Agosto

Esalimo ela ennihimya itthu piili. Itthu sene tiiya: Yoopacerya, anaxariya sinnaaphwanya mixankiho. Ya nenli, Yehova onnaakhaliherya oxintta mixankiho iyo. Masi onaakhaliherya sai? Enamuna emosa onipaka awe eyo, ori onikhaliherya okhalana moonelo wooloka voohimya sa okumi ahu nnaamwi nikhalaka olumwenku ola wootakhala. Yehova onnileiherya wiira nnoophwanya ohakalala wunceene naamurumeelaka. Hata vari siiso, Yehova khonnileiherya wiira khaninrowa okhalanaka mixankiho. (Yes. 66:14) Yehova onnitumererya wuupuwelelaka itthu sooloka sinrowa wiiraneya muhoolo, okathi ninrowa ahu okhalana okumi wooloka. Maana Yehova oniphavela wiira nikhaleke saana ni moohimala. (2aKor. 4:16-18) Nto nilipelelaka ophiya okathi owo, Yehova khonrowa ohiya onikhaliherya wiira niweryeke omurumeela khula nihiku hata siniphwanyaka mixankiho. (Wikh. 3:22-24) Arumeyi oororomeleya a Yehova akhalai ni a mahiku ala anniixuttiha exeeni? Nave nnimwiixutta wiira ootheene ahu sinooniphwanyaka mixankiho nahaalipelela ahu. Nave-tho, nnimwiixutta wiira naahihiye omuroromela Yehova, khula okathi onoonikhaliheryaka. — Esal. 55:22. w23.04 14-15 itti. 3-4

Nnimwiixutta etthu ni ntakiheryo na Yosefe ni Maria, yaawo yaawiiwelela makhulupale a mulaponi, hata ikwaha sikina vaaxankiha opaka eyo. Nwehe etthu yeeherenrye wiiwelela waya okathi Maria aarupanle awe. (Luka 2:1-6) Okathi ole, Seesari Augusto aahikumiherya nlamulo naahimya wiira atthu ootheene yaahaana otthikela elapo aya wiira yarepeliwe. Maria ni Yosefe yaahaana weetta mukwaha wa ikiloomo 150 erowaka oBethelehemu, nave yaavira ephiro yoowaatta isupita ni mikhuruwelo. Mukwaha ole, waari wooxankiha, otepexa wene Maria iira ohalaka vakhaani oyara. Nkuupuwelani vakhanle wiira erukulu yampacerya onwereya eettaka mukwaha ole! Woonasa wene, awo yaahixanka vanceene ni okumi wa Maria ni mwaana aarupaliwe, yoowo muhoolo mwaya aarowa okhala Mesiya. Tthiri Yosefe ni Maria yaaphavenle yaamurumeela mathowa ale wiira ahimwiiwelele kuvernu. Yosefe ni Maria khiyeemerenrye wiira mixankiho iye siwiirihe ohimwiiwelela kuvernu. Okhala wiira yaahiiwelela, Yehova aahaareeliha. Maria aahiphiya moovareleleya oBethelehemu, aahimuyara mwaana mukumi ni aahikhaliherya wiiraneya eprofesia ya mbiibiliyani! — Mik. 5:2. w23.10 8 etti. 9; 9 itti. 11-12

Ankhi akhala wiira munnixanka okathi munuupuwela anyu orowela mithukumano? Etthu enrowa wookhaliheryani ori olokiherya khula muthukumano. (Mir. 21:5) Nto okathi munisuwela anyu mwaha onrowa othokoreriwa omuthukumanoni, munimoonaka okhweya okomentari. Etthu ekina, ori ovaha ikomentaario sookhuveya. (Mir. 15:23; 17:27) Akhala wiira munoovaha ekomentaario yookhuveya, munoovukula oxanka. Okathi munivaha anyu ekomentaario yookhuveya ni moolumo anyu, munimooniherya wiira muhiilokiherya saana ni muhiiwexexa mwaha owo. Masi ankhi akhala wiira muheererya inamuna iya sootheene, masi nlelo munaxanka mwaaphavelaka okomentari? Mukupaliki wiira Yehova onnivaha efaita yinceene itthu sootheene muniwerya anyu opaka. (Luka 21:1-4) Tthiri, Yehova khonnivekela opaka etthu nihinwerya ahu. (aFil. 4:5) Musuweleke etthu muniwerya anyu opaka, nuumala-vo mpakeke okhala yoolukama anyu ni munvekeleke Yehova wiira oovaheeni murima woomaaleleya. Wanipacerya, yoolukama anyu ekhaleke ovaha ekomentaario yookhuveya. w23.04 21 itti. 6-8

Murummwa Paulo, aahaalikanyiha makristau ntoko anakhotto aari oowehaweha ni yiilokihenrye wiira awane ekhotto. Okhottoni, nakhotto khula okathi ohaana okhala oolikana ene wiira owane. Nto eyo ti etthu eniwiiraneela makristau. Wiira niilokiherye nihinatthi ophiya nihiku na Yehova, nihaana owara soowara iya sinittharelana: “Waamini ni ophenta” vamosa ni “nlipelelo na woopowa, ntoko ekapaseeti”. Yoowara ya yuuma yaanikhapelela murima wa nakhotto. Ntoko yoowara ya yuuma yaakhapelela aya murima wa nakhotto, waamini ni ophenta onnikhapelela murima ahu wa nthoonyeryo. Mikhalelo iya, sinninikhaliherya ohihiya omurumeela Muluku ni omutthara Yesu. Waamini onninikupaliha wiira Yehova onimwaatthuvela “ale animwaavya ni murima aya wotheene”. (aHep. 11:6) Nave waamini, onninikhaliherya ohihiya omuroromela muhooleli ahu Yesu, hata siniphwanyaka mixankiho. Nave-tho, niwuupuweleke axinna ahu ahinihiya ororomeleya hata ahaaxiwaka aahiiso waathowaka musurukhu. Opaka eyo, onoolipiha waamini wahu ni onikhaliherya ovilela. Ohiya-vo, nihaana osyaka ophavelasa muhakhu. Exeeni enrowa onikhaliherya osyaka omorela muraakho owo? Nihaana waatakiha anna ni arokora yaawo aakhweihenrye okumi aya wiira aheleke Omwene wa Muluku opuro woopacerya. w23.06 10 itti. 8-9

Wiihiiha mukhalelo onnikhaliherya ovarerya miyuupuwelo sahu ni miteko sahu. Wiihiiha onninikhaliherya opaka etthu wiira niphwanye soolukama sahu otepexa wene akhala wiira khanrina ikuru wiira niphwanye. Muhiliyale wiira wiihiiha oniirela mpantta mikhalelo sinikumiheriwa ni munepa woowaarya. Nto munvekeleke Yehova munepa woowaarya wiira munnuuherye mukhalelo owo wa faita. (Luka 11:13; aKal. 5:22, 23) Nihilipeleleke wiira nikhalane okathi wooreerexa. Elapo ela ninkhala ahu khivanireerela olipelela itthu ookhala saana wiira nipake ele nimphavela ahu. Akhala wiira nnoolipelela okathi wooreerexa, woonasa wene khaninkhala-khala nimalelihaka etthu nimphavela ahu. Ikwaha sikina nyuwo pooti ohikhalanaka ikuru woomaleliha etthu muniphavela anyu otepexa wene vakhala wiira ti yooxankiha. Akhala wiira eyo enimwiiraneya, munoonela sai opaceryaka vakhaani-vakhaani mpakha omaleliha? Nave mwaaphavelaka wunnuuherya mukhalelo mmosa wa ekristau, munoonela sai wooniheryaka vakhaani-vakhaani mukhalelo owo khula nihiku? Aahiiso akhala wiira muniphavela omusoma Biibiliya ootheene, munoonela sai opacerya omusomaka minuutu vakhaani khula nihiku? w23.05 29 itti. 11-13

Nikhaliheriwaka ni Yehova vamosa ni mutthenkeso awe, ninnaakhela malakiheryo manceene mahiku ala ookiserya. Malakiheryo awo anninikhaliherya ootheene ahu ohihiya weetta ‘ephiro yooreera’. (Yes. 35:8; 48:17; 60:17) Ninnikupali wiira khula okathi mutthu oneemererya awe yoosoma ya Biibiliya, owo onnikhalana eparakha yooweetta ‘ephiro yooreera’. Atthu akina annipaka eyo mwa okathi vakhaani ni anaahiya weetta ephiro eyo. Masi akina annilakela ohihiya weetta ephiro eyo mpakha ophiya mapuro anrowa aya. Masi opuro xeeni anrowa aya? Ale arina nlipelelo na okhala wiirimu opuro aya “mparayiisu mwa Muluku”. (Wis. 2:7) Ale arina nlipelelo nookhala valaponi, opuro aya okathi anrowa aya okhala atthu oohittheka wanikisa wa Olamulelo wa Ekonto Emosa wa Kristu. Vakhala wiira nyuwo muneetta ‘ephiro yooreera’, muhitthikele ottuli ni muhihiye weetta ephiro eyo mpakha ophiya opuro munrowa anyu, eyo piiyo, elapo esya! w23.05 17 etti. 15; 19 itti. 16-18

Akhala wiira munimuupuwelelaka itthu sootheene Yehova oopakenle aweni, eyo enoowiirihani omuxukhurela ni ophavela ovahererya okumi anyu wa yena. (Esal. 116:12-14) Biibiliya onnimuhimya Yehova okhala maphattuwelo a “soovaha sotheene sooreera ni soomalela”. (Yak. 1:17) Yoovaha yuulupale, mukuttho wa mwanawe ori, Yesu. Tthiri eyo yoovaha ehinlikana ni sikina! Eyo ti etthu yiirinhe oweryaneya nyuwo okhalana ompatthani woolipa ni Yehova. Nave eyo ehoovahani eparakha ya ophwanya okumi woohimala muhoolo. (1Yoh. 4:9, 10) Wiivahererya wa Yehova, enamuna ekina munooniherya anyu wiira munnixukhurela itthu sootheene Yehova opanke awe mwaha wa niphento, ohela muhina mareeliho muniphwanya anyu. — Otum. 16:17; 2aKor. 5:15. w24.03 5 etti. 8

Olelo-va, okathi nnoona ahu mweettelo woohiloka wa atthu, ninnixanka ntoko Lothi. Biibiliya onihimya so: ‘Lothi aanixanka vanceene mwaha wa mweettelo woohiloka onooniherya ohuuliwa muru wa atthu ale ootakhala’. Owo aanisuwela wiira Tiithi ahu a wiirimu onninyokha mweettelo owo. (2Ped. 2:7, 8) Omuttittimiha ni omphenta Muluku waahimukhaliherya Lothi, okhootta mweettelo woohiloka wa atthu a okathi ole. Ntoko Lothi, hiyo ninkhala eriyari ya atthu ahinttittimiha malamulo a Yehova aahiiso anttittimiha vakhaani. Hata vari siiso, nnoowerya okhalana mweettelo wooloka. Exeeni enrowa onikhaliherya? Nihaana omphenta Muluku ni omuttittimiha. Yehova onnirumeela eliivuru ya Miruku wiira onikhaliherye ni onitumererye opaka itthu sooloka. Nto atthu ootheene, eyo piiyo, alopwana, athiyana, amiravo ni atthu oowuuluvala, anoowerya wiixutta itthu sooreera akhala wiira anoosoma eliivuru ya Miruku. Omuttittimiha Yehova, onooniiriha osyaka woothererya itthu mwaha wa etthu yoohiloka nipanke ahu. w23.06 20 itti. 1-2; 21 etti. 5

Woonasa wene, munnilupatthiwa ni amusi, aahiiso munnileva itthu sinceene wiira muhele nipuro noopacerya Omwene wa Muluku. (Math. 6:33) Akhala wiira eyo enniwiiraneelani, mukupaliki wiira Yehova onniweha wiimananiha wanyu. (aHep. 6:10) Tthiri opaka eyo, enooniherya wiira nyuwo munnikupali moolumo a Yesu ani: “Ole ohiyale empa, aahiyale axinnawe, axirokorawe, amamawe, apapawe, anaawe, aahiiso ohiyale imatta mwaha wookhala mwiixutti aka ni mwaha wa ihapari sooreera, okathi ola, onimwaakhela voowaatta, ipa, axinna, axirokora, aximaama, anamwane, imatta, hata olupatthiwaka. Nave olumwenku onirwa, onoophwanya okumi woohimala”. (Mar. 10:29, 30) Nto mareeliho awo ootheene mphwannye anyu toowaatta ovikana itthu sootheene mulenve anyu. — Esal. 37:4. w24.03 9 etti. 5

Okathi makristau a oYudeya, yaarina aya muxankiho wa etala yinceene anna a muloko wa wAntiyokiya, “yaahilakela waakhaliherya anna yaakhala oYudeya, ntoko yaawerya aya”. (Mit. 11:27-30) Nnaamwi makristau ale yaaphwanyiwe etala yaakhala otteiwene, anna a wAntiyokiya yaahilakela waakhaliherya. (1Yoh. 3:17, 18) Naatakihaka makristau ale a wAntiyokiya, nihaana owoonela othunku anna ni arokora okathi sinaaphwanya aya ihasara aahiiso mixankiho sikina. Nto moowaakuveya nihaana waakhaliherya anna awo. Hiyo pooti waakoha axitokweene a muloko ahu, akhala wiira yookhala etthu ninreerela ahu opaka wiira naakhaliherye, aahiiso hiyo pooti ovaha musurukhu ahu ni waavekelela anna ni arokora awo. Okathi owo, anna ni arokora anoorowa opirisariki ovahiwa itthu saamukhaani sinrowa waathowaka. Okathi Mwene ahu Yesu Kristu, onrowa awe waaphukelaka atthu valaponi, nimphavela wiira oniphwanye nooniheryaka othunku wiira ‘naakhele Omwene olokiheriwe’. — Math. 25:34-40. w23.07 4 itti. 9-10; 6 etti. 12

Omutakihaka Yehova, Yesu aanaathokorerya saana atthu akina. Yesu aahirummwa orwa valaponi wiira aalaleerye ‘atthu aisarayeli paahi, yaawo yaari ntoko ipwittipwitthi saarimenle’. Okhala wiira Yesu aanaathokorerya saana atthu akina, eyo yaahimwiiriha ohiya waalaleerya atthu aarummwale awe paahi, masi aahaalaleerya ale yahaakhanle aisarayeli. Mwa ntakiheryo, ekwaha emosa muthiyana yoowo ahaakhanle mwisarayeli, aahinvekela Yesu wiira ampenuxe mwaana awe mwaamuthiyana yoowo ‘aahaawa vanceene mwaha wa nlaikha nootakhala nanvanre’. Yesu aahimoonela othunku muthiyana ole ni aahimpenuxa mwaana owo. (Math. 15:21-28) Nrowe niwehe ntakiheryo nikina. Wanipacerya wa muteko awe woolaleerya valaponi, Yesu ahimmye so: “Ole onikikhootta . . . , nave-tho miyo kinoomukhootta”. (Math. 10:33) Masi Pedru aahimukhootta Yesu ikwaha tthaaru. Niireke Yesu aahimukhootta Pedru? Nnaari. Yesu anisuwela wiira Pedru aahittharuwa ni ari mutthu oororomeleya. Nuumala Yesu ohihimuxiwa, owo aahitthikela okumana ni Pedru ni aahimuleela wiira aahimulevelela ni aanimphenta. (Luka 24:33, 34) Yehova Muluku ni Yesu Kristu khahiyo atthu oothipelela. Ankhi hiyo? Yehova oniphavela wiira nikhaleke atthu oohithipelela. w23.07 21 itti. 6-7

Akhala wiira ookhala mutthu ohinikupali wiira elapo enookhala eparayiisu, exeeni nikhanle ahu oohimya? Yoopacerya, nihaana omuleela wiira Yehova mwaneene tonileiherya. Eliivuru ya Wiisuupulula enihimya so: “Moone! Miyo kinnipaka itthu sotheene isya”. Yehova ookhalana ankhili, owerya ni onniphavela omaleliha yoolakela awe. Ya nenli, mwa moonelo wa Yehova, itthu oleihenrye awe vanikhala ntoko wiira sihiiraneya. Ti maana aya ahimmye awe so: “Moolumo ala toororomeleya ni teekeekhai. . . . Ala ahiiraneya!” Ya neeraru, khiivo enrowa omukhoottiherya Yehova omaleliha ele oleihenrye awe, ti etthu yaamwiirinhe ohimya so: “Miyo ka Oopacerya ni Ookiserya”. (Wis. 21:6) Muhoolo atthu ootheene anoosuwela wiira Satana tori nawoothe ni oowoolowa ohiya Yehova. Nto ikwaha sikina munrowa anyu osomaka yooleiherya yootepa oreera voohimya sa elapo akhala mutthu onihimya wiira “itthu iyo ti sootepa oreera masi kinoona wiira khasinrowa wiiraneya”, musomeke ni mmutthokiheryeke Wiisuupulula 21:5, 6. Nave pooti omutthokiherya ni wuupuwelela ni mutthu owo, ntoko Yehova aasinanri ene epaphelo ya omaleliha yoolakela awe ya wiiriha elapo okhala eparayiisu. — Yes. 65:16. w23.11 7 itti. 18-19

Yehova aahimuleela Abrahamu yooleiherya ela okathi aarina awe iyaakha 75. Niireke Abrahamu aahiweha yooleiherya eyo yiiraneyaka? Aahiweha vakhaani. Nuumala olapuwa muro Eufrate ni olipelela iyaakha 25, Abrahamu aahimuyara Isakhi. Nuuvira iyaakha 60, Abrahamu aahiyareliwa axisulu awe anli Esawu ni Yakobe. (aHep. 6:15) Masi Abrahamu khaawenhe osuulu awe opakeyaka nloko nuulupale ni waakhelaka elapo yooleiheriwa. Hata vari siiso, mulopwana ole oowaamini aahikhalana ompatthani woolipa ni mpattuxa awe. (Yak. 2:23) Okathi Abrahamu onrowa awe ohihimuxiwa, onoohakalala osuwela wiira mwaha wa waamini wawe ni opixa wawe murima, maloko ootheene a valaponi aareelihiwa. (Maph. 22:18) Nniixutta-ni? Hiyo pooti ohiwerya woona siiraneyaka itthu sootheene Yehova oleihenrye awe niinaano-va. Masi nakhala oopixa murima ntoko Abrahamu, nikupaliki wiira Yehova onoonitthuvela nenna-va, vanceenexa muhoolo elapo esya oleihenrye awe. — Mar. 10:29, 30. w23.08 24 etti. 14

Okathi mwene Oziya aari awe mmiravo aari oowiiyeviha. Oziya aahiixutta “omova Muluku”. Owo aakhwiiye orina ene iyaakha 68, mwa iyaakha sinceene sa okumi awe Yehova aahimureeliha. (2Wah. 26:1-4) Oziya aahaaxintta awanani anceene, nave aahiiriha wiira Yerusalemu okhale oovareleleya. (2Wah. 26:6-15) Moohaanyiherya, Oziya aahihakalala vanceene mwaha wa itthu sootheene aavanre awe okhaliheriwaka ni Yehova. (Mus. 3:12, 13) Mwene Oziya, aahilimalela waaleela atthu akina etthu yaakhanle aya oopaka. Niireke eyo yaahimwiiriha wuupuwela wiira yena pooti opaka khula etthu aaphavela awe? Nihiku nimosa, Oziya aahivolowa mutemplo mwa Yehova onaphavela opaha nsenso valtaari, etthu yeeyo mamwene yaaheemereriwa aya opaka. (2Wah. 26:16-18) Muulupale anamukuttho Azariya, aahimananiha omukhoottiherya, masi Oziya aahinanariwa vanceene. Mooriipiha murima, Oziya aahihiya omwaamini Yehova, nto Yehova aahimuhukhumu omukumiheryaka makuttula. (2Wah. 26:19-21) Eyo khiyaarowa wiiraneya vakhanle wiira yena khaahiyale okhala oowiiyeviha! w23.09 10 itti. 9-10

Hata nuumala othanliwa ni munepa woowaarya, murummwa Pedru nlelo aaniwanana mixankiho sawe. Mwaakha wa 36 Nuumala Kristu Orwa, Muluku aahimuruma Pedru okumana ni Korneelio yoowo ahaakhanle muyuda. Nuumala-vo, Korneelio aahithanliwa ni munepa woowaarya nto eyo yaahooniherya wiira Muluku “khonaathanya atthu”. Hata ale yahaakhanle ayuda yaneemereriwa wiirela mpantta muloko wa ekristau. (Mit. 10:34, 44, 45) Muhoolo mwaya, Pedru aahipacerya olya ni ale yahaakhanle ayuda, masi owo khaatonko opaka eyo. Masi makristau makina ayuda, yuupuwela wiira ayuda ni amalapo khiyaareerela olya vamosa. Nuumala ayuda akina orowa wAntiyokiya, Pedru aahihiya olya vamosa ni amalapo, maana anoova ovukula waamini wa makristau a ayuda. Okathi murummwa Paulo oonale wiira Pedru kheettela ekeekhai, aahimpwapwela ohoolo wa atthu ootheene. (aKal. 2:13, 14) Hata aapanke yoottheka ele, Pedru khaatthikenle ottuli ni aanivilela. w23.09 22 etti. 8

Pooti wiira yookhala etthu munreerela anyu olokiherya, masi muheemererye eyo yookhulumulakani. Tthiri “Apwiya tooreera murima” nto awo animookhaliheryani opaka marukunuxo anireerela. (1Ped. 2:3) Murummwa Pedru onninlipiherya wiira: “Muluku . . . onoomaliherya wiixutta wanyu. Owo onimoolipihani”. Woopaceryani Pedru uupuwela wiira khaaphwanela weetta ni Yesu. (Luka 5:8) Masi mwaha wa oreera murima wa Yehova ni Yesu, owo aahiwerya ovilela ni okhala mutthareli a Kristu. Yookhumelela aya Pedru aaheemereriwa “moomweneni ohinimala wa Pwiya ahu, ni Moopoli ahu Yesu Kristu”. (2Ped. 1:11) Tthiri ala mareeliho oovara murima! Vakhala wiira munoomutakiha Pedru nvilelaka ni mmweemereryaka Yehova owiixuttihani, munimwaakhela etthuvo ya okumi woohimala. Mwiira siiso, “waamini wanyu onoowiirihani woopoliwa”. — 1Ped. 1:9. w23.09 31 itti. 16-17

Etabernaakulu yaahikhalana niyate nuulupale, opuro yoowo anamukuttho yaavara aya miteko saya. Opuro owo yaahikhala altaari a ekoopiri yaavahiwa mikuttho soowoopola, nave yaahikhala epasiya yaari maasi yaawo anamukuttho yaarumeela aya, wiira yiireerihe ehinatthi ovaha mikuttho. (Okhu. 30:17-20; 40:6-8) Olelo-va, axinnawe Kristu annimurumeela Yehova moororomeleya valaponi-va, niire so niyate na muhina na etemplo ya omunepani. Epasiya yuulupale yaari mutabernaakulu ni mutemplo, enniwuupuxerya makristau ootheene oothanliwa wiira ahaana okhalana mweettelo wooloka ni okhalana waataana wooloka ni Yehova. Ankhi atthu a “muttitthi muulupale”, animurumeela woowi Yehova? Murummwa Yohani, aahiwoona “yeemenle ene ohoolo wa ehice”. Opuro owo onitaphulela niyate na ota na etemplo ya nthoonyeryo, weiwo “aninvarela aya muteko [Muluku] othana ni ohiyu mutemplo mwawe”. (Wis. 7:9, 13-15) Ninnivaha efaita yinceene eparakha ela Yehova onivanha awe ya omukokhorela mwa enamuna yooloka mutemplo ya omunepani! w23.10 28 itti. 15-16

Yehova onnaarumeela axitokweene wiira anilipihe. (Yes. 32:1, 2) Okathi sinoophwanyayani mixankiho, mwaaleeleke axitokweene itthu sootheene sinooxankihani. Mweemereryeke okathi axitokweene anookhaliheryayani. Aarumeelaka axitokweene Yehova onimoovahani ikuru. Nlipelelo nahu na mbiibiliyani na okhala mahiku ootheene, okhale mparayiisu valaponi vaava aahiiso moomweneni wa Muluku wiirimu. (aRom. 4:3, 18, 19) Nlipelelo nahu ninninikhaliherya ovilela mixankiho, olaleya ihapari sooreera ni omaleliha yoothanleliwa ahu mmulokoni. (1aTes. 1:3) Tthiri nlipelelo nenlo naamulipinhe murummwa Paulo. Owo aahimmye wiira ‘aaniphunyiwa’, ‘aahitthukweliwa’, ‘aanilupatthiwa’ ni aaniixoona ‘onyanyaliwa’. Nave ikwaha sikina aahaala vakhaani okhwa. (2aKor. 4:8-10) Murummwa Paulo aahikhalana ikuru mwaha woowi aniwehexexa nlipelelo nawe na muhoolo. (2aKor. 4:16-18) Tthiri Paulo aanuupuwela nlipelelo nawe na muhoolo, okhala mahiku ootheene wiirimu. Nto aanoona okhala “etthu ya faita yuulupale” mookumini mwawe. w23.10 15-16 itti. 14-17

Okathi munivekela anyu, nwehe akhala wiira okathi wooreerela wiira Yehova oovaheeni etthu muninvekela anyu. Woonasa wene, nimphavela wiira nivekelo nahu naakhuliwe moowaakuveya. Ekeekhai wiira Yehova onnisuwela okathi wooreerela wiira onikhaliherye. (aHep. 4:16) Okathi mavekelo ahu ahinaakhuliwa aya, hiyo pooti wuupuwelaka wiira Yehova ‘ookhootta’. Masi waakhuliwa waya pooti okhala ‘mulipeleleke’. Mwa ntakiheryo, munna mmosa anvekela Yehova wiira omukhaliherye openuwa oretta awe. Masi khaapenunwe. Vaakhanle wiira Yehova aahipaka miiriirya ompenuxa moowaakuveya, Satana aarowa wuupuwelaka wiira munna ole onimurumeela Yehova paahi mwaha woowi oopenuxiwa. (Yoobi 1:9-11; 2:4) Ohiya-vo, Yehova oonileiherya wiira muhoolo ootheene ahu nnoopenuxiwa. (Yes. 33:24; Wis. 21:3, 4) Ohinatthi ophiya okathi owo, nihilipeleleke wiira nnoopenuxiwa mwa miiriirya. Etthu munna ole aakhanle awe oovekela, yaari ovahiwa ikuru ni murettele wa mmuupuweleloni wiira ohihiye omurumeela moororomeleya, nnaamwi owereiwaka. w23.11 24 etti. 13

Nnaamwi Sansoni aatthenke vanceene, masi owo khaahiyale omurumeela Yehova. Owo aahiphavelasa eparakha yoopaka etthu Yehova aaphavela awe, eyo piiyo, owana ni afilisti. (Aph. 16:28-30) Sansoni aahimuxonttela Yehova oriki: “Kintthuna owunlela ikuhu aFilisti”. Mwa mwiiriirya Yehova aahaakhula nivekelo na Sansoni onvahaka ikuru sinceene. Okathi ole, Sansoni aahiwiiva afilisti anceene ovikana aawiivale awe okumi awe wootheene. Ekeekhai wiira mwaha wa soottheka sawe, Sansoni saahimphwanya mixankiho sinceene. Masi owo khaahiyale wiimananiha opaka itthu Yehova aaphavela awe. Etthu emosa-ru enniiraneya ni hiyo. Vakhala wiira noottheka, nnapirisari okhaliheriwa aahiiso nooyeleela eparakha naarina ahu, nihihiye omurumeela Yehova. Muhiliyale wiira Yehova khonikhala-khala oninyanyalaka. (Esal. 103:8, 9) Hata nitthekaka, nlelo nnoowerya onvarela muteko Yehova, ntoko Sansoni iirale awe. w23.09 6 itti. 15-16

Ovilela wanyu onimookhaliheryani weemereriwa ni Yehova. Masi khentaphulela wiira Yehova onnihakalala okathi munilupatthiwa anyu aahiiso sinoophwanyayani mixankiho. Owo onihakalala ni nyuwo mwaha wa ovilela wanyu. Ovilela wanyu onniwiirihani weemereriwa ni Muluku. Tthiri awo mareeliho oohakalaliha! (Esal. 5:12) Muhiliyale wiira Abrahamu aahivilela mixankiho soovirikana, eyo yaahimwiiriha olipiha waamini wawe nave Yehova aahimureeliha mwaha wa ovilela. Yehova aamuthokorerya ntoko naxariya ni mpatthani awe. (Maph. 15:6; aRom. 4:13, 22) Nave eyo pooti oniiraneela. Hiyo khanneemereriwa ni Muluku mwaha wa itthu ninwerya ahu opaka mmutthenkesoni aahiiso miritti sirina ahu, masi mwaha wa ovilela ni waamini wahu. Moohicikha iyaakha sahu, makhalelo ahu ni itthu ninwerya ahu opaka, ootheene ahu nihaana ovilela ni waamini. Niireke wookhala muxankiho munivilela anyu nenna-va? Akhala wiira ti siiso, mukupaliki wiira Yehova onnihakalala ni ovilela wanyu. Okathi ninsuwela ahu wiira Muluku onnineemererya, nlipelelo nahu ni sooleiherya sawe ninnitepa okhala noolipa. w23.12 11 itti. 13-14

Mukristau ohaana wiixutta olavula saana ni atthu akina. Munna onisuwela olavula saana ni atthu akina, onniwiriyana ni ephoole okathi anilavula aya ni onniiwexexa moonelo aya ni muupuwelo aya. (Mir. 20:5) Owo onoowerya osuwela moota anilavula aya, owehaka owiitho waya yaalavulaka ni itthu aniphavela aya ohimya. Munoowerya wiixutta itthu iyo sootheene nvirihaka okathi muri ene ni atthu akina. Vakhala wiira munooviriha okathi munceene nvaanelaka ni atthu awo, murumeelaka mensagem, aredes sociais aahiiso emeili, vanimoovilakani owaattamela wiira nvaanele. Mwiivaheke okathi wiira nvaanele muri ene hoothe. (2Yoh. 12) Mukristau orina waamini woolipa, onnikhapelela saana ni onisuwela waakhapelela amusi awe. (1Tim. 5:8) Ti vooloka osuwela ovara etthu enrowa wookhaliheryani muhoolo. (Mit. 18:2, 3; 20:34; aEef. 4:28) Mutthareke ntakiheryo na mutthu onivara muteko munceene ni apacerya onimaliha. Mwiira siiso, munoowerya ophwanya muteko ni ovara mahiku manceene. w23.12 27 itti. 12-13

Biibiliya aaromolaka nuulumo noowi, “nihiku na Yehova”, oniphavela ohimya okathi yoole Yehova onrowa awe waapwetexa awanani awe ni owoopola arumeyi awe. Ikwaha sikina, Yehova aahitoko opaka eyo khalai. (Yes. 13:1, 6; Ezek. 13:5; Sof. 1:8) Mahiku ahu ala, “nihiku na Yehova” ninrowa opacerya okathi ahooleli a ipoliitika anrowa aya ompwetexa Babilonia Muulupale, nave ninrowa omala okathi wa Armagedoni. Nto wiira noopowe, nihaana wiilokiherya nihinatthi ophiya “nihiku” nno. Yesu ooniixuttiha wiira, nihaana wiilokiherya ahinatthi “maxakha maalupale”. Nto eyo, entaphulela wiira khula okathi nihaana okhala “oolikana ene”. (Math. 24:21; Luka 12:40) Epaphelo yoopacerya Paulo aalepenle awe makristau a oTesaloonika, aahirumeela malikanyiho manceene yaakhaliherya wiilokiherya alipelelaka ophiya nihiku nuulupale na ophukela wa Yehova. Masi Paulo aanisuwela wiira nihiku na Yehova, khinaarowa ophiya okathi ene yoole. (2aTes. 2:1-3) Hata vari siiso, aahaatumererya makristau ale wiira yaahaana wiilokiheryaka hata nihiku nno nahaarowa ophiya okathi ene yoole. Nave hiyo, nihaana wiilokiherya nittharaka miruku iyo sa Paulo. w23.06 8 itti. 1-2

Wanikisa wa mwaakha wa 1970, yaahitekiwa epereetiyu aahiiso empa yoorakamela osulu elapo ya oTóquio, oJapão. Epereetiyu eyo yaarina antare 60, eyo piiyo, saahiilanyeriwa ipa 60. Okhala wiira epooma ele sinnikhumelela itetere sinceene, atthu yaaweha empa ele, yaaniikoha akhala wiira khiyaarowa omora. Masi khahiyo ti yeeyo yiiraneyale. Makristau anoolikana ni empa ele yoorakama. Xeeni ninhimya ahu siiso? Mukristau oohaana okhala oohittikinyeya ni oowiixaakuviha. Ohaana okhala oolipa ni oohittikinyeya, okathi onaakiherya awe aahiiso wiiwelela Malamulo a Yehova. Nave owo ohaana okhala ‘oowaakuva wiiwelela’ ni oheemererya etthu ekina emwiirihaka oturuka muupuwelo. Nave-tho, owo ohaana okhala ‘oowaathokorerya akina’ khula okathi vanreerela aya. (Yak. 3:17) Mukristau orina mikhalelo iya, khivanrowa omuxankiha okhalana mikhalelo sikina. w23.07 14 itti. 1-2

Yesu aanivilela sooweeha sa Satana Diabo, yoowo aaphavela wiira owo ohiye okhala oororomeleya wa Muluku. (Math. 4:1-11) Satana aanipaka sootheene aawerya awe, wiira omwiirihe Yesu ottheka ni ohiwerye owoopola apinaatamu. Okathi wa muteko awe woolaleerya valaponi, Yesu saahimphwanya mixankiho sikina. Owo aanilupatthiwa ni awanani awe ni yaaniphavelasa omwiiva. (Luka 4:28, 29; 13:31) Ohiya-vo, owo aahaana ovilela soovonya sa awiixutti awe. (Mar. 9:33, 34) Nave okathi aaphukeliwe awe, owo aahivilela ohasuliwa ni omaniwa. Wanikisa waya, owo aahiiviwa mwa enamuna yoowereya ni yoomoriha ikharari. (aHep. 12:1-3) Okathi aakhwa awe, owo aahaana ovilela mekhawe ohikhaliheriwaka ni Yehova. (Math. 27:46) Moohaanyiherya, Yesu khaareere ohaawa wiira ovahe okumi awe wa mureerelo ahu. Okathi nnuupuwelela ahu itthu sootheene Yesu onipakenle awe, eyo enniniiriha omphenta vanceene. w24.01 10-11 itti. 7-9

Opixa murima onninikhaliherya okhalana ompatthani wooloka ni atthu akina. Onninikhaliherya waawiriyana ni ephoole okathi atthu akina anilavula aya. (Yak. 1:19) Nave onninikhaliherya okhalana murettele naawo. Opixa murima onoonikhaliherya ohilavula etthu nihuupuwenle yeeyo yaarowa waawereya atthu akina. Nave khaninrowa opaka etthu ninanariwe ene. Vakhala wiira mutthu mukina onninyoonyiha ohiya omuttikiherya etthu yoohiloka oniirenle awe, nnoovilelaka, omulevelela “ni murima wotheene ikwaha sotheene”. (aKol. 3:12, 13) Opixa murima onoonikhaliherya opaka soothanla sooloka ohiya othanla opaka etthu naakuveyasaka. Nihaana oviriha okathi wiira nuupuwelele itthu sootheene ninreerela ahu opaka. Niira siiso, nnoowerya opaka yoothanla yooloka. Mwa ntakiheryo, vakhala wiira nimphavelasa muteko, hiyo pooti weemererya muteko woopacerya nimphwanya ahu. Masi nakhala oopixa murima nnimwaavya okathi wiira nuupuwelele akhala wiira nnookhalanaka okathi woovirihaka ni emusi ahu ni moota onrowa aya okhala ompatthani ahu ni Yehova. Opixa murima onninikhaliherya opaka soothanla sooloka. w23.08 22 itti. 8-9

Vaakhala wiira nyuwo munninyoonyiheya mwaha wa soovonya sanyu mmuupuweleke natiri mummanenle anyu Yehova, eyo enimookhaliheryani ovilela okathi sinoophwanyaayani mixankiho. Moota xeeni? Okathi muniivahererya anyu wa Yehova, muniikhootta mmansinyu. Nto eyo enitaphulela wiira, munrowa okhoottaka khula etthu Yehova oninyokha awe. (Math. 16:24) Vaavo sinoophwanyaayani mixankiho, khamunrowa oviriha okathi munceene muupuwelelaka etthu yoopaka. Okhala wiira munrowa wiiraka musuwenle ene etthu yoopaka, eyo piiyo, ohihiya omuroromela Yehova. Mwapaka eyo, khamunrowa ohiya omuhakalaliha Yehova. Nave munrowa olikanaka ni Yoobi. Hata okathi yoole samphwanya aya mixankiho, owo aahimmye so: “Mpakha okhwa waka, nkinihiya okhala oororomeleya!” — Yoobi 27:5.w24.03 9 itti. 6-7

Yehova “Muluku oophenta” ori ni hiyo! (2aKor. 13:11) Nto owo onnimuthokorerya khula mmosa a hiyo. Ninnikupali wiira ale animuroromela Muluku anooreeriwa ni ‘ophenta wawe’. (Esal. 32:10) Vaavo nnuupuwelela ahu moota onooniherya awe ophenta wawe, nnimoonaka wiira owo Muluku a ekeekhai ni nnootepaka omwaattamela. Hiyo pooti omwaattamela ninvekelaka nimuleelaka wiira ninipirisari niphento nawe okathi wootheene. Nihaana omuleela itthu sootheene sinnixankiha, nikupaliki wiira owo onniniwiriyana ni onimphavela onikhaliherya. (Esal. 145:19) Ntoko siisaale onnisivela aya woora mooro okathi wooriirya, mwa enamuna emosa-ru, nihaana osiveliwaka ni ophenta weekeekhai wa Yehova. Ophenta wa Yehova ti wuulupale nave owo onikhala mahiku ootheene. Tivonto, muttotteleke mureerelo ophenta wa Yehova mweekumi mwanyu okhuma nenna-va. Nto mwaha wa ophenta wa Yehova ootheene ahu nihaana ohimya wiira “miyo kinnaphenta Apwiya”! — Esal. 116:1. w24.01 31 itti. 19-20

Ohiya paahi waaleela atthu wiira nsina na Muluku Yehova, Yesu aahipaka-tho itthu sikina. Ayuda, yaawo yaavaanela ni Yesu, yaanisuwela nsina na Muluku, masi Yesu taapacenrye ‘waasuweliha’ mikhalelo sa Tiithi awe. (Yoh. 1:17, 18) Mwa ntakiheryo, soolempwa sa eHeeberi, sinihimya wiira Yehova toomoriwa ikharari ni ooreera murima. (Okhu. 34:5-7) Yesu aahitthokiherya eyo, ovahaka ntakiheryo na mwaana aakhumme vate wa paapa awe. Vaavo ninsoma ahu nlikanyiho na paapa oninweha mwanawe ori ene ottaiwene, onatthimaka orowaka omukhupaarela ni omulevelela ni murima wootheene, niri eliivuru ya Luka, ninniwerya osuwela oratteene omoriwa ikharari ni oreera murima wa Yehova. (Luka 15:11-32) Yesu oonisuweliha moota Yehova ori awe. w24.02 10 itti. 8-9

Yehova onninoonela othunku ni onilipiha okathi sinniphwanya aya mixankiho. Ninrowa omutakiha sai Yehova niwoonelaka othunku ni waalipiha atthu akina? Enamuna emosa nikhanle ahu oopaka eyo, ori okhalana mikhalelo sinrowa waalipiha atthu akina. Mikhalelo xeeni iyo? Exeeni enrowa onikhaliherya ophentana ni ohihiya ‘olipihana mukina ni mukhwaawe’? (1aTes. 4:18) Etthu enrowa onikhaliherya, ori okhalana mikhalelo ntoko omoriwa ikharari, oreera murima ni omaala. (aKol. 3:12; 1Ped. 3:8) Masi mikhalelo iyo sinrowa onikhaliherya sai? Okathi nnaamorela ahu ikharari anna ni arokora ni waathokorerya, eyo enooniiriha waalipiha okathi sinaaphwanya aya mixankiho. Yesu aahimmye so: “Eyano enilavula itthu sisareyale vamurimani. Mutthu ooreera murima, onnilavula itthu sooreera”. (Math. 12:34, 35) Waalipiha anna ni arokora sinaaphwanya mixankiho, enamuna emosa enooniherya wiira ninnaaphenta. w23.11 10 itti. 10-11

Wiira niwerye wiiwexexa iprofesia sa mbiibiliyani, nihaana okhaliheriwa. Mwa ntakiheryo, nkuupuwelani muri ene ni mpatthani anyu murowaka opuro muhitonko anyu ophiya. Masi mpatthani anyu owo, onnisuwela saana opuro owo ni onnisuwela ephiro mukhanle anyu oovira. Moohaanyiherya okhalana mpatthani siiso aamookhaliheryani vanceene. Yehova ori ntoko mpatthani owo maana onnisuwela opuro niri ahu moovarihana ni Biibiliya ni itthu sinrowa wiiraneya muhoolo. Nto naaphavelaka wiiwexexa iprofesia sa mbiibiliyani nihaana wiiyeviha ni onvekela Yehova wiira onikhaliherye. (Dan. 2:28; 2Ped. 1:19, 20) Ntoko anamuyari aniphavela mureerelo wa anaaya, Yehova oniphavela wiira apinaatamu akhalane murettele muhoolo. (Yer. 29:11) Masi moovirikana ni anamuyari, Yehova pooti onihimeerya itthu sinrowa wiiraneya muhoolo ni khula okathi owo onihimya itthu seekeekhai. Ti nthowa naya owo orumme awe olempwa iprofesia iyo mbiibiliyani, wiira niweryeke osuwela itthu sinrowa wiiraneya muhoolo. — Yes. 46:10. w23.08 8 itti. 3-4