Iphiẹrophiyọ ru Wo Vwo Kpahen Obaro na Che Shefia-a

1. Diesorọ Ebraham vwo vwo imuẹro nẹ o che vwiẹ ọmọ?

JIHOVA ve kẹ ugbeyan rọyen Ebraham nẹ ẹgborho akpọ na ejobi che vwo ebruphiyọ womarẹ ọmọ rọyen. (Jẹ 15:5; 22:18) Kidie nẹ Ebraham vwo esegbuyota okokodo kpahen Ọghẹnẹ, o de muo ẹro nẹ ive rẹ Ọghẹnẹ che rugba. Ẹkẹvuọvo, Ebraham vwọ hẹ ẹgbukpe 100 rẹ aye rọyen vwọ hẹ ẹgbukpe 90, jẹ ayen ji rhi vwiẹ ọmọ-ọ. (Jẹ 21:​1-7) Dedena, Baibol na da ta: “Womarẹ iphiẹrophiyọ, Ebraham vwo esegbuyota nẹ ọyen cha dia ọsẹ rẹ ẹgborho buebun kirobo ra tarọ jovwo.” (Ro 4:18) Wọ riẹnre nẹ oborẹ Ebraham phiẹrophiyọ na rugba. Ọ da rhe dia ọsẹ rẹ Aizik rọ dia ọmọ ro rhẹro rọyen ọke grongron rhire na. Die yen nẹrhẹ Ebraham vwo imuẹro nẹ Jihova che ru ive rọyen gba?

2. Diesorọ Ebraham vwo vwo imuẹro nẹ ive ri Jihova che rugba?

² Kidie nẹ Ebraham vẹ Jihova vwo oyerinkugbe rọ kpẹkpẹre, ọ da nẹrhẹ o vwo “imuẹro kokoroko nẹ oborẹ [Ọghẹnẹ] veri na” che rugba. (Ro 4:21) Jihova rhiabọreyọ Ebraham o de se ọvwata fikirẹ esegbuyota rọyen. (Jem 2:23) Kirobo rehẹ Rom 4:​18, esegbuyota vẹ iphiẹrophiyọ ri Ebraham churobọ si ohwohwo. Asaọkiephana, e jẹ a ta ota kpahen oborẹ ọyinkọn Pọl ta kpahen iphiẹrophiyọ kirobo ra niyẹnrẹn rọyen vwẹ Rom uyovwin 5.

3. Die yen Pọl ta kpahen iphiẹrophiyọ?

³ Pọl dje oboresorọ avwanre vwo vwo imuẹro nẹ “iphiẹrophiyọ na ku ohwo phiyotọ-ọ.” (Ro 5:5) Pọl je cha avwanre uko vwo vwo ẹruọ rẹ oborẹ iphiẹrophiyọ avwanre kerẹ Inenikristi sa vwọ ganphiyọ. A cha vwọ fuẹrẹn obo rọ sa vwọ dia ọtiọyen vwo nene oborẹ Pọl djunute vwẹ Rom 5:​1-5 na, gbe roro kpahen oborẹ owẹ komobọ rhiẹromrẹ. Wo vwo ruẹ ọtiọyena, wọ cha mrẹvughe nẹ iphiẹrophiyọ wẹn rhoma rhe ganphiyọ re. E vwo yono yanran na, e ji che dje oborẹ iphiẹrophiyọ wẹn sa vwọ gan vrẹ obo rọ hepha enẹna. E jẹ a ka fuẹrẹn iphiẹrophiyọ ri Pọl tare nẹ o che se ku ohwo phiyotọ-ọ.

IPHIẸROPHIYỌ RẸ AVWANRE VWORI

4. Die yen a ta ota kpahen vwẹ Rom 5:​1, 2?

⁴ Se Rom 5:​1, 2. Pọl si eta yena vwo rhe ukoko rọhẹ Rom. Iniọvo na yono kpahen Jihova vẹ Jesu, ayen vwo esegbuyota je dia Inenikristi re. Ọghẹnẹ de se ayen “evwata womarẹ esegbuyota,” ọ da je vwẹ ẹwẹn ọfuanfon vwọ jẹ ayen reyọ. Ọtiọyena, ayen vwo uvi rẹ iphiẹrophiyọ ayen ji vwo imuẹro nẹ o che te ayen obọ.

5. Iphiẹrophiyọ vọ yen Inenikristi ra jẹrẹyọ vwori?

⁵ Ọke vwọ yanran na, Pọl de si ileta vwo rhe Inenikristi ra jẹreyọ vwẹ Ẹfesọs kpahen iphiẹrophiyọ rẹ ayen vwori. “Uku vwọ kẹ ihwo efuanfon na” ọ hẹ usun rẹ iphiẹrophiyọ yena. (Ẹf 1:18) Pọl je vuẹ iniọvo rehẹ Kọlose kpahen asan rẹ ayen da cha riuku rẹ iphiẹrophiyọ rayen na. O sere “iphiẹrophiyọ ra sẹro rọyen kẹ ovwan vwẹ obodjuvwu.” (Kọl 1:​4, 5) Iphiẹrophiyọ rẹ Inenikristi ra jẹreyọ vwori yen, a vwọ rhọvwọn ayen nushi kpo arhọ ri bẹdẹ vwẹ odjuvwu, rọ dia asan rẹ ayen de che nene Kristi sun.​—1 Tẹ 4:​13-17; Ẹvw 20:6.

6. Die yen oniọvo ọvo ra jẹrẹyọ ta kpahen iphiẹrophiyọ rọyen?

⁶ Inenikristi ra jẹreyọ vwẹ ẹro ọghanghanre vwo ni iphiẹrophiyọ yena. Oniọvo Frederick Franz rọ dia ọvo usun rayen da ta: “Iphiẹrophiyọ avwanre na muẹro dẹn, o ji che rugba vwọ kẹ ihwo 144,000 na eje vwọ vrẹ oborẹ avwanre vwẹ ẹwẹn roro dede.” Ọ vwọ fuevun ga Ọghẹnẹ ikpe buebun re, vwẹ ikpe ri 1991 Oniọvo Franz da tanẹ: “Iphiẹrophiyọ avwanre yena je ghanre kẹ avwanre rhi te ọke na. . . . Avwanre je vwọ hẹrhẹ kpobarophiyọ ye, jẹ ọdavwaro avwanre vwo kpahọn ganphiyọ. O fori nẹ avwanre hẹrhẹ, o toro uche ikpe ro che gron te-e. Iphiẹrophiyọ rẹ avwanre vwori na ghanre kẹ vwẹ vrẹ obo ri jovwo.”

7-8. Iphiẹrophiyọ vọ yen Inenikristi buebun vwori? (Rom 8:​20, 21)

⁷ Iphiẹrophiyọ rẹ ihwo buebun re ga Jihova nonẹna vwori fẹnẹ ọ rẹ ihwo ra jẹreyọ na. Ọyen hẹ iphiẹrophiyọ ri Ebraham vwori rọ vwọ dia otọrakpọ na bẹdẹ vwẹ otọ rẹ Uvie rẹ Ọghẹnẹ. (Hib 11:​8-10, 13) Pọl si kpahen osa rọ hẹrhẹ ihwo ri vwo iphẹrophiyọ yena. (Se Rom 8:​20, 21.) Ọke wo vwo yono kpahen ive rehẹ Baibol na re ta ota kpahen obaro na ẹsosuọ, ọvọ yen ma kẹ wẹ omavwerhovwẹn? Ọ rọ tare nẹ wọ cha dia gbagba ẹdẹ ọvo je vrabọ rẹ umwemwu? Gbanẹ oma vwerhen owẹ wo vwo yono nẹ ihwo wẹn ri ghwuru cha rhoma rhe dia otọrakpọ na vwẹ iparadaisi? Ive nana nẹrhẹ wọ tẹnrovi obaro na “vẹ iphiẹrophiyọ.”

⁸ O wenẹ avwanre rhẹro rẹ arhọ ri bẹdẹ vwẹ odjuvwu yẹrẹ otọrakpọ na, avwanre vwo iphiẹrophiyọ rọ kẹ avwanre omavwerhovwẹn. Jẹ iphiẹrophiyọ rẹ avwanre vwori na sa ganphiyọ. Obo ri Pọl rhoma si dje oborẹ ọ sa vwọ dia ọtiọyen. E ja fuẹrẹn obo ro si kpahen iphiẹrophiyọ avwanre. E de ru ọtiọyen ọ cha nẹrhẹ e vwo imuẹro nẹ iphiẹrophiyọ avwanre na che rugba.

OBORẸ IPHIẸROPHIYỌ AVWANRE SE VWO MUẸRO

9-10. Vwo nene udje ri Pọl, die yen Inenikristi se rhẹro rọyen? (Rom 5:3) (Ni ihoho na.)

⁹ Se Rom 5:3. E se vwo vwo iphiẹrophiyọ ro muẹro, noso nẹ e se hirharoku ukpokpogho. Ọyena se gbe ohwo unu. Vwọrẹ uyota, Inenikristi eje se rhẹro rẹ ukpokpogho. Roro kpahen udje ri Pọl. Ọ vuẹ ihwo ri Tẹsalonaika nẹ: “Ọke rẹ avwanre vẹ ovwan vwọ herọ, ọkieje yen avwanre vwọ vuẹ ovwan nẹ a cha rioja rẹ ukpokpogho, ọyena yen obo re phiare na.” (1Tẹ 3:4) O de rhe si vwo rhe Inenikristi rehẹ Kọrẹnt: “Avwanre guọnọre nẹ ovwan riẹn kpahen ukpokpogho rẹ avwanre rhiẹromrẹ. . . Avwanre de roro nẹ avwanre che ghwu.”​—2Kọ 1:8; 11:​23-27.

¹⁰ Nonẹna, Inenikristi ji se rhẹro rẹ ukpokpogho sansan. (2Ti 3:12) Kẹ owẹ vwo? Wo vwo se Jesu gbuyota je dia odibo rọyen na, wo hirharoku ukpokpogho jovwo re? Ọ sa dianẹ igbeyan yẹrẹ ihwo orua vwẹ owẹ jehwẹ re. Ọ sa tobọ dianẹ ayen gboja kẹ wẹ re. Ẹgbaẹdavwọn wọ vwọ dia ohwo rẹ uyota vwẹ kemu kemu wo ruẹ so ebẹnbẹn kẹ wẹ vwẹ asan wo de ruiruo jovwo re? (Hib 13:18) Igọmeti vwọso wẹ kidie nẹ wọ vuẹ ihwo efa kpahen oborẹ wo segbuyota? Dedena, Pọl tare nẹ avwanre ghọghọ o toro o ka rẹ ukpokpogho avwanre hirharoku-u. Diesorọ ọ vwọ ta ọtiọyen?

11. Diesorọ o vwo fo nẹ e muegbe re vwo chirakon ri kebẹnbẹn kebẹnbẹn re se hirharoku?

¹¹ Avwanre sa ghọghọ siẹrẹ e de hirharokuẹ ukpokpogho fikirẹ erere ro no cha. Kirobo rẹ Rom 5:3 tare, “ukpokpogho nẹrhẹ e chirakon.” Inenikristi eje che hirharoku ukpokpogho, ọtiọyena o fori nẹ ayen chirakon. Eriyin na, ofori nẹ avwanre eje muegbe re vwo chirakon rẹ kebẹnbẹn kebẹnbẹn re se hirharoku. E de ru ọtiọyen ka sa mrẹ orugba rẹ oborẹ avwanre phiẹrophiyọ. Avwanre guọnọ dia kerẹ ihwo ri Jesu vwo vwẹ ẹwẹn ọke rọ vwọ ta ota kpahan ibi ri shephiyọ otọ rọ vọnre vẹ ikuta na-a. Ayen rhiabọreyọ ota na vẹ aghọghọ ẹsosuọ ẹkẹvuọvo, “ukpokpogho yẹrẹ omukpahen” vwọ vwomaphia, ayen de she. (Mt 13:​5, 6, 20, 21) Vwọrẹ uyota, e vwo hirharoku ẹvwọsuọ yẹrẹ ebẹnbẹn dia obo re vwerhoma-a, ẹkẹvuọvo e de chirakon rọyen, ọ ghwa erere cha. Vwẹ idjerhe vọ?

12. Mavo yen avwanre sa vwọ mrẹ erere siẹrẹ e de chirakon rẹ ebẹnbẹn?

¹² Odibo Jems djunute erere ra mrẹ siẹrẹ e de chirakon rẹ ebẹnbẹn. O de si: “Jẹ akoechiro ruiruo rọyen gba rere ovwan sa vwọ gba tototo vwẹ kẹdia kẹdia, emu vuọvo vwo jẹ ovwan ẹkanrọn.” (Jem 1:​2-4) Jems djisẹ rẹ akoechiro kerẹsiẹ ra da mrẹ nẹ o vwo iruo ro che ru. Iruo vọ yen akoechiro che ru? Ọ sa nẹrhẹ e vwo iwan kerẹ odirin, esegbuyota je nẹrhẹ a vwẹroso Ọghẹnẹ phiyọ. Ẹkẹvuọvo, o ji vwo erere ọfa kiriguo ra cha mrẹ vwo nẹ akoechiro rhe.

13-14. Erere vọ yen akoechiro ghwa cha, kẹ mavọ yen o vwo churobọ si iphiẹrophiyọ? (Rom 5:4)

¹³ Se Rom 5:4. Pọl tare nẹ akoechiro nẹrhẹ a mrẹ “ẹroesiri rẹ Ọghẹnẹ.” Ọ cha nẹrhẹ Jihova rhiabọreyọ owẹ. Ọ dia ọnana mudiaphiyọ nẹ oma vwerhen Jihova siẹrẹ wo de hirharokuẹ ebẹnbẹn yẹrẹ edavwini-i. Ukperẹ ọtiọyen, oma vwerhọn kidie nẹ wọ fuevun chirakon. Ọ vwerhoma ra vwọ riẹn nẹ akoechiro avwanre nẹrhẹ Jihova ghọghọ.​—Un 5:12.

¹⁴ Karophiyọ nẹ Ebraham chirakon rẹ edavwini ọ da nẹrhẹ ọ mrẹ aroesiri rẹ Ọghẹnẹ. Jihova niro kerẹ ugbeyan Rọyen o de se ọvwata. (Jẹ 15:6; Ro 4:​13, 22) Ọ je sa dia ọtiọyen kẹ avwanre. Ọ dia uche rẹ iruo re ru vwẹ ẹga rọyen yẹrẹ uphẹn rẹ ẹga ra rhiavwerhen rọyen yen muo vwo rhiabọreyọ avwanre-e. Ẹkẹvuọvo, o ruẹ ọtiọyen siẹrẹ a da fuevun. Avwanre eje se chirakon o toro ikpe, ẹdia yẹrẹ ẹgba rẹ avwanre vwori-i. Wọ fuevun chirakon rẹ ebẹnbẹn enẹna? Ọ da dia ọtiọyen, karophiyọ nẹ obo wo ruẹ na nẹrhẹ oma vwerhen Jihova. A da rien nẹ Ọghẹnẹ rhiabọreyọ avwanre, ọnana sa nẹrhẹ iphiẹrophiyọ avwanre ganphiyọ.

IPHIẸROPHIYỌ RỌ NABỌ MUẸRO

15. Ẹkpo ọfa vọ yen Pọl vwọphia, kẹ diesorọ ọyena se vwo gbe ihwo evo unu?

¹⁵ Kirobo ri Pọl tare, oma vwerhen Jihova siẹrẹ avwanre da fuevun ga ji chirakon rẹ ebẹnbẹn. Vwo oniso rẹ obo ri Pọl rhoma ta: “Ẹroesiri rẹ Ọghẹnẹ na kọ rha nẹrhẹ avwanre vwo iphiẹrophiyọ, iphiẹrophiyọ na ku ohwo phiyotọ-ọ.” (Ro 5:​4, 5) Ọnana se gbe ihwo evo unu. Diesorọ? Kidie vwo nene obo rehẹ Rom 5:​2, Pọl ka tanẹ Inenikristi rehẹ Rom vwo iphiẹrophiyọ jovwo re, ọyehẹ “iphiẹrophiyọ rẹ urinrin rẹ Ọghẹnẹ.” Ọtiọyena, ohwo sa nọ, ‘Ọ da dianẹ Inenikristi yena vwo iphiẹrophiyọ jovwo re, kẹ diesorọ Pọl vwọ rhoma djunute iphiẹrophiyọ vwẹ ota rọyen?’

16. Mavọ yen iphiẹrophiyọ rẹ ohwo vwori sa vwọ ganphiyọ? (Ni ihoho na.)

¹⁶ E se vwo ẹruọ rẹ obo ri Pọl mudiaphiyọ siẹrẹ a da riẹn nẹ iphiẹrophiyọ ọyen obo re ganphiyọ ganphiyọ. Kerẹ udje: Wọ karophiyọ ọke wo ke vwo nyo kpahen iphiẹrophiyọ rọhẹ ota rẹ Ọghẹnẹ ẹsosuọ? Vwẹ ọke yena ọ sa dianẹ wo rorori nẹ a vwọ dia otọrakpọ na bẹdẹ vwẹ iparadaisi dia obo re cha sa phia-a. Ẹkẹvuọvo, wo vwo vughe Jihova ji yono kpahen ive ri Baibol phiyọ na, o de rhi muwẹro dẹn nẹ iphiẹrophiyọ na che rugba.

17. Idjerhe vọ yen iphiẹrophiyọ wẹn vwọ ganphiyọ wọ vwọ vwomakpahotọ ji bromaphiyame nu?

¹⁷ Wọ vwọ vwomakpahotọ ji bromaphiyame nu, wọ da nabọ rhi vughe Jihova ji vwo ẹguọnọ rọyen, iphiẹrophiyọ wẹn da rhe ganphiyọ. (Hib 5:13–6:1) Ọ sa dianẹ wo rhiẹromrẹ obo re djunute vwẹ Rom 5:​2-4 na re. Wo hirharoku ukpokpogho buebun, ẹkẹvuọvo wo vwo chirakon, wọ da rhe mrẹvughe nẹ Ọghẹnẹ rhiabọreyọ owẹ. Wọ vwọ riẹn nẹ oma wẹn vwerhọn na, wọ da rhe mrẹ erọnvwọn efa re nẹrhẹ o muwẹro nẹ obo ro veri na che rugba. Iphiẹrophiyọ wẹn da rhe gan vrẹ obo rọ hepha ọke rẹsosuọ ye. O de rhi muwẹro komobọ, je mrẹ nẹ ọ cha phia. O de rhi wene kẹdia kẹdia rẹ akpeyeren wẹn ji wene obo ru wo nene ihwo orua wẹn yerẹn wan, oka rẹ orhiẹn ru wo brẹ kugbe obo wọ reyọ ọke wẹn vwo ruiruo wan.

18. Imuẹro vọ yen Jihova vwọ kẹ avwanre?

¹⁸ Ọyinkọn Pọl vwẹ ẹkpo ọghanghanre ọvo vwọphia shekpahen iphiẹrophiyọ ru wo vwori ọke wọ vwọ riẹn nẹ Ọghẹnẹ rhiabọreyọ owẹ. Ọ kẹ wẹ imuẹro nẹ obo wo phiẹrophiyọ na che rugba. Die yen sa nẹrhẹ o muwẹro? Ẹwẹn ọfuanfon na mu Pọl vwọ vuẹ Inenikristi nẹ: “Iphiẹrophiyọ na ku ohwo phiyotọ-ọ; kidie Ọghẹnẹ reyọ ẹwẹn ọfuanfon rọyen rọ vwọ kẹ avwanre vwo djephia nẹ ọyen vwo ẹguọnọ avwanre.” (Ro 5:5) Ọtiọyena wo vwo obo re sa nẹrhẹ iphiẹrophiyọ wẹn na muwẹro dẹn.

19. Die yen sa kẹ wẹ imuẹro nẹ obo ru wo phiẹrophiyọ che rugba?

¹⁹ Roro kpahen obo ri Jihova ve kẹ Ebraham, kugbe obo ro rhiabọreyọ ji no kerẹ ugbeyan Rọyen. Oborẹ Ebraham phiẹrophiyọ rugba. Baibol na da ta: “Ebraham vwo vwo edirin nu, ive nana de te obọ.” (Hib 6:15; 11:​9, 18; Ro 4:​20-22) Obo ro phiẹrophiyọ na shefia-a. O se muwẹro dẹn nẹ wọ da fuevun, oborẹ wo phiẹrophiyọ che rugba. Iphiẹrophiyọ wẹn muẹro; ọyen obo re nẹrhẹ a ghọghọ, o che ku we phiyotọ-ọ! (Ro 12:12) Pọl de si: “E jẹ Ọghẹnẹ rọ kẹ ohwo iphiẹrophiyọ, kẹ ovwan aghọghọ rode vẹ ufuoma kidie ovwan vwẹrosuọ, rere iphiẹrophiyọ rẹ ovwan sa vwọ ganphiyọ womarẹ ẹgba rẹ ẹwẹn ọfuanfon na.”​—Ro 15:13.