Silempwale ni Yohani
3 Aahikhala nfarisi mmosa, aihaniwa Nikodemo,+ yoowo aari muhooleli a ayuda. 2 Ohiyu, owo aahirowa okumana ni Yesu,+ onamuhimeerya wiira: “Rabi,+ hiyo noosuwela wiira mwa mwiixuttihi onikhuma wa Muluku, okhala wiira khuuvo oniwerya opaka miiriirya iya+ munipaka anyu, ohikhaliheriwaka ni Muluku”.+ 3 Yesu aahimwaakhula wiira: “Kinooleelani ekeekhai wiira, vahikhanle wiira mutthu orooyariwa vasya,*+ khonwerya okela Moomweneni mwa Muluku”.+ 4 Nikodemo aahimukoha Yesu wiira: “Vaniweryaneya sai mutthu oyariwa onnuwale ene? Khuuvo oniwerya otthikela mmirimani mwa amamawe wiira oyariwe-tho”. 5 Yesu aahaakhula oriki: “Kinooleelani ekeekhai wiira, vahikhanle wiira mutthu oyariwe ni maasi+ ni ikuru soowaarya,+ khonwerya okela Moomweneni mwa Muluku. 6 Ole oyariwe ni mutthu, ti mwaana a mutthu, masi ole oyariwe ni ikuru soowaarya, ti mwaana a Muluku. 7 Muhitepe otikinihiwa mwaha wa wooleelani wiira: Nyuwosa muhaana oyariwa vasya. 8 Epheyo, enoopela opuro eniphavela aya. Nyuwo munniiwa oruma waya, masi khamunisuwela onikhuma aya aahiiso onikela aya. Nto ale aniyariwa ni ikuru soowaarya, ari siiso”.+
9 Nikodemo aahimukoha Yesu oriki: “Eyo eniweryaneya sai?” 10 Yesu aahimwaakhula wiira: “Nyuwo mwa mwiixuttihi a wIsarayeli. Nlelo khamunisuwela itthu iya? 11 Kinooleelani ekeekhai wiira, hiyo ninlavula itthu ninsuwela ahu, nave ninnikhalela onamoona itthu soonale ahu. Masi khamuneemererya onamoona ninvaha ahu. 12 Miyo kinnooleelani itthu siri valaponi, masi nyuwo khamunikupali. Ankhi kooleelani itthu siri wiirimu, munrowa okupali sai? 13 Khuuvo mutthu otonko owela wiirimu,+ ohikhanle paahi ole okhurunwe wiirimu,+ Mwaana a Mutthu. 14 Siisaale Moise aathomeyale awe enowa vamwirini ori ene moothakoni,+ siiso-tho atthu anrowa omuthomeya Mwaana a Mutthu,+ 15 wiira ootheene ale animukupali, aphwanye okumi woohimala.+
16 “Tthiri, Muluku oophentexa olumwenku,* mpakha onvaha Mwanawe mmoseene,+ wiira ootheene ale anooniherya omwaamini yoowo, ahipwetexiwe, masi akhalane okumi woohimala.+ 17 Veekeekhai, Muluku khomurumme Mwanawe orwa vathi-va wiira ophukele olumwenku. Masi omurumme wiira olumwenku woopoliwe mwaha wa yoowo.+ 18 Ole onooniherya omwaamini yoowo, khonrowa ophukeliwa.+ Ole ohinimwaamini, oophukeliwa, okhala wiira khaaminni nsina na Mwaana mmoseene a Muluku.+ 19 Mweekeekhai, muthuko ohoorwa moolumwenkuni,+ masi atthu khonaasivela muthuko, enaasivela epiphi, maana awo annipaka itthu soohiloka. Tivo awo anrowa ophukeliwa. 20 Tthiri, ole onipaka itthu sootakhala, onninyokha muthuko, nave khonaattamela muthuko, wiira muthuko owo ohooniherye miteko sawe sootakhala. 21 Masi ole onipaka itthu sooloka, onnaattamela muthuko,+ wiira miteko sawe sooneyeke, okhala wiira miteko iyo soovariwa ntoko Muluku oniphavela awe”.
22 Nuumala-vo, Yesu ni awiixutti awe yaahirowa mmuttettheni mwa oYudeya. Nto, aahikhala weiwo ni awiixutti awe okathi vakhaani, nave aanaapatisa atthu.+ 23 Masi-tho, Yohani aapatisa atthu wEnoni, waattamela oSalimi, maana yaahikhala maasi manceene opuro ole.+ Nto atthu yaanirowa wiira yapatisiwe.+ 24 Yohani iira nlelo ohiriheliwe mukhatteya.+
25 Vano awiixutti a Yohani yaanivaanyihana ni muyuda mmosa, mwaha wa oreerihiwa. 26 Siiso, awo yaahirowa wa Yohani anamuhimeerya wiira: “Rabi,* munnimuupuwela mulopwana yoole mwaamuhimya anyu+ ni aari ni nyuwo okhopela wa muro Yordani? Owo onaapatisa atthu. Nave atthu ootheene annirowa wa yoowo”. 27 Yohani aahaakhula oriki: “Khiivo etthu, mutthu onaakhela awe ohivahiwe wiirimu. 28 Nyuwo mmansinyu mwa anamoona a itthu kaahimmye aka wiira: ‘Miyo nkihiyo Kristu,+ masi kirummwale orowa ohoolo wawe’.+ 29 Muthiyana onoivariwe,* tawawe ole omunoivanri.*+ Masi mpatthani awe ole onoivanri,* okathi oneemela awe onanwiriyana ole onoivanri,* onnitteeliwa murima vanceene, mwaha wa omwiiwa ole onoivanri.* Siiso, otteeliwa waka murima woomalelihiwa. 30 Miteko sa Kristu sihaana wuncerereya, vano miteko saka sivukuweke”.
31 Ole onikhuma osulu+ ti muulupale waavikana atthu ootheene. Ole onikhuma vathi, ta vathi vaava, ni onilavula itthu sa vathi. Ole onikhuma wiirimu, ti muulupale waavikana atthu ootheene.+ 32 Owo onnikhalela onamoona itthu oonale awe ni iiwale awe,+ masi khuuvo onikupali onamoona awe.+ 33 Ole okupanli onamoona awe, oheemererya wiira Muluku teekeekhai.+ 34 Tthiri, ole orummwale ni Muluku, onilavula itthu sinihimya awe Muluku,+ okhala wiira Muluku onninvaha ikuru soowaarya voohiphima. 35 Tiithi onnimphenta Mwaana,+ nave onvahererya itthu sootheene mmatatani mwawe.+ 36 Ole onooniherya omwaamini Mwaana, ookhalana okumi woohimala.+ Vano ole ohinimwiiwelela Mwaana, khonrowa ophwanya okumi owo,+ masi oviruwa wa Muluku onrowa okhala ni yoowo.+