Kuama Ocipama ca Ilikiwa

EMBIMBILIYA li sokisa ekongelo Liakristão letimba liomunu. Onepa lonepa yi sukiliwa, pole olonepa viaco “ka vi kuete upange umuamue.” Loku ci tiamisila konepa eyi, etu tu kuete oku talavaya kupange wosi tua ilikiwila. Eci ci kisika okuti tu kuata elomboloko kuenda tu tata ciwa ocikele cosi coku linga ohundo tua tambula, okuti ka tu sepula esilivilo liovipama vimue, loku sima okuti ovipama vikuavo viwapo vali. (Va Rom. 12:4-8) Ocimunga cukuenje wa kolelua haeye wa lunguka, ci kuete ocikele coku eca okulia kuespiritu “kotembo ya tukuiwa.” (Mat. 24:45) Eci tu lekisa uloño wetu woku linga olohundo loku kuama olonumbi tua tambula, tu lekisa okuti tua sanjukila eliangiliyo liaco eli. Eci ci kuatisa koku enda ciwa kuekongelo liosi.

Ceci ci Kongeliwamo. Eci ilikiwila oku linga ocipama cimue vosikola, kuata utate woku lombolola lika eci catiamẽla kocipama caco okuti ku lombolola ocipama cimue cikuavo. Olonjanja vialua, kuka imbiwa onumbi yono mu sangiwa ovipama vika lomboluiwa. Nda kua imbiwile onumbi yovipama oka lombolola vohundo yove, ci tava okuti upa ovipama volono viosi wa nõla. Pole, osimbu o pongiya ohundo yove, kũlĩhĩsa ciwa okuti alomboluilo aco osi atiamẽla kocipama ca ilikiwa. Poku nõla eci oka kongelamo, ove oka sukilavo oku kapako olonjeveleli viove.

Lilongisa ciwa lutate ovipama vi sangiwa vono ya ilikiwa kuenda konomuisa ovisonehua vi sangiwamo. Noke tala ndomo oka vi lombolola ciwa okuti olonjeveleli vi kopako esilivilo. Nõla atosi avali ale atatu vocipama ca sonehiwa okuti o-o aka kala atosi a velapo vohundo yove. Cimuamue haico, vocipama wa ilikiwila nõlamo ovisonehua vimue Viembimbiliya wa sokiya oku ka tanga loku ka lombolola.

Ovipama viñami vi kuete oku lomboluiwa? Vina lika o tẽla oku lombolola ciwa. Ku ka nyõle elongiso liwa omo lioku kongelamo ovipama vialua. Nda olonepa vimue viovipama ka vi likuata locimãho cohundo yove, luluvalela kolonepa vina vi ku kuatisa oku tẽlisa ocimãho cove. Vocipama wa ilikiwila, nõlamo olonepa vina okuti olonjeveleli vi kopako vali elilongiso kuenda esilivilo. Ocimãho cove ketosi eli lielungulo, haku talako onepa yalua yovipama o tẽla oku lombolola, pole oku kuama ocipama ca ilikiwa ndono yohundo yove.

Ohundo yove ka yi ka kale ño yimue yoku pitiya alomboluilo a sangiwa vocipama ca ilikiwa. Ove te wa sokiya oku lombolola atosi amue, oku a situlula, oku a sokisa la cimue, kuenda oku eca yimue ongangu yi lekisa ndomo atosi aco a kapiwako. Ovisimĩlo vikuavo te via vanguiwila oku lombolola atosi a velapo a sangiwa vocipama ca ilikiwa, okuti hakupiñanyako ocipama.

Vamanji vana alume va kuete eloñoloho li sukiliwa koku kala alongisi, pamue vokuenda kuotembo va lalekiwa oco va ece elongiso Vohongele Yupange. Ovo ca va lomboloka ciwa okuti va sukila oku kuama ocipama ca ilikiwa okuti ka va ci piñanya la cimue ciñi. Cimuamue haico, vamanji vakuakulinga olohundo viowiñi, va siata oku ihĩwa opapelo mu sangiwa ovipama va kuete oku kuama. Ovipama vi sangiwamo, ci tava oku vi linga muiñi muiñi, pole opapelo yaco yi lekisa ciwa atosi a velapo aka lomboluiwa, loku eca esunga liwa lieci ci kasi oku lomboluiwa, kuenda ovisonehua vi lekisa uvangi watiamẽla kohundo. Oku lilongisa ndomo o longisa loku kuama ovipama via ilikiwa ndono yohundo yove, onepa yimue ya velapo yoku lipongiyila ovikele vikuavo vioku linga olohundo.

Oku likisa oku ci linga, ci pondolavo oku ku kuatisa oku songola alilongiso Embimbiliya amamako. Ove oka lilongisa oku tiamisila ovisimĩlo viove kocipama ci kasi loku longisiwa okuti ku pambukila koku lombolola ovina vikuavo, vina okuti pamue viwa pole ka vi sukiliwa koku kuata elomboloko lieci ci kasi oku longisiwa vocipama. Pole, nda okuti wa kuata elomboloko liwa lielilongiso lilo, ove ku ka kakatela ño enene kocipama ca ilikiwa okuti ku vokiyako vali alomboluilo akuavo ana ondonge yi sukila.