Ndi Ngani Ri Tshi Fanela U Rabela Misi Yoṱhe?
“Rabelani misi yoṱhe. Ivhani na dzindivhuho zwithuni zwoṱhe.”—1 Vha-Thesalonika 5:17, 18.
1, 2. Daniele o sumbedza hani uri u a dzhiela nṱha ndugelo ya u rabela, nahone zwenezwo zwo kwama hani vhushaka hawe na Mudzimu?
MUPOROFITA Daniele o vha e na nḓowelo ya u rabela Mudzimu luraru nga ḓuvha. O vha a tshi gwadama bulini ḽa lufhera lwawe lwa nṱha, ḽe ḽa sedza thungo ya muḓi wa Yerusalema, nahone a rabela henefho. (1 Dzikhosi 8:46-49; Daniele 6:11) Naho ndaela ya vhamusanda yo thivhela u rabela muthu naho e ufhio nga nnḓa ha Dario, khosi ya Vhamidiani, Daniele ho ngo litsha u rabela. Naho zwo vha zwi tshi vhea vhutshilo hawe khomboni kana hai, hoyu munna o rabela Mudzimu misi yoṱhe.
2 Yehova o dzhia hani Daniele? Musi muruṅwa Gabriele a tshi ḓa u itela u fhindula thabelo dza Daniele, o amba uri muporofita ndi “muthu a tamisaho” kana “mufuniwa.” (Daniele 9:20-23; The New English Bible) Kha vhuporofita ha Hesekiele, Yehova o amba uri Daniele ndi munna muvhuya. (Hesekiele 14:14, 20) Vhutshiloni hawe, zwi vhonala uri thabelo dza Daniele dzo ita uri a vhe na vhushaka ha tsini na Mudzimu wawe, zwithu zwe zwa ṱhogomelwa na nga Dario.—Daniele 6:17.
3. Samusi zwo sumbedzwa nga zwe muṅwe murumiwa a ṱangana nazwo, thabelo i nga ri thusa hani u dzula ri tshi fulufhedzea?
3 U rabela misi yoṱhe zwi nga dovha zwa ri thusa u sedzana na milingo i konḓaho. Sa tsumbo, ṱhogomelani mafhungo a Harold King, murumiwa wa ngei China we a haṱulelwa u dzula dzhele e eṱhe miṅwaha miṱanu. A tshi ṱhogomela zwe a ṱangana nazwo, Wahashu King o ri: “Ndi nga kha ḓi thivhelwa u vha na vhushaka na vhathu, fhedzi a huna muthu ane a nga nthivhela u vha na vhushaka na Mudzimu. . . . Ngauralo, muṅwe na muṅwe we a vha a tshi pfuka seleni yanga o vha a tshi mmbona ndo gwadama ndi tshi khou rabelela nṱha luraru nga ḓuvha, ndi tshi khou humbula Daniele, we Bivhili ya amba ngae. . . . Zwi vhonala uri nga tshenetsho tshifhinga muya wa Mudzimu wo livhisa muhumbulo wanga nga nḓila i bvelelaho na u ita uri ndi dzike. Thabelo yo nṋea maanḓa na khuthadzo vhukuma!
4. Ndi mbudziso dzifhio dzi kwamaho thabelo dzine ra ḓo dzi haseledza kha ino thero?
4 Bivhili i ri: “[“Rabelani misi yoṱhe,” NW]. Ivhani na dzindivhuho zwithuni zwoṱhe.” (1 Vha-Thesalonika 5:17, 18) Ri tshi dzhiela nṱha yeneyi nyeletshedzo, kha ri ṱhogomele mbudziso dzi tevhelaho: Ndi ngani ri tshi fanela u dzhiela nṱha thabelo dzashu? Ri na zwiitisi zwifhio zwa u rabela Yehova misi yoṱhe? Nahone ri fanela u ita mini arali ri tshi ḓipfa ri sa fanelei u rabela Mudzimu nga ṅwambo wa vhukhakhi hashu?
Fhaṱani Vhushaka Nga U Rabela
5. Thabelo i ri thusa u ḓiphina nga vhushaka vhufhio ho khetheaho?
5 Naa ni a ṱoḓa uri Yehova a ni dzhie ni khonani yawe? O amba nga muthomi wa lushaka Abrahamu nga yeneyo nḓila. (Yesaya 41:8; Yakobo 2:23) Yehova u ṱoḓa ri tshi vha na vhushaka ho raloho nae. U a ri ramba vhukuma uri ri sendele tsini nae. (Yakobo 4:8) Naa honohu u rambiwa a ho ngo tea u ita uri ri humbule nga ho dzikaho nga ha ndugiselelo yo khetheaho ya u rabela? Samusi zwi tshi konḓa vhukuma u ita ndugiselelo dza u amba na mushumeli wa muvhuso wa vhuimo ha nṱha, zwi nga konḓa vhukuma u vha khonani yawe! Fhedzi Musiki wa fhethu hoṱhe u ri ṱuṱuwedza uri ri ambe nae nga thabelo ro vhofholowa, tshifhinga tshiṅwe na tshiṅwe tshine ra ṱoḓa u ita nga u ralo. (Psalme ya 37:5) U rabela hashu misi yoṱhe zwi ri thusa u vha na vhushaka ha tsini na Yehova.
6. Tsumbo ya Yesu i ri funza mini nga ha ṱhoḓea ya u “rabela misi yoṱhe”?
6 Naho zwo ralo, zwi a leluwa lungafhani u litshelela u rabela! U sedzana na mitsiko ya vhutshilo ha ḓuvha ḽiṅwe na ḽiṅwe zwi nga ita uri ri sa vhe na tshifhinga tsha u ita vhuḓidini ha u amba na Mudzimu. Yesu o ṱuṱuwedza vhatevheli vhawe u “rabela misi yoṱhe,” nahone na ene muṋe o ita nga u ralo. (Mateo 26:41, vhambedzani NW.) Naho tshifhinga tshoṱhe o vha a tshi dzula o farakanea ḓuvha ḽoṱhe, o ḓivhetshela tshifhinga tsha u amba na Khotsi awe wa ṱaḓulu. Nga zwiṅwe zwifhinga, Yesu o vha a tshi vuwa “ḽí sathu u tsha,” u itela u ya u rabela. (Marko 1:35) Kha zwiṅwe zwiitea, o ya a awela fhethu ho fholaho ḽo no kovhela u itela u rabela Yehova. (Mateo 14:23) Tshifhinga tshoṱhe Yesu o vha a tshi dzudzanya tshifhinga tsha u rabela, nahone na riṋe ri fanela u ita nga u ralo.—1 Petro 2:21.
7. Ndi zwiimo zwifhio zwine zwa fanela u ri sudzulusela u amba na Khotsi ashu wa ṱaḓulu ḓuvha ḽiṅwe na ḽiṅwe?
7 Hu na zwifhinga zwinzhi zwo teaho zwa u rabela u woṱhe ḓuvha ḽiṅwe na ḽiṅwe musi ri tshi sedzana na vhuleme, milingo, na dziphetho. (Vha-Efesa 6:18) Musi ri tshi ṱoḓa vhulivhisi ha Mudzimu kha masia oṱhe a vhutshilo, vhushaka hashu nae vhu ḓo aluwa. Arali khonani mbili dza sedzana na vhuleme dzoṱhe, naa vhushaka havho a vhu ṋaṋi u khwaṱha? (Mirero 17:17) Zwi ḓo tou ralo arali ri tshi ḓitika nga Yehova nahone u a ri thusa.—2 Koronika 14:11.
8. U ya nga tsumbo dza Nehemia, Yesu, na Hanna, ri guda mini nga ha vhulapfu ha thabelo dzashu ri roṱhe?
8 Ri takala lungafhani uri Mudzimu ho ngo vhea mikano ya vhulapfu kana uri ri fanela u amba nae lungana! Nehemia o amba nga u rabelela mbiluni nga u ṱavhanya musi a sa athu amba na khosi ya Peresia. (Nehemia 2:4, 5) Yesu o dovha a rabela nga u pfufhifhadza musi a tshi humbela uri Yehova a mu ṋee maanḓa a u vusa Lazaro. (Yohane 11:41, 42) Hanna na ene o “fhedza tshifhinga tshilapfu a tshi khou rabela Yehova” musi a tshi khou mu vhudza zwa haṋwani hawe. (1 Samuele 1:12, 15, 16, vhambedzani NW.) Thabelo dzashu dzi nga vha pfufhi kana ndapfu zwi tshi ya nga ṱhoḓea kana zwiimo.
9. Ndi ngani thabelo dzashu dzi tshi fanela u katela thendo na u livhuha zwoṱhe zwe Yehova a ri itela zwone?
9 Vhunzhi ha thabelo dza Bivhilini ndi dza u livhuha vhuimo ha nṱha ha Yehova na mishumo yawe mihulwane. (Ekisodo 15:1-19; 1 Koronika 16:7-36; Psalme ya 145:0-21) Kha bono, muapostola Yohane o vhona magota vha 24—mbalo yo fhelelaho ya Vhakriste vho ḓodzwaho vhe vhuimoni havho ha ṱaḓulu—vha tshi khou renda Yehova, vha tshi ri: “Murena Mudzimu washu, ndi’we wo fanelwaho nga thendo na zwikhoḓo na maanḓa, ngauri ndi’we wo sikaho zwoṱhe; zwo bvelela, zwo sikiwa nge wa zwi funa.” (Ndzumbululo 4:10, 11) Na riṋe ri na tshiitisi tshi fanaho tsha u hulisa Musiki washu tshifhinga tshoṱhe. Vhabebi vha takala lungafhani musi vhana vhavho vha tshi vha livhuha zwi tshi bva mbiluni nga ṅwambo wa tshiṅwe tshithu tshe vha vha itela tshone! Ri nga khwinisa ndeme ya thabelo dzashu nga u dzhiela nṱha vhuthu ha Yehova na nga u sumbedza u mu livhuha zwi tshi bva mbiluni.
Ndi Ngani Ri Tshi Fanela U ‘Rabela Misi Yoṱhe’?
10. Thabelo i khwaṱhisa hani lutendo lwashu?
10 U rabela misi yoṱhe ndi zwa ndeme kha lutendo lwashu. Musi o no amba nga tshifanyiso tsha ṱhoḓea ya u ‘dzula ri tshi rabela ri sa neti,’ Yesu o vhudzisa a ri: “Murwa-muthu a tshi ḓa, naa ni ri u ḓo wana hú na lutendo naa?” (Luka 18:1-8) Vhukuma, thabelo i bvaho mbiluni i fhaṱa lutendo. Musi muthomi wa lushaka Abrahamu a tshi khou kalaha nahone a si na vhana, o amba na Mudzimu nga ha eneo mafhungo. Musi Yehova a tshi mu fhindula o thoma a mu humbela uri a sedze ṱaḓulu nahone a vhale dziṋaledzi arali a tshi nga kona u ita nga u ralo. Nga murahu Mudzimu a khwaṱhisedza Abrahamu a ri: “Vhana vhau vha ḓo anda vha ralo.” (Genesi 15:5, 6) Ha vha na mvelelo dzifhio? Abrahamu “a tenda Yehova, ndi zwone zwe a pfi o luga ngazwo’.” (Genesi 15:5, 6) Arali ra vhudza Yehova zwi re mbiluni yashu, ra ṱanganedza khwaṱhisedzo yawe i bvaho Bivhilini, na u mu thetshelesa, u ḓo khwaṱhisa lutendo lwashu.
11. Thabelo i nga ri thusa hani u piringulula vhuleme?
11 Thabelo i nga dovha ya ri thusa u tandulula vhuleme. Naa vhutshilo haṋu ha ḓuvha ḽiṅwe na ḽiṅwe na zwiimo zwine na ṱangana nazwo zwi a konḓa? Bivhili i ri vhudza uri: “Kumedzela Yehova zwi U lemelaho, u ḓo U ṱhaḓula; ha nga litshi muvhuya a tshi dzula ó khakhelwa.” (Psalme ya 55:22) Musi ro sedzana na phetho dzi konḓaho, ri nga edzisa tsumbo ya Yesu. O fhedza vhusiku hoṱhe a tshi khou rabela e eṱhe musi a sa athu khetha vhaapostola vhawe vha 12. (Luka 6:12-16) Nahone vhusiku ha nga phanḓa ha lufu lwawe, Yesu o rabela nga maanḓa vhukuma lwe “biko ḽawe ḽa nga marotha a malofha a welaho mavuni.” (Luka 22:44) Ha vha na mvelelo dzifhio? “A pfiwa, nge a vha a tshi ofha Mudzimu.” (Vha-Heberu 5:7) Thabelo dzashu dzi bvaho mbiluni na dza tshifhinga tshoṱhe dzi ḓo ri thusa u sedzana na zwiimo na milingo zwi konḓaho.
12. Ndugiselelo ya thabelo i sumbedza hani dzangalelo ḽa Yehova kha riṋe?
12 Tshiṅwe tshiitisi tsha u sendela tsini ha Yehova nga thabelo ndi tsha uri na ene u ḓo sendela tsini hashu. (Yakobo 4:8) Musi ri tshi vhudza Yehova zwi re mbiluni dzashu nga thabelo, naa ri a ṱhogomela uri u na dzangalelo kha ṱhoḓea dzashu na u ri ṱhogomela nga lufuno? Muthu muṅwe na muṅwe nga dzawe u a tshenzhela lufuno lwa Mudzimu? Yehova ho ngo ṋea muthu naho e ufhio ndugelo ya u thetshelesa thabelo dzine vhashumeli vhawe vha dzi livhisa khae samusi e Khotsi avho wa ṱaḓulu. (Psalme ya 66:19, 20; Luka 11:2) Nahone u a ri ramba uri ri ‘laṱele dzimbilaelo dzashu dzoṱhe kha ene, ngauri ndi ene ane a ri vhilaelela.’—1 Petro 5:6, 7.
13, 14. Ndi zwiitisi zwifhio zwine ra vha nazwo zwa u rabela misi yoṱhe?
13 Thabelo i nga ita uri ri vhe na mafulufulu mahulwane vhuḓinḓani ha khagala na u ri khwaṱhisa musi u sa vha na dzangalelo ha vhathu na u hanedzwa zwi tshi ita uri ri fulufhuwe. (Mishumo 4:23-31) Thabelo i nga dovha ya ri tsireledza kha “maano oṱhe a Diabolo.” (Vha-Efesa 6:11, 17, 18) Musi ri tshi khou lwisana na u sedzana na milingo ya ḓuvha ḽiṅwe na ḽiṅwe, tshifhinga tshoṱhe ri nga humbela Mudzimu uri a ri khwaṱhise. Thabelo ya tsumbo ya Yesu i katela khumbelo kha Yehova ya u ‘ri phulusa vhuvhini.’—Mateo 6:13.
14 Arali ra bvela phanḓa ri tshi rabelela thuso ya uri ri kone u langa nḓowelo dzashu dza tshivhi, ri ḓo wana thuso ya Yehova. Ri na heyi khwaṱhisedzo: “Mudzimu hone u a fulufhedzea; ha nga tendi ní tshi lingiwa luné ni sa ḓo lu kona! Tshawe ndi u ri a tshi vhea mulingo, a vhea na tshivhana tshiné na kona u sera ngatsho’.” (1 Vha-Korinta 10:13) Muapostola Paulo o khwaṱhiswa nga Yehova nga fhasi ha zwiimo zwo fhambanaho. O ri: “Zwoṱhe ndi zwi kona nga a nkonisaho.”—Vha-Filipi 4:13; 2 Vha-Korinta 11:23-29.
Konḓelelani U Rabela Hu Sa Londwi Vhushayanungo
15. Hu nga bvelela mini arali vhuḓifari hashu ha kundelwa u swikelela milayo ya Mudzimu?
15 U itela uri thabelo dzashu dzi pfiwe zwavhuḓi, ri fanela u thetshelesa nyeletshedzo ya Ipfi ḽa Mudzimu. Muapostola Yohane o ṅwala a ri: “Na tshifhio tshiné ra humbela u a ri fha, ngauri milayo yawe yoṱhe ri a i pfa, ri ita zwiné a zwi takalela.” (1 Yohane 3:22) Fhedzi hu nga bvelela mini arali vhuḓifari hashu ha sa swikelela milayo ya Mudzimu? Adamu na Eva vho dzumbama nga murahu ha musi vho ita tshivhi tsimuni ya Edeni. Naa riṋe ri ḓipfa ri tshi ṱoḓa u ‘dzumbama tshifhaṱuwo tsha Mudzimu’ nahone ra litsha u rabela. (Genesi 3:8) Klaus, mudaleli wa zwivhidzo a re na tshenzhelo, o ri: “Ndo ṱhogomela uri vhukando ho khakheaho ha u thoma hune ha dzhiiwa nga vhathu vho ṱutshelaho kule na Yehova na ndangulo yawe ndi ha u litsha u rabela.” (Vha-Heberu 2:1) Zwo vha zwo ralo kha José Ángel. U ri: “Ho fhela miṅwaha i ṱoḓaho u vha ya malo ndi sa rabeli misi yoṱhe. Ndo ḓipfa ndi sa fanelei u amba nae, naho ndo vha ndi tshi kha ḓi mu dzhia e Khotsi anga wa ṱaḓulu.”
16, 17. Ṋeani tsumbo dzi sumbedzaho nḓila ine thabelo ya misi yoṱhe ya nga ri thusa ngayo u kunda vhushayanungo hashu ha muya.
16 Vhaṅwe vhashu ri nga ḓipfa ri sa fanelei u rabela nga ṅwambo wa vhushayanungo muyani kana nga ṅwambo wa u ita vhukhakhi. Fhedzi hezwi ndi zwifhinga zwine ra fanela u dzhiela nṱha vhukuma mbuyelo ya thabelo. Yona o shavha mushumo wawe. Fhedzi ‘musi o tsikeledzea, Yona o vhidza Yehova, nahone a mu aravha. Yona o ṱavha mukosi musi e dindini ḽa vhafu, nahone Yehova a mu pfa a tshi vhidzelela.’ (Yona 2:2) Yona o rabela, Yehova a fhindula thabelo yawe, nahone Yona a dzivhuluwa muyani.
17 José Ángel na ene o rabela zwi tshi bva mbiluni u itela u wana thuso. U ri: “Ndo vhudza Mudzimu zwi re mbiluni yanga nahone nda humbela uri a mpfarele. Nahone a nthusa. A thi vhuyi nda humbula uri ndo vha ndi tshi ḓo vha ndo vhuyelela ngohoni arali i vhe i si thuso ya thabelo. Zwino ndi rabela misi yoṱhe ḓuvha ḽiṅwe na ḽiṅwe, nahone ndi dzula ndo lavhelela zwenezwi zwifhinga.” Tshifhinga tshoṱhe ri fanela u ḓipfa ro vhofholowa u amba na Mudzimu nga ha vhukhakhi hashu na hone ri humbele u hangwelwa nga u ḓiṱukufhadza. Musi Khosi Davida a tshi bula vhutshinyi hawe, Yehova o mu hangwela zwivhi zwawe. (Psalme ya 32:3-5) Yehova u ṱoḓa u ri thusa, hu si u ri sasaladza. (1 Yohane 3:19, 20) Na thabelo dza vhahulwane vha tshivhidzo dzi nga ri thusa muyani, nga uri thabelo dzo raloho dzi na “maanḓa.”—Yakobo 5:13-16.
18. Vhashumeli vha Mudzimu vha nga vha na fulufhelo ḽifhio hu sa londwi uri vha nga vha vho xela lungafhani?
18 Naa hu na khotsi ane a nga si ṱanganedze murwa wawe we nga u ḓiṱukufhadza a ya khae u itela u wana thuso na nyeletshedzo nga murahu ha musi o ita vhukhakhi? Tshifanyiso tsha murwa wa ḽihwarahwara tshi sumbedza uri hu sa londwi uri ri nga vha ro xela lungafhani, Khotsi ashu wa ṱaḓulu u a takala musi ri tshi vhuyelela khae. (Luka 15:21, 22, 32) Yehova u ṱuṱuwedza vhoṱhe vho itaho vhukhakhi uri vha ambe nae, “ngauri u hangwela hawe ndi huhulu.” (Yesaya 55:6, 7) Naho Davida o ita zwivhi zwihulwane zwo vhalaho, o amba na Yehova, a ri: “Mudzimu, ipfa thabelo yanga; U songo ntsanda ndi tshi U lilela.” O dovha a ri: “Hu tshee matsheloni na nga madekwana na masiari ndi ḓo mu lilela nda dzindela, ndi hone a tshi ḓo vhuya a pfa ipfi ḽanga.” (Psalme ya 55:1, 17) Zwenezwo zwi khwaṱhisa lungafhani!
19. Ndi ngani ri songo fanela u phetha nga uri thabelo dzashu dzine dza vhonala dzi sa fhinduliwi dzi sumbedza uri Mudzimu ho ngo dzi ṱanganedza?
19 Hu pfi mini arali thabelo dzashu dza sa fhindulwa nga u ṱavhanya? Ri fanela u ita vhungoho ha uri zwine ra khou humbela zwi tendelana na zwine Mudzimu a zwi funa nahone ro zwi humbela dzinani ḽa Yesu. (Yohane 16:23; 1 Yohane 5:14) Mufunziwa Yakobo o amba nga vhaṅwe Vhakriste vhe thabelo dzavho dzi sa fhindulwe nga ṅwambo wa uri vho vha vha tshi khou “humbela luvhi.” (Yakobo 4:3) Kha ḽiṅwe sia, a ro ngo fanela u ṱavhanya u amba uri thabelo dzashu dzine dza vhonala dzi sa fhinduliwi tshifhinga tshoṱhe dzi sumbedza vhuṱanzi ha uri Mudzimu ho ngo dzi ṱanganedza. Nga zwiṅwe zwifhinga Yehova a nga tendela vhagwadameli vhawe vha fulufhedzeaho vha tshi bvela phanḓa vha tshi rabela nga maṅwe mafhungo lwa tshifhinganyana musi phindulo yawe i sa athu vhonala. Yesu o ri: “Bvelani phanḓa ni tshi humbela, ndi hone ni tshi ḓo fhiwa.” (Mateo 7:7, vhambedzani NW.) Naho zwo ralo, ri fanela u ‘konḓelela thabeloni.’—Vha-Roma 12:12.
Rabelani Misi Yoṱhe
20, 21. (a) Ndi ngani ri tshi fanela u rabela misi yoṱhe kha ano ‘maḓuvha a vhufhelo’? (b) Ri ḓo wana mini arali ri tshi sendela ḓuvha ḽiṅwe na ḽiṅwe khuluṋonini ya Yehova i songo ri fanelaho?
20 Mitsiko na vhuleme zwi khou engedzea kha ano ‘maḓuvha a vhufhelo,’ a re na “zwifhinga zwi lemelaho.” (2 Timotheo 3:1) Nahone milingo i nga ita uri ri dzule ri tshi khou humbula ngayo. Naho zwo ralo, thabelo dzashu dza misi yoṱhe dzi ḓo ri thusa uri ri dzule ro sedza kha zwithu zwa muya hu sa londwi vhuleme, milingo, na u kulea nungo zwine zwa khou bvela phanḓa. U rabela hashu kha Yehova ḓuvha ḽiṅwe na ḽiṅwe zwi nga ri ṋea thikhedzo ine ra i ṱoḓa.
21 Yehova, “Mupfi wa dzithabelo,” ha ngo farakanea vhukuma lune a si ri thetshelese. (Psalme ya 65:2) Ri songo vhuya ra farakanea lune ra litsha u amba nae. Vhushaka hashu na Mudzimu ndi tshithu tsha ndeme vhukuma tshine ra vha natsho. Ri songo vhuya ra vhu dzhiela fhasi. “Zwino kha ri sendele-ha ró takala, ri ḓe tsini ha khuluṋoni ya khathutshelo, ri ṱanganedze vhuthu, ri wane tshilidzi, ri lamulelwa musi zwó fanela.”—Vha-Heberu 4:16.
Ni Nga Fhindula Hani?
• Ri guda mini kha muporofita Daniele nga ha ndeme ya thabelo?
• Ri nga khwaṱhisa hani vhushaka hashu na Yehova?
• Ndi ngani ri tshi fanela u rabela misi yoṱhe?
• Ndi ngani u ḓipfa hashu ri sa fanelei hu songo fanela u ri thivhela u rabela Yehova?
[Tshifanyiso kha siaṱari 16]
Nehemia o rabela thabelo pfufhi musi a sa athu amba na khosi
[Tshifanyiso kha siaṱari 17]
Hanna o “fhedza tshifhinga tshilapfu a tshi khou rabela Yehova”
[Zwifanyiso kha siaṱari 18]
Yesu o rabela vhusiku hoṱhe musi a sa athu khetha vhaapostola vhawe vha 12
[Zwifanyiso kha siaṱari 20]
Hu vha na zwibuli zwa u rabela ḓuvha ḽoṱhe