Tendelani Lufuno Lu Tshi Ni Ṱuṱuwedza U Dzula Ni Tshi Huwelela

1. Ndi mini zwe ra zwi guda kha muṱangano wa ṅwaha muṅwe na muṅwe wa 2023?

KHA muṱangano wa ṅwaha muṅwe na muṅwe wa 2023,a ho khwiniswa zwiṅwe zwa zwithu zwine ra zwi tenda. Ro dovha ra pfa nḓivhadzo dzi takadzaho nga ha mushumo washu wa u huwelela. Sa tsumbo, ro guda nga ha uri vhaṅwe vhathu vha nga kha ḓi wana tshibuli tsha u ima na vhathu vha Yehova na nga murahu ha musi Babele Ḽihulu ḽo no fheliswa. Ro dovha ra ḓivhadzwa uri u bva nga November 2023, a hu tsha ḓo vha na ṱhoḓea ya uri vhahuweleli vha vhige zwoṱhe zwe vha ita kha mushumo wavho wa u huwelela. Naa dzenedzo tshanduko dzi ita uri mushumo washu u si tsha vha wa ndeme kana wo ṱavhanyiswaho u fana na u thomani? Na khathihi.

2. Ndi ngani mushumo washu wa u huwelela u tshi ṋaṋa u vha wo ṱavhanyiswaho ḓuvha ḽiṅwe na ḽiṅwe? (Marko 13:10)

² Ḓuvha ḽiṅwe na ḽiṅwe, mushumo washu wa u huwelela u vha u tshi khou ṋaṋa u vha wo ṱavhanyiswaho. Ndi ngani? Ndi ngauri tshifhinga tshi khou fhela. Ṱhogomelani zwe Yesu a dzula o zwi amba nga ha mushumo wa u huwelela maḓuvhani a vhufhelo. (Vhalani Marko 13:10.) Kha bugu ya Mateo, Yesu o amba uri mafhungo maḓifha o vha a tshi ḓo huwelelwa ḽifhasini ḽoṱhe “vhufhelo” vhu sa athu swika. (Mat. 24:14) Ipfi “vhufhelo” ḽi ambela kha u fheliswa tshoṱhe ha shango ḽivhi ḽa Saṱhane. Yehova o dzula o vhea “ḓuvha na tshifhinga” tshine zwenezwi zwithu zwa ḓo itea ngatsho. (Mat. 24:36; 25:13; Mish. 1:7) Ḓuvha ḽiṅwe na ḽiṅwe ḽi ri sendedza kha tshenetsho tshifhinga. (Vharoma 13:11) Kha ri bvele phanḓa na u huwelela u swika vhufhelo vhu tshi swika.

3. Ndi mini zwine zwa ri ṱuṱuwedza u huwelela?

³ Hu na mbudziso ya ndeme ine ra tea u humbula nga hayo, ya uri: Ndi ngani ri tshi huwelela mafhungo maḓifha? Lufuno ndi lwone lu ri ṱuṱuwedzaho u huwelela mafhungo maḓifha. Musi ri tshi huwelela, ri sumbedza u funa mafhungo maḓifha, u funa vhathu nahone tsha ndeme vhukuma, ri sumbedza u funa Yehova na dzina ḽawe. Kha ri haseledze nga ha zwenezwi zwithu nga tshithihi nga tshithihi.

RI HUWELELA NGAURI RI FUNA MAFHUNGO MAḒIFHA

4. Ndi mini zwine ra zwi ita musi ri tshi pfa mafhungo avhuḓi?

⁴ Naa ni kha ḓi humbula nḓila ye na ḓipfa ngayo musi ni tshi pfa mafhungo avhuḓi, khamusi a uri ho bebwa ṅwana muṱani kana a uri no wana mushumo we na vha ni tshi khou u ṱoḓa? A zwi timatimisi uri no vha no takala lwe na ṱavhanya na vhudza mashaka aṋu na khonani dzaṋu nga ha eneo mafhungo. Naa ho itea zwi fanaho musi ni tshi pfa mafhungo avhuḓi u fhira oṱhe, ane a vha mafhungo maḓifha a Muvhuso wa Mudzimu?

5. No ḓipfa hani musi ni tshi thoma u guda ngoho i re Ipfini ḽa Mudzimu? (Sedzani zwifanyiso.)

⁵ Humbulani nga ha nḓila ye na ḓipfa ngayo musi ni tshi thoma u guda ngoho i re Bivhilini. No guda uri Khotsi aṋu wa ṱaḓulu u a ni funa na uri u ṱoḓa ni tshi vha tshipiḓa tsha muṱa wa vhagwadameli vhawe. No guda na uri o fhulufhedzisa u fhelisa vhuṱungu na tshengelo, uri ni nga vha na fhulufhelo ḽa uri ni ḓo dovha na vhona vhane na vha funa vha tshi vuswa shangoni ḽiswa na zwiṅwe zwo engedzeaho. (Marko 10:29, 30; Yoh. 5:28, 29; Vharoma 8:38, 39; Nzumb. 21:3, 4) Zwe na zwi guda zwo kwama mbilu yaṋu. (Luka 24:32) No zwi takalela nahone no vha ni tshi ṱoḓa u vhudza muṅwe na muṅwe nga hazwo.—Vhambedzani Yeremia 20:9.

6. Ndi mini zwine na zwi guda kha tshenzhelo ya Ernest na Rose?

⁶ Ṱhogomelani tshenzhelo i tevhelaho. Muṅwe wahashu ane a pfi Ernestb o vha e na miṅwaha i ṱoḓaho u vha fumi musi khotsi awe vha tshi lovha. Ernest u ri: “Ndo vha ndi tshi ḓivhudzisa uri: ‘Vho ya ṱaḓulu? Kana vha tou vha vha si tsha vha hone lwa tshoṱhe?’ Ndo vha ndi tshi tama vhaṅwe vhana vhe vha vha vha tshi kha ḓi vha na vhokhotsi.” Ernest o vha a tshi dzulela u ya mavhiḓani, a gwadama tsini na vhiḓa ḽa khotsi awe nahone a rabela a ri: “Mudzimu, ndi ṱoḓa u ḓivha uri khotsi anga vha ngafhi.” Musi ho no fhela miṅwaha i ṱoḓaho u vha 17 khotsi awe vho lovha, o humbelwa arali a tshi nga takalela u gudiswa Bivhili nahone a tenda. O vha o takala musi a tshi guda uri vhafu a vha tsha pfa tshithu, zwi tou nga vho eḓela khofhe khulu, na uri Bivhili i fhulufhedzisa uri vha ḓo vuswa tshifhingani tshi ḓaho. (Muh. 9:5, 10; Mish. 24:15) O fhedzisela o wana phindulo dza mbudziso dze dza mu dina lwa tshifhinga tshilapfu. Ernest o takalela ngoho dze a vha a tshi khou dzi guda Bivhilini. Mufumakadzi wawe Rose na ene o ṱanganela kha ngudo ya Bivhili, a takalela zwe a vha a tshi khou zwi guda. Vhuvhili havho vho lovhedzwa nga 1978. Vho huwelela nga u fhisea kha muṱa, khonani na vhaṅwe nga ha ngoho dze vha dzi guda. Nga nṱhani ha zwenezwo, Ernest na Rose vho thusa vhathu vha fhiraho 70 uri vha ḓivhe Yehova na uri vha lovhedzwe.

7. Hu itea mini musi lufuno lwa ngoho i re Bivhilini lu tshi ṱoka midzi mbiluni dzashu? (Luka 6:45)

⁷ Zwi tou vha khagala uri musi lufuno lwa ngoho i re Bivhilini lu tshi ṱoka midzi mbiluni dzashu, ri nga si kone u fhumula. (Vhalani Luka 6:45.) Ri ḓipfa u fana na vhafunziwa vha Yesu vhe vha amba uri: “Ri nga si litshe u amba nga ha zwe ra zwi vhona na u zwi pfa.” (Mish. 4:20) Ri funa ngoho nga maanḓa lune ra ṱoḓa u i vhudza vhathu vhanzhi nga hune zwa nga konadzea ngaho.

RI HUWELELA NGAURI RI FUNA VHATHU

8. Ndi mini zwine zwa ri ṱuṱuwedza u vhudza vhaṅwe mafhungo maḓifha? (Sedzani bogisi “Funani Vhathu—Ni Ite Vhafunziwa.”) (Sedzani tshifanyiso.)

⁸ U fana na Yehova na Murwa wawe, na riṋe ri funa vhathu. (Mir. 8:31; Yoh. 3:16) Ri pfela vhuṱungu vhathu vha “sa ḓivhi Mudzimu” na vha “si na fhulufhelo.” (Vhaef. 2:12) Nga nṱhani ha thaidzo dzine vha vha nadzo, vha nga pfa vha tshi nga vha dindini ḽihulu. Fhedzi riṋe ri na mafhungo maḓifha ane a nga thambo ine ya nga vha kokodzela nnḓa. Nga nṱhani ha uri ri a vha funa na u vha pfela vhuṱungu, ri ṱoḓa u ita zwoṱhe zwine ra nga kona uri ri vha vhudze mafhungo maḓifha. Musi vha tshi guda nga ha eneo mafhungo, a nga vha ṋea fhulufhelo, a vha thusa uri vha takale zwino na u vha ṋea tshibuli tsha u ḓiphiṋa nga “vhutshilo ha vhukuma” vhune ha vha vhutshilo vhu sa fheli shangoni ḽiswa.—1 Tim. 6:19.

9. Ndi tsevho ifhio ine ra i vhudza vhathu nga ha zwine zwa ḓo itea tshifhingani tshi ḓaho nahone ndi ngani? (Hesekiele 33:7, 8)

⁹ Ri sevha vhathu uri ḽino shango ḽivhi ḽi ḓo fheliswa hu si kale ngauri ri a vha funa. (Vhalani Hesekiele 33:7, 8.) Ri pfela vhuṱungu vhahura vhashu na miraḓo ya muṱa washu vha sa shumeli Yehova. Vhunzhi ha vhathu vha ḓitshilela vhutshilo havho vha sa ḓivhi zwine zwa khou ḓa, zwine zwa vha “maṱungu mahulu a sa athu u vhuya a vha hone u bva tshee shango ḽa sikwa u swika zwino, ha tsha ḓo dovha a vha hone.” (Mat. 24:21) Ri ṱoḓa vha tshi ḓivha nga ha zwithu zwine zwa ḓo itea nga tshifhinga tsha khaṱhulo: Vhurabeli ha mazwifhi vhu ḓo fheliswa, nga murahu ha kona u fheliswa shango ḽivhi nga nndwa ya Haramagedo. (Nzumb. 16:14, 16; 17:16, 17; 19:11, 19, 20) Ri rabelela uri vhathu vhanzhi nga hune zwa nga konadzea ngaho, vha thetshelese zwine ra vha vhudza nahone vha nange u shumela Yehova na riṋe zwino. Fhedzi hu pfi mini nga ha vhathu vhane vha si ṱoḓe u thetshelesa musi ri tshi khou vha sevha zwino, u katela na mashaka ashu?

10. Ndi ngani zwi zwa ndeme u bvela phanḓa ri tshi sevha vhathu nga ha zwine zwa ḓo itea hu si kale?

¹⁰ Samusi zwo ṱalutshedziwa kha thero yo fhiraho, zwi nga itea uri Yehova a tshidze vhathu vhane vha ḓo vha na lutendo khae musi vha tshi vhona Babele Ḽihulu ḽi tshi fheliswa. Arali zwo ralo, ndi zwa ndeme uri ri bvele phanḓa ri tshi vha vhudza nga hazwo zwino. Ṱhogomelani uri zwine ra vha vhudza zwone zwino zwi nga vha zwone zwine zwa ita uri vha humbule zwiṅwe nga tshenetsho tshifhinga. (Vhambedzani Hesekiele 33:33.) Khamusi vha nga humbula tsevho ye vha i pfa kha riṋe, zwenezwo zwa ita uri vha ḓe vha shumele Yehova na riṋe tshifhinga tshi sa athu fhela. U tou fana na mulindadzhele wa ngei Filipi we a rembuluwa nga murahu ha “mudzinginyo muhulu,” khamusi vhaṅwe vha sa thetshelesi zwino vha nga rembuluwa musi vha tshi vhona hu tshi fheliswa Babele Ḽihulu.—Mish. 16:25-34.

RI HUWELELA NGAURI RI FUNA YEHOVA NA DZINA ḼAWE

11. Ri ṋea hani Yehova vhugala na u mu hulisa? (Nzumbululo 4:11) (Sedzani zwifanyiso.)

¹¹ Tshiitisi tsha ndeme tshine tsha ita uri ri huwelele mafhungo maḓifha, ndi uri ri funa Yehova Mudzimu na dzina ḽawe ḽikhethwa. Ri dzhia u huwelela sa nḓila ya u renda Mudzimu ane ra mu funa. (Vhalani Nzumbululo 4:11.) Ri a tenda nga mbilu dzashu dzoṱhe uri Yehova o tewa nga maanḓa, vhugala na u huliswa nga vhagwadameli vhawe vha fhulufhedzeaho. Ri mu ṋea vhugala na u mu hulisa musi ri tshi vhudza vhaṅwe nga ha vhuṱanzi vhu pfalaho ha uri ‘o sika zwithu zwoṱhe’ na uri ri khou tshila ngauri o ri ṋea vhutshilo. Ri shumisa tshifhinga tshashu, nungo dzashu na zwithu zwine ra vha nazwo uri ri huwelele nga hune ra nga kona ngaho. (Mat. 6:33; Luka 13:24; Vhakol. 3:23) Ri a zwi funa u amba nga ha Mudzimu ane ra mu funa. Ri a dovha ra ṱuṱuwedzea u vhudza vhaṅwe nga ha dzina ḽawe na zwine a vha zwone. Ndi ngani?

12. Ri ita hani uri dzina ḽa Yehova ḽi khethwe musi ri vhuḓinḓani?

¹² U funa hashu Yehova zwi ri ṱuṱuwedza u ita uri dzina ḽawe ḽi khethwe. (Mat. 6:9) Ri khou ṱoḓa u vhudza vhaṅwe uri zwithu zwoṱhe zwi si zwavhuḓi zwe Saṱhane a zwi amba nga ha Yehova a si ngoho. (Gen. 3:1-5; Yobo 2:4; Yoh. 8:44) Musi ri vhuḓinḓani, ri a fhisetshela u imelela Mudzimu washu na u amba ngoho nga hae kha vhathu vhane vha ṱoḓa u ri thetshelesa. Ri ṱoḓa muthu muṅwe na muṅwe a tshi ḓivha nga ha lufuno lwawe na uri u vhusa nga nḓila yo lugaho na yo teaho na uri muvhuso wawe u ḓo ḓa hu si kale wa fhelisa u tambula, wa ḓisa mulalo na dakalo kha vhathu. (Ps. 37:10, 11, 29; 1 Yoh. 4:8) Musi ri tshi vhudza vhathu zwenezwi zwithu nga ha Yehova, ri vha ri tshi khou ita uri dzina ḽawe ḽi khethwe. Ri a takala ngauri ri vha ri tshi khou ita zwine ra fanela u ita sa Ṱhanzi dza Yehova. Ndi ngani ri tshi ralo?

13. Ndi ngani ri tshi pfa ro huliswa u vhidzwa uri ri Ṱhanzi dza Yehova? (Yesaya 43:10-12)

¹³ Yehova o ri khetha uri ri vhe “ṱhanzi” dzawe. (Vhalani Yesaya 43:10-12.) Miṅwahani yo fhiraho, vhurifhi vhune ha bva kha Tshigwada Tshi Langaho ho amba uri: “Ndugelo khulwane ine ra vha nayo ndi ya u vhidzwa Ṱhanzi Dza Yehova.”c Ndi ngani zwo ralo? Ṱhogomelani tsumbo i tevhelaho. Arali ni tshi khou ṱoḓa muthu ane a nga vha ṱhanzi yaṋu tsengoni, ni nga nanga muthu ane na mu ḓivha, ane na mu fhulufhela, ane a vha na dzina ḽavhuḓi na ane vhathu vha ḓo fhulufhela vhuṱanzi hawe. Musi Yehova a tshi ri nanga uri ri vhe Ṱhanzi dzawe, o sumbedza uri u a ri ḓivha zwavhuḓi na uri u a ri fhulufhela uri ri vhudze vhaṅwe uri ndi ene Mudzimu wa ngoho e eṱhe. Ri pfa ro huliswa u vha Ṱhanzi dzawe, ri shumisa tshibuli tshiṅwe na tshiṅwe u ita uri dzina ḽawe ḽi ḓivhiwe na u bvisela khagala uri zwithu zwoṱhe zwi si zwavhuḓi zwe zwa ambiwa nga hae a si ngoho. Musi ri tshi ita nga u ralo, ri vha ri tshi khou tendelana na zwine dzina ḽashu ḽa amba zwone, zwa uri ri Ṱhanzi dza Yehova.—Ps. 83:18; Vharoma 10:13-15.

RI ḒO BVELA PHANḒA RI TSHI HUWELELA U SWIKA VHUFHELONI

14. Ndi zwithu zwifhio zwi takadzaho zwe ra lavhelela uri zwi nga itea hu si kale?

¹⁴ Ro lavhelela u vhona zwithu zwi takadzaho zwine zwa nga itea hu si kale. Ro lavhelela u vhona Yehova a tshi fhaṱutshedza mushumo washu nga u ita uri vhathu vhanzhi vha ṱanganedze ngoho maṱungu mahulu a sa athu thoma. Nahone ro dovha ra lavhelela uri na nga tshifhinga tsha maṱungu mahulu tshine tsha ḓo vha tshifhinga tshi konḓesaho, zwi nga itea uri vhathu vhanzhi vha bve shangoni ḽivhi ḽa Saṱhane vha ḓe u renda Yehova na riṋe.—Mish. 13:48.

15-16. Ndi mini zwine ra ḓo bvela phanḓa ri tshi zwi ita nahone ri ḓo zwi ita u vhuya u swika lini?

¹⁵ Musi ri tshi kha ḓi vha ro lindela, hu na mushumo wa ndeme une ra fanela u u ita une wa si tsha ḓo dovha wa itiwa. Ri na ndugelo ya u huwelela mafhungo maḓifha a muvhuso wa Mudzimu u mona na ḽifhasi ḽoṱhe. Ri dovha ra tsivhudza vhathu nga ha zwine zwa ḓo itea hu si kale. Vhathu vha khou tea u ḓivha uri ḽino shango ḽivhi ḽi tsini na u fheliswa. Musi tshifhinga tsha khaṱhulo tshi tshi swika, vha ḓo zwi ḓivha uri mulaedza we ra vha ri tshi khou u huwelela, wo vha u tshi bva kha Yehova.—Hesek. 38:23.

¹⁶ Ro ḓiimisela u ita mini? U funa mafhungo maḓifha, u funa vhathu na u funa Yehova na dzina ḽawe zwi ḓo ri ṱuṱuwedza u bvela phanḓa ri tshi huwelela nga mafulufulu na u fhisea, ri tshi ḓivha uri wonoyu mushumo wo ṱavhanyiswa. Ri ḓo ita wonoyu mushumo u vhuya u swika Yehova a tshi ri: “Zwo lingana.”