Olondaka Viwa Komanu Vosi

Epinduko lia Yesu lia vetiya olondonge viaye oku tava kuenda oku lekisa ombili. Upostolo Paulu wa nyula o Asia Menor kuenda o Mediterraneo wa sokiya akongelo, kuenda oku pamisa Akristão oco va yuvule ovituwa ka via sungulukile loku pandikisa kelambalalo. Ndaño lovitangi viaco pole, etendelo Liakristão lia amamako oku livokiya.

Paulu wa kapiwile vokayike. Ndaño wa kala vo kayike, pole, wa soneha ovikanda vioku pamisa akongelo Akristão, kuenda oku va lungula. Eye wa lungula ovitangi vi tunda kunanguluke. Paulu lekuatiso liespiritu sandu lia Suku, wa popia hati, “olombinji via tema” vi ka vangula “ovina via penga,” vi keya pokati kene kuenda “vi ka koka oloñame okuti vi va kuama.”—Ovilinga 20:29, 30.

Unanguluke wa fetika kesulilo liocita catete. Kotembo yaco Yesu wa eca kupostolo Yoano ocinjonde Cesituluilo ci situlula ovina via laikele oku iya kovaso yoloneke. Ndomo Yoano a ci soneha, ndaño vana va tu lambalala ale alongisi ve sanda lacimue ci tẽla oku tateka Suku oku tẽlisa ocipango caye catiamẽla kongongo kuenda komanu. ‘Olofeka viosi, apata osi, vakualimi aiñi aiñi kuenda omanu vosi’ va ka yeva olondaka viwa Viusoma wa Suku. (Esituluilo 14:6) Ofeka yelau yi ka tumbuluiwa palo posi, kuenda wosi o yongola oku linga ocipango ca Suku o pondola oku kalamo!

Anga hẽ “esapulo liaco liwa” kokuove? Nda wa sanjukila esapulo liaco, lilongisa esapulo lia Suku li sangiwa Vembimbiliya liatiamẽla komanu, kuenje o kuatisiwa cilo kuenda kovaso yoloneke.

O pondola oku tanga Embimbiliya vo www.jw.org. Vo Internet, o pondolavo oku konomuisa olombrochura ndeci: A Bíblia — Qual É a sua Mensagem?, Olondaka Viwa vi Tunda ku Suku, elivulu Embimbiliya li Longisa Nye? lalivulu akuavo a lombolola esunga lieci tu kolelela Kembimbiliya, ndomo tu kapako alungulo oco vepata kuenda komuenyo wetu. Ale pulisa Ombangi yimue ya Yehova oco o sange alomboluilo akuavo.

—Ulandu wopiwa kelivulu Liovilinga, Efeso, Filipoi, Kolosai, Filemone, 1 Yoano, kuenda Esituluilo.