Neereke nyuwo ‘mooxuttera esiiri’ ya okhala oohakalala ni itthu muraanyuno?

1. Ontaphulela eheeni okhala oohakalala ni itthu mutthu oraaweno ni eheeni ehintaphulelaaya?

NEEREKE nyuwo munnahakalala ni itthu muraanyuno? Mutthu onhakalala ni itthu oraaweno onnaphwanya ohakalala ni murettele mwaha wa mareeliho oraaweno vano. Owo khanxupeya naari khannyoonyiheya mwaha wa itthu ohikhanlaaweno. Menento ohakalala ni itthu nraahuno, khontaphulela weera khaninrowa waasaka itthu ikina. Mwa ntakihero, khaiyene ti woonanara wa mukristu otthuna waatxeerera muteko onanvarelaawe Yehova. (Arom. 12:1; 1 Tim. 3:1) Nnaamweera vareene hiiho, owo khañyeleela ohakalala wawe wakhala weera iparakha sonvarela Yehova khasinanphwanya ntoko owo aawehereraawe.

2. Mwaha wa heeni ohihakalala ni itthu mutthu oraaweno oraaya woowoopiha?

² Ohihakalala ni itthu nraahuno pooti onikumihera maxupo mantxipale. Atthu ehinhakalala ni itthu eraayano pooti oviriha iwoora sintxipale evaraka muteko weera ephwanye itthu sa weerutthuni seiyo siri soohitthuneyaxa. Mooriipiha murima asinna akina mpaka ahiiya musurukhu ni itthu ikina yaatthunaaya. Pooti weeraka awo yuupuwela ha, ‘Miyo kinnaphwanela,’ ‘Kooweherera etempu yintxipale,’ naari ‘Kinahaala otthikiha musurukhu kikunxaaka.’ Menento, mikhalelo sootesene sa wiiya sinnamunanara ni sinnanveehiha Yehova. (Mir. 30:9) Akina aanyoonyiheya vantxipale mwaha woohaakhela iparakha yaatthunaaya mpaka ohiya onvarela Yehova moomalela. (Agal. 6:9) Moota heeni mutthu iivaherenre wa Yehova aarowaawe wuupuwela opaka etthu ntoko eyo? Pooti weeraka mutthu owo oheemexera wunnuwihera mukhalelo wa ohakalala ni itthu oraaweno.

3. Ikhaikhai heeni ninxutteraahu va Afilipi 4:11, 12?

³ Ootheene ahu nintthuneya wunnuwihera mukhalelo wa ohakalala ni itthu nraahuno. Murummwa Paulo, olempe weera owo ‘aaxuttera okhala oohakala ni itthu aaraaweno ahipwatthaka makhalelo awe.’ (Mmusome Afilipi 4:11, 12.) Owo olempe masu ala emaara aawalelinwaawe mukateya. Nnaamweera vareene hiiho, owo khaayelenle ohakalala wawe. Owo ‘aaxuttera esiiri’ ya ohakalala ni itthu aaraaweno, wakhala weera nnimwiilipihera okhala oohakalala, masu ni sookumanano sa Paulo sinnanroromeliha weera nnoowera wunnuwiheera mukhalelo wa ohakalala ni itthu nraahuno. Nihiweherereke weera mukhalelo wa ohakala ni ele nraahuno onrowa okhumelela meekhaaya. Moovirikana ni eyo nintthuneya oxuttera ohakalala ni itthu nraahuno. Moota heeni? Nnoorowa woona mikhalelo sinrowa onikhavihera oxuttera esiiri ya ohakalala ni ele nraahuno.

MUNNUWIHERE MUKHALELO WA OXUKHURELA

4. Moota heeni okhalano mukhalelo wooxukhurela onnikhaviheraaya okhala oohakalala ni itthu nraahuno? (1 Atesalonika 5:18)

⁴ Mukhalelo wa oxukhurela onnaneeriha ohakalala ni itthu nraahuno. (Mmusome 1 Atesalonika 5:18.) Mwa ntakihero, vaavo hiyo ninxukurelaahu ni ele nraahuno, onnooneya weera hiyo khaninxupeya ni itthu ninhaawelaahu seiyo nihikhanlaahuno. Vaavo ninxukhurelaahu iparakha nraahuno mmutekoni mwa Yehova, ninniilipihera opaka ele ninweraahu ni iparakha iyo ohiya okhala ni ntthuno noowaakhela iparakha inyowani. Khanintikiniheya vaavo Biblya onnoopereraawe omuxukhurela Yehova vaavo nimpakaahu mavekelo! Okhalano mukhalelo wooxukhurela onnanikhavihera okhalano “murettele wa Muluku onapwaha myupuwelo sothesene.” — Afil. 4:6, 7.

5. Mwaha wa heeni aIsraeli yaatthuneyaaya okhala ooxukurela ni itthu yaaraayano? (Nwehe-tho efootu.)

⁵ Moone etthu yeereñye ni aIsraeli. Ikwaha sintxipale awo yannamukhupanya Yehova mwaha wooweera khiyaakhanleno yootxa yaatxaaya wExipitu. (Nam. 11:4-6) Ekhaikhai weera, ekumi aya khaiyene yaari yookhweya onikareni. Etthu heeni yaarowa waakhavihera okhala oohakala ni itthu yaaraayano? Awo waatthuneya wuupuwelelaka ni oxukhurela woohima sa itthu Yehova aapakenlaawe. WExipitu, weiwo yaathokororiwaaya ntoko akaporo, Yehova aahaawiihera mattaruxo 10 ale yaahasula aIsraeli yaakhalihaka akaporo. Vaavo aIsraeli yaataphulinwaaya, awo “yàhàveka Axipitu” iparatha, iwooru, ni ikuwo. (Ott. 12:35, 36) Vaavo aIsraeli yaatthara-tthariwaaya mpaka ephareya yooxeera, Yehova mwa mwiiriira aakawanya maahi. Ni vaavo yeettaaya onikareni, owo annaatxiha mahiku ootheene yootxa ya emana. Vanonto ti heeni yaaxupa? Aisraeli khiyaakwaneñye ohiya mwaha wooweera awo khiyaakhanleno yootxa yaahaawelaaya, mene mwaha wooweera awo khiyaaxukhurela itthu yaaraayano.

6. Mikhalelo heeni soowunnuwihera oxukhurela?

⁶ Moota heeni nneeraahu ninnuwihere mukhalelo wooxukurela? Yoopatxera, mwiihiyereke etempu mahiku ootheene weera mphimelele itthu sinoosivelani. Mulepe itthu piili naari tthaaru seiyo nyuwo munxukhurelaanyu. (Wikh. 3:22, 23) Etthu yanaaveeli, moonihere oxukhurela wanyu. Mpatxerihe waaxukhurela atthu mwaha wa itthu enoopakelaayani. Opwaha sootheene, mmuxukhureleke Yehova mwaha wa itthu sootheene. (Nsal. 75:2 [75:1, Tradução do Novo Mundo]) Etthu yanaararu, mwaathanleke asinthamwene yaale enoonihera oxukurela. Mwaha wooweera oxukurela mukhalelo mmoha yoowo onvalihaniwa, ni etthu emoha-moharu enneereya ni ohixukurela. (Ola. 1:26-28; 2 Tim. 3:1, 2, 5) Vaavo hiyo nnooniheraahu oxukurela, onookhala wooxupa ovoleeliwa ni mukhalelo woohixukurela.

7. Moota heeni Aci unnuwihenraawe oxukurela ni yookhumelela aya teevi?

⁷ Nthokorore etthu yeereñye ni Aci, yoowo onkhala wIndonesia. Owo onnaakhulela eeraka: “Mpuwa mwa eretta ya Koronaviiru, kaapatxera olikanxera makhalelo aka ni makhalelo aasinna akina. Yookhumelela aya, miyo nkaahakalala.” (Agal. 6:4) Etthu heeni emukhavihenre otxentxa muupuwelo awe? Owo ohimme ha: “Kaapatxera ohima mareeliho kaakhenlaaka mahiku ootheene ni wuupuwelela woohima sa itthu sintxipale sooreera seiyo kaaphwannyaaka mwaha wooweerela eparte mareherero a Muluku. Nto kaahoonihera omuxukhurelaka waka Yehova. Yookhumelela aya, miyo kannahakalala.” Wakhala weera nyuwo munnaxupeya, nyuwo pooti opaka etthu emoha-moharu weera mutthikele okhala ooxukhurela.

MUKHALEKE OOWEHEXEXA NI NVIRELELE OKHALA OOWIIYEVIHA

8. Muraakho heeni Barukhi aamorenlaawe?

⁸ Namalepa a Yeremiya Barukhi, aamorela mmuraakhoni. Barukhi aakhalano muritti wooxupa, yoowo waari omukhavihera Yeremiya waaleela aIsraeli yaawo yaari oohixukhurela etthu yeera yaakhumelele. Barukhi aayeleela mukhalelo wa owehexexa. Ohiya owehexexa etthu Yehova aatthunaawe weera apake, onnooneya weera owo aapatxera wuupuwelela moowiixera woohima sa yoowo ni etthu aarowaawe opaka. Moorweela mwa Yeremiya Yehova aamweerela Barukhi: “Weyo khawìnlenle itthu sitokotoko? Txonde, ohìnlele.” (Yer. 45:3-5) Ni masu makina, owo aahima ha: “Ohakalaleke ni makhalelo oraaweno vano.” Barukhi aahaakhulela nttaruxo na Yehova ni aavirelela waakhuleliwa ni Yehova.

9. Moovarihana ni 1 Akorinto 4:6, 7, wiiyeviha onrowa onikhavihera waakhulela eheeni? (Nwehe-tho efootu.)

⁹ Ikwaha ikina mukristu pooti wuupuwelaka weera onnaphwanela waakhela eparakha mmutekoni mwa Yehova. Owo pooti okhala oosuwela, oovara muteko, naari orinono sookumanano naari itthu sootheene iya sootthaaru. Menento, akina pooti waakhela iparakha seiyo owo aatthunaawe weera aakhele. Moota heeni munna owo eeraawe uupuwelele woohima sa mwaha owo? Owo aamurowa wuupuwela etthu murummwa Paulo olempaawe, yeeyo emphwanyeya va 1 Akorinto 4:6, 7. (Mmusome.) Iparakha sootheene nnaakhelaahu ni itthu sootheene ninweraahu oopaka sinkhuma wa Yehova. Yehova khannivaha itthu sootheene iya mwaha wooweera hiyo tootepa otthuneya waapwaha atthu akina. Opwaha mwa yeeyo, Yehova onnanivaha itthu sootheene iya mwaha wooweera onnanisivela ni tooreera murima. — Arom. 12:3, 6; Aef. 2:8, 9.

10. Moota heeni ninrowaahu wunnuwihera wiiyeviha?

¹⁰ Hiyo pooti wunnuwihera wiiyeviha wahu nuupuwelelaka moowiixera ntakihero Yesu onivanhaawe. Muupuwele etthu yeereñye ohiyu vaavo Yesu aarapihaawe inaani sa atthareli awe. Murummwa Yohani olempa ha: “Yesu [asuwelaka] [1] weera Atiithi awe, yaamwinnyerera itthu sootheene mmatatani mwawe ni [2] weera aakhumme wa Muluku ni [3] aatthikela wa Muluku, . . . aapatxera orapiha manaani atthareli awe.” (Yoh. 13:3-5) Yesu aamurowa wuupuwela weera atthareli awe yaaphwanela orapiha manaani awe. Menento mpuwa mwa ekumi awe valaponi, owo khaatonko wuupuwela weera annaphwanela ekumi yooreera, ntoko okhalano empa yooreera ni musurukhu muntxipale. (Luka 9:58) Yesu aari oowiiyeviha ni annaxukurela itthu aaraaweno. Owo oonivaha ntakihero nooreera. — Yoh. 13:15.

11. Moota heeni wiiyeviha omukhavihenraaya Dennis okhala oohakalala ni makhalelo awe?

¹¹ Dennis, onkhala wOlanda, aaheerera otthara ntakihero na Yesu, menento khaiyene waari wookhweya. Owo ohimme ha: “Ikwaha ikina miyo kinnakhalano miyuupuwelo sa wiisunnuwiha naari ohihakalala ni itthu kiraakano vaavo mutthu onaakhelaawe eparakha mmutekoni mwa Yehova. Vaavo eneereyaaya eyo, kinnasoma nyaha sinuuluma woohima sa wiiyeviha. Va aplikatiivu JW Library^® koohelavo inoota sa soolepa sinuuluma woohima sa wiiyeviha weera kaakuveyeke ophwanya ni osoma. Nave-tho koobaxari mutelefoonini mwaka itthu ikina woohima sa wiiyeviha ni kinnaiwelela ikwaha sintxipale.a Kooxuttera weera muteko wootheene nimpakaahu yoolakela ahu ti ovuwiha nsina na Yehova ohiya wiivuwiha asineene ahu. Mutthu ori poothe a hiyo onneerela eparte etthu Yehova ompakaawe.” Wakhala weera nyuwo khamunhakalala ni makhalelo anyu, mpakeke itthu sinrowa wookhaviherani wunnuwihera mukhalelo woowiiyeviha. Eyo enoorowa olipiha onthamwene anyu ni Yehova ni enimookhaviherani okhala oohakalala ni makhalelo anyu. — Yak. 4:6, 8.

MPHIMELELEKE YOOWEHERERA ANYU

12. Yooweherera heeni ya muhoolo ennikhavihera okhala oohakalala ni makhalelo ahu? (Yesaya 65:21-25)

¹² Hiyo ninnahakalala ni itthu nraahuno wakhala weera ninnuupuwelela yooweherera ahu yooreera ya muhoolo. Eliivuru ya Yesaya Yehova onnanleela weera onnoona maxupo ninvirihaahu ni ennanroromeliha weera onoorowa omaliha maxupo ootheene. (Mmusome Yesaya 65:21-25.) Ninrowa okhalaka moovareleleya ni nnookhalano itthu sooreera. Nnoorowa okhalano muteko wooreera, ni nnoorowa okhalano ekumi yooreera. Khaninrowa-tho woovaka weereya ni hiyo naari ni anamwane ahu itthu soowoopiha. (Yes. 32:17, 18; Ez. 34:25) Yoowehereraahu ya muhoolo ti yooreera ni yeekhaikhai.

13. Mikhalelo heeni sootepa otthuneya nintthuneyaahu owehexexaka wa yoowehereraahu?

¹³ Vano opwaha khalayi ninnatthuneya owehexexa yooweherera ahu. Mwaha wa heeni? Mwaha wooweera ninkhala “mahiku òmalihera” ni ootheene hiyo ninnaviriha maxupo a “ehuhu yowopopiha.” (2 Tim. 3:1) Yehova mahiku ootheene onnanikhavihera weera niwere ovilela anivahaka miruku, ikuru, ni nikhavihero ninhaawelaahu. (Nsal. 145:14) Opwaha mwa yeeyo, yooweherera ahu pooti onikhavihera ovilela emaara ya maxupo. Apaale pooti weeraka nyuwo munnaviriha maxupo ootxiha emusi anyu ni itthu sinhaaweleya. Neereke nyuwo munrowa ovirihaka maxupo awo moohimala? Hooye. Yehova oolaihera woovahani itthu munhaawelaanyu ni itthu ikina-tho oparayiisu. (Nsal. 9:19 [9:18, NM]; 72:12-14) Pooti weeraka nyuwo munnaviriha maxupo a eretta ehinlamiwa ya mmuupuweloni naari ya orakala. Neereke munrowa ovirihaka maxupo awo muhiwehereraka olamihiwa? Hooye. Ireetta ni okhwa sinoomala mu elapo enyowani ya Muluku. (Apok. 21:3, 4) Yooweherera eyo ennanikhavihera okhala oohakalala ni makhalelo ahu, nihixupeyaka naari onyoonyiwa viinaano va. Hiyo pooti ohakalala nnaamweera nivirihaka ohixariya, naari oyeleela itthu sahu, ohaawa mwaha wa iretta naari maxupo makina. Mwaha wa heeni? Mwaha wooweera nnaamweera nivirihaka itthu sooxupa vano, noosuwela weera “sohawa sahu siri soyeva” ni elapo enyowani khaninrowa-tho ohaawa. — 2 Akor. 4:17, 18.

14. Moota heeni ninrowaahu olipiha yooweherera ahu?

¹⁴ Okhala weera yooweherera ahu ti yootepa otthuneya weera nihakalaleke ni itthu nraahuno, moota heeni ninrowaahu olipiha? Hiihaale ntoko mutthu ontthuneyaawe onvarihela Binóculo weera awere woona nnene sene itthu soorakamela, hiyo-tho ninnatthuneya opaka itthu soophwanelela weera nlipihe yoowehereraahu. Napaka eyo, nnoowera woona eparayiisu ya muhoolo nnene sene. Vaavo hiyo ninxupeyaahu mwaha woothoiwa musurukhu, hiyo pooti wuupuwelela ekumi ahu moota enrowaaya okhala muhoolo vaavo musurukhu ohinrowaaya okhala, ohinrowaaya okhala okopha, ni ehinrowaaya okhala atthu oothoiwa. Wakhala weera hiyo ninnaxupeya mwaha wooweera hiyo khinaakhenle iparakaha naahaawelaahu hiyo pooti wuupuwela moota itthu sinrowaaya okhala soohitthuneya muhoolo ni vaavo hiyo ninrowaahu onvarelaka Yehova mwa iyaakha sintxipale. (1 Tim. 6:19) Apaale hiyo pooti woona okhala wooxupa wuupuwelela woohima sa yoowehereraahu ya muhoolo, menento oxupeya woohima sa makhalelo ahu vano. Menento, owehexexa yooweherera ahu ya muhoolo yeeyo Yehova onlaihenraawe pooti okhala wookhweya wa hiyo.

15. Etthu heeni nyuwo munxutteranyu ni ikomentaariyu sa Christa?

¹⁵ Moone moota yooweherera emukhavihenraaya Christa, yoowo othelanne ni Dennis, nimuhimmaahu woopatxerani. Owo ohimme ha: “Miyo kookhalano eretta ehinlamiwa ni ennakeeriha ovarihela muteko ekatera ya maroota ni kinnaviriha etempu yintxipale nihiku ti nihiku kireene vakaamani. Kinnavoreiwa mahiku ootheene. Meetiku aka okilenle weera nkinrowa olama. Mene moowaakuveya kaahuupuwela ha, ‘Ola onnoona muhoolo mwa mukhalelo woovirikana.’ Kinnawehexexa yoowehereraka, ni eyo ennakiphwanyiha murettele. Olelo va, miyo kinnavilela maxupo a elapo ela, menento kinoorowa ophwanya ohakalala woomalela elapo enyowani!”

“KHEYAVOVO ENÀTHOWA YALE ANAMÒVA”

16. Mwaha wa heeni mwene Davidi aalempaawe weera ale emmoova Yehova “kheyavovo enàthowa”?

¹⁶ Murumeyi oohakalala a Yehova nlelo aneereke oviriha maxupo. Mwene Davidi aaviriha maxupo wa anamwane awe araru. Owo aathokororiwa moohixariya, aahimmwa okhala namarukunuwela ni annaasaasiwa mwa iyaakha sintxipale vaavo owo aatthawa-tthawaawe. Nnaamweera vareene hiiho, vaavo owo aatthara-tthariwaawe, owo aahimme ha woohima sa Yehova: “Kheyavovo enàthowa yale anamòva.” (Nsal. 34: 10, 11 [34:9, 10, NM]) Mwaha wa heeni owo aahimmaawe hiiho? Mwaha wooweera, nnaamweera hiyo nreene atthu a Yehova, khaninweherera weera ekumi ahu khenrowa oviriha maxupo, hiyo ninnaroromela weera khasinrowa onithowa itthu veekhaikhai ninhaawelaahu. (Nsal. 145:16) Nave-tho hiyo pooti onvekela Yehova weera anikhavihere wa maxupo ootheene hiyo ninvirihaahu. Ni hiyo pooti okhalano murettele, ohakalala, woohipwattha makhalelo ahu.

17. Mwaha wa heeni nyuwo mulakenlaayu oxuttera esiiri ya ohakala ni itthu muraanyuno?

¹⁷ Yehova ontthuna weera nyuwo muhakalaleke. (Nsal. 131:1, 2) Nto mwiilipihereke weera muxuttere esiiri ya ohakalala ni itthu muraanyuno. Wakhala weera nyuwo munimwiilipihera vantxipale weera munnuwihere mukhalelo wa oxukhurela, nvirelelaka okhala oowiiyeviha, ni mulipihaka yooweherera anyu, nyuwo munoowera ohima ha: “Anyi, sohiyeriwa saka sòkisivela.” — Nsal. 16:5, 6.