Wo se Vughe Uyota Na?

1. Mavọ yen oma ru we kpahen uyota na?

IDIBO ri Jihova vwo ẹguọnọ kpahen uyota rọhẹ Baibol na. Ọyehẹ avwanre mu esegbuyota avwanre kpahen. (Ro 10:17) Avwanre vwo imuẹro nẹ Jihova yen vwẹ ukoko rẹ Inenikristi na vwo mu kerẹ “uchivwo kugbe obicha vwọ kẹ uyota na.” (1Ti 3:15) Ọtiọyena avwanre vwomakpotọ kẹ “ihwo re kobaro vwẹ ohri” rẹ avwanre, re nabọ dje uyota rọhẹ Baibol na fiotọ je vwẹ odjekẹ ro shephiyọ ọhọre rẹ Ọghẹnẹ vwọ kẹ avwanre.—Hib 13:17.

2. Vwo nene obo rehẹ Jems 5:19, imuoshọ vọ yen e se hirharoku ọ da tobọ dianẹ a mrẹ uyota na vughe re?

² Dedena, avwanre da tobọ mrẹ uyota na vughe nu je rhọnvwe nẹ ofori re vwo nene odjekẹ rẹ ukoko rẹ Ọghẹnẹ, e ji se sun avwanre ghwru. (Se Jems 5:19.) Eshu guọnọre nẹ avwanre vwẹroso Baibol na yẹrẹ odjekẹ ro nẹ ukoko rẹ Ọghẹnẹ chaa.—Ẹf 4:14.

3. Diesorọ e vwo tinkamu uyota na? (Ẹfesọs 6:13, 14)

³ Se Ẹfesọs 6:13, 14. O rhe che krii, Idẹbono cha reyọ evuẹ rẹ efian vwo sun ẹgborho na ghwru rere ayen vwo gbevwọso Jihova. (Ẹvw 16:13, 14) Avwanre je riẹn nẹ Eshu cha davwẹngba rọyen phiyọ ro vwo sun idibo ri Jihova ghwru. (Ẹvw 12:9) Kọyensorọ ọ vwọ ghanre re vwo yono oma avwanre obo re se vwo vughe uyota kugbe efian, ji ru nene obo re yonori. (Ro 6:17; 1Pi 1:22) Usivwin rẹ avwanre vwọ vrabọ rẹ ukpokpogho rode na churobọ si uyota na!

4. Die yen a cha ta ota kpahen vwẹ uyono nana?

⁴ Vwẹ uyono nana, a cha jokaphiyọ iruemu ivẹ ra guọnọre re cha cha avwanre uko vwo vughe uyota ro nẹ Baibol na rhe, ji rhiabọreyọ odjekẹ ro nẹ ukoko rẹ Ọghẹnẹ cha. A je cha ta ota kpahen erọnvwọn erha re che ru e se vwo tinkamu uyota na ọkieje.

IRUEMU RA GUỌNỌRE E SE VWO VUGHE UYOTA NA

5. Idjerhe vọ yen oshọẹdjẹ ri Jihova vwọ cha avwanre uko vwo vughe uyota na?

⁵ Oshọẹdjẹ ri Jihova. A da nabọ vwo oshọẹdjẹ ri Jihova, e rhe che ru emu vuọvo ro che miovwo ivuun kidie avwanre vwo ẹguọnọ rọyen. Ọnana che mu avwanre vwo vughe ofẹnẹ rẹ obo ri yovwirin vẹ obo re brare, uyota kugbe efian, je nẹrhẹ e vwo aroesiri ri Jihova. (Isẹ 2:3-6; Hib 5:14) E jẹ avwanre vwẹ uphẹn kẹ oshọ rẹ ohworakpọ nẹ ọ gan vrẹ ẹguọnọ rẹ avwanre vwo kpahen Jihovaa, kidie ọke buebun na obo re nẹrhẹ oma vwerhen ihworakpọ yen miovwo Jihova ivun.

6. Mavọ yen oshọ rẹ ihworakpọ vwọ nẹrhẹ isun ihwe rẹ Izrẹl gbobọnyẹ uyota na?

⁶ E de vwo oshọẹdjẹ rẹ ihworakpọ vrẹ oshọẹdjẹ rẹ Ọghẹnẹ, ọnana sa nẹrhẹ e bo ghwru nẹ uyota na. Jẹ e roro kpahen udje rẹ isun 12 re jiri nẹ e ra bẹbẹ ni otọ ri Jihova ve kẹ ihwo rẹ Izrẹl. Ihwo ihwe vwẹ usun rẹ ihwo re jiri na, vwo oshọẹdjẹ rẹ ihwo ri Kenan vrẹ ọ ri Jihova. Ayen vuẹ irivẹ rayen nẹ: “Avwanre che se nene ihwo na họnre-e; kidie ayen ga nọ avwanre.” (Uk 13:27-31) Vwẹ ẹro rẹ ohworakpọ, ayen niro nẹ ihwo ri Kenan vwo ẹgba vrẹ ihwo rẹ Izrẹl, ọyena ghini uyota. Jẹ kohwo kohwo rọ tare nẹ ihwo rẹ Izrel che se phi ihwo ri Kenan na kparobọọ vwẹroso Jihovaa. Ofori nẹ ihwo ihwe re jiri nẹ e ra bẹbẹ ni otọ na tẹnrovi obo ri Jihova guọnọre nẹ ihwo rẹ Izrẹl ru. O ji fo nẹ ayen roro kpahen obo ri Jihova ru kẹ ayen vwẹ obuko re. Ọnana rha nẹrhẹ ayen riẹn nẹ ẹgba rẹ ihwo ri Kenan na te emuọvoo siẹrẹ a da vwọ vwanvwen ẹgba ri Jihova ro me kpenu na. Vwọ fẹnẹ ihwo ihwe yena ri vwo esegbuyotaa na, Joshua vẹ Kalẹb guọnọ vwo aroesiri ri Jihova. Ọtiọyena, ayen da vuẹ ihwo na nẹ: “Ọ da dianẹ oma rẹ avwanre vwerhe Ọrovwohwo, ọ sa reyọ avwanre rhe otọ na rọ da vwọ kẹ avwanre.”—Uk 14:6-9.

7. Mavo yen e se vwo ru oshọẹdjẹ re vwo kpahen Jihova ganphiyọ? (Ni uhoho na.)

⁷ E se vwo ru oshọẹdjẹ rẹ avwanre kpahen Jihova ganphiyọ, ofori nẹ a tẹnrovi obo re cha nẹrhẹ oma vwerhọn vwẹ korhiẹn korhiẹn rẹ avwanre brẹ. (Un 16:8) Wo de se kpahan ikuegbe rehẹ Baibol na, nọ oma wẹn, ‘Me da hẹ ẹdia ọtiọyena, orhiẹn vọ yen mi rhe bru?’ Kerẹ udje, vwẹ ẹwẹn roro nẹ wọ hẹ etiyin kerhọ ọke rẹ isun ihwe rẹ ihwo rẹ Izrẹl na vwọ nẹ erharhe iyẹnrẹn na. Wọ rha djoshọ rẹ ohworakpọ ji se oborẹ ayen tare na gbuyota, gbanẹ ẹguọnọ ru wo vwo kpahen Jihova vẹ owenvwe ru wo vwo ru obo re vwerhọn oma che shekpotọ? Uvwiẹ rẹ Izrẹl eje nama se obo ri Joshua vẹ Kalẹb tare na gbuyotaa. Ọtiọyena, uphẹn rẹ ayen vwọ ro Otọ rẹ Ive na da va ayen abọ.—Uk 14:10, 22, 23.

8. Uruemu vọ yen ofori nẹ a davwẹngba vwo vwo, kẹ diesorọ?

⁸ Omaevwokpotọ. Ihwo re vwomakpotọ yen Jihova vwẹ uyota na phia kẹ. (Mt 11:25) Avwanre vwomakpotọ vwo rhiabọreyọ ukẹcha e vwo yono uyota na. (Iru 8:30, 31) Dedena, ofori nẹ avwanre jomaotọ e vwo jẹ oma ẹkparọ. Omaẹkparọ sa nẹrhẹ e no nẹ iroro romobọ rẹ avwanre vẹ odjekẹ ri Baibol kugbe ọkpọvi ro nẹ obọ rẹ ukoko rhe abavo.

9. Mavọ yen a sa vwọ dia ihwo re vwomakpotọ ọkieje?

⁹ A sa vwọ dia ihwo re vwomakpotọ ọkieje, ofori nẹ a karophiyọ nẹ avwanre fiẹ emuọvo vwẹ obaro ri Jihovaa. (Un 8:3, 4) A je sa rẹ Jihova rere a sa vwọ dia ihwo re vwomakpotọ vrẹ obo ri jovwo, re se yono. Jihova cha cha avwanre uko e se vwo nẹ iroro rọyen rọ vwọ kẹ avwanre womarẹ Ota kugbe ukoko rọyen ghanghanre vrẹ ọ rẹ avwanre. Vwẹ isese ri Baibol wẹn, jokaphiyọ ẹkpo ri djerephia nẹ Jihova vwo ẹguọnọ rẹ ihwo re vwomakpotọ, nẹ o vwo utuoma kpahen ihwo ri phuoma, ri nẹ oma rayen gegerege re je kparoma. Davwẹngba mamọ wọ vwọ vwomakpotọ ọkieje siẹrẹ wo de vwo uphẹn rẹ ẹga rọ cha kẹ wẹ ogangan je nẹrhẹ ihwo ni we so.

MAVỌ YEN E SE VWO TINKAMU UYOTA NA

10. Amono yen Jihova reyọ vwọ vwẹ odjekẹ vẹ iji vwọ kẹ ihwo rọyen?

¹⁰ Vwẹroso odjekẹ ro nẹ ukoko ri Jihova cha ọkieje. Vwẹ Izrẹl awanre, Jihova reyọ Mosis kugbe Joshua vwọ vwẹ odjekẹ kẹ ihwo Rọyen. (Jos 1:16, 17) Kidie nẹ ihwo rẹ Izrẹl ni ihwo nana kerẹ ihwo ri mudia kẹ Jihova Ọghẹnẹ, ayen da mrẹ ebruphiyọ. Ikpe ujorin buebun ra ka vwọ reyọ ukoko rẹ Inenikristi vwo mu nu, iyinkọn 12 na je reyọ odjekẹ vwọphia. (Iru 8:14, 15) Ọke vwọ yanran na, a da reyọ ekpako efa vwẹ Jerusalẹm vwọba ayen. Kidie nẹ ayen nene odjekẹ rẹ eshare nana re fuevun na, “esegbuyota rẹ ikoko na kọ ganphiyọ, ayen ki ji buẹnphiyọ kẹdi kẹdẹ.” (Iru 16:4, 5) Vwẹ ọke rẹ avwanre na, avwanre je mrẹ ebruphiyọ siẹrẹ e de nene odjekẹ ro nẹ ukoko ri Jihova cha. Ẹkẹvuọvo, mavọ yen oma che ru Jihova siẹrẹ avwanre rha rhọnvwe vwo oniso rẹ ihwo ro vwo muu? A sa kpahenphiyọ onọ yena siẹrẹ e de roro kpahen obo re phia kẹ ihwo rẹ Izrẹl ọke re vwo suẹn ayen kpo Otọ rẹ Ive na.

11. Die yen phia kẹ ihwo evo vwẹ Izrẹl rẹ awanre ri gbevwọso Ọghẹnẹ rọ reyọ Mosis vwo mu nẹ o sun ayen? (Ni uhoho na.)

¹¹ Uvwre rẹ ọke rẹ ihwo rẹ Izrẹl vwọ yan kpo Otọ rẹ Ive na, eshare evo ra nabọ vughe de gbevwọso Mosis kugbe ẹdia rọ hepha kerẹ ohwo ri Jihova vwo mu. Ayen da ta: “Ukoko na ejobi funre [ọ dia Mosis ọvoo], kohwo kohwo vwẹ usun rayen, yẹ Ọrovwohwo uherevie rẹ ayen.” (Uk 16:1-3) Dede nẹ vwẹ ẹro ri Jihova “ukoko na ejobi funre,” Mosis yen Jihova jẹre nẹ o sun ihwo Rọyen. (Uk 16:28) Ayen vwọ reyọ Mosis vwo guẹdjọ na, kọyen Jihova yen ayen reyọ vwo guẹdjọ. Ukperẹ ayen vwọ tẹnrovi obo ri Jihova guọnọre; ayen da tẹnrovi ojevwe romobọ rayen—ẹgba kugbe ẹdia rode. Ọtiọyena Ọghẹnẹ da ghwọrọ ihwo re kobaro rẹ ẹvwọsuọ na, ji te ihwo uriorin buebun ri gbe nene ayen. (Uk 16:30-35, 41, 49) Nonẹna, e ji se vwo imuẹro nẹ ihwo ri muọghọ kẹ ọrhuẹrẹphiyotọ rẹ ukoko ri Jihovaa, oma rayen vwerhọọn.

12. Diesorọ a sa vwọ vwẹroso ukoko ri Jihova ọkieje?

¹² Avwanre sa vwẹroso ukoko ri Jihova ọkieje. Ọ da dianẹ a guọnọ ewene vwẹ ẹruọ rẹ avwanre vwo kpahen ẹkpo ri Baibol ọvo yẹrẹ ewene vwẹ ọrhuẹrẹphiyotọ rẹ owian rẹ Uvie na, ihwo re kobaro vwẹ ohri rẹ avwanre nama ghwọrọ ọke ayen ki ruẹ ewene ro forii. (Isẹ 4:18) Ayen ruẹ ọtiọyen kidie obo re ma ghanre kẹ ayen yen, ayen vwo ru obo re vwerhen Jihova oma. Ayen je davwẹngba rayen eje vwo muẹ erhiẹn rayen kpahan Ota rẹ Ọghẹnẹ, rọ dia uwan rẹ idibo ri Jihova eje nene.

13. Die yen “uwan rẹ eta re vọnre vẹ erere” na, kẹ die yen ofori nẹ a reyọ vwo ru?

¹³ “Rhe nene uwan rẹ eta re vọnre vẹ erere.” (2Ti 1:13) “Uwan rẹ eta re vọnre vẹ erere” mudiaphiyọ iyono rẹ Inenikristi rehẹ Baibol na. (Jọ 17:17) Iyono nana yen e mu kemu kemu rẹ avwanre segbuyota kpahen. Ukoko ri Jihova yono avwanre nẹ e tinkamu uwan rẹ eta yena. Siẹrẹ avwanre de ru ọtiọyen, a cha mrẹ ebruphiyọ.

14. Idjerhe vọ yen Inenikristi evo vwo jẹ “uwan rẹ eta re vọnre vẹ erere” na enene?

¹⁴ Die yen sa phia ọ da dianẹ e rhe nene “uwan rẹ eta re vọnre vẹ erere” naa? Roro kpahen udje nana. Vwẹ ẹgbukpe ujorin rẹsosuọ, Inenikristi evo ki guẹn nẹ ẹdẹ ri Jihova na te re. Ọ sa dianẹ o vwo ileta ọvo ri Pọl siri rẹ ayen rorori nẹ ọ ta ọtiọyen. Ukperẹ ayen vwọ nabọ frẹkotọ guọnọ otọ rẹ ota na, Inenikristi evo vwẹ Tẹsalonaika de se efian na gbuyota ayen da je vuẹ ihwo efa kpahọn. Iroro rha phiẹn ayeen ọ da dianẹ ayen karophiyọ obo ri Pọl yono ayen ọke rọ vẹ ayen vwọ herọ. (2Tẹ 2:1-5) Pọl vuẹ iniọvo na nẹ ayen se kemu kemu rẹ ayen nyori gbuyotaa. Rọ sa vwọ vwẹ ukẹcha kẹ ayen vwẹ obaro na, Pọl de ku ileta rivẹ ro si rhe ihwo ri Tẹsalonaika phiyọ vẹ eta nana: “Ọnana uyeren mẹ, rẹ omẹvwẹ ri Pọl vwẹ obọ mẹ vwo si, rọ dia oka rọhẹ kọbe kọbe ri mi siri; enẹ yen mi siẹ ẹbe mẹ wan.”—2Tẹ 3:17.

15. Mavọ yen avwanre sa vwọ sẹro rẹ oma avwanre vrabọ rẹ evuẹ rẹ efian re họhọ uyota? Djudje ọvo. (Ni ihoho na.)

¹⁵ Die yen avwanre se yono vwo nẹ eta ri Pọl vuẹ iniọvo ri Tẹsalonaika? Siẹrẹ avwanre de nyo eta re rhọnvwephiyọ oborẹ avwanre yono nẹ Baibol na rhee yẹrẹ nyo evuẹ rẹ efian ri forii, a guọnọre nẹ avwanre reyọ aghwanre vwo ruiruo. Vwẹ Soviet Union awanre, ivwighrẹn na de si ileta je vwọ kẹ iniọvo na nẹ esiri ukoko yen o nurhe. Ileta na jiriro kẹ iniọvo evo nẹ ayen vwẹ ukoko romobọ rayen vwo mu. Ọ sa dianẹ obo rehẹ ileta na uyota. Ẹkẹvuọvo ayen sa reyọ obo re si phiyọ ileta na vwọ phiẹn iniọvo rẹ avwanre re fuevuun. Ayen mrẹvughe nẹ obo re si phiyọ ileta na vẹ obo re yono ayen rhọnvwephiyọ ohwohwoo. Nonẹna, ivwighrẹn rẹ avwanre davwẹngba ọkievo vwọ vwẹ intanẹti yẹrẹ erọnvwọn re ghwa iyẹnrẹn vwo phiẹ ohra kugbe ohẹriẹ phiyọ ohri avwanre. Ukperẹ avwanre vwọ “fobọ phieghe nẹ iroro rẹ [avwanre],” ofori nẹ avwanre sẹro rẹ oma rẹ avwanre womarẹ a vwọ frẹkotọ roro sẹ obo re nyo vẹ obo re se kugbe uyota rẹ avwanre yonori vwẹ obuko re, rhọnvwephiyọ ohwohwo.—2Tẹ 2:2; 1Jọ 4:1.

16. Vwo nene obo rehẹ Rom 16:17, 18, die yen ofori nẹ avwanre ru ọ da dianẹ ihwo evo hrahra evuẹ rẹ efian kpahen uyota na?

¹⁶ Wẹ vẹ ihwo re fuevun ga Jihova dia vwọrẹ okugbe. Ọghẹnẹ guọnọre nẹ avwanre ga vwọrẹ okugbe. Ọ da dianẹ e tinkamu uyota na, ka sa ga vwọrẹ okugbe. Kohwo kohwo rọ hrahra evuẹ rẹ efian kpahan uyota na so ohẹriẹ phiyọ ukoko na, ọtiọyena Ọghẹnẹ si avwanre orhọ nẹ a “kẹnoma kẹ ayen.” E rhe ru ọtiọyeen, ayen ji se si avwanre nẹ uyota na.—Se Rom 16:17, 18.

17. Erere vọ yen che te avwanre obọ siẹrẹ a da mrẹ uyota na vughe je yọnrọn kokoroko?

¹⁷ Siẹrẹ avwanre da mrẹ uyota na vughe je yọnrọn kokoroko, ọ cha nẹrhẹ avwanre vẹ Jihova vwo uvi rẹ oyerinkugbe je nẹrhẹ esegbuyota rẹ avwanre gan. (Ẹf 4:15, 16) Ọnana cha sẹro rẹ avwanre vrabọ rẹ iyono vẹ evuẹ rẹ efian rẹ Eshu, je nẹrhẹ avwanre dia otọ rẹ ẹroevwote ri Jihova vwẹ ọke rẹ ukpokpogho rode na. Ọtiọyena ovwan gba yọnrọn kemu kemu rọ dia uyota kokoroko, “Ọghẹnẹ rẹ ufuoma na ko nene ovwan dia.”—Fil 4:8, 9.