MWAHA ONTHOKORORIWA 20
ETXIPO 7 Yehova ti Ikuru Sahu
Mwaaseke nimaaliho na Yehova
“Attottopeliwe . . . Atithi a ikharari ni Muluku a [nimaaliho nootheene].” — 2 AKOR. 1:3.
ELE NINKELA AHU OXUTTERA
Ninrowa woona itthu ninxutteraahu ni moota Yehova aamaalinhaawe ayuda yaakuxerinwe omuthaamiheriwoni.
1. Muhime mikhalelo sa ayuda yaakuxerinwe omuthaamiheriwoni.
NKUUPUWELANI moota ayuda yaathamiherinwe oBabilonia yiisoonenlaaya. Awo yaahoona elapo aya enyaanyiwaka. Mwaha wa soottheka saya ni mwaha wa makholo aya, awo yaathaamihiwa mmawannyaya enaroihiwa elapo yahaasuwenlaaya. (2 Sow. 36:15, 16, 20, 21) Ekhaikhai weera, oBabilonia ayuda ale yaakhalano otaphuwa woopaka itthu saya. (Yer. 29:4-7) Menento ekumi khaiyene yaari yookhweya, nave khaiyene yaari ekumi yaarowaaya othanla. Vanonto, moota heeni awo yiisoonelaaya moovariha ni mikhalelo saya? Moone masu a murumeyi mmoha oororomeleya yoowo-tho aakuxerinwe omuthaamiheriwoni: “Vamyolokoni vo Babilonia, vava hiyo nàkilathi’vo nìnlaka ni nimùpuwelaka Siyoni.” (Nsal. 137:1) Ayuda ale yaaxupeñye vantxipale yannatthuneya omaalihiwa, mene yaarowa ophwanya woowiini nimaaliho nno?
2-3. (a) Etthu heeni Yehova aapankaawe ni ayuda yaathaamihinwe? (b) Etthu heeni ninrowaahu woona mwa yoosoma ene yeela?
2 Yehova, “Muluku a [nimaaliho nootheene].” (2 Akor. 1:3) Ntoko Muluku a nsivelo, owo onnaamaaliha ootheene yaale emmwaattamela. Yehova aasuwela weera ayuda akina yaathaamihinwe, yaamwaakhulela nttaruxo nawe ni omutthikela. (Yes. 59:20) Mwa yeeyo, mwa iyakha 100 ayuda ehinaaye othaamihiwa, profeta Yesaya aahuupuxeriwa olepa eliivuru ya nsina nawe. Mwaha wa heeni? Yesaya olempe ha: “‘Muhakalalihe, muhakalalihe muloko aka,’ onnèra Muluku anyu.” (Yes. 40:1) Aani, moorweela mwa soolepa sa profeta Yesaya, Yehova aahaavaha ayuda ale nimaaliho nenno yaahaawelaaya.
3 Ntoko ayuda yaathaamihinwe, hiyo-tho onnatthuneya omaalihiwa etempu eri yootheene. Mwa yoosoma ene yeela, nnoorowa woona mikhalelo miraru sa moota Yehova aamaalinhaawe ayuda yaathaamihinwe: (1) Owo aahaalaihera waalevelela ale yaattharunwe, (2) owo aahaavaha yooweherera atthu awe, ni (3) owo aamaliha woova waya. Emaara ninrowaahu othokororaka ipontu iya, moone moota ninttottelaahu mureerelo masu oomaaliha a Yehova.
YEHOVA MWA IKHARARI ONNANLEVELELA
4. Moota heeni Yehova oonihenraawe weera Muluku oomoriwa ikharari? (Yesaya 55:7)
4 Yehova ti “Atithi a ikharari.” (2 Akor. 1:3) Owo ohoonihera mukhalelo ola, vaavo aalaihenraawe waalevelela ayuda ale yaattharunwe. (Mmusome Yesaya 55:7.) Owo enre: “Ni otthuna wohimala kòhòmorela ikharari.” (Yes. 54:8) Moota heeni Yehova aarowaawe woonihera omoriwa ikharari? Nnaamweera ayuda ale nlelo yaaviriha maxupo mwaha wa soopaka saya, Yehova aahaalaihera weera khiyaarowa ovirelela okhala oBabilonia mahiku ootheene. Awo yaamurowa okhala omuthaamiheriwoni etempu ya vakhaani. (Yes. 40:2) Moohihovela, masu ala yaari oolipiha ni oomaaliha wa ayuda yaattharunwe!
5. Mwaha wa heeni nraahuno mathowa mantxipale oowoona ikharari sa Yehova waapwaha ayuda yaathaamihinwe?
5 Etthu heeni ninxutteraahu? Yehova ori oolikaneene waalevelela arumeyi awe. Olelo nookhalano mathowa mantxipale waapwaha ayuda Yaathaamihinwe. Moota heeni? Noosuwela etthu Yehova onvarihelaawe muteko weera anlevelele. Sivirakaru iyakha sintxipale vaavo Yehova aahimmaawe, Yehova aamurumiha Mwanawe ommusivelaawe owa elapo ya vathi weera avahe mukuttho wa atthu ootheene enttharuwa. Mukuttho owo oneeriha soottheka ‘oleveleliwa’ naari otxipihiwa moomalela. (Mit. 3:19; Yes. 1:18; Aef. 1:7) Veekhaikhai nnanvarela Muluku a ikharari!
6. Moota heeni ninttottelaahu mureerelo vaavo ninwehexexaahu ikharari sa Yehova? (Nwehe efootu.)
6 Masu oowuupuxeriwa a Yehova emphwanyeya va Yesaya 55:7 pooti onimaaliha wakhala weera ninnaxupeya ni miyuupuwelo soowiivaha nthowa. Akina a hiyo ninnavirelela wiivaha mathowa mwaha wa yoottheka nipankaahu khalayi nnaamweera nttharunweene. Ikwaha sintxipale eyo enneereya wakhala weera ninnaviriha maxupo mwaha wa yoottheka eyo. Menento, wakhala weera noottharuwa soottheka sahu ni oreherera mikhalelo sahu, nroromeleke weera Yehova oonlevelela. Ni emaara Yehova onanlevelelaawe, owo khonuupuwelela soottheka sahu. (Munwehe Yeremiya 31:34.) Tivawonto, wakhala weera Yehova khonuupuwelela soottheka sahu sa khalayi, hiyo-tho khontthuneya wuupuwelela. Etthu Yehova onwehaawe itthu nimpakaahu viinaano, ohiya soottheka nipankaahu khalayi. (Ez. 33:14-16) Ni moohipisa, Tiithi ahu a ikharari onoorowa ontaphula moomalela mwa maxupo a soottheka sahu.
Yehova khanweha soottheka nipankaahu khalayi, mene onweha itthu nimpakaahu viinaano (Nwehe eparagrafu 6)
7. Etthu heeni enrowa oneeriha waasa nikhavihero wakhala weera nnimwiipithiha yoottheka?
7 Etthu heeni nintthuneyaahu opaka wakhala weera yoowuupuxera ahu ennanxupa mwaha woowiipithiha yoottheka etokweene nipankaahu? Biblya onnanooperera ovekela nikhavihero wa asitokweene a mmulokoni. (Yak. 5:14, 15) Mene, khaiyene ti wookhweya waakhulela soottheka sahu. Mene wakhala weera nnoottharuwa, eyo enooneeriha owaattamela alopwana ala oororomeleya nuupuwelaka weera Yehova ni alopwana ala aathanliyaawe enoonimorela ikharari ni enimoonihera nsivelo. Moone moota omoriwa ikharari wa Yehova wammaalinhaaya munna mmoha oneeriwa Arthur,a yoowo yoowuupuxeraawe ya murima yaamuxupa vantxipale. “Yaavira eyaakha emoha, vaavo koonenlaaka iviidiyu sookonihana moohireerela, mene vaavo nuulummaahu woohima sa yoowuupuxera ya murima, kaahaaleela amwaaraka ni asitokweene a mmulokoni. Kipakakaru eyo, kaataphuwa, mene nlelo kannaxupeya mwaha wa etthu kaapankaaka. Asitokweene a mmulokoni yaakileela weera Yehova khaakinyanyanle. Owo onnanttaruxa mwaha wooweera onnansivela. Masu aya ooreera yaamaaliha murima aka ni yaakikhavihera oreherera muupuwelo aka.” Vano munna Arthur pioneiro ni murummwa ookhavihera. Ti woomaaliha osuwela weera Yehova onnanimorela ikharari vaavo ninttharuwaahu!
YEHOVA ONNANIVAHA YOOWEHERERA
8. (a) Yooweherera heeni Yehova aavanhaawe ayuda yaathaamihinwe? (b) Moovarihana ni Yesaya 40:29-31 ayuda ale yaattharunwe yoonela hayi yooweherera yaaraayano?
8 Vamaithoni va atthu, ayuda yaathaamihinwe, khayaarinono yooweherera. Omwene wa aBabilonia waasuweliwa mwaha wookhootta waataphula atthu yaathaamihaaya. (Yes. 14:17) Menento, Yehova aahaavaha yooweherera atthu awe. Owo aahaalaihera waataphula atthu awe. (Yes. 44:26; 55:12) Vamaithoni va Yehova, Babilonia aari ntoko ntthupi. (Yes. 40:15) Ni wiiseeliwa ni iphumu, ntthupi naavavihiwa. Ayuda ale yaathaamihinwe, yoonela hayi yooweherera yaaraayano? Eyo yaahaalipiha. Mene yaamukhumelela etthu ekina. Yesaya olempe ha: “Othene anamwìwelela Yahvéh ephom’aya ekithí wa mahiku othene.” (Mmusome Yesaya 40:29-31.) Aani, yooweherera aya yaahaavaha ikuru; ni awo ‘mapupha aya [yanvava] ntoko mapupha a xaakha.’
9. Itthu heeni saaweeriha ayuda yaathaamihinwe ororomela soolaihera sa Yehova?
9 Yehova-tho aahaavaha mathowa oororomela soolaihera sawe. Moota heeni? Muupuwele iprofesia seiyo saakwanenle. Awo yannasuwela weera Asiria yaamurowa otuphela omwene woota wa Israeli ni waathaamiha atthu yaakhala weiwo. (Yes. 8:4) Awosa yaawoona aBabilonia emunyaanyaka Yerusalemu ni yaathaamihaka atthu yaakhala weiwo. (Yes. 39:5-7) Awo-tho yannoona vaavo mwene Sedesiya aasonyolinwaawe maitho awe ni aakuxerinwaawe oBabilonia. (Yer. 39:7; Ez. 12:12, 13) Itthu sootheene Yehova aahimmaawe, moohihovela saakwanela. (Yes. 42:9; 46:10) Itthu sootheene iya saahaavaha nroromelo weera yoolaihera ya Yehova yoowaavuluxa-tho yaamurowa okwanela!
10. Etthu heeni enrowa onikhavihera olipiha yooweherera ahu mahiku ala oomalihera?
10 Etthu heeni ninxutteraahu? Vaavo ninkhulumuwaahu, yooweherera pooti onlipiha ni onikhavihera otthikela okhalano ikuru. Ninkhala etempu yooxupa ni ninnawana ni amwiittani a ikuru. Nnaamweera vareene hiiho, khanintthuneya okhulumuwa. Yehova oonivaha yooweherera yootepa oreera ya okhalano ekumi yoohimala, murettele weekhaikhai ni ovareleleya. Nintthuneya wuupuwelelaka yooweherera eyo ni murima ahu wootheene. Naahipaka eyo, yooweherera ahu enaakhale ntoko efootu ehinooneya nnene ninwehaahu moorweela mwa exanela yooriipa. Moota heeni ninrowaahu “otteeliha exanela ahu” neerihaka yooweherera ahu okhala yooreera? Nintthuneya emaara yootheene niihiyereke etempu weera nuupuwelele moota ekumi ahu enrowaaya okhala elapo enyowani. Nintthuneya osomaka nyaha, woonela iviidiyu ni itxipo seiyo sinuuluma woohima sa yooweherera ahu. Ni hiyo-tho pooti wuuluma ni Yehova woohima sa soolaihera ninwehereraahu weera noone okwanela waya.
11. Eheeni yaamukhavihenre murokora mmoha arinono eretta yoohilama otthikela okhalano ikuru?
11 Moone moota yooweherera yaamukhavihenraaya ni omulipiha murokora mmoha oneeriwa Joy, yoowo arinono eretta yoohilama. Owo ohimme ha: “Emaara miyo kinkhulumuwaaka, kinnamuleela miyuupuwelo saka soowiixera Yehova, kisuwelaka weera owo onnakiiwexexa. Moota Yehova onkaakhulaawe, onnakivaha ‘owera otokotoko.’” (2 Akor. 4:7) Joy onnuupuwelela areene elapo enyowani, weiwo ‘ahinrowaawe okhala mutthu anaahime: Kinoovoreiwa.’ (Yes. 33:24) Wakhala weera hiyo-tho nnoomuhulela murima ahu Yehova ni owehexexa yooweherera ahu, nnoowera okhalano ikuru.
12. Mathowa heeni nraahuno enneeriha ororomela soolaihera sa Yehova? (Nwehe efootu.)
12 Hiihaale aapankaawe ni ayuda yaathaamihinwe, Yehova-tho onnanivaha mathowa mantxipale oororomela soolaihera sawe. Muupuwele iprofesiya nnoonaahu sikwanelaka. Mwa ntakihero, ninnoona epotensia ya elapo yootheene yeeyo eri “okina wolipa ni okina wolosowa.” (Dan. 2:42, 43) Nave-tho ninniiwa suulummwaka woohima sa “otetereya wa elapo mapuro oovirikana,” nave ninnalaleya mitthenka sooreera “elapo yootheene.” (Math. 24:7, 14) Iprofesiya iya ni iprofesiya ikina, sinnalipiha nroromelo nahu wa soolaihera soomaaliha ninwehereraahu weera sinookwanela.
Iprofesiya nnoonaahu sikwanelaka olelo, sinnanivaha mathowa oororomela soolaihera sa Yehova (Nwehe eparagrafu 12)
YEHOVA ONNAMALIHA WOOVA WAHU
13. (a) Maxupo heeni ayuda yaarowaaya oviriha emaara yaakelaaya otaphuliwa? (b) Ntoko elempwalaaya va Yesaya 41:10-13, moota heeni Yehova aamaalinhaawe ayuda yaathaamihinwe?
13 Nnaamweera Yehova aalipinhe ayuda yaathaamihinwe ni yooweherera yootepa oreera, owo aasuwela weera yaamurowa oviriha maxupo emaara yaarowaaya otaphuliwa. Yehova aahima weera yaattamelaka otaphuliwa ayuda yaathaamihinwe, mwene mmoha aamurowa otuphela maloko oowaattamela nave aamurowa omoopopiha Babilonia. (Yes. 41:2-5) Neereke ayuda yannatthuneya oxupeya? Yehova aahaamaaliha vahinaaye, eeraka: “Ohòve, niwoko kiri ni weyo. Ohithwelele, niwoko miyo kà Muluku á.” (Mmusome Yesaya 41:10-13.) Etthu heeni aatthunaawe ohima ni masu ooweera “miyo ka Muluku á”? Owo khaatthuna owuupuxera ayuda weera yaatthuneya omukokhorela, mwaha wooweera eyo yaari etthu yaatthuneyaaya opaka. Opwaha mwa yeeyo, owo aatthuna owuupuxera weera nlelo aari ni yaawo. — Nsal. 118:6.
14. Moota heeni Yehova aamalinhaawe woova wa ayuda yaathaamihinwe?
14 Yehova-tho aamaliha woova wa ale yaathaamihinwe awuupuxeraka ikuru sawe sihinkota. Owo aaweerela ayuda yaathaamihinwe weera ewehe erimu yoosareya ithenyeeri. Ohiya paahi owo opattuxa ithenyeeri, owo-tho oosuwela ethenyeeri eri poothe nsina naya. (Yes. 40:25-28) Mwaha wa yeeyo, Yehova oosuwela nsina na mutthu ori poothe na yoole onanvarela! Ni okhala weera Yehova ookhalano owera woopattuxa ithenyeeri, eyo ennoonihera weera owo ookhalano owera woowaakhavihera atthu awe. Aani, ayuda yaari omuthaamiheriwoni khiyaarinono mathowa ooxupeya ni woova.
15. Moota heeni Muluku aareherenraawe ayuda Yaathaamihinwe wa ele yaakelaaya okumanano?
15 Yehova aahaareherera atthu awe wa ele yaakela aya okumanano. Eparte emoha ya eliivuru ya Yesaya, Yehova aahaaleela atthu awe: “Orowe, muloko aka, okele mpani mwá, owale masele ottuli wá, wìpithihe ehuhu ehivinre mpaka orirya esara awe.” (Yes. 26:20) Masu ala pooti weera yaapatxenre okwanela vaavo mwene Kiro aatuphenlaawe oBabilonia. Namathola-thola mmoha oGrecia a khalayi, ohimme weera vaavo Kiro aavolowaawe oBabilonia “aahaaleela [anakhotto awe] weera ewiive ootheene yaale yaari vaate va milako.” Nkuupuwelani moota aBabilonia yonvaaya! Mene ayuda yaathaamiherinwewo khayiivinwe mwaha woowiiwelela miruku sa Yehova.
16. Mwaha wa heeni nihintthuneyaahu oxupeyaxa ni itthu sa muhoolo? (Nwehe efootu.)
16 Etthu heeni ninxutteraahu? Moohipisa va nnoorowa oviriha maxupo ehitonko waakhumelela atthu. Emaara enrowaaya opatxera, atthu ootheene enoorowa woova ni oxupeya. Mene atthu a Yehova khenrowa woova. Noosuwela weera Yehova Muluku ahu. Nsuwelaka weera “ovuluxiwa [wahu ori] vakhiviru.” (Luka 21:28) Naari emaara yeeyo wiiraana wa maloko, enrowaaya onituphela, hiyo nnoovirelela okhala oolipa. Yehova onoorowa onikosoopa ni onivaha miruku sinvuluxa ikumi. Ninrowa ovahiwaka moota heeni miruku iyo? Hiyo onnatthuneya oweherera weera noone. Menento, onnooneya weera nnoorowa waakhelaka miruku iyo moorweela mwa miloko sahu. Wakhala weera ti hiiho, onnooneya weera sinkela okhala ‘impa sahu’ mapuro yaawo ninrowaahu okhala oovareleleya. Ninrowa wiireherera moota heeni wa itthu sinkela weereya muhoolo? Nintthuneya okhalaka vamoha ni asinna ni asirokora, niiweleleke miruku sootheene sa mmarehereroni nave nroromeleke weera Yehova onnahoolela mareherero ahu. — Aheb. 10:24, 25; 13:17.
Wakhala weera nnimuupuwelela owera wa Yehova woonivuluxa, khaninrowa okhala ooxupeya mpuwa mwa maxupo matokweene (Nwehe eparagrafu 16)b
17. Moota heeni nyuwo munrowaanyu waasa nimaaliho na Yehova?
17 Nnaamweera ayuda yaathaamihinwe yaaviriha itthu sooxupa, Yehova aahaavaha nimaaliho awo yaahaawelaaya. Owo onoorowa opaka etthu emoharu ni hiyo. Tivawonto, muhipwatthaka etthu enrowa weereya omaalo, nvireleleke waasa nimaaliho na Yehova. Muroromeleke ikharari sa Yehova ni mulipiheke yooweherera anyu. Muupuweleke weera, okhala weera Yehova Muluku anyu, nyuwo khamuntthuneya woova etthu.
ETXIPO 3 Yehova Onninivaha Ikuru, Nlipelelo, ni Nroromelo
a Masina makina aatxentxiwa.
b OTAPHULELA WA EFOOTU YA:Ekhurupu emoha ekhaanini ya asinna ethukumanneene. Awo ennaroromela owera wa Yehova ni osuwela wawe woowaakosoopa atthu awe eri mapuro eri poothe.