Miteko sa Arummwa
4 Pedru ni Yohani nlelo alavulaka ni atthu ale, yaahirwa anamukuttho ni muhooleli a mutemplo ni asaduki.+ 2 Awo yaahinanariwa vanceene, okhala wiira arummwa yaaniwiixuttiha atthu ni yaanilaleya ohoolo wa atthu ootheene, wiira Yesu oohihimuxiwa mookhwaani.+ 3 Nto, yaahinvara Pedru ni Yohani, yaatthukwela,+ mpakha mmeeloni mwaya, maana vaahiila. 4 Masi, atthu anceene yaiwale moolumo awo, yaahaamini. Siiso, nummeru na atthu yaaminni naari etthu yoowiiraka alopwana 5.000.+
5 Mmeeloni mwaya, anamalamulela, makhulupale a ayuda, alipa-oowiixuttiha nlamulo, yaahithukumana oYerusalemu, 6 vamosa ni mukhulupale a anamukuttho Hanaaxi,+ Kaifa,+ Yohani, Alexandre ni amusi ootheene a mukhulupale a anamukuttho. 7 Awo yaahimweemexa Pedru ni Yohani eriyari aya, anapacerya waakoha ariki: “Itthu iya, munipaka ni owerya wawani aahiiso ni nsina nawani?” 8 Vano Pedru, osareyale ene ikuru soowaarya,+ aahiwaakhula iiraka:
“Nyuwo anamalamulela a atthu ni makhulupale a ayuda, 9 niireke muniphavela osuwela etthu yooloka nimwiirenle ahu mulopwana ola oorakala+ ni moota okhalihiwe awe saana? 10 Vano, nyuwo ni atthu ootheene a wIsarayeli musuwele etthu ela: mulopwana ola oopenuxiwa mwa nsina na Yesu Kristu, munazarethi.+ Mwaha wa yoowo, mulopwana ola oheemela ohoolo wanyu okhalihiwe ene saana. Yesu owo, ti yoole mwaamukhomenle anyu vamwirini wa nihaaxeryo,*+ masi Muluku oomuhihimuxa.+ 11 Yesu owo, ti ‘nluku nyuwo alipa-ooteka empa mwaakhontte anyu, nenlo nikhalihiwe nluku nuulupale na alisenso’.+ 12 Nave-tho, khuuvo onwerya onoopola, okhala wiira khanikhanle nsina nikina+ mulaponi, Muluku othanlale awe eriyari ya atthu wiira noopoliwe”.+
13 Okathi yoonale aya olipa murima wa Pedru ni Yohani ni osuwela wiira yaari atthu yahaasomme* ni yaari atthu pure,+ awo yaahitikinihiwa vanceene. Nto, yaahuupuwela wiira Pedru ni Yohani yaaneetta ni Yesu.+ 14 Siiso, khiyaawenrye omwaakhula etthu Pedru ni Yohani,+ okhala wiira mutthu ole aapenuxiwe, aari vaavale.+ 15 Tivo, yaahaaruma okhuma oSineedrio,* anapacerya ovaanela yaawo-ru, 16 ariki: “Ninrowa owiiriha exeeni alopwana ala?+ Tthiri, atthu ootheene anikhala oYerusalemu,+ annisuwela wiira mwiiriirya ola muulupale wiiraneyale ni yaawo, nave hiyo khaninwerya ovaanya. 17 Nto wiira etthu ela ehitepe wuulaana, nrowe niwoopopihe ni naahimeerye wiira ehitthikele-tho olavula ni mutthu, erumeelaka nsina nla”.+
18 Nuumala-vo, yaahiwiitthana, yaahimeerya wiira: “Muhilavule-tho etthu nnakhala wiixuttiha murumeelaka nsina na Yesu”. 19 Siiso, Pedru ni Yohani yaahiwaakhula, yiiraka: “Mutthokelele oratteene mmansinyu, yaari etthu ya xariya vamaithoni va Muluku, owiiwelelani nyuwo, ohiya omwiiwelela Muluku. 20 Masi hiyo, khaninwerya ohiya olavula itthu noonale ahu ni niiwale ahu”.+ 21 Tivo, nuumala weererya owoopopiha-tho, awo yaahaataphula, okhala wiira khiyaaphwannye mulattu wiira yaahukhumu. Nave-tho yaaniwoova atthu,+ maana atthu ootheene yaaninvuwiha Muluku, mwaha wa etthu yaakhumelenle. 22 Ohiya-vo, mulopwana ole aapenuxiwe mwa mwiiriirya, aarina iyaakha sinivikana 40.
23 Nuumala otaphuliwa, awiixutti ale anli yaahirowa opuro yaari awiixutti akina, yaaleela ele makhulupale a anamukuttho ni makhulupale a ayuda yaahimenrye aya. 24 Vaiwale aya etthu eyo, ootheene ale yaari opuro ole, yaahinvekela Muluku moowiiraana, ariki:
“Pwiya Muulupalexa, ti nyuwo mpattunxe erimu, elapo, ephareya ni itthu sootheene sinikhala mapuro awo.+ 25 Nave murumeelaka ikuru sanyu soowaarya, moohimya ni moolumo a murumeyi anyu Davidi,+ muhavinre ahu, wiira: ‘Xeeni atthu a maloko annanariwa aya, nave xeeni atthu anuupuwela aya itthu seethiru? 26 Mamwene a mulaponi aheemela, nave anamalamulela aathukumana poromosa, wiira awane ni Yehova* ni ole omuthanlale awe’.*+ 27 Mweekeekhai, Herodi vamosa ni Ponsio Pilato,+ atthu a maloko ni atthu a wIsarayeli, yaahithukumana poromosa epooma yeela wiira awane ni Yesu, murumeyi anyu oowaarya, yoowo omuthanlale anyu.+ 28 Awo yaahithukumana wiira apake etthu mwaahimmye anyu vahinatthi. Itthu iyo sihiiraneya okhala wiira mookhalana owerya, ni mwaha woowi ennivarihana ni yoolakela anyu.+ 29 Xontte Yehova,* nwiriyane onoopopiha waya, ni munikhaliherye hiyo, arumeyi anyu, wiira nihihiyererye olavula moolumo anyu, nihoovaka etthu. 30 Okathi omosa-ru, munnirumeela ikuru sanyu wiira mwaapenuxe atthu. Nave munnipaka miiriirya ni miteko sootikiniha,+ murumeelaka nsina na murumeyi anyu oowaarya, Yesu”.+
31 Vano, nuumala omuxonttela Muluku,* opuro ole yaathukumanne aya waahittikinyeya. Nave ootheene aya yaahisareya ikuru soowaarya,+ analaleya moolumo a Muluku, ahoovaka etthu.+
32 Nave-tho, muttitthi wa atthu ootheene yaaminni, waarina muupuwelo mmosa-ru.* Khuuvo aahimya wiira mireerelo aarina awe saari sawawe paahi, masi yaanikawana itthu sootheene.+ 33 Nave arummwa yaanivaha oratteene onamoona wa ohihimuxiwa wa Pwiya Yesu+ ni yaahisareya oreera murima wuulupale wa Muluku. 34 Tthiri, khuuvo mutthu aathoiwa etthu,+ okhala wiira ale yaarina imatta aahiiso ipa, yaanitumiha nto musurukhu ene yaaniruuha, 35 anaavahererya arummwa.+ Nuumala-vo, khula mutthu aanivahiwa etthu yaamuthowa.+ 36 Vano, Yosefe, yoowo-tho arummwa yaamwiihana aya Baarnaba+ (nsina nenlo nintaphulela “ole onaalipiha akina”), aari mulevi aayariwe elapo ya oKiipero, 37 aahikhalana ematta awe, khutumiha, nto musurukhu ene aahaavahererya arummwa.+