Mwaakhaliherye Akina Omurumeela Yehova ni Osuwela Waya Wotheene
“Kinowixuttihani, kinimokhapelelani”.—ESAL. 32:8.
MUNROWA WAAKHULA SAI?
Malikanyiho xeeni a mBiibiliyani anooniherya wira Yehova onniphavelasa woona makhalelo ooloka a arumeyi awe?
Xeeni vanitthuneya ahu omananiha oweha makhalelo ooloka arinaaya atthu akina?
Munrowa waakhaliherya sai amiravo ni ale aniinaano mmulokoni wira amurumeeleke Yehova moomalela?
1, 2. Yehova oniwoonela sai arummwa awe ari valaponi?
OKATHI anamuyari aniwoona aya anaaya athweelaka, ikwaha sinceene annitikinihiwa woona moota anamwane awo, sinaakuva aya wiixutta opaka itthu. Niireke mootoko woona etthu ntoko eyo? Mwaana mmosa pooti oweryaka owiira axoogu anceene, masi anamwane akhwaawe akina khuhiyawerya opaka itthu sinceene. Masi voohicikha etthu sa ele khula mwaana eniwerya awe, anamuyari vannaasivela woona etthu ti etthu anaaya eniwerya aya opaka.
2 Yehova nave onnisiveliwa waaweha anaawe ari valaponi. Owo onniwoona arumeyi awe a mahiku ala ntoko “mihakhu” sa maloko otheene. (Hag. 2:7) Awo annihimmwa okhala mihakhu mwaha wa nroromelo ni wiivahererya waya wa Yehova. Owehasa wene, nyuwo muhoona wira eriyari ya Anamoona a Yehova olelo-va, aakhala atthu anisuwela opaka itthu soovirikana. Anna akina toosuwela olavula myaha mmulokoni, akina toosuwela otthokiha itthu. Arokora anceene vannaakhweela wiixutta mattaava a ilapo sikina, wira arumeeleke okathi woolaleerya, masi akina annivaha ntakiheryo nooreera vaavo vanaakhaliherya aya ni waalipiha ale aniwereiwa. (aRom. 16:1, 12) Niireke hiyo khivannisivela okhala eriyari ya anna moota ola mmulokoni?
3. Makoho xeeni anirowa waakhuliwa muru ola?
3 Hata vari siiso, anna akina, amiravo, wala ale abatiziwe naanano, owehasa wene nlelo khaphwannye opuro aya mmulokoni. Nto ninrowa waakhaliherya sai anna ala omurumeela Yehova ni osuwela waya wotheene? Xeeni vanitthuneya ahu woona ele erina aya yooloka, ntoko Yehova siniwoonela awe?
YEHOVA ONNOONA ITTHU SOOREERA MWA ARUMEYI AWE
4, 5. Moota xeeni yoohimmwa ya Makhulupale 6:11-16 enooniherya aya wira Yehova onnoona itthu arumeyi awe aniwerya aya opaka?
4 Soohimmwa sinceene sa mBiibiliyani sinnooniherya wira Yehova khahiyo paahi oniphavela ele eri yooloka wa arumeyi awe, masi tho onniweha itthu sotheene siniwerya aya opaka. Mwa ntakiheryo, vaavo Gedeyoni aathanliwe awe wira owoopole atthu a Muluku yaahaaxiwa ni atthu a oMadiyani, owo aahitikinihiwa vaavo aakhomasiwe awe ni nlaikha wira: “Nyuwo mwá mulopwana òlipa murima ni òwerya, Apwiya ari ni nyuwo”. Eyo ennooniherya oratteene wira wookhala okathi Gedeyoni ahaarina awe “owerya”. Owo khairoromela ni aixoona ohiphwanelela. Masi vaavo aavaanela awe ni Yehova, vannooneya wira owo aanimoona ophwanelela ovikana wa moota Gedeyoni aixoonela awe.—Musome Makhulupale 6:11-16.
5 Yehova aahinvaha Gedeyoni muteko wowoopola aIsarayeli okhala wira Owo aahoona wira Gedeyoni anwerya. Okathi ole, nlaikha na Yehova, naahoona moota Gedeyoni eepettha awe etrigu ni ikuru sawe sotheene. Yookhala-tho etthu ekina yaavanre murima nlaikha nle. Okathi ole, atthu yeepettha etrigu nipuro nookokola wira arumeeleke epheyo okathi wooveera wira iphepu saakuveke ovava. Masi Gedeyoni eephetta etrigo wiiphiini wira ohooniwe ni atthu oMadiyani. Nto eyo yaahooniherya wira owo aari mutthu a miruku! Nto khivanitikiniha woona wira Yehova aamoona Gedeyoni okhala mulimi a nthiti masi aari mulopwana a miruku. Tthiri Yehova ahoona osuwela ni owerya wa Gedeyoni nto khumuthanla wira onvarele muteko awe.
6, 7. (a) Moota xeeni moonelo wa Yehova voohimya sa profeta Amosi waavirikanne awe ni ole wa aIsarayeli? (b) Exeeni yoonihenrye wira Amosi aari mutthu aasuwela itthu sinceene?
6 Vamosaru, hiyo ninnoona ntakiheryo na profeta Amosi wira Yehova onniweha tthiri itthu arumeyi awe anisuwela aya, pooti okhala yaale anooniwa ohikhalana efaita wala ohisuwela etthu. Amosi onniihimya okhala makampusi a inama ni namattottela a ifigu, seiyo saalyiwa ni atthu oothoiwa. Vaavale Yehova amuthanlale awe Amosi wira awuulumele aIsarayeli a maloko 10 yaari oomwareya, atthu akina owehasa wene yaanuupuwela wira Yehova khamuthanlale mutthu oophwanelela.—Mmusome Amosi 7:14, 15.
7 Nnaamwi Amosi aari mutthu aakhuma muttetthe mwaamukhaani wa alimi, aanisuwela malamulo ni soolimalela sa okathi awe, eyo ennooniherya wira owo aari mutthu oosuwela itthu. Owo-tho aanisuwela makhalelo a wIsarayeli ni aanisuwela maloko yaakhala vakhiviru mwaha wa mikwaha sawe sa nakoso mapuro awo. (Am. 1:6, 9, 11, 13; 2:8; 6:4-6) Nave asomi anceene olelo-va annimuhimya Amosi okhala mutthu aasuwela saana olepa. Profeta ola ohiya osuwela othanla masu oowerya, masi aahirumeela saana ni osuwela ilepeliwo saya sooreerela. Mweekeekhai, omwaakhula wawe moolipa murima mulipa a mukuttho ootakhala Amasiya, waahooniherya wira Yehova aahimuthanla mutthu ookhalela aarina owerya ni osuwela weiwo waaniwa wira owo khaarina wanipacerya.—Am. 7:12, 13, 16, 17.
8. (a) Nlipiheryo xeeni Yehova anvanhe awe Davidi? (b) Xeeni masu a Esalimo 32:8 anaaroromeliha aya ale okathi mukina ahiniiroromela yoonaka wira khanisuwela etthu?
8 Tthiri, Yehova onnoona itthu arumeyi awe anisuwela aya. Owo aahimuleiherya Mwene Davidi wira khula okathi aarowa omulakiherya ni ‘omuthonyerya ephiro yorera’. (Musome Esalimo 32:8.) Nyuwo munnoona ovareleya waya muteko masu awo? Hata hiyo okathi mukina nooniheryaka ohiiroromela, Yehova onoonikhaliherya opaka itthu ovikana vaniwerya ahu, mpakha owerya opaka itthu sahaatonko ahu wuupuwela wira naanwerya khalai. Ntoko siisaale mutthu oniwiixuttiha atthu owela myaako onaawehexexa awe oratteene ale aniwiixuttiha awe wira aakaphuleke yaamoraka, Yehova onnisiveliwa onilakiherya wira ninnuwe momunepani. Yehova pooti waaruma anna wira anikhaliherye ovara itthu moovarihana ni osuwela wahu wotheene. Moota xeeni?
MPHAVELEKE WOONA ETTHU YOOLOKA ERINA AYA AKINA
9. Ninrowa ovarihela sai muteko yootumererya ya Paulo yoowi ‘khula mutthu awoneleke vatthu akhw’awe’?
9 Paulo ahaatumererya maKristau wira ‘khula mutthu awonelake vatthu akhw’awe’. (Mmusome aFilipi 2:3, 4.) Masu awo a Paulo aniphavela ohimya wira hiyo nihaana ovaha efaita itthu atthu akina anisuwela aya. Hiyo nnoonela sai vaavo atthu akina anivaha aya efaita munnuwelo ahu wa omunepani? Okhala wene, eyo ennintumererya ovikaniha wiimananiha wira nipakeke itthu sooloka ovikana khalai. Vamosa-ru, vaavo vanivaha ahu efaita okhumela saana wa akina, ninnaakhaliherya awo okhumela saana ni wunnuwa momunepani.
10. Ti pani onitthuneya okhapeleliwa saana mmulokoni?
10 Ti pani onitthuneya okhapeleliwa saana? Khula mmosa a hiyo onnitthuneya okhapeleliwa saana. Aatepexa amiravo ni ale abatiziwe naanano annitthuneya okhaliheriwa okhalela nthiti miteko sa mmulokoni. Eyo enimwaakhaliherya awo woona wira aakhalana opuro eriyari ya annaya. Masi nakhootta owooniherya anna awo wira aakhalana efaita, nto animoonaka wira khaniphwanelela ovahiwa miritti mmulokoni ntoko Nuulumo na Muluku nintumererya aya.—1 Tim. 3:1.
11. (a) Moota xeeni mutokweene mmosa aamukhalihenrye awe mmiravo oxintta wuuliwa wawe muru? (b) Muniixutta exeeni voohimya sa yowiiraneya ya Julieni?
11 Mutokweene mmosa oniireliwa Ludovic, yoowo aakhaliheriwe okathi aaryaawe mmiravo onihimya so: “Vaavo vaninvaha aka efaita munna mmosa, owo onnirowa ohoolo mowaakuveya”. Voohimya sa mmiravo mmosa oniireliwa Julien, yoowo aari oowuuliwa muru, Ludovic onnihimya so: “Okhala wira Julieni okathi mukina aanipaka itthu moowoovelela nto aakhala ntoko aarina mweettelo woohiloka. Masi kaahoona wira owo aari mutthu oreera murima ni aaniphavela waakhaliherya atthu akina mmulokoni. Tivonto, ohiya owehexexa makhalelo ale yaari oohiloka, miyo kaaniweha makhalelo ooloka yaarina awe ni omananiha omukhaliherya”. Nuuvira okathi Julieni aahikhala murummwa oorumeela, vano onirumeela ntoko pioneero ookilaatheya mmulokoni.
MWAAKHALIHERYE ORUMEELA OSUWELA WAYA WOTHEENE
12. Mukhalelo xeeni onitthuneya ahu okhalana wira naakhaliherye akina omurumeela Yehova moomalela? Nvahe ntakiheryo.
12 Wira niwerye waakhaliherya akina orumeela osuwela waya wotheene, nihaana okhala a miruku. Ntoko sihimmwale aya ni yowiiraneya ya Julieni, hiyo nihaana owehaka makhalelo ooloka a mutthu owo ni khiyaimananiha omukhaliherya olokiherya makhalelo makina awo. Eyo enoolikana ni enamuna Yesu aamoonela awe murummwa Pedru. Nnaamwi Pedru ikwaha sikina aaniherya ohilipa-lipa, Yesu aahihimya wira owo aarowa okhala oolipa ntoko mwala.—Yoh. 1:42.
13, 14. (a) Moota xeeni Baarnaba oonihenrye awe okhalana miruku voohimya sa Marko? (b) Moota xeeni mmiravo mmosa aakhaliheriwe awe ntoko saakhaliheriwa awe Marko? (Nwehe elatarato yoopacerya.)
13 Baarnaba aahikhalana mukhalelo owo voohimya sa Yohani yoowo iireliwa-tho Marko ni ntaava na oRoma. (Mit. 12:25) Okathi Paulo aapaka awe mukwaha awe woopacerya wa omisionaario ni Baarnaba, Marko aari “namakhaliherya”, owehasa wene aakhaliherya miteko sa werutthuni. Masi, vaaphiyale aya oPanfilia, Marko aahaahiya apatthani awe. Awo yaahivikaniha weetta arowaka moono onikhuma nsuwa weiwo waasuwelexiwe waata alavilavi. (Mit. 13:5, 13) Muhoolo mwaya, Baarnaba osuwelaka wira Marko tiyoole ahaaroromeleya, aahimukuxa wira amwiixuttihe. (Mir. 15:37-39) Eyo yaahimukhaliherya mmiravo Marko okhala murumeyi ookhoomala a Yehova. Muhoolo mwaya, Marko aari ni Paulo okathi aatthukiwe awe oRoma, ni owo vamosa ni Paulo yaahaaroihela makhomaso anna a muloko wa oKolosi, ni Paulo annimulavula mookhalela Marko. (aKol. 4:10) Nkahaya muupuwele ohakalala waarina awe Baarnaba okathi yoole Paulo aavekenle awe wira aroiheliwe Marko amukhaliheryeke.—2 Tim. 4:11.
14 Alexandre yoowo othanliwe naanano okhala mutokweene, onnuupuwela moota aakhaliheriwe awe ni munna mmosa mwa miruku oriki: “Okathi karyaaka mmiravo, vaanikivila opaka nivekelo atthu anceene akiiwaka. Mutokweene mmosa aahikikhaliherya wiilokiherya ni okhala omaaleeleya. Ohiya ohikivaha-tho nivekelo owo aanikithanla ikwaha sinceene wira kipake nivekelo okathi woorowa olaleerya. Nuuvira okathi kaahilimalela opaka mavekelo vaatthuni”.
15. Moota xeeni Paulo oonihenrye awe waattottopela annawe?
15 Vaavo vanoona ahu mukhalelo wooloka wa muKristau mukhwiihu, niireke hiyo ninnimuleela wira mukhalelo owo onninisivela? Va aRoma ekapitulu 16, murummwa Paulo aahaattottopela maKristau 20 yaawo yaarina mikhalelo sooloka saamusivela. (aRom. 16:3-7, 13) Mwa ntakiheryo, Paulo aahihimya wira Androniko ni Junia, yaanimurumeela Yehova okhuma khalai, ni aahittittimiherya ovilela waya. Paulo aahimuromola-tho mooreerela maamawe Rufo, yoowo aamukhapelenle oratteene Paulo owo.
16. Mureerelo xeeni waakhumelenle mwaha woottottopeliwa mmiravo mmosa?
16 Vaavo vanaattottopela ahu mooreerela atthu akina, sinnikhumelela mireerelo sinceene. Muthokorerye yowiiraneya ya mmiravo mmosa a oFrança oniireliwa Rico, yoowo aakhulumunwe mwaha woowi apapawe yahaakhanle namoona, yaahimukhoottiherya obatiziwa. Nto Rico uupuwela wira aahaana owehererya wunnuwa vaneemereriwe awe opaka soothanla sawe ni nlamulo wira omurumeeleke Yehova. Owo aahiriipiwa murima mwaha wa otheiwa oxikola. Frédéric, mutokweene mmosa yoowo aamusomiha Biibiliya mmiravo ole, onihimya so: “Kaahimuttottopela Rico, kimuhimeeryaka wira olupatthiwa iwo waakhumelenle mwaha woowi aari oolipa murima ni oororomeleya”. Masu ala oottottopela yaahimulipiha Rico, ni aahivarexexa yoothanla awe ya omurumeela Yehova ni eyo yaahimukhaliherya okhala oowiiwanana ni apapawe. Wuukiseryani waya, Rico aahibatiziwa orineene iyaakha 12.
17. (a) Ninrowa waakhaliherya sai annihu orowa ohoolo? (b) Mukhalelo xeeni misionaario mmosa owoonihenrye awe amiravo, nto exeeni ekhumelenle mwa wa eyo?
17 Khula okathi nimmuxukhurela ahu munna opanke mwaha wooloka, wala etthu ekina eninvuwiha Yehova, hiyo ninnaalipiha annihu, wira amurumeeleke Yehova ni murima wotheene. Silvia, a yoowo aarumeela eBetheli ya oFrança mwa iyaakha sinceene, aahihimya wira arokora pooti waattottopela anna. Owo aahoona wira athiyana pooti woona wiimananiha wa anna. Tivonto, “ottottopela waya onimmunnuuherya ottottopela wa anna akina”. Owo onnihimya-tho so: “Kinoona wira waattottopela anna etthu yooreera”. (Mir. 3:27) Jérôme misionaario mmosa a oGuiana Francesa, ohaakhaliherya amiravo anceene okela muteko wa omisionaario. Owo onihimya so: “Kihoona wira waaxukhurela anna mu iponto seiye sinikhumela aya saana okathi woolaleerya, onivaha aya ekomentaario yoolokiheriwa saana, onniwiiriha wiixoona okhala oophwanelela. Nto eyo enniwiiriha anna awo otepa orowa ohoolo”.
18. Xeeni ovara muteko ni amiravo onikumiherya aya mireerelo?
18 Hiyo pooti waalipiha annihu vaavo vanivara ahu muteko hoothe. Mutokweene pooti onvekela mmiravo orina ni onisuwela omurumeela komputadore wira wimpirimiri va jw.org myaha sootthuneya sinirowa waalipiha anna owunnuwela ahirina komputadore. Akhala wira nyuwo munirowa ovara muteko woolokiherya Empa ya Omwene, xeeni ohimulattulaka mmiravo wira mwavare muteko owo hoothe? Wira siiso onimookhaliheryani owoona amiravo ivarelo saya miteko ni waattottopela wira aroweke vahoolo.—Mir. 15:23.
NVAREKE MUTEKO MUUPUWELAKA MUHOOLO
19, 20. Xeeni vanitthuneya ahu waakhaliherya atthu akina orowa vahoolo?
19 Okathi Yehova aamuthanlale awe Yoxuwa Owo aahimuruma Moise wira “amulipihe murima” Yoxuwa owo. (Mmusome Otumererya 3:28.) Khula mwaakha atthu anceene annikela mmulokoni wa eKristau olumwenku wotheene. MaKristau otheene okhoomala, ohiya axitokweene paahi ahaana waakhaliheryaka amiravo ni ale aniinaano mmulokoni wira amurumeele Yehova ni osuwela waya wotheene. Wira siiso nnimwaakhaliherya anceene okela muteko wa okathi wotheene ni akina “anosuwela owixuttiha atthu akina-tho”.—2 Tim. 2:2.
20 Hata nyuwo murumeelaka muloko muulupale ni woolipa wala ekrupu yaamukhaani ehanle okhala muloko, mwiimananihe ovara muteko muupuwelaka muhoolo. Esiiri ya owerya eyo omutakiha Yehova, yoowo oniphavela woona ele eri yooloka wa arumeyi awe.
[Enoota]
a Masina aaturukiwa.