Yohuminyo yina Yehova a ecele ku va Isareli. Kotembo yuviali wa Salomone ofeka yaco yopisile tunde kocikanjo co konano yo Dani toke kombuelo yo Bereseva. Vocikanjo eci omo va Isareli va kala. (1 Olosoma 4:25) Koloneke vilo, kolofeka viosi tu sangiwa, tu pondola oku sokolola otembo eci oluali luosi luka pongoluiwa vofeka yelau muna muka kala lika omanu vana vakuesunga. Pole, cilo tua kolapo momo tu kasi vekalo liwa kespiritu.—Isaya 65:13, 14.
10. Nye tu pondola oku tambula eci tuka kala omanu ‘vana va koka’?
10 Nye cika pita letu eci tuka kala omanu ‘va koka’? Olondaka via tumĩwa la Suku vi tu lomboluila ndoco: “Ngendevando o sanga asumũlũho a lua.” (Olosapo 28:20) Epandi lietu tu lekisa kupange wetu woku kunda olondaka viwa kolofeka viosi tu kasi kuenda komanu vosi tu pondola oku kundila, li nena asumũlũho alua a tundilila ku Yehova. Manji umue o tukuiwa hati Frank kumue lukãi waye Rose, va kasi volupale luo konano yofeka yo Eskosia, tunde eci va litumbika kupange wakundi votembo yosi toke cilo, pa pita ale eci ci soka 40 kanyamo. Eci ovo va pitĩla volupale luaco va sanga okuti omanu vana va lekisile tete onjongole kocili, va liwekapo. Noke, manji Frank kumue lukãi waye va fetika upange wavo woku kunda kuenda oku longisa omanu oco va linge olondonge. Cilo, volupale luaco muli ekongelo limue li kasi oku livokiya. Olohueli evi via tambula asumũlũho a tunda ku Yehova. Manji Frank lumbombe wocili wa popia hati: “Etu tu kuete esumũlũho omo lioku kala vocili kuenda omo lioku linga upange wa Yehova.” Omo liaco, nda tua ‘lekisa esunga’ tu pondola oku tambula asumũlũho alua.
“Sanjukila Yehova”
11, 12. (a) Ndamupi tu pondola oku “sanjukila Yehova”? (b) Ocimãho cipi tu pondola oku litumbikila catiamẽla kelilongiso lietu lio pokolika? Kuenda ekuatiso lie tu pondola oku tambula?
11 Oco tu pamise ukamba wetu la Yehova loku amamako oku kolela kokuaye, tu sukila oku “sanjukila Yehova.” (Osamo 37:4) Ndamupi tu pondola oku ci linga? Ka tu sakalala lekalo lietu muẽle, ndaño okuti eci ca tĩla calua oku ci linga, pole tu eca ku Yehova ovitangi viosi tu liyaka lavio komuenyo wetu. Onjila yimue yoku ci linga, oku sandiliya otembo yoku tanga Ondaka yaye. (Osamo 1:1, 2) Ove hẽ wa siata oku kuata esanju poku tanga Embimbiliya? O pondola oku kuata vali esanju liocili eci o kuata ocimãho coku lilongisa vali calua catiamẽla ku Yehova. Eci o mãla oku tanga ocipama cimue Cembimbiliya, momo lie ku talamẽlapo kamue loku lipulisa okuti, ‘ovinimbu evi vi ndi longisa nye catiamẽla ku Yehova?’ O pondola oku kuatisiwa vali calua nda poku tanga Embimbiliya wa pongiya emẽla limue liopapelo muna o soneha atosi a velapo. Olonjanja viosi eci o mãla oku tanga ovinimbu vimue Viembimbiliya, sokolola elomboloko lieci wa tanga kuenda ci soneha oco cu ku kuatise oku ivaluka ovituwa vimue via Suku. Vosamo yikuavo Daviti wa imba ocisungo hati: “Olondaka viomela wange lovisimilo viutima wange vi sunguluke kokuove, a Yehova, wucikolo cange, haive wunjovoli yange.” (Osamo 19:14) Oku sokolola kuetu Ondaka ya Suku, ku pondola oku ‘sanjuisa’ Yehova kuenda etu muẽle.
12 Ndamupi tu pondola oku kuata esanju leci tu lilongisa kuenda oku sokolola eci tua lilongisa? Tu pondola oku ci linga poku kuata ocimãho coku lilongisa calua catiamẽla ku Yehova kuenda kolonjila viaye. Valivulu ndeci, O Maior Homem Que Já Viveu kuenda Achegue-se a Jeová,a mu sangiwa ovolandu alua a pondola oku tu kuatisa. Daviti, wa lombolola eci catiamẽla kohuminyo ya eciwa ku vakuesunga hati, Yehova ‘oka va ĩha ovina viosi utima wavo u yongola.’ (Osamo 37:4b) Upostolo Yoano wa kuatelevo ekolelo liaco kuenje wa vetiyiwa oku soneha ndoco: “Ekolelo tu [kuetele Yehova] lieli, nda tu pinga cimue ca sungulukila ocipango caye eye o tu yeva. Kuenje, nda tua kũlĩha okuti o tu yeva pokati kapingilo osi, oco tua kũlĩhavo okuti tu tambula eci tuo pinga.”—1 Yoano 5:14, 15.
a Lia sandekiwa Lolombangi via Yehova.
13. Ndamupi upange woku kunda Usoma u kasi oku amamako kolofeka vialua vokuenda kuanyamo alo a sulako?
13 Omo okuti tu kuete epandi liocili, onjongole yetu ya velapo yoku tala lovaso etu muẽle ndomo uviali wa Yehova uka kemãlisiwa. (Olosapo 27:11) Anga hẽ ka tu sanjuka poku kũlĩha eci catiamẽla kupange woku kunda u kasi oku lingiwa la vamanjetu va kasi kolofeka vina okuti olombiali viofeka yaco via tema calua? Etu tu kuete onjongole yoku tala lovaso etu muẽle elisanjo vamanji va pondola oku tambula osimbu handi esulilo lioluali lulo ka lieyile. Olombangi vialua via Yehova vi kasi kolofeka vina okuti vi pondola oku linga upange wavo woku kunda lelisanjo, via siata oku kuata ombili yocili yoku kundila olondonge vio kosikola, lomanu vana va tila kolofeka viavo kuenda vana okuti va kasi ño kolofeka viaco vokuenda kuotembo yimue yitito. Kuenje, ovo va kuete esanju liocili omo lielisanjo kefendelo. Etu tu yongola okuti, omanu va sangiwa ndeti kolofeka viaco eci va tiukila kolofeka viavo, vamamako loku tuisa ocinyi condaka ya Suku ndaño vofeka yaco upange woku kunda ka weceleliwa lolombiali viofeka.—Mateo 5:14-16.
“Kundika ku Yehova Onjila Yove”
14. Uvangi upi u lekisa okuti tu pondola oku kolela ku Yehova?
14 Helavokokuolio tu pondola oku sanga poku kũlĩha okuti ovitangi vietu kuenda ohali yosi tu kasi oku liyaka layo cilo, ka yika kalako vali! Ndamupi ci lingiwa? Daviti wa popia hati: “Kundika ku Yehova onjila yove. U kolela, kuenje eye o ci linga.” (Osamo 37:5) Vakongelo tu sangiwa, tua kũlĩha okuti, Yehova eye o pondola oku tu ĩha ekuatiso lina tu sukila. (Osamo 55:22) Vamanji vana va litumbika kupange wakundi votembo yosi ndeci akundi va velapo lava valikasi, olomitavaso vi nyula akongelo vimbo, olomisionariu, ale vana va talavaya Kombetele, vosi yavo va pondola oku lekisa uvangi wekuatiso va siata oku tambula ku Yehova. Momo lie ku vanguila kuenda ku pulila vamanji vamue wa kũlĩha va kasi kovopange aco oco va ku lomboluile ndomo Yehova a siata oku va kuatisa? Ove o pondola oku yeva ovolandu alua a lekisa okuti ndaño muẽle kotembo yovitangi, Yehova wamamako oku eca ekuatiso liaye. Eye Olonjanja viosi wa siata oku eca ekuatiso lina omanu vaye va sukila.—Osamo 37:25; Mateo 6:25-34.
15. Ndamupi esunga liomanu va Suku li kasi oku nina?
15 Eci tu lekisa ekolelo lietu ku Yehova lutima wetu wosi, tu pondola oku kuatisiwa lolondaka viukualosamo wa popia hati: “[A Yehova] molehisa esunga liove ndocinyi, loku sunguluka kuondaka yove ndutanya wekumbi pongunji.” (Osamo 37:6) Omo okuti Tulombangi via Yehova, olonjanja vimue tua siata oku popiwa lãvi. Pole, Yehova o patulula ovaso omanu vana vakuavitima via sunguluka oco va kuatisiwe oku limbuka okuti upange wetu woku kunda tu u lingila omo liocisola tu kuetele Yehova kuenda omanu vana tu lisungue lavo. Handi vali, ovituwa vietu viwa ndaño okuti vi pembuiwa lomanu valua, pole, via siata oku eca uvangi wocili. Yehova wa siata oku tu kuatisa oco tu yule alambalalo osi kuenda ovitangi viosi tu liyaka lavio. Omo liaco, esunga liomanu va Suku li kasi oku nina ndekumbi li kasi vongunji. —1 Petulu 2:12.
‘Imba Ovaso Yehova, u Kevelela Lepandi’
16, 17. Ndomo Osamo 37:7 yi lombolola, yilo oyo otembo yoku linga nye kuenda momo lie?
16 Ukualosamo wamisako lolondaka viaye hati: ‘Imba ovaso Yehova, kuenda u kevelela lepandi. Ku ka lisakalaise mekonda liu wa salala, pamue mekonda liomunu o lingainga evi vĩvi.’ (Osamo 37:7) Palo, Daviti o tu vetiya oco tu kuate epandi poku kevelela ku Yehova toke eci a tẽlisa ocipango caye. Ndaño okuti toke cilo esulilo ka lieyile handi, pole, eci ka ci lomboloka okuti, tu sukila oku liyeya. Anga hẽ ka tua siatele oku limbuka ohenda ya Yehova kuenda epandi liaye lia piãla okuti ka lisokisiwa lovisimĩlo vina tua kuatele tete? Cilo hẽ tu pondolavo oku lekisa ocituwa coku talamẽla lepandi liocili poku amamako lupange wetu woku kunda olondaka viwa osimbu handi esulilo ka lieyile? (Marko 13:10) Yilo oyo otembo yoku yuvula ovilinga viosi vi pondola oku tepulula esanju lietu kuenda oku kolapo kuetu konepa yespiritu. Yilo oyo otembo yoku likolisilako oku tamãlala layonjo oluali lulo lua Satana. Handi vali, yilo oyo otembo yoku amamako oku lekisa ovituwa viwa kuenda lalimue eteke ka tuka kapi kohele ekalo lietu lioku amamako lesunguluko liocili ku Yehova. Omo liaco, tu amamiko oku yuvula oloñeyi viosi vĩvi viatiamẽla koku lipekela kualume lakãi ale kualume lalume.—Va Kolosai 3:5.
17 Daviti o tu lungula hati: “Onyeño yimbapo, oku tema ku siapo. Ku ka lisakalaise; [leci citiamẽla koku] linga cĩvi. Momo olondingaĩvi vi nyõleha; ava puãi va imba ovaso Yehova [vaka] piñala ofeka.” (Osamo 37:8, 9) Omo liaco, tu pondola oku kuata ekolelo lioku lavoka otembo yina yi kasi ale ocipepi, eci Yehova aka kundula olondingaĩvi viosi mulo voluali kuenda vana va siata oku koka evĩho liaco.
“OKasimbu Kaño Handi”
18, 19. Ekuatiso lipi o pondola oku tambula kelivulu Liosamo 37:10?
18 Embimbiliya li lombolola ndoco: “Okasimbu kaño handi kuenje ondingaĩvi ka yi kalapo [vali]. Ndaño o vanjiliya pomangu yaye lutate, eye kepo.” (Osamo 37:10) Olondaka evi vi pondola oku tu kuatisa calua osimbu tu panda kesulilo lioluali lulo kuenda oku kunduiwa kuomanu vana ka va yongola oku pokola ku Yehova! Ovosoma osi ale ovoviali omanu va siata oku nõla, ka a siatele oku kuata epondolo lioku viala ciwa. Cilo tu kasi ocipepi lotembo yuviali wa Suku okuti Usoma wa Yehova una uka songuiwa la Yesu Kristu. Usoma waye uka viala oluali luosi kuenda uka kundula omanu vosi ka va yongola oku pokola Kusoma wa Suku.—Daniele 2:44.
19 Voluali luokaliye luna luka vialiwa Lusoma wa Suku, ndaño okuti wa likolisilako oku sandiliya ”ondingaĩvi,” kuka tẽla vali oku yi sangamo. Omunu wosi ka yongola oku pokola kolonumbi via Yehova, oka kunduiwa. Yehova kaka ecelela okuti voluali luokaliye mu kala omunu umue o suvuka usoma ale omunu umue ka yongola oku pokola kuviali Waye. Omanu vosi vaka kala posongo yove vaka sunguluka kovitima kuenda vaka yongola lika oku sanjuisa Yehova. Omanu vaka kala voluali luokaliye vaka kolapo, momo lomue oka sukila vali olosapi, loviti vioku kundika apito, kuenda ka kuka kala lacimue cika nyõla esanju liocili!—Isaya 65:20; Mika 4:4; 2 Petulu 3:13.
20, 21. (a) Velie “ambombe” va tukuiwa kelivulu Liosamo 37:11? Kuenda pi ovo va pondola oku sanga ‘ombembua yocili’? (b) Asumũlũho api tuka tambula nda tua kuama ongangu ya Daviti Wavelapo?
20 ‘Ambombe vaka piñala ofeka.’ (Osamo 37:11a) “Ambombe” vaco hẽ velie? Ondaka ya pongoluiwa hati “embombe,” yopiwa kondaka yi lomboloka “oku omboka, oku kala ukuesuluviko.” Omo liaco, ambombe vaco omanu vana va kasi oku kevelela oku tẽlisiwa kuesunga lia Yehova oco a mãleko ohali yosi va kasi oku liyaka layo. Ulandu Wembimbiliya wamisako ndoco: ‘Ambombe, vaka sanjukila oku salala kualua.’ (Osamo 37:11b) Ndaño muẽle kotembo yilo, tu pondola ale oku sanga ombembua kespiritu, yina yi kasi vekongelo Liakristão.
21 Ndaño okuti cilo tu kasi handi oku tala ohali, pole, tu pondola oku pandikisa poku likuatisa pokati la vakuetu kuenda oku lembeleka omanu vana va sumua. Omo liaco, eci ca siata oku vetiya omanu va Yehova oco va kuate esanju liocili pokati kavo. Vamanji vana va nõliwa oco va kale angombo, va siata oku tu kuatisa kekalo lietu kespiritu kuenda olonjanja vimue va siatavo oku eca ekuatiso lio ketimba lina lia siata oku tu pamisa oco tu amameko lepandi lietu kolohali omo lioku lekisa esunga. (1 Va Tesalonike 2:7, 11; 1 Petulu 5:2, 3) Ombembua yaco yi kuete esilivilo liocili! Etu tu kuetevo elavoko liomuenyo ko pui Vofeka Yelau lua laika okuiya muna muka kala lika ombembua. Omo liaco, tu amamiko loku kuama ongangu ya Daviti Wavelapo okuti Yesu Kristu, una wa vetiyiwa lombili yocili yoku vumba Yehova toke kesulilo. (1 Petulu 2:21) Nda tua kuama onjila eyi, tuka amamako lesanju lietu poku sanjukila Suku yetu Yehova.
O Pondola Oku Tambulula?
• Nye wa lilongisa kelivulu Liosamo 37:1, 2?
• Ndamupi o pondola oku “sanjukila Yehova”?
• Uvangi upi u lekisa okuti, tu pondola oku kolela Yehova?
[Elitalate kemẽla 23]
“Kolela Yehova, linga esunga”
[Elitalatu kemẽla 25]
‘Ambombe vaka piñala ofeka’