Oborẹ Ẹrhovwo Avwanre sa Vwọ Ghwotọphiyọ

1. Die yen Jihova vuẹ idibo rọyen nẹ ayen ru? (Ni uhoho na.)

ONO yen e se brura siẹrẹ a da guọnọ uchebro vẹ odjekẹ? Avwanre riẹn ẹkpahọnphiyọ rẹ onọ yena. Avwanre sa nẹrhovwo rhe Jihova Ọghẹnẹ. Ọ vuẹ avwanre nẹ e ru ọtiọyen. Ọ guọnọre nẹ a nẹrhovwo ọkieje, e re ru ọtiọyen “kẹdẹ kẹdẹ.” (1Tẹ 5:17) A sa nẹrhovwo rhe Jihova odedede je guọnọ odjekẹ rọyen vwẹ kẹdia kẹdia rẹ akpeyeren. (Isẹ 3:​5, 6) Kidie nẹ ọyen Ọghẹnẹ rọ kẹ okẹ ghwologhwolo, Jihova tare nẹ avwanre nẹrhovwo rhe ọyen uchabọ ra guọnọre eje.

2. Die yen a cha ta ota kpahen vwẹ uyono nana?

² Ẹrhovwo pha ghanghanre kẹ avwanre. Ẹkẹvuọvo, avwanre sa mrẹ bẹnbẹn a vwọ mrẹ ọke nẹrhovwo fikirẹ erọnvwọn buebun re ruẹ. Vwọba e ji se no nẹ o fori ẹrhovwo avwanre vwọ ghwotọphiyọ. Ọ vwerhoma nẹ, a sa mrẹ ọbọngan vẹ odjekẹ vwẹ Baibol. Vwẹ uyono nana, a cha ta ota kpahen obo ra sa vwọ vwẹrokere udje ri Jesu vwọ rhuẹrẹ ọke phiyọ vwọ kẹ ẹrhovwo ẹnẹ. A je cha ta ota kpahen erọnvwọn iyorin re se djunute vwẹ ẹrhovwo avwanre rere ọ vwọ ghwotọphiyọ.

JESU RHUẸRẸ ỌKE PHIYỌ VWỌ NẸRHOVWO

3. Die yen Jesu riẹnre kpahen ẹrhovwo?

³ Jesu riẹnre nẹ Jihova ni ẹrhovwo avwanre ghanghanre. Ọke grongron tavwen ọ ke rhe otọrakpọ, ọ mrẹ oborẹ Ọse rọyen kpahenphiyọ ẹrhovwo rẹ eya vẹ eshare re fuevun. Kerẹ udje, ọ hẹ etiyin ọke rẹ Ọse rọyen vwọ kpahenphiyọ ẹrhovwo ri Hanah, Devid, kugbe Ilaija, vẹ ihwo efa. (1Sa 1:​10, 11, 20; 1Iv 19:​4-6; Un 32:5) A gbe ta Jesu vwo yono idibo rọyen oborẹ ayen sa vwọ nẹrhovwo vẹ imuẹro ọkieje!​—Mt 7:​7-11.

4. Die yen e yono vwo nẹ ẹrhovwo ri Jesu rhe?

⁴ Jesu phi udje phiyotọ rẹ idibo rọyen che nene womarẹ ẹrhovwo rọ nẹ rhe Jihova. Ọkieje yen Jesu vwọ nẹrhovwo ọke ro vwo ruiruo aghwoghwo rọyen. Kidie nẹ Jesu fobọ mrẹ uphẹ-ẹn, ihwo buebun ji bro cha, ọ da rhuẹrẹ ọke phiyọ rọ vwọ nẹrhovwo. (Mk 6:​31, 45, 46) Edegburhiọke yen o vwo vrẹn rere ọ sa vwọ mrẹ ọke vwọ nẹrhovwo. (Mk 1:35) Ẹdẹ ọvo o che vwo brorhiẹn ọghanghanre, ọ da nẹrhovwo kọkirhie. (Lu 6:​12, 13) Vwẹ ason rọ koba tavwen o ki ghwu, Jesu nẹrhovwo abọ buebun rere ọ sa vwọ tẹnrovi obo rọ sa vwọ wian owian rọ ma bẹn kẹ vwẹ otọrakpọ re.​—Mt 26:​39, 42, 44.

5. Mavọ yen a sa vwọ vwẹrokere Jesu siẹrẹ a da nẹrhovwo?

⁵ Udje ri Jesu yono avwanre nẹ o toro obo erọnvwọn bun avwanre abọ te-e, o fori nẹ a rhuẹrẹ ọke phiyọ a vwọ nẹrhovwo. Kerẹ Jesu, a sa rhuẹrẹ ọke phiyọ womarẹ e vwo vrẹn edegburiọke yẹrẹ a vwọ diotọ krẹ ovwọnvwọn rere a sa vwọ mrẹ ọke vwọ nẹrhovwo. E de ru ọtiọyen, jẹ e djephia kẹ Jihova nẹ avwanre vwo ọdavwaro kpahen uphẹn roghẹresan nana. Oniọvo aye Lynne karophiyọ oborẹ oma vwerhen rọ te ọke rọ ka vwọ riẹn kpahen uphẹn rẹ ẹrhovwo. Ọ da ta, “Me vwọ riẹn nẹ me sa ta ota kẹ Jihova kọke kọke, ọnana chọn vwẹ uko vwọ mrẹ kerẹ ugbeyan rọ kẹrẹ ovwẹ je guọnọ ru ẹrhovwo mẹ rere ọ vwọ ghwotọphiyọ.” Aphro herọ-ọ ọtiọyen oma ji ru avwanre buebun. Ọtiọyena e jẹ a ta ota kpahen erọnvwọn iyorin kiriguo re se djunute vwẹ ẹrhovwo rẹ avwanre.

ERỌNVWỌN IYORIN RE PHA GHANGHANRE RE SE DJUNUTE VWẸ ẸRHOVWO

6. Vwo nene obo rehẹ Ẹvwọphia 4:​10, 11, die yen ofori nẹ a vwọ kẹ Jihova?

⁶ Jiri Jihova. Vwẹ emramrẹ igbevwunu ọvo, ọyinkọn Jọn da mrẹ ekpako 24 re vwẹ ẹga kẹ Jihova vwẹ odjuvwu. Ayen jiri Ọghẹnẹ, jẹ ayen tanẹ ọyen ohwo ro fori rọ vwọ reyọ “urinrin, ọghọ kugbe ẹgba” na. (Se Ẹvwọphia 4:​10, 11.) Emekashe re fuevun ji vwo iroro buebun re sorọ ayen vwọ vwẹ ọghọ vẹ ujiri vwọ kẹ Jihova. Ayen nabọ vughe kidie ayen vẹ ọyen gba hẹ odjuvwu. Ayen mrẹ iruemu rọyen vwẹ obo ro ruẹ. Ayen da mrẹ obo ro ruẹ erọnvwọn wan, ọnana mu ayen vwo jiro.​—Job 38:​4-7.

7. Diesorọ e vwo jiri Jihova?

⁷ Avwanre guọnọ jiri Jihova vwẹ ẹrhovwo rẹ avwanre, ji djunute ọdavwaro vẹ oboresorọ avwanre vwo vwo ẹguọnọ rọyen. Wo vwo se ji yono Baibol na ye, davwẹngba vwọ jokaphiyọ iruemu ri Jihova ru wo vwo omavwerhovwẹn kpahen. (Job 37:23; Ro 11:33) Je vuẹ Jihova oborẹ oma ru we kpahen iruemu rọyen na. Avwanre ji se jiri Jihova fikirẹ obo ro ruẹ kẹ avwanre vẹ iniọvo rehẹ akpọeje. Ọ sẹro je vwẹrote avwanre ọkieje.​—1Sa 1:27; 2:​1, 2.

8. Erhọ yen iroro evo re sorọ a vwọ kpẹvwẹ Jihova? (1 Tẹsalonaika 5:18)

⁸ Kpẹvwẹ Jihova. O vwo iroro buebun re sorọ a vwọ kpẹvwẹ Jihova vwẹ ẹrhovwo avwanre. (Se 1 Tẹsalonaika 5:18.) Avwanre sa kpẹvwẹ fikirẹ erọnvwọn iyoyovwin ro ruẹ kẹ avwanre; kidie, kemu kemu esiri na ejobi obọ rọyen i nẹ cha. (Jem 1:17) Kerẹ udje, e se dje ọdavwaro phia kpahen erọnvwọn rọ mare kugbe otọrakpọ rọ pha yoyovwin na. A je sa kpẹvwẹ fikirẹ arhọ rọ vwọ kẹ avwanre, orua, igbeyan, kugbe iphiẹrophiyọ re vwori. O ji fo nẹ a kpẹvwẹ Jihova fikirẹ uphẹn rẹ avwanre vwori ra vwọ dia igbeyan rọyen.

9. Diesorọ o vwo fo nẹ e dje ọdavwaro phia kpahen obo ri Jihova ru kẹ avwanre?

⁹ Ofori nẹ avwanre ọvuọvo davwẹngba vwo roro kpahen oboresorọ e vwo dje ọdavwaro phia kẹ Jihova. Avwanre yerẹn vwẹ akpọ rẹ ihwo re riẹn ẹse-e hepha. Ọkieje yen ihwo vwọ tẹnroviẹ oborẹ ayen guọnọre nẹ e ru kayen ukperẹ ayen vwo dje ọdavwaro phia. A da vwẹrokere uruemu tiọyena, ẹrhovwo avwanre kọ cha dia ọ rẹ oyare ọvo. A sa vwọ kẹnoma kẹ uruemu tiọyena, ko fori nẹ a vwẹ ọkieje dje ọdavwaro phia kpahen obo ri Jihova ruẹ kẹ avwanre.​—Lu 6:45.

10. Mavọ yen ẹwẹn rẹ ọdavwaro vwọ chọn oniọvo aye ọvo uko vwo chirakon? (Ni uhoho na.)

¹⁰ Uruemu ra vwọ kpẹvwẹ ẹse sa chọn avwanre uko vwo chirakon rẹ ebẹnbẹn. Roro kpahen obo re phia kẹ Kyung-sook, re gbikun rọyen phiyọ Uwevwin Orhẹrẹ ri January 15, 2015. Ra vwọ fuẹrẹn ni, a da rhe mrẹ nẹ o vwo ọga rẹ ikansa ro krotọ re rọ bẹn esivwo. Ọ da ta: “Ọga nana nẹrhẹ ofu dje vwe mamọ, oshọ mu vwe kidie mi niro nẹ akpọ mẹ ghwe re nure.” Die yen chọn rọ uko vwo chirakon? Ọ tare nẹ kason kason o ki sherhẹ, o kpo obenu rẹ uwevwin rọyen ọ me nẹrhovwo vwọ kpẹvwẹ Jihova kpahen erọnvwọn iyorin ro ru kẹ vwẹ ẹdẹ yena. Ọnana nẹrhẹ ẹnwan rọyen kpotọ je nẹrhẹ o djephia nẹ o vwo ẹguọnọ ri Jihova. O rhiẹromrẹ oborẹ Jihova sẹro rẹ idibo rọyen re fuevun wan siẹrẹ ayen de hirharoku ebẹnbẹn, ọ je rhe mrẹvughe nẹ ebruphiyọ re vwo vwẹ akpeyeren bun vrẹ edavwini re hirharokuẹ. Kerẹ Kyung-sook, avwanre vwo iroro buebun re sorọ a vwọ kpẹvwẹ Jihova, ọ da tobọ dianẹ e hirharoku ọdavwini. Re vwo dje ọdavwaro phia kẹ vwẹ ẹrhovwo sa chọn avwanre uko vwo chirakon je sẹro rẹ aghọghọ avwanre.

11. Diesorọ idibo ri Jesu vwọ guọnọ uduefiogbere ọke rẹ Jesu vwo kpo odjuvwu nu?

¹¹ Rẹ Jihova nẹ ọ kẹ wẹ uduefiogbere vwẹ iruo aghwoghwo na. Tavwen Jesu ki rhivwin kpo odjuvwu, Jesu karophiyọ idibo rọyen nẹ ayen vwo owian rẹ ayen vwo se oseri kpahọn “vwi Jerusalẹm, vwi Judia, vẹ Sameria, rhiri re te oba rẹ akpọ na.” (Iru 1:8; Lu 24:​46-48) Ọmọke vwọ wan nu, ilori rẹ ẹga rẹ ihwo ri Ju de mu ọyinkọn Pita vẹ Jọn kpo aguare ri Sanhẹdrin, je vuẹ ayen nẹ ayen dobọ rẹ iruo aghwoghwo na ji, ayen tobọ djuguegue mu ayen. (Iru 4:​18, 21) Kẹ die yen Pita vẹ Jọn ruru?

12. Vwo nene obo rehẹ Iruo rẹ Iyinkọn Na 4:​29, 31, die yen idibo na ruru?

¹² Vwẹ ẹkpahọnphiyọ rẹ ayen vwọ kẹ ilori rẹ ẹga rẹ ihwo ri Ju, Pita vẹ Jọn da ta: “O de fo vwẹ obaro rẹ Ọghẹnẹ ra vwo kerhọn rẹ ovwan jẹ Ọghẹnẹ vwo, ovwan ọvo gbe brorhiẹ nana; Kidie obo rẹ avwanre mrẹre kugbe ọ re nyori na o vwọ ọke re vwo jẹ ayen ẹta-a.” (Iru 4:​19, 20) Re vwo siobọnu Pita vẹ Jọn nu, idibo na da kpẹvwẹ Jihova vwẹ ẹrhovwo je tẹnrovi eruo rẹ ọhọre rọyen. Ayen da ta: “Kẹ idibo wẹn aroeyivwo vwo ghwoghwo ota na.” Jihova kpahenphiyọ.​—Se Iruo rẹ Iyinkọn Na 4:​29, 31.

13. Die yen avwanre se yono vwo nẹ udje ri Jin-hyuk rhe?

¹³ Avwanre sa vwẹrokere idibo na vwo ghwoghwo ọ da tobọ dianẹ ihwo ri suẹn vuẹ avwanre nẹ a dobọji. Roro kpahen udje rẹ oniọvo ọshare Jin-hyuk, re mu phiyọ uwodi kidie ọ rhọnvwe vwobọ vwẹ oseghe rẹ usuo-on. Vwevunrẹ uwodi, a da vwẹ owian kẹ oniọvo na nẹ ọ vwẹrote ihwo re mu phiyọ isẹro rẹ obọ rayen, a vuẹrẹ nẹ vwọ vrẹ oborẹ ayen guọnọre, ọ ta ota vuọvo vwo nẹ Baibol na vwọ kẹ aye-en yẹrẹ orọnvwọn ọfa-a. Ọ rẹ Jihova nẹ ọ kẹ ọyen uduefiogbere kugbe aghwanre rere ọ sa vwọ reyọ kuphẹn kuphẹn ro rhiephiyọ vwo ghwoghwota kẹ ayen. (Iru 5:29) Ọ da ta: “Jihova kpahenphiyọ ẹrhovwo mẹ ọ da kẹ vwẹ uduefiogbere vẹ aghwanre me sa vwọ ton uyono ri Baibol rẹ ibrẹro iyorin phiyọ vwẹ anurhoro rẹ isẹro rayen. Ason de te, ki mi si ileta re me cha vwọ kẹ ihwo re me vẹ ayen gba hẹ uwodi vwẹ ẹdẹ rọ vwọ kpahọn.” Avwanre ji se vwo imuẹro nẹ Jihova cha chọn avwanre uko vwo ru iruo aghwoghwo avwanre fiotọ. Kerẹ Jin-hyuk, a sa rẹ nẹ Ọ kẹ avwanre uduefiogbere kugbe aghwanre.

14. Die yen sa chọn avwanre uko siẹrẹ e de nene ebẹnbẹn muabọ? (Une rẹ Ejiro 37:​3, 5)

¹⁴ Rẹ Jihova nẹ ọ chọn wẹ uko vwo yerin ghene ebẹnbẹn wẹn. Avwanre buebun hirharokuẹ ebẹnbẹn kerẹ ọga rẹ ugboma yẹrẹ ọ rẹ iroro, ohwo re vwo ẹguọnọ kpahen ro ghwuru, ebẹnbẹn rẹ orua, omukpahen vẹ efa ọtiọyen. Ega re hra nene asan eje kugbe ifovwin je rhe nẹrhẹ ọ bẹn re vwo chirakon rẹ ebẹnbẹn nana. Vuẹ Jihova oborẹ oma ru we. Ta ota kẹ kpahen ẹdia na kirobo rẹ wọ cha ta ota kẹ ugbeyan rọ kẹrẹ owẹ. Jẹ o muwẹro nẹ Jihova che “ruo kẹ wẹ.”​—Se Une rẹ Ejiro 37:​3, 5.

15. Mavọ yen ẹrhovwo sa vwọ chọn avwanre uko vwo “chirako vwẹ ukpokpogho”? Djudje rọyen.

¹⁵ Re vwo mu oma phiyọ ẹrhovwo ẹnẹ cha chọn avwanre uko vwo “chirako vwẹ ukpokpogho.” (Ro 12:12) Jihova riẹn ebẹnbẹn rẹ idibo rọyen hirharokuẹ​—“ọye ọvo ri nyo oviẹ rayen.” (Un 145:​18, 19) Oniọvo Kristie rọhẹ ẹgbukpe 29 rọ je dia ọkobaro rhe mrẹvughe nẹ ota yena uyota. Kpregede na o de rhi she ro okpọga ro rhẹro rọye-en. Ọnana kọ rhe so ofudjevwe vwọ kẹ. Ọke vwọ yanran na, kọ je rhe riẹn nẹ oni rọyen vwo ọga re che se sivwi-in. Kristie da ta: “Kẹdẹ kẹdẹ yen me rẹ Jihova nẹ ọ kẹ vwẹ ẹgba mi se vwo yerin ghene ebẹnbẹn nana. Me davwẹngba mi vwo ru erọnvwọn re sa nẹrhẹ oyerinkugbe mẹ vẹ Jihova ganphiyọ ọkieje womarẹ uyono ẹra kugbe uyono romobọ.” Ọ da je ta: “Ẹrhovwo chọn vwẹ uko vwo chirakon rẹ ebẹnbẹn na. Me riẹnre nẹ Jihova vẹ ovwẹ herọ ọkieje, ọnana da nẹrhẹ ẹwẹn mẹ totọ. Dede nẹ ebẹnbẹn mẹ ghwe notọ ugege yena-a, Jihova kpahenphiyọ ẹrhovwo mẹ je nẹrhẹ mi vwo ẹwẹn re dọe.” E ja karophiyọ nẹ Jihova “riẹn obo ro sivwi ihwo efuanfon rọye nẹ ọdavwini.”​—2Pi 2:9.

16. Diesorọ a vwọ guọnọ ukẹcha ri Jihova e se vwo phi edavwini kparobọ?

¹⁶ Rẹ Jihova nẹ ọ chọn wẹ uko vwo phi edavwini kparobọ. Kerẹ ihwo re gbare-e, ọkieje yen e vwo nene ọdavwini re vwo ru obo re chọre muabọ. Eshu davwẹngba rọyen eje o vwo ru ọdavwini na ganphiyọ. Idjerhe ọvo ro vwo ru ọnana yen ọ vwọ reyọ erọnvwọn ra vwọ diotọ ri titi ọfanrhiẹn vwo miovwo iroro rẹ avwanre. Erọnvwọn ra vwọ diotọ tiọyena sa nẹrhẹ ẹwẹn rẹ avwanre vọn vẹ iroro ri fori-i​—iroro tiọyena se miovwo oka rẹ ohwo rẹ avwanre hepha je nẹrhẹ e ru umwemwu ọgangan.​—Mk 7:​21-23; Jem 1:​14, 15.

17. Mavọ yen e se vwo ru nene oyare avwanre ra vwọ kẹnoma kẹ edavwini? (Ni uhoho na.)

¹⁷ Avwanre guọnọ ukẹcha ri Jihova e se vwo phi ọdavwini re vwo ru obo re chọre kparobọ. Vwẹ ẹrhovwo rẹ udje na, Jesu rẹ re nẹ: “Wo suẹn avwanre ro ọdavwini-i, ẹkẹvuọvo si avwanre nẹ ukpokpogho.” (Mt 6:13) Jihova muegbe rọ vwọ chọn avwanre uko, jẹ ofori nẹ a nokpẹn rẹ ukẹcha rọyen. O ji fo nẹ e ru nene oyare avwanre. A sa jowọ ra vwọ kẹnoma kẹ erharhe iroro rẹ akpọ rẹ Eshu nana titẹ. (Un 97:10) E se mu ẹwẹn avwanre kpahen omamọ iroro womarẹ isese vẹ eyono ri Baibol na. Re vwo kpo uyono ji vwobọ vwẹ iruo aghwoghwo na je cha chọn avwanre uko vwọ sẹro rẹ iroro avwanre. Jihova ji ve nẹ ọ cha vwẹ uphẹn kẹ avwanre ra vwọ davwen avwanre ni vrẹ oborẹ udu avwanre gbare-e.​—1Kọ 10:​12, 13.

18. Die yen ofori nẹ avwanre eje ru kpahen ẹrhovwo?

¹⁸ Vwẹ ẹdẹ re koba nana, ofori nẹ avwanre ọvuọvo nẹrhovwo vrẹ obo ri jovwo rere a sa vwọ fuevun kẹ Jihova. Rhuẹrẹ ọke phiyọ wọ vwọ nẹrhovwo ro nẹ otọ rẹ ubiudu rhe kẹdẹ kẹdẹ. Jihova guọnọre nẹ a ta obo rehẹ ubiudu avwanre kẹ vwẹ ẹrhovwo. (Un 62:8) Jiri Jihova wọ je kpẹvwẹ vwọ kẹ emu eje ro ruẹ kẹ avwanre. Rẹ nẹ ọ chọn wẹ uko wo se vwo fiudugberi vwẹ iruo aghwoghwo na. Je rẹ nẹ ọ chọn wẹ uko vwo yerin ghene ebẹnbẹn ji phi edavwini ru wo hirharokuẹ kparobọ. Wo jẹ ohwo vuọvo yẹrẹ emu vuọvo da wẹ obọ jẹ wo vwo jẹ ẹrhovwo ẹnẹ rhe Jihova ọkieje-e. Kẹ, mavọ yen Jihova kpahenphiyọ ẹrhovwo avwanre wan? A cha ta ota kpahen onọ yena vwẹ uyono rọ vwọ kpahen ọnana.